أصبح الصباح فصعدت منال لهدى كي يخرجوا معا للتسوق كعادتهم للخروج دائما معا لشراء كل احتياجاتهم و بدأت هدى تحكي لمنال عن كل ما حدث الليلة الماضية بينها هي و زوجها سالم ثم نزولها إلى سامية و حكت لها ما حدث بينهم هي و سامية حين ذهبوا للتعرف على سالي و حين عادوا و حكوا معا عن ما رأته ساميه من ممدوح زوجها و صابر حين راتهم يقفون عند باب شقة سالي في منتصف الليل و حكت لها أيضا عما فكرت فيه هي و سامية و ما خططوا له ل**ب معركتهم بأي طريقة فردت منال بعد أن سمعت كل هذا أثناء طريقهم إلى السوق قائلة
- بجد انا زعلانه منكم ازاي ما تتصلوش عليا
- يا بنتي ما أنا بحكيلك أهه
- لا كنتوا اتصلتوا عليا عشان اجي أقعد معاكوا
- الموضوع جه كده و بعدين هي كل مشكلتك أنك تحضري الفيلم ده كله يا منال أنتي كمان
- أمال لازم افهم كل حاجة و اشوف كل حاجة بعيني عشان افكر معاكوا هنطفشها أزاي دي
- أدينا بتفكر و هنمشي خطوة خطوة مع بعض لغاية ما نشوف اخرتها معاها و معاهم
قالت منال بحدة
- مش بس كدة أحنا لازم نكرهها فيهم
- أزاي
- لما نتصاحب شوية نحكيلها ق*فهم و عمايلهم
- صح لازم نعمل كدة أنتي معاكي حق
- هما يق*فونا احنا و ليهم عين يبصوا لغيرنا
- أنا خلاص يا أختي هطق
- أمال أنا أعمل أيه مع عبد الحليم و عمايل عبد الحليم
- عمل أيه تاني
- هحكيلك و قوليلي أنا غلطانة و لا هو اللي غلطان
و بدأت منال كعادتها تحكي لصديقتها المقربة هدى حيث هي أكثر صاحبة تصغي لها باهتمام
أعدت منال سفرة العشاء لعبد الحليم بعد أن عاد ليلا من عمله ذلك اليوم و قد نام أولادهم بعد أن تناولوا عشاءهم قبل مجئ والدهم إلى المنزل و قد زينت منال السفرة بالشموع و الورود و عطرت البيت و تعطرت و تزينت له و احسنت الزينة و ارتدت الروب الأبيض الذي لم ترتديه منذ يوم زفافهم ربما يتذكر ذلك اليوم و قد طلت شعرها بلون سريع يذهب حين يغسل من الشعر و ظلت تنتظر و تنتظر حتى عاد عبد الحليم و قد أدارت منال بعض الأغاني الرومانسية لعبد الحليم حافظ و خاصة اغنية أول مرة تحب يا قلبي ربما تتحرك جبال الجليد التي تسكن قلب عبد الحليم و حين دق جرس الباب ذهبت فورا لتفتح له بعد أن مات الأنتظار قائلة أول ما وقعت عيناها عليه
- أتأخرت ليه كل الوقت ده يا عبد الحليم
- خلصت شغل و رحت قعدت ع القهوة شوية
- و هنت عليك تسيبني أستناك كل ده أمال لو ما أتصلتش قولتلك ما تتأخرش
- كنت زهقان يا منال
- زهقان مني يا عبد الحليم
- زهقان من نفسي يا ستي
- هو أنت بتقعد في البيت خالص يا عبد الحليم
- يعني اسيب شغلي و اقعد جمبك
- لا تسبب القهوة يا عبد الحليم
- احنا مش هنخلص من موال كل يوم ده
- طب خلاص يا حبيبي بلاش تعكنن نفسك تعالى اتعشى
- السفرة جاهزة و لا لسه هتحضريها
- جاهزة يا روحي
- لو كنتي لسه هتحضري الاكل كنت هسيبك و أنام
- لا أنا مستنياك من بدري يا قلبي
- طيب هغسل أيدي و اجي
- روح يا حبيبي
أطفأت منال المصابيح الكهربائية و أشعلت الشمع خرج عبد الحليم من الحمام ليجد ذلك المنظر فقال لمنال بسخافة
- أيه يا منال اللي أنتي عاملاه ده
- عجبك يا حبيبي
- عجبني أيه و زفت أيه
- زفت يا خبر أ**د
- هتخلصي الشمع اللي شارينه عشان لما النور يقطع نولعه ينورلنا عشان الرومانسية و الكلام الفارغ بتاعك ده
- كلام فارغ يا راجل
- و أيه كل الورد ده اشترتيه بكام ده كله
- هو ده كل اللي همك
- مش هتبطلي تضيعي فلوسك ع الهبل ده يا هانم
- هبل أنا هايله يا عبد الحليم
- أه ها**ه و ع**طة كمان اللي تضيع فلوسها على الكلام ده تبقى ها**ه
- أهد*ك قولتها بنفسك يا عبد الحليم فلوسي مش فلوسك
- و هي فلوسي و فلوسك أيه مش كله لعيالك اللي نايمين جوه دول هو أنا بقولك أديني حاجة
- عيالك ملزومين منك انت يا عبد الحليم مش مني
- و الله يا أختي اللي بقبضه بديهولك و كفي نفسك بيه أنا بشتغل الصبح و بالليل تفتكري اقطع نفسي مثلا يعني
- هو أنا كنت طلبت منك حاجة زيادة يا راجل
- و لا تطلبي أنا بد*كي كل اللي بقبضه من وظيفة الصبح فعلا و مرتب شغل بالليل يدوب مصروفي و مصروف العيال و لو طلبتي حاجة أشتريهالك و أنا راجع و ما بتكفيش كمان هو أنا يعني هضحك عليكي ليه
- هو أنا جيبت سيرة فلوس خالص دلوقتي يا عبد الحليم
- ما هو أنا بس بفهمك عشان الاسراف اللي أنتي فيه ده ما ينفعش
- أطمن يا عبد الحليم الشمع ده أنا شحتاه ما أشترتوش و الورد قطفته بأيدي من الجنينة اللي تحت قدام العمارة مبسوط كده شفت أنا مدبرة أزاي
- أه أن كان كده معلش
- شفت أنت على طول ظالمني أزاي و انت اللي بتنكد عليا و بتقول أن أنا اللي بنكد عليك
- مش يفهمك الدنيا يا منال أصلك عايشه في فيلم أبيض و أنخمدأ**د
- مخدتش بالك من حاجة تاني غير الورد و الشمع
- حاجة زي ايه
- شكلي ما فيهوش أي حاجة متغيرة
- أيه اللي متغير أنتي زي ما أنتي
- أنا زي ما أنا يا خبر أ**د
- ما لك يا وليه
- يعني مفيش اي حاجة متغيرة خالص متأكد
- يا نهارك مش فايت
- ليه يا راجل
- أنتي أشتريتي روب جديد
- ألطم على وشي يا عبد الحليم
- أنا رايح أنام احسن مش طافح
- أتخمد
ظلت هدى تضحك ضحكات تعجب من هول ما سمعت لم تحتمل أن تتماسك رغم أنها تسير بالشارع هي و منال قالت منال بأسى
- هو أنا كل ما هحكيلك حاجة هتفضلي تضحكي عليا كدة
- اعملك أيه طيب يا منال ما انتي حكاويكي كلها كوميديا سودة
- فعلا معاكي حق
- عبد الحليم ده بصراحه ما لهوش شبه
- أنتي هتقوليلي
- هو صحيح سالم عامل زيه كده لكن ...
- لا لا حرام عليكي زيه ايه يا شيخة ده حاجة و ده حاجة تانية خالص
- يا اختي كلهم زي بعض
- أنتي ما قلتليش ناوية تعملي اكل أيه النهاردة
- محشي
- أشمعنى
- عايزة ابعت لصاحبتك طبق
- يا شيخة أبعتيلها كيكة حد يبعت محشي
- أه هي دي تعرف تعمل محشي
- صحيح اكيد هتفرح بيه
- تفتكر اعمل كرنب و لا ورق عنب
- أعمالي ورق عنب و بتنجان و فلفل و كوسه
- أحشي فلفل ألوان زي المرة اللي فاتت لو لقيتيه صغير شويه و يا ريت تحشي فلفل حراق كان تحفة لما عملتيه
- ههههه فاكرة لما قولتيلي يا شيخة هو حد يحشي الفلفل الحراق أول مرة اشوف حد يعمل كده
- ههههه أه
- نزلتي عليه أنتي و مديحة و سامية ما سيبتوليش و لا قرن فلفل واحد
- ههههه كان تحفه بصراحة طعمه كان حلو بشكل
- هبعته لصاحبتك
- ابعتيلها طبق حلو يا اختي كبير كده يملى العين
- ما هو انا هعمل كده و نجيب كرنب كمان مع ورق العنب خليها حفلة محشي بقى هههههه
- و ابقي افتكري البت العروسة دي بطبق هي كمان
- هههههه ما انتي عارفة هبعتلكوا كلكوا يا منال بس خلوا عندكوا دم و أبقوا اطلعوا ساعدوني
- بس كدة عنيا أنا أول واحدة و أشتري معاكي بقى و نعمل سوى
- أخص عليكي هو أنا بقولك عشان تقولي أشتري معاكي
- لا ما أنا مش هعمل اكل بقى هعمل معاكي حلة محشي ليا و خلاص و بعدين الحاجة غالية حرام تعملي كل ده لوحدك و تشتريه لوحدك
- ياه عليكي يا منال هو احنا بينا فرق
- لا طبعا بس برضوا هشتري معاكي
ظلت هدى تتجول هي و منال بين محال بائعي الخضروات و السوبر ماركت و اشتروا ورق العنب و الكوسه و الباذنجان و الكرنب و الفلفل الملون و الفلفل الحار و الطماطم و الخضرة و الأرز ثم ذهبوا إلى القصاب و اشترت كل منهن أثنان كيلوا من اللحم و بعد هذه الجولة عادوا إلى بيت هن و لكن منال صعدت مع هدى لشقتها بالطابق الثامن لتساعدها في طهو الطعام كما وعدتها و اتصلت هدى على سامية و حين ردت عليها قالت هدى
- فينك
- موجودة هروح فين
- وراكي حاجة
- لا لسه راجعة من الشغل حاسه بشوية إرهاق
- لا النهاردة الخميس بكرة أجازة روقي كدة
- خير شكلك كده في حاجة
- ههههه لا ابدا هعمل محشي
- بجد
- بس لو مجيتيش تساعديني أنا و هدى ....
- لا و على ايه من غير تهديد جايه
- ههههه مستنياكي
أنهت هدى مكالمتها مع سامية و بدأت تتصل على مديحة و أول ما تلقت مديحة المكالمة قالت هدى
- فينك يا مديحة
- أهو اديني مرميه اهوه هروح فين يعني
- هتطبخي ايه النهاردة
- عندي اكل من امبارح
- يعني ما وراكيش حاجة تعمليها
- هو شغل البيت بيخلص
- أنا جبت محشي
- و النبي صحيح
- و لو مطلعتيش .....
- من غير ما تكملي طالعة حالا
- بسرعة أنا محتاسة أنا و منال لوحدنا أحنا جبنا كتير عشان عاملين حسابكوا و حساب العمارة كلها
- يا اختي عليكي
- بقولك ايه
- خير
- هاتي في ايدك البت العروسة الجديدة دي ن**ب فيها ثواب
- تعيشي للعرايس الغلابه و تديهم دروس في الطبيخ يا رب
- ههههه انجزي ما ترغيش كتير
- ههههه حاضر
أنهت هدى مكالمتها مع مديحة و خرجت مديحة فورا من شقتها و صعدت بالمصعد إلى الطابق السابع و وقفت أمام باب شقة العروس علياء و دقت جرس الباب ففتحت علياء الباب قائلة
- أذيك يا مديحة اتفضلي
- لا يا اختي مش هدخل
- ليه بس عماد مش هنا الإجازة خلصت و نزل شغله
- طب كويس بتعرفي تعملي محشي
- بصراحة لا
- طب احنا هنعمل محشي عند هدى تعالي اقعدي في وسطينا أتعلمي يا اختي حاجة تنفعك
- خلاص ماشي
- طب هتطلعي معايه و لا اسبقك
- لا تعالي دقيقة واحده بس اجيب المفتاح و البس حاجة
- يا اختي ما انتي لابسه جلابيه حلوة أووي و حشمه و بعدين كمان مفيش رجالة في العمارة دلوقتي خالص
- طيب بس اجيب المفتاح و مريلة المطبخ بتاعتي
- طيب يا أختي اللي تشوفيه
أنتظرت مديحة علياء حتى احضرت المفتاح و مريلة المطبخ و صعدوا معا الى هدى و تجمعوا معا و أخذوا يعلموها كيف تطهو المحشي و ظلوا يضحكون معا و اندمجت معهم علياء و شعرت و كأنها بين عائلتها ظلوا هكذا ساعتين متواصلتين أخذت منال تغسل الخضرة و تقطعها بالسكين و وقفت مديحة تسلق ورق العنب و الكرنب بينما جلست هدى تحاول تعليم علياء كيف تقور الكوسه و الباذنجان و الفلفل دق جرس الباب ذهبت مديحة لتفتح قائلة
- يا اختي حمد الله على السلامة
- و الله نمت و أنا قاعدة ما حسيتش بنفسي
- طب تعالي يا له بسرعه دا الماتش حامي أووي النهاردة
- هي هدى جابت كتير يعني للدرجادي
- أه ما شاء الله جايبه كرنبتين و كيلوا ورق عنب و خمسة كيلوا بتنجان و خمسه كوسه و كيلو فلفل حراق و كيلو فلفل رومي و كيلو فلفل ألوان
- ما شاء الله لا معاها حق تطلب مساعدة
- ما هي لو معملتش كدة مش هنخلص في يومنا النهاردة
دخلت سامية هي الأخرى إلى المطبخ و شمرت ساعدها و استعدت للمساعدة . جلست هي مكان هدى و قامت هدى لتجهيز الخلطة بطريقتها المحترفة السرية و بعد أن أنتهوا من التجهيزات الأولى جلسوا جميعا لحشو ورق الكرنب ثم ورق العنب ثم الباذنجان ثم الكوسه و هكذا حتى انتهوا من تحضيره و طهيه تماما .