عشق الأدهم

البارت الاول ?

حكايتنا زي كل حكايه في بيوتنا المصريه بدات بأم نفسها تفرح ببنتها علشان تطمن عليها مع راجل يحميها ويبقي سند ليها فى الحياه وكاى ام مستعجله تفرح ببنتها جوزتها جواز صالونات ومن هنا هنبدا .

------------------------

همس بنت جميله رقيقه لدرجه ان اى حاجه بتأثر عليها ودى مشكلتها فى الحياه مابتعرفش تاخد موقف مع اى حد يجرحها عايشه تسعد غيرها وبس كانت كل أحلامها انها تحب وتتحب وتجوز الى بتحبه بس نصيبها كان مجرد جوازه عاديه اتجوزت همس في اوائل العشرينات وبعد تسع شهور ربنا رزقها( بحور) نسخه من مامتها حبت جوزها محمد حب عشره ورضيت بنصبها وبعد سنتين جابت( ادم )كانت نوعا ما مرتاحه وحمدربنا علي حياتها لكن دائما مافيش حاجه كامله

بدات كل حاجه تتغير لما كانت في مره بتذاكر لحور ودخل جوزها وملامحه مرسوم عليها الغضب !!

محمد وملامحه متغيره :مساء الخير

همس وعينيها عليه وملاحظه تغير ملامحه ،: مساء النور ثوانى اخلص مع حور واحضرلك العشاء

محمد وهو داخل اوضه نومه ومن غير مايلتفت ليها :لا شكرا

فضلت مكانها بتبصله بنظرة استغراب وبتسال نفسها هو ماله ياترى ايه الى مغيره !!!

وكملت مذكره لبنتها وبعد ساعه كانت نيمت عيالها ودخلت تشوف جوزها ماله !! دخلت اوضيتهم لقيته قاعد على السرير وسرحان قربت منه وهى مبتسمه

همس :مالك يامحمد حد مزعلك

رد محمد من غير مايبصلها :لا . العيال ناموا ؟

همس:اه ناموا انت كويس

بدا محمد يتعصب وصوته علا نوعا ما :مانا قولت كويس فى ايه مالك انتى

همس كملت بهدوء تحاول تفهم ماله : هو انت متخانق في الشغل

رد محمد بزهق وهو بيضغط على فكه يحاول يكتم غضبه : لا

همس :طيب مالك

رد عليها بصوت عالى لما حس انه خلاص زهق من اسالتها :مانا قولت مافيش انتي مابتفهميش ولا ايه !!!ايه مالك مالك ماتفصلى شويه

ولأنها مش من النوع الي بيحب المشاكل قامت من جنبه بهدوء وهى بتحاول تمنع دموعها من النزول وردت عليه بصوت مخنوق

: خلاص انا اسفه اني سالتك !! تصبح على خير

طلعت على السرير من الجنب التانى ولفت عطيته ضهرها وغمضة عنيها و دموعها نازله ب**ت وهي بتفكر

: ليه بيعمل فيا كده دا عمره مااتعامل معايا وحش مش عارف ليه بقالو كام يوم مش طايق البيت ولا حتى عياله دانا مش فاكره اخر مره قرب منى امتى صحيح الموضوع مش فارق معايا بس بقت حاجه ملحوظه ياترى فيك ايه مغير حالك يامحمد ياترى وراك ايه

ومحستش بنفسها لما نامت من كتر العياط والتفكير

اما محمد فضل سرحان شويه وبص عليها ضميره انبه وصعبت عليه بس افتكر انه لازم يعمل كده قام من جنبها براحه وخرج مسك فونه واتصل برقم واتكلم بصوت اقرب للهمس

:الو ايوه لا عملت زى مااتفقنا (وسكت يسمع) انا عارف حاضر هانت خلاص والله طيب سلام

ودخل تانى الاوضه بص على همس لاقها نامت ودموعها على خدها طلع على السرير ونام وهو بيحاول يسكت صوت ضميره الى عمال يديله انذار بس هو مش عايز يسمعله

تاني يوم صحيت همس وهي مصدعه من قلت النوم والعياط طول الليل قامت صحت حور علشان تنزلها المدرسه وهي بتلبسها طلع محمد ولسه ملامحه زى ماهى بصلها بغضب وقالها

:انا نازل وهتأخر بليل ياريت مش كل خمس دقائق تتصلي وتقولي هتيجي امتي زى ما بتعملى كل يوم

بصتله همس باستغراب لأنها عمرها ما اتصلت بيه زي مابيقول وقفت قصاده وقالت له

:انا من امتي بتصل بيك كده يامحمد الا لو حاجه ضرورى غير كده مش بتصل

ضحك باستهزاء : اه وتتصلي ليه هو انتي فضيالي كفايه عليكي عيالك والمدرسه واكلهم ولبسهم لكن انا اخر حاجه بتفكرى فيها مجرد بنك بيصرف وبس

همس لسه مستغربه اسلوبه واتاكدت من طريقته انه عايز يعمل خناقه وخلاص

:في ايه يامحمد انت بتتلككلي وبعدين هما عيالي لوحدي ولو مهتمتش بيهم وهما لسه اطفال مين هيهتم وبعدين انا عمري. ماطلبت حاجه لنفسى قبل كده

محمدصوته علا وقرب منها ووشه بقى احمر من كتر النرفزه

:ايه بتلككلك دى احترمي نفسك وانتي بتكلميني معايا ياهانم ولا اهلك معلموكيش تكلمى جوزك ازاى لو متعرفيش اعرفك

همس بصتله وهي خلاص دموعها هتنزل ردت عليه بقهره

: هتعمل ايه يامحمد هتض*بنى !!!عموما خلاص اعمل الي انت عايزه انا نزله عن اذنك

وسابته واخدت حور وادم ونزلت وفضل محمد يبصلها وضميره وجعه للحظه بس سكته وقال مش هينفع الا كده ونزل يروح شغله وهو بيفكر فى الخطوه الجايه

*****************

فى بيت حنين اخت همس

صحيت الصبح كالعاده وحضرت الفطار ودخلت تصحى بنتها الوحيده منه

:- يامنه اصحى يابنتى الله يهد*كى

ردت عليها منه بنوم

:- اصحى ليه ياماما سبينى نايمه شويه

:- انتى يابنتى مش عندك محاضرات انهارده

:- لا ياماما معنديش سيبنى بقى

خرجت حنين وهى بتبرطم بكلام مش مفهوم طلع فارس وهو بيبصلها وابتسم على شكلها المتعصب

قرب منها وشدها لحضنه :- الجميل زعلان ليه

بصتله بغيظ :- البت دى عايزه تجننى لو طالت تفضل نايمه العمر كله مش هتقول لا

ضحك فارس وحضنها قوى وهو بيهمس فى ودنها

:- ماتسيبها نايمه على الاقل اعرف اصتبح بيكى على انفراد

ابتسمت بحب وهى بتضمه قوى

:- ياحبيبى يافارس ربنا يخليك ليا انت الوحيد الى بتقدر تهدينى فى ثانيه

بعد عنها شويه وهو بيغمز لها

:- لا وعندى طرق بتهظى قوى كمان وكمان

ولسه هيقرب من شفايفها خرجت منه بصوتها كله .:- انت هتعمل ايه يابشمهندس !! يادى الفضيحه

لفلها بسرعه وهو بيجرى ورها

:- وربنا لو مسكتك لشد لساتك الى بيجيب جلطه ده

ضحكت منه وهى بتجرى

:- خلاص يابوب حقك عليا يعنى انا غلطانه صحيت علشان افطر معاك

وقف بصلها بغيظ :- اه غلطانه دك ارف فى غلساتك

غمزتله منه وهو بتضحك

:- معلش يابوب انا عارفه انى قطعت عليك مكنتش اعرف انك بتصتبح من المزه

برقت حنين وقلعت الشبشب ولقت منه بيه وهى بتصرخ فيها

:- انا قولت انك بقيتى سافله محدش صدقنى وربنا لعيد تربيتك تانى

اتفادت منه الشبشب وهو بتضحك

:- خلاص بقى ياحنون انا داخله انام تانى

وجريت على اوضتها وهى بتضحك !! بصت حنين لفارس الى مش مبطل ضحك

:- مبسوط كده

قرب منها فارس وهو بيغمزلها تانى

:- لا لسه عايز اتبسط تعالى بقى كده اما افتكر كنت هقولك ايه

******"""""******""""""******

فى دبى داخل شركه للاستراد والتصدير

كان قاعد شاب فى اوائل الثلاثينات اقل مايقال عنه انه وسيم الى حد كبير جدا كان بتكلم فى التليفون وهو متعصب جدا

:- ازاى يعنى الشحنه موصلتش لحد دلوقت انت ا بتستهبلوا

رد عليه المتصل :- ياادم بيه المشكله فى شركه الشحن هى الى ماخره الاجرائات

ادم بعصبية :- اتصرف معاهم احنا مضين على شرط جزائى على التاخير ولو اتاخرت اكتر من كده هنخسر فلوس كتير

:- حاضر يافندم انا هتصرف

قفل ادم وثوانى تليفونه رد برقم شريف اخوه الكبير

رد ادم وهو بيحاول يهدى نفسه

:- اخبارك ايه ياخبيبى وحشتنى

رد شريف بزعل :- لو وحشتك كنت جيب ياستاذ لكن الظاهر القاعده عجباك هناك

رد ادم بتعب :- والله ابدا فرع الشركه هنا فى مشكله وصاحب الشركه مش عارف اى حاجه ولا فاهم حاجه بياخد فلوس وبس

:- الله يعينك ياحبيبى المهم مش هتنزل قريب

:- هحاول ياشريف اخلص وانزل كام يوم وابقى ارجع تانى

اتن*د شريف بتعب من اخوه الوحيد الى مضيع حياته فى الشغل وبس

:- ماشى ياادم هستناك !! هسيبك تكمل شغل

:- ماشى ياحبيبى سلم على ناديه واياد

:- الله يسلمك ؛ مع السلامه

:- سلام

قفل ادم معاه وكمل شغله الى اخد كل وقته

****************

عند همس

نزلت وصلت حور المدرسه وكل تفكرها ليه جوزها معاملته اتغيرت كده فكرت تروح لماماتها بس رجعت قالت لنفسها اكيد هتقولها انه تعبان من الشغل وانها لازم تستحمل

رجعت فكرت فى اختها بس نهت تفكرها بأنها هترجع بيتها يمكن يكون فعلا عنده مشكله وبليل يجى يعتزر ليها زى عادته

فضلت اليوم كله بتحاول تهدى نفسها وتقنعها انه اكيد عنده مشكله فى شغله ولما يرجع هيبقى كويس بس كل تفكرها راح لما دخل عليها وهو زى ماهو مافيش اى تغير

عدى كام يوم كان فيهم محمد بيعملها معامله جافه حتي عياله مكنش بيتكلم معاهم ولما شافته بدء يسوء اكتر قررت تدور وراه

فكرت تنزل تراقبه بس رجعت قالت لنفسها ان مش ده الحل بصت لتليفونها وقالت لنفسها

: اكيد لو فى حد فى حياته هيبقى بينهم على الاقل رسايل

وبدأت بالاكونت بتاعه دخلت عليه ولأنها ذكيه جدا ودا اصلا مجال درستها عرفت تفتح كل رسايله واتصدمت من الي شافته !!!!!!!!

رسائل كتير مع واحده وواضح أنهم بيحبوا بعض بقالهم فتره

بس لحظه !!!! الرسايل بدأه من سنه يعني ايه كانت مخدوعه كل ده وهي مش حاسه طيب ازاى يمكن علشان مكنتش بتحبه كفايه فماحستش بخيانته وكملت الرسايل وكل ماتقراها دموعها تنزل اكتر

دموع قهره ووجع وحلم كانت نفسها تحققه ومتحققش

واخر رساله بينهم بيقولها أنه مش قادر يبعد عنها ولا يكمل مع مراته!!!!

ضحكة ضحكت وجع وهى بتكلم نفسها : مش قادر يكمل معيا ياااااا اد كده انا رخيصه عندك يابو عيالى دانا عمرى ماكنت وحشه معاك ورغم ان مافيش بينا حب بس كنت بتقى الله فيك وفى بيتى بس هقول ايه حسبى الله ونعم الوكيل

وفي آخر الرساله بيتفق معاها يتقبلوا بليل في كافيه (___)

قفلت الموبايل وهي في حالة صدمه فضلت تفكر هتعمل ايه مسحت دموعها وقررت انها لازم تنهي المهزله دي رجعت فكرت فى عيالها هيتربوا من غير اب ازاى لكن هو اصلا مش هموا عيالوا وانا معاهم هكبرهم واعلمهم وعمرى ماهسمح لحد يجرحهم .......

وقررت قرار مافيش راجعه فيه !!!!!!!