HABANG nagmimisa ay hindi mapilgilang mapatitig ni Loui kay Benjie na seryosong-seryoso sa ginagawa nito. Hindi pa rin siya nakikita ng binata dahil sa pangalawang row siya nakaupo at natatakpan siya ng mga taong nasa harapan niya. Pagkatapos ng misa ay lumabas na kaagad si Benjie kasama ang pari kaya naman hindi na niya magawang habulin pa ito.
Siguro nga ay hindi ko na siya makakausap, aniya sa sarili habang tanaw pa rin ang pinto. Ilang sandali pang nanatili si Loui sa kinatatayuan, at nang napansing kaunti na lang ang tao ay lumabas na rin siya.
Uuwi na ako. Hindi ko na talaga yata siya makikita. Nanghihinayang man ay nagpasya na siyang umuwi nang makita niya ang isang pamilyar na bulto, at kilalang-kilala niya ang pigurang iyon na nakatayo sa di-kalayuan. Nanlaki a
