**ر القيود

بارت 2

**ر القيود

عيون الملاك ?

★★★★قراءه ممتعه ★★★★

صح بيه دارت دنيتي

صح كلها شافت دمعتي

الصوج مو باحد تره

عمت عليه طيبتي

★★★★★★★★★★★★★★

حجي جبار : ماشي راح اقبل تعزلون بس بشرط وشرطي هو مالي علاقه بيكم بعد مصرفكم اكلكم شربكم انتو حيروا بروحكم

وها المشتمل مثل ماتشوفون حايط واحد مبني وهم مو كله مالي علاقه بي انتو تبنونه والكم اسبوع واحد مهله بره الاسبوع اطردكم من البيت

زمرد : لا شيخ لا هيج وبعدها مامكمله قاطعها حجي جبار بصوت عالي : لعد شعبالج يوگف هذا الزعطوط ويزامط گبالي واسكتله

الا اشوفه نجوم الظهر وهذا اخر كلام اسبوع وبس بره الاسبوع اريدكم بره بيتي

وطلع حجي جبار

زمرد: يمه شلون بينه هسه

ليث: يمه اني ادبرها انتي بس لا تنقهرين

زمرد: يمه ذهب مهري اخذه وبيعه وابني بي

ليث: لا يمه اني ادبر الفلوس انتي ظمي ذهبج وارتاحي واني رايح هسه

زمرد : وين رايح وليدي

ليث: يمه شغله شويه وارجع

ليث: طلعت من البيت واني حاير بزماني. ادري بحجي جبار نذل بس اتوقعت يصبر شهر شهرين

اني جامع فلوس بس ماتكفي ابد شلون بيه رحت للاسطبل لان من اشوف الخيول تهدا اعصابي

واني شيخ حاكم سامحلي اركبهن فركبت خيله كلش عزيزه عليه اني جنت موجود من انولدت فاني المسميها اسمها ( عاصفه )

فركبتها وكمت اركض بيها بالميدان وبره فتره تعبت فنزلت ورجعتها لمكانها وتفاجاه الشيخ حاكم كاعد وجان يعاينلي

الشيخ حاكم هوو صاحب الاسطبل رجال عمره ببدايه الاربعين. اليشوفه يكول بعده بالعشرين حيل معتني بروحها وماعنده جهال الاعرفه هو جان يحب وحده من غير عرب وسوه المستحيل حته يزوجها وبطلاع الروح تزوجوا وبقوا سوه 4سنين بدون مايصير عدهم جهال براها مرته تمرضت بمرض خبيث وبقت سنتين تعاني وراها توفت ومن وفاتها ليهسه ابد ماازوج على الرغم اهله شكد لحوا عليه بس مايقبل

يتزوج وهو مربي ابن اخو المتوفي( قيس ) اللي هوه صديقي الوحيد

بره ماشفت الشيخ حاكم لازم اسلم عليه فرحتله

ليث: السلام عليكم شلونك شيخ حاكم

الشيخ حاكم : وعليكم السلام

شلونك ابني اليوم جنك مو مركز هاي اول مره اشوفك تركب عاصفه وذهنك شارد

ليث: والله شيخ موضوع شاغل بالي وان شاء الله ينحل

شيخ حاكم : گول وان شاء الله احله الك

ليث بتردد: مااريد ازعجك شيخ

شيخ حاكم : شنهي ليث ماتريد تكلي

براحتك بس لا تلف وتدور

ليث: لاحشاك شيخ الموضوع ومابي ……… بديت اسولفله وسولفتله كلشي

ليث: وهاي كل ما بلقضيه

شيخ حاكم : الله يساعدك وليدي بعدك بهذا العمر وشفت هواي مصايب بس انته قوي واني ان شاء الله اساعدك راح انطيك الفلوس للبناء وحته راح اوصي خلفه اعرفه هو يشتغلك

ليث: لا شيخ اني ماكتلك مشكلتي حته تنطيني فلوس

شيخ حاكم : ليث هاي الفلوس دين واكيد الها مقابل

مقابل هاي الفلوس اريدك تصير ايدي اليمنه

انته تدري اني ماعندي ولد ومربي قيس ابن اخوي ومعتبره ايدي وهسه انته بمثابه قيس وبعد اعز انته حيل تحب الخيل فراح اعلمك كلشي بيهن بحيث اذا عاينت عله خيل من عيونه تعرف شبي

وراح اعلمك على هواي شغلات ماتعرفه بالمقابل انته ايدي اليمنه تقبل لو لا

ليث : اكيد شيخ اتشرف اشتغل جوه ايدك

شيخ حاكم: انته ما تشتغل جوه ايدي انته ايدي نفسها. وهسه تعال وياي حته انطيك الفلوس

كام شيخ حاكم وراح لمكتبه اللي مسوي بالمزرعه وطلعلي الفلوس. وانطانياها

ليث: اخذتها ورجعت وبره يوم التقيت بالخلفه اللي حجه عنه شيخ حاكم وشيخ حاكم كله

شيخ حاكم : ابو قاسم ( الخلفه) البيت اريده يكمل باقل من 5 ايام

ابو قاسم : شيخ مانكدر لازم نبني وبعدين نبقه كم يوم نبلله وبعدين نلبخ ونبيض ونطبك كاشي وسيراميك على الاقل يرادلنه 3 اساببع

شيخ حاكم : ليث ابني شنو رايك

ليث: شيخ خل ابو قاسم يبني غرفه وحده. و ويلبخها بس وبعدين يبدي بالباقيات

شيخ حاكم : سمعت ابو قاسم كلام ليث يتنفذ وشيكول ليث تسوي

ابو قاسم : تامر شيخ

ليث.

براها بده ابو قاسم بالغرفه. ولبخها. بيومين وبراها بده بباقي البيت

من خلص الاسبوع ادري بحجي جبار راح يسووي هوسه ويطردنه فكلت لامي يمه خل نطلع ونبقه بهاي الغرفه لحد مايكمل البيت

وصدك شلنه غراضنه ورحنالها واحنه نسمع تشمت مرت الحجي جبار ( سعديه)

سعديه وهي تحاجي وحده من صديقاتها اللي مثلها : اكولج عيني شنو رايج لو اغير الغرف اللي فوك و محمد كبر اريد اسويله غرفه وحد راح اصعده بالغرفه الفوك

على خل نستفاد منها بمكان ما يعيشون بيها ناس ماتسوه الله خلصنه منهم

ليث: اسمع كلام سعديه واعاين لامي واشوف الدمعه تلالي بعينها لو بيدي جان موتت سعديه بمكانها بس ادري اني هسه مو بقوتهم ولا جبروتهم

بقينه اني وامي بالغرفه وكل يوميه. يجون العمال يشتغلون واني يمهم واساعدهم واوجههم وبره مايرحون ارجع لامي كلي تراب ووصخ وحجي جبار ماتعب روحه ولا اجه شفنه ابد عبالك مو ابنه ومرته

وگضت الايام لحد ماكمل البيت وعشنه بيشيخ حاكم بقيت وياه وكمت اتعلم منه هواي شغلات. تجاره. وخيول وحته رمايه علمني

بس بنفس الوقت

مايتساهل وياي بالشغل بلع** كلش صاارم بس ادري كله علعمود اتعلم

جان كلشي بحياتي هادي باستثناء شغلتين

الاولى حجي جبار اللي جان بين فتره وفتره يسوويلي مشاكل وهوسه وعرك

والثانيه محمد اخويه الصغير جان حيل يضايقني ويحجي عليه ويصيحلني ابن الخدامه هو وجماعته ومن اسمعهم هيج يحجون اتعارك وياهم وادميهم وارجع لامي مدمه. ويجينه حجي جبار يتعارك ويعيط

لحد ما اليوم لنفس السبب تعاركت ويه صديق محمد يصير ابن فليح واحد من اصحاب البساتين اليمنه وهو وحجي جبار بينهم غيره ودائما واحد يحجي على الثاني وكلعاده اجه حجي جبار وسوه الهوسه نفس ما شفتوا

زمرد : هذا اطيب اكل لاحله ولد بكل السلف

ليث: ههههه يمه بعدج تحجين وياي جني زعطوط

زمرد: يمه شكد ماتكبر تبقه بعيني. هذاك ابن الگماط

ليث:هههه

وبديت اكل واتشاقه ويه امي

ومرت الايام واني اشتغل عد الشيخ حاكم

وبيوم راجع هستوني من الشغل وشفت هوسه يمه البيت الجبير وصوت عياط فرحت حته اشوف وانصدم ………

يتبع …

★★★★★★