تناقضات

27

محمد: ههههه .. من يكون هاذي ؟ انتوا محد يسلم منكم ..

علي: صلوح بوقحفيه

فارس: ههاااااي .. صدتوه يعني ..

خالد: وقلت له لو شفتك مره ثانيه باذ*حك ..

محمد: شو سويتوا فيه ؟

علي: بردنا خواطرنا شوي ..

فارس: بس شوي .. جان قضيتوا عليه بعد ..

خالد: والله كان ودي .. بعد اللي سواه مو شوي هالنذل .. صج ما يبين في عينه ..

علي: سود الله ويهه .. يعني عزيناه ودخلناه وسطنا .. وفالاخير يقطنا في مصيبه .. ومحد راح فيها غير خلود اخوي ..

محمد: خلود .. من اللي تكلم فيهم و نكبكم ؟

خالد: هو مع ولد عمه هالخبل فصول ..

محمد: والله .. صج نذل ..

خالد: تخيل محمد .. ركضت فالظلام والشرطه تلاحقني .. حسبي الله عليه .. هلكني ذاك اليوم .. كنا حلوين وماشين على الخطه صح .. بس هو شو اللي خلاه ينكبنا ..

فارس: انتوا شو اللي كنتوا متفقين عليه اصلا ؟

علي: شوف كنا متفقين ان انا وخالد وحمد ولد بوسالم ن*د خيول عزبة جماعة خليل وربعه .. لانهم قبل السباق اتفقوا معانا ان لو فزنا عليهم ناخذ الخيل الاسود .. واحنا فزنا يوم خلود ركب الخيل وسابق خليل .. عاد هم ما عجبهم .. قالوا كلامهم وهم واثقين انهم بيفوزون على خالد ..

خالد: المهم قلت لخليل .. يلا على الوعد .. قالي انسى اعطيك الخيل الاسود .. اختار اي خيل الا الاسود .. عاد تعرفني لما اعصب .. سحبته من ثوبه ورضخته على الارض .. تجمعوا الشباب وباعدونا عن بعض .. عاد انا توعدتهم .. واتفقنا انا وعلوه وحمد نروح ن*د كل خيولهم من الاسطبلات .. وكل واحد من الشباب كان له مكانه يعني فصول كان يراقب ورانا .. احمد بن راشد كان سابقنا ويشوف لنا الطريق .. اما صلوح كان فالعزبه صوب البركه بروحه .. المهم يوم دخلنا عزبتهم الا الشرطه تشغل الليتات .. لان صلوح النذل مبلغ خليل من قبل .. وتعرف خليلوه خاله ضابط .. فكلمه او انهم بيسون لنا كمين .. تولعت الليتات وشردنا .. وهم شافوني ولحقوني انا بس .. باقي الشباب رجعوا العزبه .. مثل ما اتفقنا .. ان لو صار ما صار نرجع العزبه ولا كأن السالفه لنا ..

المهم تموا يلاحقوني فالظلام وانا ماشوف دربي الا اشوطح بين الشير اللي شمخت يدي وريولي .. وطحت كم مره وت**رت والله .. تذكر ركبي شلون كانت من الدم .. وماقدروا يصيدوني .. لاني انخشيت في سيارة ناطور العزبه من غير ما هو يدري .. وتميت طول الليل الهث بروحي والدم يقطر مني ..

علي: جاتنا الدوريه وتموا يدورون .. وسألونا عن خالد .. وقالهم حمد انه ما جا اليوم كلش .. وانا استغربت ان صلوح اختفى من العزبه بكبرها هو و ولد عمه هالخبل فصول .. ومن يومها ما شفناهم .. بس عرفنا انهم هم اللي انكبونا ..

فارس: صج نذاله .. بس هم ليش سوا جي ؟

خالد: تعرف صلوح مصلحجي .. و ولد عمه هالخبل ماله شخصيه .. معاكم معاكم .. عليكم عليكم ..

فارس: بس زين سويتوا فيهم ..

خالد: بعد ما برد خاطري فيه .. ودي اشوت ويهه تشوت هالنذل ..

محمد: خلود عصبي وايد .. هدي شوي

خالد: انا شفته فار دمي .. كان ودي انط من السياره واخنقه ..

فارس: اعرفك خلود .. من يوم احنا صغار اقشر .. تاخذ حقك بالطيب ولا بالقوه ..

علي: فديته اخوي ..

محمد: يا جماعه صارت 7 وبتتأخرون على الريال ..

الكل: يلا ..

طلعوا الشباب في سيارتين .. محمد ركب مع ولد عمه .. اما علي مع خالد اخوه .. وصلوا وجهتهم وخلصوا امورهم .. واتفقوا انهم يروحون المحكمه عشان يخلصون الاجراءات الماليه والقانونيه .. خلصوا من الريال على الساعه 8 ونص تقريبا .. وكلهم ركبوا مع فارس بعد ما خالد ركن سيارته عن الشركه .. راحوا يتعشون واتصلوا في سلمان ويوسف وفاضل وعزيز .. طبعا سلمان اعتذر .. اما يوسف فسلمان طلب منه يروح معاهم .. عشان يغير نفسيته من بعد اللي صار .. تلاقوا الشباب في المطعم اللي غسلوا فيه الصحون من فتره .. طبعا فارس ومحمد ما يدرون باللي صار .. اول ما دخلوا الا بذاك الاستقبال من مدير المطعم ومن اللي يشتغلون هناك .. فارس طالع محمد باستغراب ..

فارس: شو السالفه ؟

محمد: مادري والله .. التفت على خالد .. خلود شوالسالفه ..

خالد: بعدين اقولك .. تعال سلم على مدير المطعم بعرفكم عليه

محمد وفارس رفعوا حاجب وطالعوا بعض .. ( هالحركه دوم يسونها مع بعض ) .. سلموا على مدير المطعم وقعدوا على طاوله وحده كلهم .. والخدمه لهم كانت غير باقي رواد المطعم .. خدمه خاصه طبعا .. قال خالد لمحمد وفارس سالفة غسيل الصحون .. ماتوا من الضحك على عبطهم ..

خالد: انا ما كنت حاب الفكره ومستحي .. ريال شكبري اسوي جي .. بس الشباب اصروا علي .. والله استانست صج يوم ما ينسي ..

محمد: وحليلكم يالمقاليع ..

فارس: ههههه ..

............

تونسوا الشباب في المطعم .. بعد وناستهم كلن توجه لروتينه .. محمد وفارس مع بعض .. خالد وعلي عبدالعزيز ويوسف راحوا ميلس احمد بن راشد .. اما فاضل رجع البيت لانه وعد سلطان وجاسم وفهد واحمد يوديهم يشترون اشرطة سوني الجديده .. كانت الساعه 10 تقريبا .. اول ما دخل فاضل حشروه الشباب ..

جاسم: يعني متى نروح ؟

سلطان: احلف يعني شوف الساعه كم الحين ؟

جاسم محتج: اكيد المحل سكر الحين ..

فاضل يطالعهم ومتكتف: خلصتوا ؟

سلطان: اي شوف الساعه كم الحين ..

ورجع جاسم يحتج: يه .. مواعدنا الساعه 9 .. وجاينا الحين ..

سلطان: مواعيدك مب شي ياخي ..

فاضل يطالعهم ورد ببرود: خلصتوا ؟

احمد ميت من الضحك .. وفهد مبتسم ..

سلطان: الحين شلون بنروح ولا لأ ؟

جاسم: وين نروح شوف الساعه كم الحين ..

سلطان: ما ضيعنا الوقت ولا شي . .انت جاي متأخر .. لو رحنا بيكون المحل خلاص سكر ..

فاضل: شوف ساعتك ..

شاف سلطان ساعته: الساعه 10 و ربع ..

فاضل: انتوا كل مره متى تروحون؟

سلطان تم يتلفت حواليه: زين يلا نحرك عيل ..

فاضل مشى وراهم: مب صاحين انتوا ..

احمد ميت من الضحك على جاسم وسلطان .. وصلوا المحل .. اول ما دخلوا الشباب المحل انتشورا كل واحد منهم في زاويه يختار له شريط .. اما فاضل كان قاعد 5يسولف مع صاحب المحل ..

فارس ومحمد مروا على سلمان البيت .. وقعدوا عنده شوي .. تطمنوا عليه و خذوا اخباره وقالوا له باللي صار على البنت المسكينه ..

فارس: مرينا على الضابط المركز ..

سلمان: ها بشروا ؟

فارس: البنت استخفت .. من اللي صار لها .. والاخو مسكوه واللي معاه .. داهموا المكان المشبوه ومسكوا الاغلب .. لان في بعض الشباب ما كانوا موجودين ..

محمد: لا حول ولا قوة الا بالله ..

سلمان: امس ما قدرت انام .. صورت البنت في بالي .. مب قادر انسى صوتها .. ولا شكلها المسكينه .. مالومها لو استخفت ..

محمد: الله يعينها هالمسكينه .. من الصدمه صادتها ردت فعل ..

فارس: حسبي الله ونعم الوكيل ..

قعدوا شوي عند سلمان وبعدين استأذنوا لما تطمنوا عليه .. طلعوا يحوطون الشوارع بالسياره .. رن جوال فارس والرنه كانت ( عالي مستواه ) .. التفت على محمد وطول على صوت الراديو ..

فارس: هلا والله ..

مناف بعصبيه: يعني اذا ما اسأل عنك ماتعرف انت تسأل .. يمكن مت ولا صار علي شي ..

فارس باستغراب: سمالله عليج يا قلبي شو هالكلام .. هدي هدي ..

مناف: ايش اهدي .. متى مكلمتك انا اليوم ؟

فارس: شوي شوي فديتج ؟

مناف بحزن: الساعه كم اخر مره كلمتك اليوم رد علي لو سمحت ؟

فارس: شو فيج معصبه يا قلبي ..

مناف: خلاص مافيني شي .. مب معصبه ..

فارس: يا قلبي انتي .. انشغلت اليوم ..

مناف: شحالك ؟

فارس: مناف ..

مناف: هلا ..

فارس: حياتي انتي .. ليش زعلانه ؟

مناف: من انا ؟ لا مب زعلانه .. قولي شسويت اليوم ؟

فارس: مناف .. كلميني عدل ولا تكابرين ..

مناف: فارس .. وصاحت ..

فارس بخوف: مناف حياتي شو فيج ؟ ليش تصيحين ..

مناف وسط دموعها: فارس .. وسكتت ما قدرت تكمل من الصياح ..

فارس اشر لمحمد انه يوقف السياره .. محمد على طول وقف السياره .. فارس نزل من السياره يكمل مكالمته مع مناف .. ومحمد كان مستغرب من فارس ..

محمد " ذ*حك الحب يا فارس وصرت تداري على مشاعرها .. ايه عليك يا ولد عمي "

فارس: مناف .. ردي علي .. مناااف

مناف تشهق من الصياح: فارس . . فـ فـ فارس

فارس: عيونه انتي .. ليش تصيحين ؟ ليش يا قلبي .. اهدي شوي وقولي لي شو فيج ؟

مناف تمت مناف تصيح .. وهدت نفسها .. استجمعت قواها وتكلمت ..

مناف: فارس ..

فارس: يا لبيه فارس انتي ..

مناف: اليوم حلمت بنايف اخوي .. فارس وحشني اخوي .. وصاحت ..

فارس: فديت قلبج انا .. الله يرحمه .. اكيد كان مرتاح فالحلم ..

مناف وتمسح دموعها: الحمدلله .. كان ويهه منور .. وكان يضحك ..

فارس براحه: فديت قلبج .. هاي اللي مزعلج ..

مناف بحزن: كنت محتاجه اكلمك او ما قعدت من النوم ..

فارس: ليش ما اتصلتي يا قلبه ..

مناف: كنت احاتيك من سالفتك اللي قلتها لي امس .. وماحبيت اتصل فيك خفت تكون مشغول او حد حولك .. بس انت ما اتصلت فيني كلش .. وهالشي ضايقني

فارس: يا قلبي انتي يا مناف .. انا اسف بس انشغلت شوي اليوم .. وانتي لج الضوء الاخضر .. اتصلي وقت ما تبين يا قلبي ..

مناف: فديتك يا فارس ..

فارس: ها .. عيديها ..

مناف انحرجت: انت وين الحين ؟

فارس: فديت قلبج عيديها ..

مناف منحرجه: فااارس ..

فارس ابتسم: يا عيونها وقلبه انتي ..

مناف: انت وين الحين ؟

فارس: فالشارع ..

مناف باستغراب: اي شارع ؟

فارس: انا قلت لولد عمي يوقف ونزلت من السياره عشان اخذ راحتي معاج فالكلام .. فديتج خفت عليج يوم صحتي ..

مناف باحراج: اسفه يا فارس ..

فارس: فارس بشحمه ولحمه تحت امرج يا مناف ..

مناف" فديته والله": ايه عليك يا فارس ..

فارس: زين مناف ..

مناف: هلا ..

فارس: ودي اشوفج ..

مناف بجديه: لا فارس .. مب كل يوم والثاني تقول ابي اشوفج ..

فارس انصدم ومارد عليها ..

مناف بهدوء: فارس ..

فارس بصدمه: عيونه انتي ..

مناف " فديته قلبه كبير": لاتزعل يا فارس .. بس

فارس يقاطعها: فاهم عليج .. انا حاس نفسي وايد خذت عليج .. وضغطت عليج وايد .. واحرجتج بهالطلب ..

مناف" والله ودي بشوفك كل يوم يا فارس ": مو مشكله حصل خير ..

فارس ابتسم: ولا يهمج الغاليه ..

مناف: والله قلبك كبير يا فارس ..

فارس: انتي اللي دلوعه منافووو

مناف: شنو منافوو .. ياهل انا عندك ؟

فارس: فديت دلوعتي مناف .. ايه عليج بس .. ركب السياره وهو يضحك مع مناف .. حرك محمد وهو مستغرب من حال ولد عمه .. التفت محمد على فارس ..

محمد: فديت اللي غاص عميق في بحر الحب ..

فارس مبتسم: لحظه شوي يا قلبي .. طالع محمد وهو مبتسم .. حمودي .. خل عنك السوالف ..

محمد ضحك: ههههههههه .. وأشر لفارس يسكر ..

فارس: زين يا قلبي باكلمج بعد شوي .. سكر من مناف والتف على ولد عمه ..

محمد: انا بروح الحين بيت اهل المدام ..

فارس: مو جنه الوقت متأخر ؟

محمد: عادي .. بتستقبلني اي وقت ..

فارس ابتسم: ولا يهمك .. نروح ..

راحوا بيت اهل ساره زوجة محمد .. وصلوا وتم محمد فتره فالسياره متوتر وبعدين نزل .. اتصل في ساره وقالها انه عند الباب ..

محمد: فروس .. انت خلك قريب توقع اي لحظه اسوي لك ترجع لي .. لاتروح بعيد ..

فارس: ولا يهمك .. الله يرضى عليكم ..

محمد بتوتر: فديتك فروووس .. يلا سلااام

فارس: الله يرعاك ..

دخل محمد ميلس بيت اهل ساره .. كانت الساعه 11 ونص تقريبا .. انتظر فالميلس 5 دقايق على ما نزلت له ساره .. اول ما فتحت الباب التقت عيونها بعيون محمد .. تساقطت دمعات على خدها وهي تركض لمحمد بشوق وتحضنه .. لـــحـــــظه .. هاي كان خيال محمد .. نرجع للواقع .. دخلت ساره وهي منزله راسها .. وقف محمد وتم يراقبها وهي تمشي بخطوات واثقه باتجاهه .. مد يده مشتاق للمس يدها .. بتكبر صدت عنه وقعدت بالكرسي اللي جنبه .. ماستغرب هالحركه .. عداها لها وقعد بكل هدوء ..

محمد: ساره ..

ساره: نعم ..

محمد: ليش تسوين جي ؟ انتي شو شفتي علي عشان تشكين فيني ؟

ساره: .................

محمد: ساره حياتي .. انا جاي اتفاهم معاج .. ابي اخذ اللي بخاطرج ..

ساره: ماشوفك افتكرت فيني طول الفتره اللي راحت ..

محمد" قاسيه": كنت ماعطج فرصه تفكرين بالمشكله وتراجعين نفسج .. محد فينا كامل .. كلنا نغلط ..

ساره بعصبيه: بس انا مو غلطانه بشي ..

محمد: المصيبه لما الواحد ما يعترف بالغلط ويستمر فيه ..

ساره: شو قصدك ؟

محمد: كلامي واضح .. علميني يا ساره .. شو هالافكار اللي جاتج مره وحده ؟

ساره: ما جاتني الافكار مره وحده بس في ناس جزاهم الله خير فتحوا عيوني على اشياء انا كنت غافله عنها ..

محمد بقهر: حسبي الله ونعم الوكيل ..

ساره التفتت عليه: ليش ؟

محمد: لان اللي لعب بعقلج هدم حياتنا ..

ساره: الا ما هدمت ولا شي .. انا اللي كنت غ*يه ..

محمد: انتي عن ايش تتكلمين ..

ساره: بنت عمك ..

محمد: يا بنت انا حلفت لج ان ما في قلبي شي لها .. محد خذ قلبي الا انتي .. زين بسألج .. انتي شفتي علي شي ولا على فاطمه بنت عمي ..

تقاطعه ساره: لا تقول اسمها هالحقوده ..

محمد يكمل: بنت عمي مو حقوده .. احفظي ل**نج يا بنت الناس ..

ساره: اي تعزها علي ..

محمد بعصبيه: ماعزيت حد عليج .. سمعيني يا بنت الناس .. بنت عمي طول عمري عادها مثل اختي ..

ساره: قبل ممكن اصدق هالكلام .. لكن الحين مستحيل ..

محمد: انتي ما فكرتي ليش هالناس اللي فتحوا عيونج قالوا لج هالكلام؟

ساره: والله يبون مصلحتي ..

محمد: وانتي يالعاقله تشوفين ان مصلحتج بانج تهدين بيدج كل اللي بنيناها مع بعض ؟

ساره: قلت لك كنت غ*يه قبل ..

محمد: ساره فديتج .. انتي اكبر من هالكلام كله .. انتي حب حياتي .. انتي زوجتي ام عيالي .. ساره حبيبتي مافكرتي في عيالج قبل ماتسوين هاي كله ؟

ساره" عيالي": خلك من هالكلام كله يا محمد ..

محمد: انا اتكلم فالهوا .. شلي الافكار من راسج ؟ وخلي العذال عنج .. بيهدمون حياتج ومحد بيخسر الا انتي ..

ساره: يوم اكتشتفت الحقيقه ما بخسر شي .. بس لو تميت غافله وعلى ويهي بخسر كل شي ..

محمد وقف: خلاص خلي الحقيقه واللي قالوا لج الحقيقه ينفعونج .. انا ما راح استمر معاج بهالطريقه .. انتي في صوب وانا في صوب .. قعدي بيت هلج مع اللي هدموا بيتج .. وانا مع عيالي في بيتنا بكرامتي ..

ساره بطلت عيونها: هاا .. محمد انت شو تقول ؟

محمد وهو رايح عند الباب: خل تنفعج افكارج .. شكلهم غسلوا مخج عدل .. عيالج ما راح تشوفينهم .. جيتج بالطيب وانت ما رضيتي .. ماعندي اسلوب غير الطيب .. هاي اخر مره تشوفيني فيها بالحلال .. ومسك يدها وباسها .. ساره كانت واقفه تسمع محمد بذهول .. ترك يدها وطلع من غير رجعه ..

ساره تمت واقفه مكانها منصدمه وماتسمع غير ( هاي اخر مره تشوفيني فيها بالحلال ) .. قعدت على الارض تصيح .. ما عرفت كيف تتصرف .. تروح لمحمد وتترجاه يرجع في قراره او تنسى لانه ي**نها مثل ما تفكر .. رن جوالها وكانت المتصله صديقتها عليه ..

عليه: ساره .. بشريني شسويتي ؟

ساره وسط دموعها: بيطلقني ..

عليه مبتسمه: احسن .. وش لج فيه ..

ساره: بس ما توقعت الامور توصل لهالدرجه ..

عليه: هو الخسران .. ما راح يقلى مثلج .. وبنت عمه فطوم قدره .. يبه قومي غسلي ويهج .. ولا عليج من كلامه ..

ساره: عليوه وعيالي ؟

عليه: مردج بتشوفينهم ..

ساره: بس انا امهم .. ماقدر اصبر عنهم ..

عليه: حبيبتي بتتعودين .. قومي اخذي لج شور انعشي فيه نفسج شوي .. وبعدها كلميني ..

ساره: زين ..

سكرت ساره من عليه اللي هدمت حياتها .. لان عليه غيرانه .. كانت متزوجه و زوجها طلقها لانها مريضه بالشك .. دوم تشك فيه .. بس طلقها بدون عيال .. عشان جي قسى قلبها .. خربت حياة ساره لانها تغار وتموت قهر لما تشوف ساره فرحانه بحياتها .. حاولت انها تفرق بينهم من قبل بس ما قدرت .. و اخيرا قدرت لما اقنعتها بفكرة ان في حب قديم بين فاطمه ومحمد .. ساره لانها تحب عليه و**رت خاطرها لما تطلقت فكانت دوم الصديقه الوفيه واللي حاضره لها وقت طلبتها عليه .. بس عليه لانها خبيثه فكانت تتمسكن .. وقدرت تخرب عليها حياتها .. ( هل محمد بيطلق ساره؟ وساره شو ردة فعلها من بعد هالسالفه؟ ) ..

محمد المسكين طلع من عند ساره وتمنى لو انه ماتزوج ساره من البدايه ..

محمد" لو تزوجت فطيم بنت عمي احسن .. رشحوها لها بس فضلت عليها ساره .. والله واغتريت فيج يا ساره بس راح اخليج تتحسفين على غبائج .. خلي العذال ينفعونج .. " ركب السياره وفارس التفت عليه ..

فارس: بشر حمودي ؟

محمد ابتسم مغصوب: لا جديد .. حرك ..

فارس " الله يعينك يا محمد": ولا يهمك ..

كانت الساعه 12 وربع .. محمد طلب من فارس انهم يروحون بيتهم ..

محمد: فروس .. خل نروح بيتكم

فارس: زين ولا يهمك ..

وصلوا بيت بوفارس .. دخلوا الصاله وكانت مريم متابعه التلفزيون اما فاطمه كانت توها داخله الصاله .. شافت محمد ورجعت بسرعه لانها ما كانت لابسه شيله ..

محمد " فديت هالشوف والله .. آآه برد خاطري الحين "

فارس: سوري فطيم .. حياك محمد ..

مريم: حيالله محمد .. شحالك ولد عمي ؟

محمد: هلا بالعروسه .. شو اخبارج ؟

مريم انحرجت: الحمدلله ..

محمد ضحك عليها: ههههههه .. حلاتين على اللي تستحي ..

فارس: لا تحرج اختي لو سمحت .. عطنى مجال ..

مريم: عاااد .. فارس ..

محمد: اخوج ذي نذل ..

فارس: مرايم .. تصدقين ؟

مريم تقهر فارس: الحين صدقت ..

محمد وفارس: هههههههههه

محمد" وينها فطيم فديتها" ..

فارس: قومي سوي لنا عصير لو سمحتي لو ما عليج امر واذا ما فيها كلافه عليج ..

مريم: حشى فارس .. شو طالب انت عشان تقدم لي هالموشح كله ..

فارس: لازم .. هههههههه

محمد: يستخف دمه الاخ ..

فارس التفت عليه: غصبن عنك دمي خفيف ..

محمد: مرايم .. من ايدج الحلوه عصير

مريم: ان شاء الله ..

فارس: هووووووب .. دكتور فالغزل حمودي ..

مريم: حمودي .. حلوه هاذي .. ههههههههه

محمد: باصفقه اخوج .. خليه عنج ..

مريم: انا بروح اسوي العصير قبل ما تجننوني .. وطلعت عنهم .. ومحمد ينتظر دخول فاطمه في اي لحظه .. كان ينتظرها بشوق ..

محمد " آآه يا فطيم .. خذتي عقلي .. "

فارس: وين رحت حماده ..

محمد: حماده ان شاء الله يصفقك ..

فارس ضحك بصوت عالي: ههااااااااااااااااااااي ..

محمد: وجع ..

فارس: عسل على قلبي يا قلبي .. رن جوال فارس بس هالرنه كانت تبيه بوصول رساله .. فتح الرساله وقراها وابتسم .. محمد يطالعه ومبتسم ..

محمد: شو هالمسج .. ويسوي نفسه انه يبي يشوف الرساله .. وفارس يبتعد عنه ..

فارس: وخر مناك ..

محمد: زين ابي اعرف ردك على الرساله ؟

فارس: حمادوووووو

محمد مسك فارس من اذنه: من حمادوووو

فارس: آآآي ي ي .. محد .. هد اذني ..

محمد: بتعيدها ؟

فارس: آخر مره

محمد: قول توبه

فارس: آي آي .. توبه توبه ..

محمد ترك فارس: اسود الويه ..

دخلت فاطمه وشافتهم بهالمنظر .. غصبن عنها ضحكت ..

فاطمه باست فارس: شحالك اخوي ..

محمد كان يطالعها باعجاب .. التفت عليه فاطمه وتلاقت عيونها بعيون محمد .. نزلت راسها بخجل ..

فارس: طيب فديتج اختي ..

محمد: شحالج فطيم ؟

فاطمه وهي تقعد جنب اخوها: الحمدلله .. انت اخبارك واخبار اليهال ؟

محمد: طيبين يسرج الحال .. تنفس براحه .. ابتسم وطلع جواله تم يتعبث فيه ..

فارس: شحالج الغاليه ؟

فاطمه: تمام فديتك .. انت شو اخبارك؟ ما شفناك اليوم ؟ اشتقنا لك

فارس: ايه عليج اختي ..

فاطمه: اليوم بابا استغرب انك طالع من الصبح ..

محمد" يا ويل حالي على الدلع انا .. بابا .. حلوه طالعه من حلجها" ..

فارس: كان عندي شغل متراكم مال كم اسبوع ..

فاطمه: زين خالد مو مقصر ..

فارس: اعرفه خالد شغول .. بس في اشياء لازم اشيك عليها بنفسي .. وفي اشياء خالد يشيك عليها ..

فاطمه: اهاا .. يعطيكم العافيه ..

فارس: الله يعافيج .. التفت على محمد .. بن عمي .. شو هالهدوء ؟

محمد رفع راسه وتلاقت عيونه بفاطمه اللي كانت سرحانه فيه: لا .. بس كنت اشيك على جوالي ..

فارس: شو تشيك رسايل الحب والغرام .. رن جوال فارس والرنه ( عالي مستواه ) ..

محمد: لا مكالمات الحب والغرام .. رد بس ..

فارس ويهه صار احمر .. كتم الرنه وابتسم .. فاطمه تمت اطلع فارس بشك ..

محمد يحرج فارس: رد ليش كتمت الرنه ..

فارس فاتن عليه: لا سكروا ..

محمد: علينا عاد .. ما شوفك تكتم الرنه ..

دخلت مريم بالعصير: تفضلوا احلى عصير من ايديني الحلوات ..

فاطمه: بس ثنين .. وانا ؟

محمد لا شعوريا: ولا يهمج .. تفضلي عصيري .. مد يده لها بالعصير ..

فاطمه انحرجت .. لانها ما كانت تقصد ..

فاطمه: لا عادي محمد .. كنت امزح .. بروح اسوي لي ..

محمد باصرار: لا والله تشربين عصيري ..

فاطمه: لا شدعوه محمد .. عيب والله عيب .. انت الضيف ..

محمد: من قالج بعطيج العصير جي .. لا يبه شربيه بالعافيه .. بس بتسوين لي عصير من ايدينج الحلوات .. نقزت مريم: لا يبه انا اللي ايديني حلوات ..

محمد: ولا يهمج .. ايدينج حلوات .. وفطيم ايدينها بعد حلوات ..

فاطمه كانت بتموت من الحيا ..

فارس: فطيم شربي العصير .. ولا عليج منه لاتسوين له عصير ولا شي ..

محمد: افااا ..

فاطمه: لا بسوي حق ولد عمي .. طالعت محمد بحنان .. ولا يهمك يا محمد اسوي لك احلى عصير ..

محمد" فديتها": تسلمين بنت العم .. فيج الخير .. مو مثل هالدب فروس ..

مريم: احلى الدب فروس ..

فاطمه: حدكم عن اخوي .. الا فارس ..

فارس: فديت اختي اللي تفزع لي ..

محمد: حلاتين عليك يا فارس ..

فارس: ليش ؟

محمد: من يدافع عنك ؟

فارس: فطيم اختي ..

محمد: احسدك .. ورفع حاجب وطالع فاطمه ..

فارس ومريم: ههههههههههه ..

طبعا محد فهم مغزى كلام محمد الا فاطمه .. قامت من مكانها وراحت تسوي عصير حق محمد .. وهي فالمطبخ تمت تفكر في كلام محمد ..

فاطمه " شو فيه محمد ولد عمي .. وايد تغير .. نظراته تغيرت .. كلامه غير عن قبل .. بديت اخاف منه " كانت مندمجه وهي يتغسل الكاس .. وان**ر الكاس وادخل شوية زجاج في يدها وانجرحت .. صرخت ..

فاطمه: آآآي .. فارس ..

فارس سمع صوت اخته وركض لها المطبخ ..

فارس بخوف: شو فيج فطيم ؟

فاطمه اطالعه وتتألم: فارس .. يدي ..

قرب منها وشاف الدم اللي بيدها .. خاف على طول سحبها من ايدها وراح الصاله ..

فارس: مرايم روحي جيبي عباية اختج ..

مريم بخوف: شو فيج فطيم ؟

فاطمه: ان**ر الكاس بيدي ودش الزجاج .. آآي .. حطت راسها على ص*ر فارس وصاحت ..

فارس: بسرعه مرايم فديتج .. حضن اخته .. حياتي فطيم الحين بوديج المستشفى ما عليج شر حبيبتي ..

محمد كان يطالع فاطمه بخوف: سمالله عليج فطيم .. انا السبب ..

فارس: ليش انت ؟

محمد: انا اللي طلبت منها تسوي لي عصير ..

فارس: لا يا ريال لاتقول جي .. زين محمد فديتك شغل السياره على ما نجيك ..

محمد وهو طالع: من عيوني .. " كل شي لعيون فطيم يهون " .. فارس كان حاضن فطيم ويسكتها ..

فارس: فطيم فديتج .. الا كاس وان**ر لاتكبرين الموضوع ..

فاطمه وسط دموعها: يدي تعورني فارس .. والله تعورني ..

فارس: فديت يدج يا فطيم ..

دخلت عليهم مريم وعطت فاطمه العبايه لبست عبايتها وهي تصيح ..

مريم: اجي معاكم .؟

فارس: لا فديتج ماله داعي .. بس بلغي الكل ..

مريم: ان شاء الله .. ايه عليج فطوم ..

طلع فارس مع فاطمه وركبوا السياره مع محمد .. اتصل عبدالعزيز لفارس .. اللي حس بتوأمه ..

فارس: هلا عزيز

عبدالعزيز: اخبار فطيم؟

فارس: ما عليها شر ان شاء الله .. احنا قريب المستشفى

عبدالعزيز: اجيكم ..

فارس: لا يبه ماله داعي .. كلها الا جرح صغير بس اختك دلوعه حبتين ..

فاطمه بعفويه: فاااااارس ..

فارس: اووه انتي هني ..

فاطمه صاحت: والله يعورني ..

محمد: ما تشوفين شر بنت عمي .. ما عليج من فروس بس يبي يلعوزج ..

فاطمه سمعت كلام محمد وحست براحه ..

فارس: زين عزيز وصلنا المستشفى .. باكلمك اول ما نطلع ..

عبدالعزيز: الله يحفظكم ..

وصلوا المستشفى .. نظفوا لفطيم الجرح وخيطوه لها .. كانت ماده يدها وتتألم ..

الدكتور: خليها ترتاح على السرير شويه ..

فارس: ان شاء الله ..

الدكتور: ما تشوفين شر اختي ..

فاطمه: مشكور دكتور ..

الدكتور: العفو ..

فارس: ما بتكتب لها ادويه او شي ؟

الدكتور: ما تحتاج .. بس بكتب لها بندول تقدر تجيبه لها من الصيدليه ..

فارس: خلاص صار ..

راح فارس ورا الدكتور عشان ياخذ الورقه منه .. اما محمد تم مع فاطمه .. رجع الدكتور يتطمن على فاطمه بعد ما عطى فارس الورقه ويصرفها فالصيدليه ..

الدكتور موجه كلامه لمحمد: زوجتك قويه ما شاء الله عليها ..

محمد وفاطمه انصدموا بكلام الدكتور ..

الدكتور: ما شاء الله كانت هاديه واحنا انظف لها الجرح .. ان شاء الله ما عليج شر اختي ..

محمد: يعطيك العافيه دكتور وماقصرت ..

الدكتور: الله يعافيك .. وسلامات ماتشوفون شر ..

طلع الدكتور من الغرفه اللي كانت فيها فاطمه .. محمد كان واقف عند الباب وفاطمه شبه منسدحه على السرير .. كل واحد منهم يفكر في كلام الدكتور ..

( زوجتك قويه ماشاء الله عليها ) .. هالجمله تترد على مسامع محمد وفاطمه .. دخل فارس وشاف حالهم استغرب ..

فارس: ها فطيم الحين احسن ..

فاطمه سرحانه: .............

فارس: فطومه .. مسك كتفها بهدوء .. فطيم وين رحتي ؟

فاطمه: هلا فارس ..

فارس: احسن الحين حبيبتي ؟

فاطمه اي ..