عشق الأدهم

البارت الثالث ?

عند محمد. ولورا

وصلوا الاتنين عند بيت لورا وقف محمد العربيه ولف بصلها وهو مبتسم وماسك اديها بصتله بهيام وبصوت رقيق قالتله

:ها ياحبيبي هاتيجي تكلم بابا امتي!!

محمد لسه على ابتسمته وهو باصص لعنيها زى المسحور رد عليها .

:- اول مااخلص موضوع مراتي تاني يوم هكون عند والدك بطلب ايدك ياقلبى .

مسك ايدها باسها لورا بصتله بغيظ وهى بتسحب اديها

:طيب لما اشوف اخرتها معاك كنت شايل هم هتقولها ازاي اهي عرفت لوحدها وطلبت الطلاق من نفسها من لف ودوان يبقي فاضل ايه خلص بقي بكره علي طول انا تعبت من الانتظار بقالنا سنه مستنين اليوم ده .

محمد مسك اديها تانى وابتسم بحب

:خلاص ياعمري بكره هخلص كل حاجه وبعد بكره هكون خاطبك انتي تامري انا مقدرش اعيش من غيرك

ضحكت لورا وهى بتميل عليه بدلع

: طيب سلام بقي ابقي كلمني لما تروح

محمد باس اديها وهى بعدت

:حاضر ياحبيبتي سلام

مشي بعربيته بعد ماهي طلعت وصل البيت واول مادخل كان فاكر ان همس موجوده وهتقولوا دى شقتى وشقه عيالى وتعملها خناقه بس ملقاش حد في البيت رمي مفاتيحه و قعد علي اول كرسي قا**ه وقال في نفسه

:- عمرى ماكنت اتوقع ان اسمع الكلام ده من همس انا اه كنت عارف انها مابتحبنيش وان جوزنا كان جواز عادى بس مش عارف ليه قلبى وجعنى .ياتري الي انا عملته غلط ولا صح انا بحب لورا ومش قادر اكمل مع همس الحياه الى اتجبرت عليها !! طيب وعيالي ؟؟ انا مبقتش عارف .. هو ليه انا مش فرحان المفروض افرح ان خلاص هتجوز الي بحبها صح مش مهم اى حاجه تانيه انا عايز اعيش حياه تانيه حياه فيها حب ودلع ولورا هدلعني اخر دلع

واقنع نفسه ان هو صح ونسى انه ظلم انسانه بريئه عمرها ماجرحته ومافكرش ان الدنيا داين تدان وان من ظلم يظلم ولو بعد حين .

_____________

تانى يوم عند همس اتصلت باختها وهى منهاره من جواها بس بتحاول تتماسك

همس بصوت تعبان : الو ايوا ياحنين عاملين ايه

حنين ردت باستغراب :الحمد لله مالك ياهمس صوتك تعبان كده ليه انتى كويسه

همس بعياط وقهره :لا مش كويسه ياحنين فارس فين

حنين بلهفه وخوف على اختها :فارس نزل الشغل مالك ياحبيبتى فيكى ايه العيال كويسين

همس: اه كويسين الحمد لله

حنين بقلة صبر :طيب ريحينى وقوليلى مالك بس

همس اتن*د بقهره وردت عليها

:انا هطلق ياحنين

حنين بصدمه:ايه ! طلاق ! ليه ايه الى حصل احكيلى ياهمس

همس حكتلها كل حاجه واختها كانت بتسمع وهى مزهوله

ردت عليها حنين بغيظ :بتقولى ايه يا همس بقى سبها تبجح فيكى ومنطقش ولا دافع عنك بكلمه

همس بعياط:ولا حتى قدر يتنفس قدمها

حنين بغيظ اكتر : الواطى قليل الاصل منه لله عموما ياحبيبتى هدى نفسك وانا هكلم فارس وهنجيلك مش هتاخر عليكى

قفلت معاها حنين وكانت منه واقفه جنبها

بصتلها منه بقلق: خالتوا مالها ياماما

حنين وهى مسهمه :خالتك هتطلق يامنه

شهقت منه بصدمه :ايه ليه ياماما ايه الى حصل

حنين :هقولك بس استنى اما اكلم ابوكى الاول

اتصلت على فارس وحكتله الى حصل ومنه جنبها سمعاها وعيونها مبرقه من الى سمعته

(( حنين اخت همس الكبيره اتجوزت فارس بعد قصه حب ايام الكليه وربنا مارزقهمش غير ببنتهم الوحيده منه الي بتعتبر خالتها هى امها التانيه وروحهم في بعض ))

بعد حوالى ساعه وصلت حنين لبيت مامتها ودخلت لهمس واول ماشفتها خدتها في حضنها ورجعت همس لدموعها تاني .

طبطبت حنين على همس وقلبها وجعها عليها

:كده ياهمس ماتكلمنيش تقوليلي وابقي معاكي غير انهارده

بعدت عنها همس ودموعها زادت :معلش ياحنين مكنتش عارفه اعمل ايه كان لازم اوجه بس انا مش زعلانه عليه انتى عارفه اني مكنتش بحبه انا زعلانه علي الست سنين الي ضاعوا مني معاه وتبقى دى اخرتى .

حنين ردت بضيق من محمد :ولا يهمك انتي لسه صغيره محدش عارف بكره في ايه.

ردت عليها همس بحزم :هيكون في ايه ياحنين خلاص انا هربي عيالي وهعيش علشانهم بس

حنين :مش وقت الكلام في بكره المهم فارس اتصل بيه وقاله هيجي علي الساعه 7 علشان نشوف هنعمل ايه .

همس ردت بعصبيه :مافيش غير الطلاق الي هيتعمل هو اصلا كان كده كده هيطلقني ده الكلام الي الهانم الجديده قالتهولى

حنين بغل :الواطي سابها تبجح فيكى خطافة الرجاله و بعد مااستحملتي معاه كل ده والعيشه الي يادوب علي القد اول ماربنا رزقه ويكبر يعمل كده هقول ايه منه لله

(محمد كان ماسك اداره معرض عربيات ومع الوقت فتح معرض خاص بيه واخد توكيل كذا نوع عربيه )

همس :المهم كلمي فارس وعارفيه كل حاجه وقوليلوا ان انا مش عايزه منه حاجه غير الطلاق

حنين:يعني ايه الكلام ده انتي هتسيبي حقك وحق عيالك لا ياهمس دا لازم يجبلك كل حقوقك

همس:ياحنين انتي عارفه اني مبحبش المشاكل انا عايزه اخلص وافوق لعيالي

حنين بغضب من اختها :لا ياهمس كفايه سلبيتك دى هى الى وصلتك لكده طول عمري اقولك خدى موقف معاه فى اى مشكله وانتي تقوليلي لا انا كده كويسه انا مبحبش المشاكل وادى النتيجه حقك هجبهولك وهندمه علي الي عملوا معاكى وده اخر كلام

وسابتها وطلعت تكلم فارس قعدت همس وهي مش عارفه هي صحيح كانت غلط علشان كانت عايزه تعيش من غير مشاكل

عند حنين وهى بتكلم فارس :لا يافارس المرادى مش هسمع كلامها كل حقوقها هتخدها منه ورجله فوق رقبته

فارس : اهدي ياحنين طيب مايمكن نعرف نصلحهم علي بعض

حنين :نصالح مين يافارس بقولك كده كده كان هيطلاقها تقولي نصالحهم خلاص يافارس كفايه كده عليها همس تعبت كل السنين الي فاتوا وهى مستحملاه وياريت عجبه دا كمان الزباله الى كانت معاه بتبجح فيها وهو قعد زى قلته يطلاقها وبكره ربنا يعوضها ويفرحها انشاء الله

فارس:ماشي ياحنين الي تشفوه انا اصلا جاي علشان هو علي وصول

حنين :طيب سلام

فارس:سلام ياحبيبتي

قفلت معاه ودخلت لهمس لقتها اخده عيالها فى حضنها وسرحانه ودموعها نزله بصت لهناء وراحت قعدت جنب همس

حنين :همس ياحبيبتى انا مش عايزه اشوف دموعك دى تانى علشان خاطرى

همس بصتلها:انا مش زعلانه صدقينى ياحنين كل الحكايه ان تعبانه شويه ونفسى ارتاح

هناء بدموع:ربنا يريح قلبك ياقلب امك ويعوضك خير

همس قامت راحت لمامتها :ياماما ياحبيبتى بالله عليكى ماتعملى فى نفسك كده انا والله كويسه قوى علشان خاطرى متعيطيش

هناء: حاضر ياحبيبتى حاضر المهم هتعملى ايه لما يجى

همس:انا مش عايزه اشوف وشه هفضل جوه مع العيال لحد لما يمشى

حنين : طيب وحقوقك مش هتكلمى معاه فيها

همس :ياحنين علشان خاطرى انا مش عايزه منه حاجه

هناء وهى بتبص لحنين علشان تسكت:خلاص ياهمس الى تشوفيه

_____________________

عند محمد لورا بتكلمه فون

_____

محمد :ايوه ياحبيبتى انا خلاص وصلت

لورا : فهمت هتعمل ايه اتفاوض معاهم علي قد ماتقدر وحقوقها تخسف بيهم الارض يعني لو ليها الف تخليهم ميه سامعني احنا محتاجين كل قرش علشان نتجوز

محمد:خلاص ياحبيبتي فهمت وبعدين هى ملهاش غير ماخرها ونفقت عيالي واذا كان علي الشقه تاخدها تع

قاطعته لورا بصوت عالى

:شقه ايه دي الي تاخدها انت اتجننت لا طبعا تروح تعيش عند امها هي مش امها عايشه لوحدها

محمد:اه عايشه لوحدها بس علشان العيال مايسبوش بيتهم وانا هجبلك احسن منها

لورا بعصبيبه :بقولك ايه مافيش شقق هتتساب وبعدين احنا هنبعها علشان نجيب شقه اكبر سامعنى ياانا ياالشقه

رد محمد عليها بسرعه :خلاص الي انتي عايزاه هعمله

لورا ببسمه :ايوا كده ياحبيبي انا خايفه علي مصلحتك

وبعدين مانا بكره اجبلك عيال وهيبقوا محتاجين كل قرش معاك

ابتسم محمد وبكل سلبيه رد عليها

:معاكي حق ياقلبي خلاص انا هقفل دلوقت ولما اخلص معاهم هكلمك

لورا:ماشي ياعمري سلام

قفلت معاه وهي بتفكر في الى ناويه تعمله _________________

في بيت همس وصل محمد وكان مستنيه فارس وهناء وحنين وكانت همس في اوضه عيالها مش عايزه تطلع مش طايقه تشوفه

دخل محمد واول ما هناء شافته بصتله بصه عتاب واقهره على بنتها

بص في الارض لان من جواه عارف انه طلع واطي اتكلم فارس

: عمري ماتوقعت ان انت تعمل كده مع همس يامحمد بعد مااستحملت معاك كل السنين دى بس هاقول ايه الاصل بيبان مع العشره

بصله محمد واتعصب عليه :اصدق ايه يافارس اني قليل الاصل

فارس رد عليه بتريقه

:ماشاء الله مانت نبيه اهو

محمد حب يشل احساسه انه فعلا قليل : مش يمكن هى الى وصلتنى لكده بعدم اهتمامها بيا على طول مش فاضيه غير لعيلها وبس

حنين اتغاظت منه ومن بجاحته

:وهما عيالها لوحدها يعنى وبعدين همس عمرها ماكانت مهمله فيك دى لحد لبسك بتحضره فين الاهمال ده

بصتله هناء بعتاب :وهى يعنى حتى لو اهملتك شويه تروح تحب غيرها وكمان تتجوز سبحان الله على الزمن الى احنا فين

فارس :انت متستهلش واحده زى همس فعلا كفايه عليك واحده تخدك علشان فلوسك وبكره تندم وهفكرك

في اللحظه دى خرجت همس وقاطعة فارس

همس: فارس لوسمحت مالوش لازمه الكلام ده كل واحد عارف نفسه كويس محمد انا طلبت الطلاق ومش عايزه غيره

حنين بعصبيه :وكل حقوقها تجبهلها والشقه كمان

محمد :لا معلش دي شقتي من تعبي وشقايا اسبهلها ليه انشاء الله

همس بصدمه :وانا اصلا مش عايزها ولا عايزه حاجه تفكرني بيك

حنين:انتي بتقولي ايه ياهمس

همس:الي انتي سمعتيه مش عايزه الشقه انا هاخد حاجتي منها وهسيبهالوا

فارس :ازاي ياهمس دى حق عيالك

همس بصت لمحمد بق*ف :اذا كان هو مش هموا عيالوا ولا فكر فيهم

محمد بص في الارض تاني كان عايز يسبلها الشقه بس خايف لورا تسيبه

همس :طلاقني يامحمد لو سمحت

محمد بصلها قوي وطلعت منه الكلمه وجعاه مش عارف ليه :انتى طالق ياهمس طالق !! بكره هنروح للماذون نخلص كل حاجه وماخرك ونفقه العيال كمان هجبهم بكره معايا عن اذنكم .

مشي محمد ودخلت همس اوضتها معندهاش اى استعداد تسمع حاجه من حد .