13

2897 Words

عمر : وين ؟ تركي : الشاليهات عمر : لا مشكور تركي : ليش يبا؟ شتسوي ؟ عمر : ولاشي (( عمر كان مخلص رسمه له و قاعد يلونها )) تركي : يعني متأكد ماتبي تجي وياي؟ عمر : متأكدين تركي : براحتك يبا عمر : مشكوور يابوتريك ، ماتقصر تركي : ولووو يالشيخ ، يلا ، فتكو بعافيه عمر : مو هني يقولونها يالخديه تركي: يلا يلا سلام عمر : حياك الله عمر رجع يلونها و باب بلكونته مشرع و النسمــه ولا أحلى منهـا كان يلون لوحته بكل دقـه ، يلونها ويقرب يشوفها من قريب و يبعد عنها عمر : هيَ الروح و الوجدان الريشه و الألوان إلا حبيبة عمري هيَ و كل العمر عزوبيــه .. لون نصها عمر و عقب تعييز انه يكملها سندها و حطها عند الكبت على ستاندها .. حذف الوانه و خرابيشـه على مكتبه و يده كل الالوان فيـها دخل الحمام يغسل يده يشوف على حنجه اللون الاحمر عمر تم يظحك على روحه وحس بالمللللل يلف بيتهم كلـــــــــه ، مب عارف شيسوي طلع فتح كبته بدل ملابسه لبس بنطول جينز فضفاض و تيشيرت اسود ، كان شكله نظـــييف و منعنش لبس نظارته و مشط شعره ورش له عطره 212 راح لعند سريره و نزل على ركبـه كل شي خاشه تحت هالسرير طلعه .. من كثر اشيائه ماقدر يخشها بصندوق ، تحت السرير المليان كانت صناديق و رزم من الاوراق مجمعه و احجامها مختلفه ، حتى هو استغرب من نفسه متى كتبهم و متى جمعهم ، وصار يسبق نفسه و يفتح هذي و يقرى هذي و يتذكر كل شي تم يقرا كل ورقه و كل بيت كاتبه لغلا و كل شي خلى الاوراق على جنب و طلع صندوق فيه صوره هو و غلا يوم كانوا صغار ، و آخر صوره قدر ياخذها لها و هي بهالسن ، كانوا مصورين هي و خالد مع سعد و فيصل لما كانوا صغار و الكل خذ منها كانت صورتهم وايــد حلووه ماتأمل الا فيها ،، يشوف عيونها الناعسه و يسرح فرموشها المنمده ، و الا يشوف البياض اللي كاسي جبينها ، ولا يتأمل فحمرة خدودها ، يشوف ظحكتها ومثامينها اللي تنسي الواحد عذابه و كل همومه و الا ايديها اللي شابكتهم بيد فيصل الصغيره اللي بحضنها ، ولا يراقب بريق عيونها اللي مايميز كم ضايعٍ فيه .. ولا يشوف خالد الي واقفه جنبها و نصها عليه .. ( كاهو اخوك ، بطل عينك ، شوفه ، حذاها معاها ، هو لها هي له ، انت مو منها ولا لها افهم افهممم ) عمر : لاا لا ، غلا لي انا وبس ، غلا انتي غلا عمر ، عمرج ماراح تصيرين لخالد ، لي انا وبس .. ماكان يبي ينكد على عمره وشال كل اللي عفسه على السرير و خشه تحته .. طلع يتمشى فالبيت وهويسمع اغنية كاظم الساهر بالسماعات اللي فاذنه (((الزين هذا حلو و زين.. زاهي بلا عقد وقلايد.. مزيون يسبي القلب والعين.. فيه الحسن والزين زايد.. ما شفت أنا في وصفه اثنين.. ترف الصبا غض النهايد.. من وين هذا الريم من وين.. لي صار للغزلان قايد.. مفنـــودعن كل المزاييـــن.. نوره لنور الشمس عايد.. في مبسمه درٍ مثامين.. يــــكٍ ودانات فرايد.. عوده إذا هب الهوا يلين.. فارع ومياس ونايد .. تحلى به الأوصاف وتزين.. وتزين به حتى القصايد..))) المهم المها : من هذي؟ عمر انتبه لها بس ماسمعها شافها تتكلم و شال السماعات : اوه هلا المها : هلا فييك عمر مشى و قعد عند التلفزيون شغله وقعد يشوف التلفزيون ، المها هني طنقرت عمر : شمغيبج المها ؟ ماعندج مدرسه المها وهي شبه مبوزه: عمر انا فالجامعه ، و ثاني شي احنا عندنا اجازه عمر : اهـاا المها تروح و ترد ، تبي تحسسه باللي فيها ماتعرف شلون المها : تصدق عمر ! عمر باستهبال : اصدق المها : عندنا واحد فالجامعه منعجب فصديقتي ، و شكله مب عارف شيسوي ، كل يوم طالع لها بحركه عمر رفع حواجبه معصب : كلمج؟ قالج شي؟ المها انشق حلجها : لالالا ، ماجا صوبي كلش ، اقولك " صديقتي " مو انا عمر بحاجب مرفوع : انزين؟ المها اشتطت و هي تألف عليه : الله يسلمك كل يوم طالع لها بشي الا يكشخ لها الا يقصدها بالكلام ، الا يسوي لها حركه الا ورد الا رسايل وين مانروح نشوفه عمر : جليل اصل لانه المها بققت عيونها : شحقه زين ؟ عمر : والله هاللي بيسوي هالحركات مع بنات العالم يطلع راضيها على هله ، والغيره ماتعرف دربه ، وتقولين شحقه المها : كاه انت تسويها مع غلا عمر هني عيونه طاحت بحظنه و الصدمه كانت مبينه عليه عمر : شقلتي؟ المها : ماقلت شي عمر : عيييدي شقلتي المها قامت : ولاشي ولاشي عمر يصرخ : لما اتحجى ردي ، قولي شقلتي المهـا وهي تبي تشرد : ماقصدت أنسى كل شي عمر هني فقد كل عقله و طار ووقف جدامها وهو يصرخ فوجهها : أنتي أصلا شنو؟ حقيرة؟ شوي علييج(ماكان حاس باللي يقوله و لايدري شيهذر على راسها ) انتي مافوجهج حيا، ماتستحين تقولين لي انا هالكلام ؟ انتي الحيا ماعرفج ، انتي اتفه من الياهل اللي عقله فاضـي ، ل**نج مايعرف السنع ، تبعتي العنود ومصيرج مثلها ، ياخسارة اللي كان فقلبي لج .. " يلف و يرد لها " و سمعيني انتي غلا أرفع من انها تجي على ل**نج ، فاهمتني ، مابيج تقربني ولا ابيج تطريني ولا تطرين غلا ، ولا شفتيني بدرب امشي بالدرب الثاني ، ولا كاني اعرفج ، لان انا مابي اعرفج . دخل داره و رضخ بابه بكل قوته هزت بيتهم الفاضـي .. المها كانت من الخرعه و من القهر و من الخوف و من كل شي ، تدور و دموعها تصب ماتعرف وين تروح وين تنخش وين تفرغ كل اللي فيها من كره غلا اللي دخل قلبها قبل ثوانـي ..! خالد كان توه راد من صلاة العصر و كان تعبان من الدوام و غلا كانت تكلم عمتها فالتليفون و خالد واقف لها يحط اذنه على السماعه : عمتييييي غلا تدزه : انزين كملي ، اسممعج خالد : لاتكمليين غلا تسد السماعه بيدها : افف خالد شفيك خالد : يلا يلا لوسمحتي ابي التليفون غلا : صــج (ترد لعمتها) .. خالد يشل مريم اللي كانت على الكرسي ومنسدحه و عيونها ماتبين من الخدود شلها و حذف الغتره و يركض فيها و لين وصل للدرج يوقف فجأه و تسكر ظحك خالد يبوس خدها بقوه : فديييييييييتج انا يالدبـه مريم تظحك و تحافص برجلها خالد : أي عاد بس ماتتدلعون انتوا ، يلا يلا امشي وياي دام امج باعتني فالسوق و مسويه على تنزيلات شيقعدنا؟ غلا تتخصر له وهي فيها الظحكه على كلامه خالد يكتب لها فالهوا ( 50% ) بعد مابدل ملابسه كان حاط مريم معاه فالبلكونه وهو يدخن .. خالد(طولت هذي؟ شتقول لها عمتي؟ أكيد تسألها عن اللي صار يوم العشـا ، يالله شبتقول غلا؟ لا غلا مستحيل تقول شي ؟ ياللللله شتبي عمتي أكيد شي مهم حده دام ماسكرت منها و هي تدري اني وصلت البيت ) غلا : ويـن وصلـت ؟؟ خالد حس انها كشفته : هااه؟ هنيي ، فخدودج غلا : ههههههه صج زين عيل مابعدت خالد : لاااا افا علييج يالغلا ، تطمنننني غلا وهي حابسه عوارها : حيااتي والله ,, خالد : شتبي العمـه؟ غلا : ولاشي والله ، كانت تسألني عن اشيا وجذي خالد : شهالاشيا عااد غلا و هي تقوم عنه و تعدل شكلها فالمنظره : من هني و هناك .. شلونكم؟ شخباركم؟ و اشيا ماقدر اقولها خالد :لاا غلا (يتصنع) حبيبـتي غلا اللي بتعلمني ، شكانت تبي ؟ غلا : ههههههه خالد شفيك؟ من صجك؟ خالد : لا قصدي عن شنو يعني هني و هناك غلا : صدقني ولا شي اسئله عاديه لو في شي ، انا بقولك بدون ماتسأل خالد : بعـــــددي والله نرجع للمها شوي ........... بعد مادخلت غرفة يدتها النايمه و انخشت فزاويه و تمت تصيح على طريقة عمر و كلامه واسلوبه والفاظه ، شكان يقول؟ انا شسويت؟؟ بس انا قلت له كلام قوي ، يااالله بس شلون كان بيحس فيني لو ماقلت له .. بس كاني على الاقل قدرت احركه شوي خليته يعصب و يصرخ قبل كلش ولا احسه معاي حتى ان سولف ، بس لحظه هو قال لي كلمه ولين الحين ترن فأذني ((اخسارة اللي كان فقلبي لج ..)) شققصده؟؟ عمر يحبني؟ يحبني؟؟ لا ماصدق ، كان يحبني ( ترجع تصيح وهي تعض اصابعها ) انا من يومي هبلـه و الحين اثبتت لعمري هالغباء و الهباله اللي فيني عمر كان قاعد على المكتب و ماسك قلم خشب عريض شوي ويقصصه بالموس انا اوريها هالوصخه ، من اشكال العنود ، لكن انا وراج وانا اللي بعلمج السنع ، اففففف ياربي ، وين صرت انا بأمريكا ؟ هذي بعد وراها اهل واخوان وابو وام وهي بنت خالتي ، عمر : بس هي غلطت عـلى غـلا ، انا الدنيـا كلها ولا غلا لطيفه اللي فتحت الباب ومالقطت غير كلمة غلا لطيفه : شفيها هالغلا بعد ؟ عمر يلبس نظارته بسرعه : ولاشي ولاشي لطيفه : شبلاك بعد ؟ مابغينا نخلص من هالموال رجعنا عليه عمر وهو يرفع راسه للسقف ويرد ينزله : يمه يمه ، لاتكلميني بهالطريقه ، تراني حي مامت شهالاسلوب الله يخليج لطيفه : انت اللي شهالأسلوب ، تكلمني جذي؟ وشمسوي فمها ؟ هاه ماتستحي على ويهك؟ عمر بقق عيونه (قالت لهم هالخايسه؟) : شسويت ؟؟؟ لطيفه: انا اللي أسألك ، جاوبني عمر كان توه بيبط البرمه .. بس لطيفه نطقت لطيفه : البنيه تصيح و حالتها حاله .. شبلاها؟ عمر هني كان وده يكفخ مها : يوهو شدراني انا شبلاها ، نشاد عنها ، ريلها ولا من انااا لها ؟ لطيفه : اسمعني عاد ياعميـر ، لاتفكرني هبله و لاعميه ماشوف ، ترا عيوني مفتحه هالكبـــر (تأشر باصابعها) واشوف كل شي وادري عن كل شي ، قعداتك مع المها و حركاتك مع بنت عمك و لا الضراب اللي صار فكل يمعه يستوي عندنا ، ولا قعدتك فدارك و مناحتك وهالأرف اللي معيش روحك فيه علشان مرت اخوك ، انا ادري به اكبر واوعى على عمرك ، لاتشوف شي مايعجبك مني و من ابوك ، السالفه خلاص مصخت ولازم يصير لها حد ، مب كفايه اللي صار بينك و بين اخوك و سامحك عليه ، بعد راد تبي تلطمه؟ شبلاك انت؟ ماتقولي شصار فيك؟ خلاص مافي شي اسمه حدود؟ مافي وعي ؟؟ عمر : حقكم علي ليطفه : أي يمه ، هاي اللي انت فالح لنا فيه ، تغلط غلطه كبر الدنيا و تنزل لنا دمعتين و تقول لنا آسف و حقكم علي عمر : شتبيني اسوي لج ؟ مافقعتوا مرارتي ياناس؟ شسوي بعمري ؟ شسوي بعمري اللي خذتوه مني؟ وعطيتوه لاخوي فغمضة عين ، قهرتوني عميتوني ذ*حتوني ذ*حتونا كلنا؟ وشستفدتم؟ ابي اعرف؟ في ابو و ام يضيعون احلام عيالهم بهالطريقه؟؟ شسوي عشان اريحج الحين ؟ اطلع من هالبيت؟ اغيب عنكم ؟؟ يرضيج؟ اذا يرضيج خلاص اوعدج من هالبيت بهج لاتحاتين ماني قاعد بس نطرو علي ، افا عليج يايمه (يحب راسها) انا ادري فيج انتي لازم نصير ع** كل شي حتى نرضيج ، ولايهمممج .. انا ودي من زمان اعا** حظي بس ماقدر لانه مره وحده ظحك لي وجاب لي غلا ، بس كشر لي بسرعـه وخذها مني.. لطيفه : ودي اكفخك لكن قلبي مايطاوعني عمر يوطي راسه لها ويقرب خده : كفخيني يمه (وصيحته مغيره صوته) يمكن اصحى يمه ، انا غايب عن هالدنيا وعيني معاها تكفيين ، يمكن اصحى لطيفه لمت راس عمر و عمر مايبي هاللي يصير ، لو تقرب من امه مايدري شينطره ؟ كان يبي يباعد راسه عنها و يشيل يدينها اللي محتظنته ، بس هو يبي هالشعـور و هالحضن من زمـــاان ، كان يدوره من سنين و اليوم لقاه ! لطيفه : ياعمـر يايمه ، صدقني هاللي قاعد تسويه مامنه فايده ولا دموعك وحرقة عينك وقلبك عليها بترجع لك دقيقه من اللي راح ، خلاص ياحبيبـي ، بنت عمـك صارت لاخوك وهي ام عيال ، تعبنا و احنا نعيد هالكلام عليك .. ليش تسوي فينا جذي تتعب و تتعبنا معاك .. انت ماتحبها؟ عمر نط مره وحده : آخ يمه ، لو بيدي اصير تراب لريلها و ترجع لي لطيفه تغمض عينها على كلام ولدها : دامك تحبها فكر بان اللي قاعد انت تسويه يضرها ، يأذي حياتها؟ يعني انت ترضى انها باجر تتطلق بسبتك وتتم جذي متلتها؟ احنا مافكرنا نزوجها الا لان كنا ندري ان محد قادر يتحمل مسؤولية كل اللي يصير لها غير اخوك .. تدري ليش؟ مب عشان نقهرك .. لان ندري انك انت توك فبداية عمرك يايمه .. باجر تتزاعلون و على اتفه سبب تتطلقون ولا يصير بينكم شي .. وتخليها عمر : لاا ، يمه لاتفصلين وتلبسين على هواج ، انا لو بـس غلا كانت لي ..... استغفرر الله يارب ، استغفر الله لطيفه : تستغفر لان تدري اللي كنت بتقوله واللي بتقوله غلط في غلط عمر : انا صرت غلط من راحت عنـي ..انا يايمه حاس اني باموت من كثر مافقلبـي حره ، قهر و كل شي بص*ري يولع مايطفي ، احسه كل يوم يشب ولا اقدر عليه ، غلا شسوت فيني؟ (يخش راسه فكفوفه)،،،،،، طلعي عني يممممه طلعي خليني بروحييي ، مابي حدد لطيفه : انا بخليك الحين لان نفسي ماتقدر على شوفتك جذي عمر: يمه انا مت جدام عيوونج وهنت عليج ، لاتخليني اصدق هالكلمتيين عفيـه لطيفه رفعت شالها اللي طاح من على جتوفها و مشت فدار ولدها ترفع الامواس الم**ره وهي مستغربه .. طلعت من الغرفه وسكرت الباب عليه عمر قعد وهو فنوح وصل لاذن المها الي نازله على الدرج راده بيتهم ، كانت تبي تطل لكن ماستهمت له و طلعت من بيتهم .. وهي وعدت نفسها انها ماتزورهم .. ماتنكر ان اغلب جياتها بس تبي تشوف ولد خالتها اللي حبتـه و كرهته بروحها وهو مايدري انها جات ولا ماجات؟؟؟ .* بعـد مرور شهريـن *. يوم الثلاثاء.. خالد كان راجع من الشغل و التعب مبين عليه ، تعبه مب من الشغل يحس عوار فقلـبه و خايف يقول لغلا ركب الدرج و شاف غلا فدارهم .. كانت توها حاطه مريم بالسرير ، شافت خالد و خافت .. انسدح خالد على السرير ويده على قلبـه .. غلا قعدت حذاه وهو منسدح : نوررت البيت حبيبــي خالد يبتسم لها ومافيه حيل يرد ، سحب ايدها و حطها على قلبه ، غلا انخ*ف قلبها غلا : بسم الله عليييك شفيك خالد يجذب عليها : كله منج غلا: شسويت ؟ خالد تعبان؟ خالد : شسوي احبج غلا : لا خالد قلبك فيه شي خالد : أي انتي فيه و سكت عنها ، وماقدرت تقول له شي لانه غمض عيونه .. غلا ركضت و جابت له كاس الماي لكنه نام ..! غلا بكل احباط قعدت عند راسه وهو نايم و التعب على ملامحه ساكن الغدا انحط و انشال ولاحد منهم جاسه .. غلا بايدها تمسح على وجهه الحـاار (يابعد عمري ياخالد ، طول عمرك انت اللي تعابلني ، شصار فيك؟؟ ) مرت السـاعات و خالد نايـم .. اظلم الوقت وبعده نايم ،، غلا قرصها قلبها عليه ، ماتعرف شتسوي ،، تتصل لعمها ؟ عمتها؟ شتسوي ؟ تقومه من النوم؟. خالد باليالله قدر يفتح عيونه على اضوق شي و يشوف عيون غلا و هي تلف فيهم يمين يسار ، ماتعرف شتسوي غلا حست بشي على ايدها ، وبسرعه انتبهت له غلا : خالد .... انت قمت ! "تمسح على ايده و ذراعه" خالد : شنو ولهتي علي ؟ غلا تبوس راسه : اكيد ، بس قولي شفيك؟ تعبان؟ خالد يتظاهر انه صاحي : افا ، انا اتعب ، بس هد حيللي الشغل غلا : خالـــــد ،،شفت شاللي خذته من الشغل ، كاهو سدحك من الظهر لين الحين ، شتسوى عليك؟ حبيبي صحتك بالدنيا خالد : آخ عليج تحاتيني غلا: خالد انا من صجي و انت تتغشمرر خالد : ماتغشمر ، مافيني شي ، حديد اناا و قام عن سريره يتسبح .. طلع و مالقى غلا بالغرفه بدل ملابسه اللي كانت حاطتهم لكن مافيه قوه ، فقل باب الدار وانسدح على السرير مغمض عينه خالد كان بداخله ألف صرخة عوار ، لكنه مايبي يبينها بعدها قام وهو معاند اللي فيه ، لبس ملابسه و طلع لغلا .. خالد يشوف الاكل وهو مشتهيه ومو مشتهيه غلا : لاتشوفه بنص عين بتاكله كله خالد : ههههههه ترا آكلج معاهم غلا : اذا بترجع مثل ماكنت ، كلني خالد : يقعد حذاها و مطوقها بيده : ليش شلون كنت؟ غلا تلف وجهه عنها : كنت خالـد ، يلا اكل خالد : انشالله خالد قعد ياكل و نسى كل الي حذاه لانه كان يوعان عدل .. خالد : غـلااا ! غلا : ها حبيبي! خالد : ابي لبــن غلا : هههههه انشالله نزلت غلا عشان تجيب له اللبن و هي نازله من على الدرج شافت سياره صافه عند باب بيتهم من القزاز بس ماهتمت لها خذته و ودت اللبن لخالد و قعدت معاه و هو قاعد يشطب على اللي باقي وهو ياكل شوي و يسولف معاها شوي جاتهم الخدامـه .. الخدامه : Mr.khalid ,, Your brother is waiting you in the living room خالد قام : عمـر؟ (يلتفت لغلا) ، شيبي ؟ غلا : مادري؟ انزل له خالد : ببدل ملابسي اول غلا : اوكي انا انزل له خالد خ*فها من على الدرج : لا انتي خلج غلا تخلبصت : انشالله لبس خالد ثوبه بسرعه ونزل وهو يسكر ازرته و شكله متخرع .. لان عمر من زمان قاطعهم ! شجاييبه الحين ؟ الخدامه الي كانت قاعده تشيل الاكل : But he said that he wants you also Madam غلا : وانتي شعليج اف ,, I don't want to see him الخدامه : I'll tell him this message when he come again غلا بققت عينها ..............................!!!!! شيبي عمـر من خالـد ؟؟ و شقصد الخدامه بشبه التهديد اللي وجهته لغلا؟ خالد يمكن يموت ؟؟ غلا فتحت باب الدار بكل قوتها و هدت عمرها على الكرسي وهي ماسكه راسها من جنبينه .. (( رجع يسويها؟ هذا استخف؟ بايع عمره؟ في حد يتجرأ لهدرجه ؟؟ لالا أكييد فعقله شي ، والله ان درى خالد بيذ*حه يذ*ححه ،، شسوي فيه ؟؟ )) خالد بعد ماقعد مع عمر و سولفوا و شلونك و شخبارك ؟؟؟ عمـر : وينها ام فيصل ؟ خالد وهو يرفع حاجب ويولع زقارته : ليش؟ عمر : ابيها تسمع هالسالفه؟ خالد : ضروريه ؟ عمر : بعد اذنك يعني .. ! خالد : زين انطر

Free reading for new users

Scan code to download app

App Store Google Play

Facebookexpand_more