دخلت سامية و معها هدى إلى شقة سامية قالت هدى بعصبية
- شفتي يا أختي الولية و بجاحتها
ردت سامية
- قولي شفتي الولية و خبثها
- صحيح دي قفلت في وشنا الباب و دخلت بكل برود و كأنها ما عملتش حاجة
أردفت ساميه
- و ما ردتش علينا لما سألناها بتشتغل أيه
- أكيد رقاصة يعني هتشتغل أيه في نص الليل
- شكلها مريب أووي الست دي
- أنا هتفرس بقى سالم اللي ما بياخدش باله من حاجة ياخد باله منها و يقول عليها حلوة كمان
- أصلك كنتي مأمنا له أووي
- و قال يا مأمنه للرجال
أكملت لها سامية المثل قائلة
- يا مأمنه للميه في الغربال
- و اخرتها هنفضل نحرق في دمنا كده
- أمال لو عرفتي اللي شفته من ممدوح و صابر
- أهو هو صابر ده أس البلاوي كلها
- فعلا و ممدوح لازق فيه مش عارفة ليه
- شفتي ايه بقى عشان تكمل
أخذت سامية تحكي لها قائلة
- من يومين كدة في نص الليل سمعت صوت غريب على باب الشقة فتحت لقيت ممدوح و صابر واقفين قدام باب شقتها
- بيعملوا أيه يا اختي قدام باب شقتها في نص الليل
- أنا عارفة بقى
- يعني لما سألتي ممدوح قالك أيه
- أهو قال أي كلام فارغ ما لوش معنى
- و أنتي سكتي
- أهو اتخانقت معاه يومها و خلاص هعمل ايه يعني
- اللي بيحصل ده ما يتسكتش عليه
- هنعمل ايه تفتكري
- أنا عايزة أفهم صاحب الشقة اللي باعهالها ده أزاي يبيع شقة زي دي لواحدة عازبة
ردت سامية
- قال بتقول أنها متجوزة قال
- و دا فين جوزها ده أن شاء الله
- مسافر
ردت هدى بعصبية
- اقطع دراعي أن كان ليها راجل يلمها
- دي حاجة. أكيد مديحة بتقول أن مرات صاحب الشقة كانت هتتنقط منها
- أكيد بلفته عشان يبيعلها الشقة أمال يعني هيبيع لواحدة زي دي ليه
- و بعدين يا هدى و العمل
- الولية باين عليها خالص أنها عدت الخمسين
- خمسين دي شكلها كدة عدت الخمسين أمال أنا شكلي ايه عندي ميت سنه
- ما هي مدلعة نفسها يا اختي
- مدلعة نفسها أووي أووي
قالت هدى مؤكدة
- شكلها من اللي بيعملوا عمليات تجميل
- لكن الرجالة ما بتفهمش كدة المهم النتيجة اللي في الاخر
- شكلها معاها قرشين ساندينها
- العمايل دي كلها بقرشين
ردت هدى و كأنها تريد ان تقول وجدتها
- مفيش حل غير اننا لازم نصاحبها
- فعلا و نضمها لينا و نبقى أصحاب أوي أوي
- عشان نعرف تفاصيلها و لو حد من اجوازتنا قربلها نعرف
- ازاي دي بقى
- أكيد لو ليها مزاج مش هتحكي لكن لما نكون اصحاب هنطب عليها كل شوية
ردت سامية تؤكد كلام هدى
- صح فعلا
- مش هتقدر ساعتها تقفل بابها في وشنا زي ما عملت كدة
- طيب و هنعمل كدة أزاي
- نعزمها تقعد معانا كلنا في يوم عند واحدة فينا
- و أفرضي رفضت العزومة
-
نفضل نكررها لغاية ما تقبل
- و بعدين
- نقعد سوى قاعدة ستات نفضفض و نحكي و نتصاحب
- يا سلام على دماغك يا هدى
- مش بس مرة واحدة كذا مرة
- أه فعلا
- نحاول كمان نعزمها عند كل واحدة فينا مرة و نكون برضوا كلنا متجمعين
- أه نجرب و ما له
- بس عايزين نبدأ كده الاول نبعتلها طبق في حاجة حلوة
- او طبق محشي من بتاعك يا هدى
- صحيح اللي زي دي أكيد مش بتعرف تعمل محشي
- نجر رجليها واحدة واحدة
- دا انتي مش سهله يا هدى هههههه
- لازم نشغل دماغنا و ألا المعبد هيتهد على دماغتنا
- أيوه لكن اكيد واحدة زي دي مش سهلة أوووي كدة
- و لا احنا سهلين يا سامية و إن كانت هي حلوة احنا أذكياء
- اللي يشوفك و أنتي مديانا الطرشة و احنا بنتكلم ما يشوفكيش دلوقتي
- أنا قلت سالم ما بيجيش أصلا كتير و ما بياخدش باله من حاجة لكن لقيتها رايحة للرجالة لغاية القهوة بعربيتها لا و ايه بتيجي عندهم و بتهدي السواقة أووي قال أيه أصل بيتها قرب
- أيه بتروحلهم لغاية القهوة
- أه يا أختي تفضل تلف بعربيتها حواليهم و سالم مكانش واخد باله منها فعلا لولا الله يسامحه ممدوح جوزك
- أيه ما له ممدوح
- هو يا أختي اللي شاورله عليها و بعد يوصفله في جمالها و يقوله أنها احلى من نجمات السينما
- كمان
- أه يا أختي هو و سي صابر
- يا خبر أ**د يبقى شكي في محله و يوم ما كانوا واقفين قدام باب شقتها كانوا خارجين من عندها
- أكيد
- يا لهوي
- ما لحقتش تسكن معانا مقصوفة الرقبة خرابة البيوت و قلبت الدنيا
- لازم نفهم مديحة و منال على اللي اتفقنا عليه
- هبقى اتصل عليهم عشان عارفة طبعا أن عندك شغل و مش فاضيه تكلمي حد يا سامية
- بقولك صحيح
- قولي
- العروسة
- علياء
- أه
- مش نعزمها هي كمان عشان يبقى الموضوع منطقي شوية
- منطقي من ناحية أيه
- يعني العروسة دي جارة جديدة و سالي جارة جديدة أشمعنى نعزم سالي و هي لا
- معاكي حق فعلا
- عشان نفهمهم هما الاتنين أن كل غرضنا أن ستات العمارة كلها تتجمع و نبقى كلنا أصحاب
- أه فعلا و الأمور تمشي عادي
- أه أمال أيه
- أنا خلاص دماغي هتنفجر من كتر التفكير
- و لا تنفجر و لا حاجة كله بأوانه ما تقلقيش
- هو في قلق أكتر من كدة
- مسيرنا نطفشها من هنا
- تفتكري
- لو معملناش كدة عيب علينا
- فعلا خصوصا أن ده الحل الوحيد اللي يخلينا نتقي شرها
- المهم أنا هطلع دلوقتي و اسيبك لو وراكي حاجة في البيت تعمليها
- حاجة ايه بس الساعادي خليكي قاعدة معاية ممدوح هيخلص شغل و يروح يقعد ع القهوة.
- يا دي القهوة جلابة المصايب
- عملت معاه ميت مشكلة بسببها مفيش فايدة
- و حياتك دي أدمان خلاص
- ربنا يتوب عليهم منها
- امين يا رب أنا طالعة بقى
- لا ما تطلعيش خليكي معاية شوية
- العيال بتذاكر
- ما يذاكروا هو أنتي اللي بتذاكري
- يحتاجوا حاجة و لا يسألوا عن حاجة
- مصره
- وقت تاني هنزل و نقعد سوى براحتنا
- أن شاء الله