انتهوا اخيرا من تحضير المحشي و جلسوا معا ينتظرونه حتى ينضج قالت مديحة
- بقولكوا ايه
- أيه
- أيه رأيكوا نطلع نقعد على سطح العمارة شوية تحت تكعيبة العنب و اهو يبقى تغيير
- و الله معاكي حق يا مديحة النفسية محتاجة قاعدة زي دي
- أي ده هو في قاعدة فوق السطح و كده
- أه يا علياء ده هيعجبك أووي
-
خلاص يا له بينا نطلع
- بس هنتحمل نقعد في الجو ده الدنيا لسه برد على فكرة
- يا سقعانه أنتي يا ساميه
- أنا فعلا بحس بالبرد من أقل شوية هوى
- أجيبلك شال من عندي و يا له بقى بطلي **ل
- طيب و المحشي
- أول ما يستوى نغرف و ناخده و نطلع
- صح ناكله فوق بروقان
- طيب أنا هدخل ابص عليه كده
رفعت مديحه غطاء الحلة و أخذت طبق و ملعقة و أخذت بعض أصابع المحشي و وضعتها على الطاولة أمامهم ثم غطت الحلة و كشفت الحلة الأخرى و فعلت نفس الشئ و كشفت الغطاء عن الحلة الأخرى و وضعت الاطباق كل طبق به صنف من أصناف المحشي تناولت كل منهن اصبع لتتذوقه و علياء تنظر إليهم مبتسمه قالت مديحه
- متهيألي عايز شويه ع النار لسه
- لا يا مديحة أنا بحبه في مضغه بلاش يتهري
- معدتنا مش متحمله يا منال
- مش ناقصين فعلا القولون ع الآخر
- ما بتدوقيش معانا ليه يا عليا
- لما يستوي
- قولي رايك أنتي كمان
- المهم اتفقتوا على ايه هتسيبوه ع النار و لا هتطفوا عليه
- دوقي أنتي و قوليلنا يا علياء
تناولت علياء أصبع ورق عنب و تذوقته قائلة
- الله
- هههه عجبك للدرجادي
- أه يا هدى دا تحفة تسلم ايدك
- احنا كمان أول ما دقناه من أيد هدى كنا عاملين زيك كده
- فعلا تحفة
- طيب برضوا مقررناش
- بقالنا شويه بنتشاور و بندوق ما خلصوش الشوية اللي قلتوا عليهم
- فعلا أطفئ النار و يا له نغرف و نطلع
- لا استنى هاتي أكبر طبق عندك
- للي ما تتسماش ده اكيد
- طبعا
- دي مين اللي ما تتسماش دي
- مسيرك هتعرفي
- يا ما نفسي احطلها فيه سم
- قلبك ابيض في طرق تانية
- هاتي اغرفهولها بأيدي
- لا انتي اللي هتنزليهولها يا مديحة
- زي بعضه
- و تقوليلها احنا قاعدين على سطح البيت شوية لو تيجي تأنسنه شويه
- دلوقتي
- أه خير البر عاجله
- هي بس تطلع
- هقولك عندها شغل دلوقتي
- هموت و افهم بتشتغل أيه دي
- أكيد رقاصة
- يا جماعة فهموني
- مسيرك تفهمي يا حبيبتي
- يا له يا مديحه بسرعة
- حاضر
نزلت مديحه إلى الطابق الخامس فورا و دقت جرس باب شقة سالي ، فتحت لها سالي متجهمه قالت لها مديحه بضيق
- هدى بعتالك طبق المحشي ده عشان تدوقي المحشي بتاعها
- ميرسي أنا عامله ريجيم
- بس دوقيه و مش هتندمي
- طيب ميرسي
- كمان احنا قاعدين على سطح العمارة لو تحبي تقعدي معانا شويه القعدة هتعجبك اوي
- هشوف و ابقى اطلع لكوا
- واضح انك مش فاضيه بعد اذنك
- أذنك معاكي اتفضلي
ركبت مديحة المصعد و صعدت إلى الطابق الثامن ثم دقت جرس باب شقة هدى فتحت لها منال قائلة
- أيه ما طلعتيش ليه السطح
- انتوا طلعتوا خلاص
- أه طلعوا أنا و هدى بنغرف و طالعين
- طيب هاتي حاجة أخدها معاكوا
خرجت هدى من المطبخ تحمل وعاء به أصابع محشي الكوسا و الفلفل الملون و الحار قائلة
- خدي يا مديحة السرفيس ده في ايدك
- الله الله الريحة ايه
- أوعي ياكلوه قبل ما نطلع
- لا احنا نطلع سوى احسن
- طيب أنا هجيب السرافيس التانية و جايه
دخلت هدى إلى المطبخ ثم عادت تحمل وعاء به أصابع محشي ورق العنب و فلفل حار
- هدخل أجيب سرفيس الكرنب و بالذنجان و اجي
- ما تتأخريش
- صحيح قبل ما ادخل عملتي ايه مع اللي ما تتسماش
- و لا حاجة يا اختي خدت الطبق و هي ملويه كده
- ملويه ليه لاويه تلويها
- معرفش بترد كدة من تحت ضرسها
- يعني هتطلع و لا ايه
- معرفش مرستنيش
- طيب لما نشوف أخرتها
- يا له بقى خلينا نطلع
- ماشي
دخلت هدى إلى المطبخ و عادت بالوعاء الآخر ثم عادت حملت كل منهن وعاء و صعدت إلى السطح و اول ما رأتهن سامية قالت
- اتاخرتوا ليه كده جوعتونا
- ههههه على ما مديحة طلعت
- و عملت أيه
- و لا حاجة هنعمل أيه
- يعني أيه الكلام ده
- خلاص بقى اديتها الطبق و خلاص
- هتطلع
- يا عالم
- برضوا مش هتفهموني بتتكلموا على ايه
- ههههه مسيرك تفهمي
- ماشي يا هدى
جلسن جميعا ليتناولوا الطعام فقالت علياء
- يااااااه مش معقول أنا بجد عمري ما أكلت محشي بالطعامة دي
- بالهنا و الشفا يا حبيبتي
- بس أنتي كده أكلتيني و مش هعرف اكل مع عماد لما يرجع
- لا ما تقلقيش هتاخدي محشي لعماد كمان
- لا مش ممكن يعني اكل و اخد اكل كمان يا هدى
- أه بس على شرط
- شرط أيه يا مديحة
- المرة الجاية هناكل المحشي من أيدك أنتي يا عليا
- ههههه أنتي كدة عايزة تروحي المستشفى
- ههههه يخرب عقلك هو أنتي ما بتعرفيش تطبخي خالص
- لا أزاي بعمل مكرونة و بانيه حلوه أوي
- مكرونه بشاميل
- لا محمره
- ههههه و ده يبقى أكل
- و بعمل مكرونه بالصلصة حلوة أووي
- لا بجد أحلفي هههههه
- ما بتعرفيش تطبخي حاجة تانيه
- بحمر بطاطس و اسلق بيض و أعمل برجر
- هههههههه يخرب عقلك ضحكتينا
- انتوا بتتريقوا عليا
- لا يا حبيبتي تعالي اقعدي معانا كل يوم نعلمك طبخة
- تسلميلي يا هدى
- بقالنا كتير ما طلعناش السطح القعدة دي وحشتني أوووووي
- فعلا بس الجو لسه هوى
- مكنتش متخيله أن سطح العمارة بالجمال ده
- احنا اللي موضبينه و مخلينه كده
- جميل انكوا عيلة واحدة كده
- احنا مكناش كده
- أزاي
- كل واحد كان في حاله أول ما بدأنا نسكن في العمارة هنا
- و بعدين
- كل ما توجهنا مشكلة كل واحد ما يسألش أزاي نحلها غير لما تبدأ تمسه أو تأذيه
- و بعدين
- فضلنا نتخانق مع بعض على كل حاجة فلوس صيانة الاسانسير و فلوس نضافة السلم و كل حاجة
- و في اللي بيدفع و فيه اللي مش عايز يدفع
- لغاية ما جينا في يوم دخل علينا حرامي
- حرامي
- أه حرامي
- أول مره دخل على أمين و مديحة محدش سأل فيهم
- و تاني مرة جه عندي أنا
- أول مرة و تاني مرة
- ههههه ما هو ده بقى اللي خلانا بقينا أيد واحده
- كلنا بقينا نلم فلوس بشكل منتظم كل شهر
- اختاروا سالم جوزي عشان يشيلهم معاه و يشوف أمور العمارة
- و لو هو مش موجود أمين بيشوف ايه المطلوب يدفعه لغاية ما يجي سالم و ياخد منه اللي دفعه
- بس أنا ملاحظة أن العمارة مالهاش بواب
- كذا مرة يا اختي نجيب بواب نلاقيه فاكر نفسه هيعمل الجزء التاني من البيه البواب
- هههههه يخرب عقلك يا مديحة
- احنا قلنا احسن نعمل كاميرات مراقبة و احنا نخلي بالنا من نفسنا
- و بعدين كمان البواب هياخد مرتب مبلغ و قدره هيخلينا ندفع مبلغ اكبر احنا كل الحكاية بنلم من كل واحد ١٠٠ ج بس
- يااااااه
- اعملي حسابك أنك هتدفعيهم من الشهر الجاي يا عليا
- ههههه ليه بس كده
- أمال هتقعدي كده مجانا
- ما أحنا بندفع أيجار يا سامية
- ههههه ايجار طيب و شحن كهربة الاسانسير و الصيانة ما له و مال الأيجار
- و نضافة السلم و زينة رمضان
- صحيح و الجمال اللي عملتوه في السطح ده
- أد*كي أنتي قولتيها
- عارفة يا عليا أول ما جينا السطح ده كنا بنحط فيه اي كراكيب عندنا
- كان مزبلة
- لكن كده احسن كتير
- طبعا دي كانت فكرتي أنا و سالم
- التكعيبة دي عملناها من الفلوس اللي لمناها
- كل شهر بنعمل حاجة
- أول شهر عملنا كاميرات المراقبة بسبب الحرامي
- و تاني شهر عملنا صيانة الاسانسير و نضفنا سلالم العمارة و المدخل
- و بعد كده بقى بدأنا نغير باب العمارة و ننضف السطح و عملنا التكعيبة دي و حطينا شوية زرع
و فجأة سمعوا صوت أتي من بعيد يقول
- و الله انتوا حاجة جميلة بجد
اتجهوا جميعا بأنظارهم ناحية الباب حيث مص*ر الصوت ليجدوا سالي تقف أمامهم فذهلوا من هول المفاجأة قائلين في صوت واحد
- سالي