"MAG-IINGAT KA ROON PALAGI, ANAK, HA..."
Sandali akong tumingin kay Nanay at matipid na ngumiti rito, bago mahinang tumango.
"Tatawag ka ng madalas..."
Minsan pa, ay tumango ako.
May cellphone naman na si Biboy, at ipinangako ko kay Nanay na madalas na tatawag sa mga ito.
"Kung ganoon lang sana kadali, na pati kami ni Biboy, eh, sumama sa iyo pabalik ng Maynila..." sandali itong tumigil, bago napapailing na huminga ng malalim. "Ang kaso, marami pang kailangan na asikasuhin. Lalo na sa eskwela ng kapatid mo. Isa pa, sayang naman ang tindahan kung iiwanan pa natin, sa ngayon. Kahit na papaano ay maganda naman na ang benta. Dagdag kita rin naman iyon para sa atin."
"Nay..." may maliit na ngiti pa rin sa mga labi na inihinto ko muna ang ginagawang pag-eempake at hinarap ang nanay ko.
M
