Napatingin siya kay Ahtisa nang umungol ang dalaga at umiba ng puwesto ng pagkakahiga. Kumunot din nang bahagya ang noo nito.
Dinampot niya ang phone at in-reject ang call. Subalit mapilit ang caller.
Nina calling...
Napabuntong-hininga siya at tinanggap ang tawag, pero tikom lang ang mga labi niya.
Si Nina ang tuluy-tuloy na nagsalita, "Hoy, Tisang! Tulog ka na ba? Naisturbo ko ba ang tulog mo? May gusto lang akong ibalita sa 'yo, baka kasi makalimutan ko pa. Nabanggit mo sa akin no'ng nakaraan na kailangan mo ng trabaho, 'di ba? Naghahanap ng housekeeping staff sa Casa Ballete. Kilala nina Sir Luther at Ma'am Ruthie ang may-ari niyon. Mababait daw. Mag-sumite ka na ng resume."
Nagsalubong ang mga kilay ni Apollo.
"Sure na iyon, matatanggap ka kaagad do'n. Masipag ka naman, eh. Aya
