Ayla_part 8
357 Words
Corridor mein khari wo safaid libas wali shakhsiyat aahista aahista kamre ki taraf barhne lagi. Ayla ka dil halaq mein aa gaya tha, aur uski aankhein khouf se phatne wali ho gayi thin. Aaine ke tootne se jo kach farsh par phaila tha, wo us saaye ke qadmon ke neeche dab kar toot raha tha, lekin ajeeb baat yeh thi ke uske chalne ki koi awaz nahi aa rahi hi—sirf sheeshe ke chatakhne ki goonj thi. Ayla ne deewar ka sahara lekar khare hone ki koshish ki, lekin uski taangein bilkul jaan-less ho chuki thin.
Jaise hi wo aaseb corridor ki madham roshni se nikal kar is aakhri kamre ke andhere mein dakhil hua, Ayla ki cheekh uske gale mein hi phans gayi. Wo koi anjaan bhoot nahi tha... wo unki apni shakal thi! Lekin uske chahre par gehray zakhmon ke nishaan the aur uski aankhein bilkul be-jaan aur safaid thin. Usne Ayla ki taraf dekha aur bohot hi dheemi, larazti hui awaz mein boli, *"Tum itne saal kahan thin, Ayla? Tumne mujhe is andhere ghar mein akela chor diya aur khud maazi ko bhool kar aage barh gaein?"*
Ayla ka dimaag tezi se ghoomne laga. Us aag ke hadsay ki dhundli tasveerein ab uske saamne bilkul saaf ho rahi thin. Bachpan ka wo purana ghar, wo aag ki laptein, aur uski jurwan behn jise wo samajhti thi ke bacha li gayi thi—lekin sach yeh tha ke use isi ghar ke kamron mein chora gaya tha. Ayla ne rote hue kaha, *"Mujhe... mujhe kuch yaad nahi tha! Mujhe bataya gaya tha ke tum ab is duniya mein nahi ho!"*
Us saaye ne ek dardnaak muskurahat ke sath apna haath aage barhaya. Uske haath mein wahi diary thi jo Ayla ne pehle dhoondi thi, lekin ab us diary se aag ki chingariyan nikal rahi thin. *"Ab jab tum wapas aa hi gayi ho, to ab hum kabhi alag nahi honge. Yeh ghar ab tumhara bhi thikana hai,"* usne kaha aur darwaza ek baar phir zor se band ho gaya, aur is baar kamre ki bachi-kuchi roshni bhi mukammal tor par khatam ho gayi...
-
- Writer
