تناقضات

12

بوفارس: طيب الله بسلمك .. انت شحالك والاهل عساهم بخير ؟

محمد بابتسامه عذبه: الحمدلله ياعمي الكل بخير الله يسلمك ..

بوفارس: عيل وين طبجتك عنك؟

محمد: مادري عنه .. اتصل فيه من الصبح ولا يرد علي .. يمكن نايم الحبيب ..

بوفارس: نايم .. اي ي ي وشكله نايم فالعسل بعد ..

محمد ما عار اي اهتمام لأخر جمله قالها عمه: زين عمي ماعطلك .. بروح عند جاسم

بوفارس: الله يحفظك يبه ..

كمل بوفارس دربه ومحمد راح غرفة جاسم .. ولقى الحبايب مندمجين مع التلفزيون وكانوا متابعين توم وجيري وبكل نذاله بند محمد التلفزيون ..

تركي وجاسم: هييييييييييي

محمد: اس .. اس .. السلام عليكم

تركي: هههههههه عليكم السلام

محمد: شحالكم شباب ..

تركي: الحمدلله

جاسم كان محتج: ياخي شغل التلفزيون ..

محمد: نعم اخوي .. تكلمني

جاسم بتوسل: عاااااااد

تركي: حرام عليك .. شغل التلفزيون خله يتابع

محمد: احلف انت .. اخاف انت اللي متحرقص تبي تتابع

تركي: خخخخخخ عاد انت ماتفهم يا بونايف ..

جاسم: محمد الله يخليك

محمد بغلاسه: مممممممم موضوعكم جاري التفكير .. انتو الثنين ماتقدرون تمشون والجهاز عندي .. احم احم

تركي: قمة النذاله

محمد: ولو .. ان لم تكن نذلا اكلوك النذووول

تركي: ههههههه .. يقطع سوالفك

محمد: زين يلا ترجوني يلا ..

جاسم: عاااد حمودي ..

محمد: شو حمودي بعد .. الحين احلم اشغله او اعطيك الجهاز

جاسم: لااااااااا

تركي ومحمد ضحكوا على جاسم ...

رن تلفون محمد وحذف عليهم الجهاز وطلع يتكلم برا الغرفه ..

جاسم: Yes

تركي شغل بسرعه ..

واندمجوا مره ثانيه مع التلفزيون ومحمد كان يكلم زوجته برا الغرفه ..

محمد: يا هلا بعمري كله ..

ساره: وينك؟؟

محمد: بل .. عا.....

ساره بعصبيه: رد علي .. انت وين الحين

محمد باستغراب: ويني ؟؟ شو فيج معصبه حبيبتي ..

ساره: اعتقد كلامي واضح .. انت وين رد علي

محمد عصب: كلامج واضح بس شو سببه ؟؟ على شو هالعصبيه ؟؟

ساره: مو معصبه .. بس تعرف ترد ولا ....

محمد يقاطعها: ولا شو ... على اي اساس تتكلمين معاي بهالاسلوب ؟!

ساره سكرت التلفون من غير ماترد عليه .. محمد عصب واستغرب من الحركه ..

محمد وايد تضايق" شو فيها ساره؟؟ .. وشو اللي خلاها تتصل وتقول هالكلام وشو قصدها يسؤالها عن مكاني .. مو من عوايدها تسألني ؟؟ افففف ضاق ص*ري يا ساره "

رجع الغرفه عند جاسم وتركي ..

جاسم: محمد ابي ماي ..

محمد: انشالله

تركي التفت على جاسم وكانوا ثنينهم مستغربين من هدوء محمد المفاجئ .. خذ جاسم الماي وسأل محمد ..

جاسم: محمد .. شو فيك ؟

محمد يحاول يبتسم: ولا شي ..

تركي: بونايف .. وين فارس عنك .. ما شفناه اليوم

محمد: مادري عنه .. حتى عمي سالني عنه من شوي .. خل اتصل له اشوف وينه هو .. واتصل محمد بس مالقى اي رد من فارس .. وطرش له مسج " فروووس وينك من امس الكل يسال عنك .. رد علي ضروري ابيك في شغله"

محمد: ما رد علي .. بس دزيت له مسج .. يمكن نايم

جاسم: مستحيل .. اصلا فارس ما ينام لين هالحزه .. زين شوف خالد اخوك اكيد معاه ..

محمد: بشوف خالد اخوي .. باتصل فيه بعدين .. على العموم انا رايح تامروني على شي..

جاسم وتركي: وين ؟؟

محمد: بروح البيت .. بمركم العصر باذن الله

جاسم باستغراب: زين ..

سلم عليهم محمد وطلع .. جاسم وتركي كانوا مستغربين من محمد .. تركي ماحب يسأل جاسم عن شي لانه مجرد شخص وتعرفوا عليه في المستشفى .. ومو حلوه يتدخل في امورهم ..

مشى محمد في ممرات المستشفى وهو يفكر في تصرف زوجته الغريب .. وقرر يتصل فيها .. بس هي ما ردت على جوالها .. اتصل على البيت وردت عليه امه ..

محمد: مرحبا يمه ..

ام محمد: هلا ابوي انته ..

محمد: شخباركم فالبيت .. واخبار فهد الله يحفظه

ام محمد: الحمدلله كلنا بخير .. وفهد فديته نايم

محمد: الحمدلله انكم بخير .. زين يمه ساره عندج ؟

ام محمد: اي يبه تبيها ؟

محمد استغرب: اي يمه عطيني اكلمها ..

ام محمد: ساره يمه .. محمد على التلفون ..

ساره"اففف شيبي هاذي": الوو

محمد من غير مقدمات: ليش مارديتي على الجوال ؟

ساره بنفس: الجوال فوق .. وهني ام محمد طلعت .. حست ان الجو متكهرب بينهم

محمد خذ نفس وتكلم بهدوء: ساره يا عمري .. شو فيج معصبه .. استغربت من كلامج ؟؟

ساره: بلا عمري وغيره ..

محمد باستغراب: لاااااا انتي سالفتج سالفه ..

ساره سكرت التلفون في ويهه للمره الثانيه .. هني محمد عصب حده .. ساق السياره بسرعه جنونيه ماعرف كيف وصل فيها البيت .. اول ما وصل الا امه في ويهه .. سلم عليها وقعد معاها شوي .. استأذن منها وراح الغرفه عند ساره .. فتح باب الغرفه بهدوء وتم يطالع ساره اللي حست بوجوده بس تجاهلته .. دخل و وقف جدامها ..

محمد: عسى ما شر الشيخه .. شو سالفتج ؟؟ علميني

ساره رافعه حاجب: انت تعرف السالفه ..

محمد: اي سالفه .. الكلام اخذ وعطى .. مو اتكلم وتسكرين في ويهي ..

ساره طالعته بنظره: وين كنت يالشيخ؟

محمد: كنت فالمستشفى؟؟

ساره: وش اللي يثبت لي ؟؟

محمد بصدمه: هااا .. تشكين فيني ؟؟

ساره: ....................

محمد: ساره انتي صاحيه ؟؟ شو تخربطين انتي ؟؟

ساره: لاتلعب علي دور البريء .. كنت مغفله يا محمد .. بس الحين تفتحت عيويني على اشياء كنت غافله عنها .. صحيت من الكذب اللي كنت عايشته معاك ..

محمد بخيبه: شو تسمعين وتشوفين .. واي كذب تتكلمين عنه .. انا طول عمري مخلص لج يا ساره هالكلام كبير كبير .. هاي مو كلامج ..

ساره: خلصني واعترف ..

محمد قعد على الكرسي وغطى ويهه بإيدينه من الصدمه ..

ساره مشت عنه: الخبر اليوم بفلوس.. بكره ببلاش .. راحت غرفتهم وسكرت الباب بقوه .. اما محمد ما عرف في شو يفكر من الصدمه .. رن تلفونه وكان المتصل فارس ..

محمد"هالاتصال جى في وقته" .. قام من مكانه و وقف عند الدريشه

فارس: هلا محمد ..

محمد: وينك من امس؟؟ .. قريت المسج اللي دزيته لك ؟

فارس: آآآه يا محمد ..

محمد: سمالله عليك من الآآه .. شو فيك يبه ؟؟

فارس: تعالي البيت الحين يا محمد ..

محمد بخوف: انت فالبيت ؟!!! عسى ما شر ..

فارس: تعال وانت تعرف ..

محمد: خلاص الحين جايك .. طلع من الغرفه مستعيل .. ساره كانت واقفه ورا الباب وسمعت المكالمه .. فتحت الباب وقالت لمحمد ..

ساره: رايح لفارس ولا لفاطمه الحب ..

محمد وقف مكانه: فاطمه .. انتي تشكين اني على علاقه ببنت عمي ..

ساره: انا ما شك .. الا متأكده .. روح لها كحل عيونك

محمد مسك نفسه وطلع بهدوء من الغرفه ولا رد عليها .. وهني ساره ماتت من القهر وحقدت على فاطمه ..

طلع محمد من البيت يحاتي فارس ويحاول يتناسى هم ساره اللي كان صدمه بالنسبه له .. وصل بيت عمه وكانوا البنات مع امهم يجهزون للغدا في المطبخ .. فاطمه شافته من العا** .. واستغربت وجوده هالحزه في بيتهم .. فتحت له الباب

فاطمه: هلا ولد عمي ..

محمد شاف فاطمه وتذكر كلام ساره: هلا بنت عمي .. شحالج ..

فاطمه: طيبه الله يعافيك .. حياك دش عن الشمس ..

دخل محمد وهو يطالع فاطمه بنظرات غريبه ماقدر نفسه يفسرها .. وفاطمه كانت مستغربه نظرات محمد ..

محمد: سوي لي دري بروح حق فارس فوق ..

فاطمه باستغراب: فارس .. فارس فالبيت !!!

محمد: اي توني مكلمه ..

فاطمه: غريبه .. زين حياك ولد عمي ..

دخل محمد وبسرعه راح لغرفة فارس .. وفاطمه استغربت من شيين ؟؟ الاول وجود فارس فالبيت من غير ما يحس حد بوجوده ؟؟!! والثاني جيت محمد بيتهم لفارس هالحزه ؟؟!!!

دخل محمد على فارس وشاف حالته اللي تقطع القلب .. كان حزين ومنخ*ف لونه .. عيونه حزينه وفيها كلام وايد ودموع محبوسه .. رفع راسه يطالع محمد اللي هم ساره كان ذابحه ..

محمد: فارس شو فيك ؟؟

فارس طالع محمد فتره: آآآه يا محمد .. آآآه

محمد: عسى ما شر الغالي ..

فارس تكلم وهو منهار: راح بين ايديني يا محمد .. ماقدرت اسوي له شي .. ماقدر يكمل ونزل راسه بحزن ..

محمد بخوف: شفيك يا فارس.. من اللي راح .. الاهل فيهم شي ؟؟

فارس طوق ويهه بإيدينه بحزن وطالع محمد ..

فارس: امس من الساعه 2 لين اليوم الساعه 10 وانا في المستشفى .. وبعدين رحت المقبره

محمد قام من مكانه: المقبره .. شو صاير ؟؟ تكلم يا ريال

فارس قال لمحمد سالفة مناف كامله .. اما محمد فالبرغم من الهم اللي فيه .. الا انه حزن وايد على اللي سمعه .. ولان محمد عنده اولاد فتخيل لو كان مكان مناف واهلها ..

محمد: مات بسبب سوء التغذيه ..

فارس: لو تشوف الخرابه اللي عايشين فيها .. ماتصدق انهم عايشين فيه وياكلون فيه لو كان في اكل وينامون فيه من انولدوا وهم ماعرفوا غير هالخرابه .. يالله ماقدر انسى منظره وهو يطالع فوق .. وصوت روحه وهي تطلع من جسمه الصغير.. يا محمد حسيت الدنيا من حولي تتحرك ببطئ .. حسيت برعشه سرت في جسمي من راسي لي ريولي .. وقفت مكاني مو مستوعب اللي صار .. تمنيت لو كنت احلم احساسي كان غريب .. حسيت بشيء من الخوف لانه مات في ايدي .. حسيت بالحزن لان المسكينه مناف استنجدت فيني وانا خذلتها .. حسيت بالخذلان لاني انا اللي بلغتها بموت اخوها .. حسيت برهبة الموقف كله .. احاسيس اجتمعت في وقت واحد .. تعبت افسرها ..

غسلوه ورحنا المقبره .. صليت عليه انا وهو اخوه وكم شخص كانوا معانا في المغسله اللي بالمستشفى .. رجعت لمانف المستشفى والمسكينه كانت منهاره وتقول لي ..

مناف: آآه راح نايف .. شلون ارجع البيت من دونه .. وش واقول لامي لي رجعت من دونه .. آه يا قلبج يا يمه ..

حاولت اهديها بس كانت وايد متأثره بموت اخوها .. عيونها حزينه فيها كلام اكثر من اللي قالته .. مسكينه مناف .. والغريب في الموضوع اخوها فيصل!! حسيت مشاعره متجمده كأنه عارف بمصير اخوه .. كان هادي وايد .. بس انهار لما شاف اخوه ممد على السرير .. وصاح بحزن على فراق اخوه .. وكان حاس بالخذلان .. لانه ماقدر يسوي شي لاخوه .. ونايف كان وايد متعلق بفيصل .. صاح فيصل وكان يقول ..

فيصل: شلون برجع البيت من دونك ؟؟ وش بقول لامي وعبود .. من اللي بيرسم لي الورد والطيور ..

آآه يا محمد للحين كلامه يدور في راسي .. احس اني للحين اسمعه .. صوته في راسي كان يصيح بحزن انولد معاه .. حسيت دموعه غسلت شي بسيط من الكثير اللي بقلبه متحمله من وعى على الدنيا .. تخيل عمره 12 سنه وشايل جبال من الهموم والحزن .. تميت افكر في نفسي وفي هلي .. افكر لما نتبطر على النعمه اللي احنا فيها .. واللي غيرنا ما يحصل مثلنا .. آه وآه وآه يا محمد .. هالدنيا غريبه .. حط فارس راسه على المخده وغمض عيونه .. تم محمد يواسي فارس ومشاركه حزنه وهمه ..

فاطمه تحت في المطبخ كانت مشغوله تفكر في اخوها .. وتحاتيه وخايفه عليه .. ومستغربه من وجود محمد ولد عمها والغريب ان لهم اكثر من ساعه من وصل محمد ..

ام فارس: فطيم يمه .. يلا جهزوا الغدا اخوانج الحين بيجون انا بروح ابدل ملابسي

فاطمه: ماما .. فارس فوق في غرفته .. ومعاه محمد ولد عمي .. اجهز لهم الغدا في الميلس؟

ام فارس باستغراب: فارس فالبيت ؟!! ومعاه محمد؟!! من متى؟

فاطمه: اكثر من ساعه .. استغربت لما شفت ولد عمي جاينا .. مو عوايده ومادريت ان فارس اخوي فوق الا لما قالي محمد ..

ام فارس: زين يا امي انتي .. جهزي لهم الغدا وانا بروح اشوفهم .. عفيه بنتي ..

فاطمه: انشالله ماما ..

التفت فاطمه على مريم اللي كانت مشغوله بكتاب كانت تقراه ولا انتبهت لأي كلمه انقالت ..

فاطمه: مريوووم .. وض*بتها على كتفها ..

مريم: آآي .. عورتيني شو تبين ؟؟

فاطمه: خلي هالكتاب عنج الحين وسمعيني زين ..

مريم: قبل ما اسمعج خليني اسوي علامه على الصفحه اللي وصلت لها .. قاعده اقرى قصه (نهاية حبك اعدامي) لاتفوتج ..

فاطمه: مو وقته .. سمعيني .. فارس اخوي فيه شي ..

مريم حطت يدها على قلبها: فديت اخوي شو فيه ؟؟

فاطمه: مادري والله .. تخيلي انه اليوم فالبيت ولاحد يدري عنه .. الا لما جى محمد ولد عمي وطلب يروح له الغرفه .. انا انصدمت .. لانه كان مبين عليه ان في شي كبير صاير .. وللحين ما طلع من عنده ..

مريم: فارس فالبيت!! مستحيل يكون نايم لين هالحزه او ابكر الصبح .. يمكن يكون تعبان فديته

فاطمه: مستحيل .. تعرفين فارس شلون يكره المرض ويجمعنا حوله لو مرض فديته ..

مريم: صح كلامج ..

دخلت عليهم ايمان: ليش محمد ولد عمي هني .. شو صاير ؟

فاطمه التفتت على ايمان: جاي عشان فارس ..

ايمان: شووو .. ليش شو فيه فارس؟ .. انا على بالي انه جاي ياخذ شي من غرفة فارس .. لاني سمعت حس امي معاه بغرفة فارس ..

مريم: تصدقين انه فالبيت ولاحد يدري عنه

ايمان: اخوي فيه شي ..

فاطمه: ايه عليه والله ..

ايمان: ليكون من مكالمة ذاك اليوم .. تذكرون لما ودانا البحر ..

فاطمه ومريم باهتمام: اي..

ايمان: فاطمه ما قلج هو شو فيه ؟؟ ولا جاب لج طاري المكالمه كلش ..

فاطمه: لأ .. حاولت اني اخليه يتكلم بس حسيته متحفظ .. وتصرفاته غريبه .. تدرون امس لما رحنا المستشفى حق جاسم .. طلعنا انا وهو مع بعض بس خذني مكان غريب ..

ايمان: مكان غريب .. كملي ..

فاطمه: اي .. تخيلوا خذني على منطقه بعيده ومهجوره وتخوف .. وتم يقولي كلام استغربت منه .. هو زعلني امس .. وكان فديته يبي يراضيني .. ولما وصلنا ذيك المنطقه .. انا قلت يبي يمازحني عشان يراضيني او انه يخوفني لان المكان كان يخوف .. الا قالي .. تخيلي يا فطيم ان في ناس عايشين في هالبيوت ولا يحصلون اكل .. انا تعجبت من الكلام وحسيت انه في خاطره غير هالكلام بس مو عارف شلون يبدى .. ولما سالته عن السبب اللي خلاه يجيبني المنطقه المهجوره .. تخيلوا انه مارد علي بس اكتفى بإبتسامه وتم ساكت لين وصلنا البيت .. وصدقوني يا خواتي ان فارس وراه سالفه .. لا والسالفه شكلها كبيره

ايمان: صدقوني .. اخونا فيه شي بس مو عارف كيف يوصله لنا ..

مريم: صح .. ولازم احنا نروح له ونشوف شو في خاطره .. يمكن يصارحنا ويرتاح ..

تموا الخوات يتناقشون في موضوع اخوهم .. اما ام فارس دخلت على فارس ومحمد وشافت حالة ولدها ..

ام فارس: شلونك محمد ابوي ..

قام محمد: هلا والله مرت عمي .. انتي شحالج ؟

ام محمد: طيبه طاب حالك يبه .. فارس شو فيك يبه ؟

فارس: ولا شي يمه .. بس تعبان واليوم مالي خاطر اروح الشركه .. قلت ارتاح شوي

ام فارس: وانت محمد شو عندك مارحت الدوام ؟

محمد ارتبك: انا ماخذ اجازه كم يوم من الشغل ..

ام فارس: يعني انت وطبجتك فارس ما رحتوا اليوم ؟؟

محمد بابتسامه مصطنعه: ههههههه انا اجازه .. بس هو دلع ..

ام محمد ضحكت: ههههههه فديته يدلع ؟؟ على شو ..

فارس ابتسم بحزن لامه: امي ادلع على محمد ..

ام فارس: يا حلاة الدلع والله .. هههههههه .. زين ابوي اخليهم يجهزون لكم الغدا في الميلس ولا يجيبونه لكم هني ..

محمد: لا مرت عمي ما قصرتي .. انا بروح البيت بعد شوي ..

ام فارس: مايصير يا ولدي .. تغدى عندنا

محمد: ما قصرتي الغاليه .. الاهل ينتظروني فالبيت

ام فارس: اللي تشوفه يبه .. طلعت عنهم ام فارس ولا صدقت كلمه من اللي قالوها .. حست ان ولدها فيه شي بس ماحبت تتكلم جدام ولد عمه .. بعد فتره نزل محمد وترك فارس مغصوب .. فارس اجبره يرجع البيت ويتلاقون العصر عشان يروحون بيت مناف .. وهو نازل طلعت في ويهه فاطمه من غير شيله .. تم يطالعها تذكر كلام ساره .. نزل راسه واعتذر .. وطلع من بيت عمه وفاطمه ماخذه تفكيره من كلام زوجته .. وصل بيتهم حزة الغدا وشاف الاهل كلهم متجمعين يتغدون الا زوجته .. راح الغرفه ولقاها قاعده في صالتهم وكان مبين عليها الغيض والقهر .. دخل الغرفه يبي يبدل ملابسه .. دخلت وراه ساره ..

ساره: ها .. رحت لها..

محمد ما كان في باله الا سالفة مناف اللي تأثر فيها وايد .. التفت عليها وقال لها

محمد: اي رحت لها فديتها بنت عمي ..

ساره بطلت عيونها وماتوقعت رد محمد ..

ساره: صج انك ماتستحي على ويهك ..

رفع ايدينه في الهوا ومسكها من كتوفها ودزها بقوه على الكبت ..

محمد: سمعيني فضيها سيره .. ترا اللي فيني كافيني وماعندي وقت لخرابيج سمعيني .. اللي فيني مكفيني مكفيني

ساره دزته عنها: لازم مكفيك .. بعد ما شبعت من شوفها وش لك فيني الحين ...

محمد ماقدر يقعد معاها في نفس الغرفه .. طلع وراح غرفة اخوه علي المعاقب ..

محمد: السلام عليكم ..

علي باحراج: وعليكم السلام .. هلا والله

محمد: عطني جلابيه من عندك .. وابي ابدل ملابسي ..

علي: انشالله .. وحس ان بين محمد وزوجته شي ..

بدل محمد ملابسه وانبطح على سرير اخوه ..

محمد: علي .. لاتقول لاحد اني عندك .. وقعدني الساعه 3 ونص اوكي ..

علي: انشالله ..

نام محمد مقهور .. وعلي كان يتأمل اخوه وهو نايم .. دخلت الريم وكانت شايله الغدا لاخوها وشافت محمد على سرير علي..

الريم: محمد شو يسوي هني ؟؟

علي: مادري .. بس موصيني ماقول لاحد انه نايم عندي..

الريم: غريبه .. زين تعال نتغدى يلا فديتك ..

علي طالع اخته وخنقته العبره " آه يالريم قلبج كبير .. الله يخليج لي انشالله ويستر عليج"

تغدوا مع بعض .. وبعد ماخلصوا غداهم .. مسك علي يد الريم وباسها .. الريم استغربت من حركة اخوها ..

علي: انا لو اقولج آسف من اليوم لين اخر نفس لي .. والله ماكون اعتذرت لج عن اللي بدر مني يا اختي ..

الريم: افا عليك يا علي .. احنا اخوان وانت اخوي الاكبر مني .. وانا مابي اخسرك .. ولا اخسر اي احد منكم .. ومستحيل افرقكم انا اجمعكم لانكم عزوتي يا اخواتي .. بس طلبتك يا علي قول تم..

علي: اللي تآمريني فيه انا حاضر وتحت امرج ..

الريم: يا عل عمرك طويل وعسانا مانفترق .. اسمع يا اخوي الغالي .. ابيك تراجع نفسك وترجع لربك .. خل عنك السوالف الل صادك فيهاخالد .. سمعتك من سمعتنا يا اخوي .. انت قدوتي انا واسماء وفهد وسلطان .. الله يخليك يا علي ..

علي: اوعدج يالغالي اني ارجع علي ولد حمد اللي تربه على الدين ..

حضنت الريم اخوها وباست راسه .. استأذنت منه ونزلت ..

" الحين خل نرجع لورا شوي .. لما فهد طلع نص الليل الحوش ولحق القطوه وذ*حها .. شو كان السبب ورا تصرف فهد؟!"

فهد: من انتي؟؟

........ : انا اللي شافها اخوك خالد ..

فهد: شو تبين فيه ؟؟

........ : ما يخصك .. بس ابيه وباخذه منك وباخذ مريم معاه ..

فهد يتوسل: الله يخليج لا تاخذين حد .. لو تبين اخذيني انا ..

........ : ما بيك انت .. انت حتى ما تتكلم ..

جرحته بكلامها ..

فهد: بس انا اتكلم معاج الحين .. وصوتي حلو

........ : انت تتكلم لاني انا ابيك تتكلم ..

فهد: الله ياخذج .. ويقطج بالنار ..

........ : هههههههههههههههههههههههههههههههههه

قعد فهد من النوم متخرع .. وكان معرق وقلبه يدق بقوه .. على طول طلع من الغرفه وراح غرفة الريم .. طق الباب وكان يصيح من الخوف .. طلعت له الريم

الريم: شو فيك فهود ؟؟ فهد حضنها ودموعه على خدوده ..

الريم: تعال فديتك .. فرشت له على الارض ونام بهدوء .. وحس بالامان عند اخته

لما قعد اليوم الثاني .. ترجى الريم انها ماتقول لاحد انه نام عندها .. والريم حاولت تفهم سبب خوفه .. بس كان خايف انه يتكلم ..

الريم: وهاي كل اللي صار يبه .. وتكرر هالشي اكثر من مره يبه .. يجيني نص الليل خايف وينام عندي .. وامس انصدمت باللي سواه .. واصلا يجيني الغرفه ميت من الخوف .. شلون تجرأه يطلع من البيت ويركض في هالظلام .. ؟!!

بومحمد: امس لما شلته وحضته .. كنت احس بدقات قلبه على ص*ري من الخوف والروع اللي فيه مادري شو فينا .. اعوذ بالله من الشيطان الرجيم ..

ام محمد: وانا اسبحه كان يتفلت حوله وخايف .. لما خذته للسرير ينام ما تركني الا لما غط في النوم ..

الريم: يبه نجيب مطوع المسيد يقرى عليه احسن ..

بومحمد: بكلم محمد يشوفه .. لاحول ولا قوة الا بالله .. وفجأه حس بومحمد بيد صغيرةعلى كتفه التفت وكان فهد واقف ورا ابوه ويطالع امه واخته بخوف وقعد في حضن ابوه ..

فهد: يبه .. انا ذ*حتها .. الحين خلاص ماتقدر تسوي شي لخالد اخوي او مريم بنت عمي ..

الكل متعجب: مريم ؟؟

فهد: اي .. الجنيه اللي تطلع لاخوي خالد .. طلعت لي .. وخلت لي صوت .. وكان صوتي حلو يبه وكلمتها .. وهي قالت لي انا باخذ خالد اخوك ومريم بنت عمك .. وانا اللي اخليك تتكلم .. وانا قلت لها تاخذني انا بس قالت مابيك لانك ماتتكلم .. وانا احتريت عليها وقلت لها الله بياخذج وبيقطج بالنار .. وكنت اشوف قطوه سوده واقفه عند الدريشه بعد ما اقوم من النوم .. اطالعني وتقولي .. باخذهم وتضحك يبه صوتها يخوف .. وامس الحمدلله اني ذ*حتها وحتى ما حلمت فيها كلش .. انذهلوا الموجودين بكلام فهد .. ام محمد تمت تصيح .. وبومحمد مو عارف شو يرد على ولده .. اما الريم ما قدرت تحبس دموعها وتمت تصيح في حضن امها ..

يا دمعة الليل الطويل .. يا سر احزاني .. شايل معاي المستحيل .. والصبر عنواني .. سيف الصبر ذ*حتني يا سيف الصبر .. غربه و*در .. آآآآه من الغدر "

نزلت مناف مع اخوها فيصل من سيارة فارس .. وقفت عند باب البيت ومو قادره تتحرك .. ومو قادره توقف دموعها اللي انهمرت على خدودها مثل الشلال .. فيصل كان ماسك يد مناف بقوه ومنزل راسه .. نزل فارس من السياره ..

فارس: شو فيج؟؟ دخلي البيت ...

مناف رفعت راسها وتلاقت عيونها بعيون فارس .. قرت الحزن اللي بعيونه .. شافت حزنهم في عيونه .. وتأثره بموت اخوها نايف .. وقرت شي ثاني بعيون فارس .. وبسرعه نزلت راسها ..

اما فارس فشاف فعيونها الحزن وكان وده يمسح دموعها .. وكان يشوف خوفها في عيونها من مواجهة امها ..

فارس: ادخلي يا مناف .. لو ما قلتي لها الحين بتقولين لها بعدين .. ومردها بتعرف .. لا تهربين من واقعج .. ما نقدر نهرب من اقدارنا المكتوبه لنا ..

مناف منزله راسها: صح كلامك .. مسحت دموعها .. وجزاك الله خير يا فارس ..

فارس: يلا يبه .. روحوا داخل الحين .. وانشالله العصر بمركم بعد الصلاه .. تآمرني على شي ؟

مناف: لا مشكور ..

فارس: الله يحفظكم .. التفت على فيصل وناداه ..

فيصل: نعم ..

فارس: اسمعني يا فيصل .. خلك قوي انت المسؤل عنهم الحين .. ارجوك لاتضعف جدامهم ..

فيصل: انشالله ..

دخلت البيت بخطوات ثقيله .. وكان فارس يراقبها واخوها فيصل لين دخلوا البيت وسكروا الباب .. كان فارس متماسك جدامهم .. خاف انه ينهار من هول الموقف اللي عاشه معاهم ومن الموقف اللي بتعيشه مناف مع امها واخوها الصغير فالبيت .. اول ما ركب السياره ساق بسرعه وابتعد عن بيتهم .. وقف السياره وحط راسه على السكان .. وكان يستعيد الاحداث اللي مرت عليه .. كان يشوفها مثل الفلم .. نفس التفاصيل والاحداث .. تنفس بعمق وغمض عينه .. تم فتره مغمض ويحس يرعشه بجسمه .. استجمع قواه وحرك وراح البيت ..

اما مناف وفيصل اول ما دخلوا البيت كانت امهم في استقبالهم بعيون تايهه تدور على نايف ..

ام مناف: ها مناف يمه .. وايد تأخرتوا ..

مناف منزله راسها: ................. فيصل روح داخل ارتاح .. راح غرفته و وقف عند باب الغرفه يراقب امه واخته ..

ام مناف تسأل وهي عارفه الجواب: وين اخوج يمه ؟؟ ..

مناف بخوف: يمه .. نايف .. نايف ..

ام مناف قربت من مناف ومسكتها من كتوفها: خلاص يعني .. راح نايف راح .. نزلت دموعها وهي تتكلم .. نايف شمعة البيت .. نايف اللي ما ينام الا بحظني .. نايف اللي ما شاف ابوج .. نايف اللي كل يوم اشيله على كتفي والاعبه .. ويرسم لي طيور و ورد .. نايف ما بسمع حسه فالبيت .. خلاص ناااايف .. وقعدت على الارض تصيح ولدها .. وتض*ب نحرها من الهم .. نزلت لها مناف تهديها ..

مناف: يمه الحمدلله على كل حال .. الحين نايف مرتاح عند ربه .. والله موته احسن له من العذاب اللي عاشه في هالدنيا .. ام مناف تماسكت جدام بنتها وحضنتها ..

ام مناف: آه يا مناف .. كنت حاسه انه مب راجع معاكم ..

مناف تصيح: يمه راح نور البيت .. راح نايف .. آه يا نايف

فيصل كان واقف يطالعهم ويصيح بهدوء " امي كبيره وتحملت الموقف .. بس عبود شبيسوي "

ام مناف قامت ومسحت دموعها: قومي مناف يمه .. قومي ارتاحي بغرفتج .. من امس ما نمتي .. فيصل يبه تعال نام مع اختك.. مناف عجبها تماسك وقوة امها .. وقامت مع امها وراحوا غرفتها وانبطحت على السرير وغطتها امها .. وتمت تمسح على راسها وتقرى عليها لحد ما نامت مناف نزلت عند فيصل اللي كان جامد وايد جدام امه .. وقعدت