الشرف (الجزء الرابع) قسمة الشبينى _ كاملة

الاقتباس الثانى

غادر حمزة غرفته باكرا ليجد محمد يجلس بهدوء ، اقترب منه بسعادة واضحة ، إنه سعيد لمجرد عودته إلى المنزل ، ما يستجد من أمور يمكن التحكم بها المهم أن أبيه معهم ، عاد إليهم وإلى والدته .

رفع محمد عينيه لولده بحزم : اقعد يا حمزة ، عاوز اتكلم معاك

جلس حمزة بلا تردد ليقول محمد : حمزة انا هتجوز خلاص ، خطبت وحددت معاد الفرح اخر الأسبوع .

انقطعت انفاس حمزة وردد بفزع : خطبت !!

زفر محمد بضيق : حمزة انت راجل دلوقتى والمفروض تفهمنى ، انا محتاج ست فى حياتى ، ست تحبنى وتحمينى ، جوازى التانى ...

قاطعه حمزة : محتاج ست !!! وماما إيه مش ست !!

زم محمد شفتيه بقوة وانعقد حاجبيه رافضا ذكرها بسوء : انت مش هتحاسبنى يا حمزة ، انا بستعمل حقى اللى ربنا شرعه ..

عاد حمزة يقاطعه منفعلا : وحق امى فين ؟

انتفض محمد بغضب : قلت لك انت مش هتحاسبنى ، امك ماظلمتهاش ومش هظلمها ، انا بلغتك للعلم مش باخد رأيك

وتقدم بغضب نحو غرفته التى رفض دخولها منذ عاد ليلا من منزل شاكر .

************

غادر الضابط لينظر هيبة ل زيدان بود : عين العجل يا حچ زيدان .

أومأ زيدان بضعف : انى خابر إن واد اخوى لازمن يتأدب ، وأدبه على ، لكن مهما اتحدتنا هتلاجى اللى يطلع يزايد على أفكار الناس ويجلب العيلتين على بعض .

أومأ هيبة مؤكدا : فاهم يا حچ وخوى وولده اول من هيروح فى الرچلين .

تن*د زيدان بحزن : انى خابر إن الولد مالهمش ذنب فى اللى حوصل ، لكن ضريبة الدم غالية .

هز هيبة رأسه وتساءل : رايد مين من بناتنا يا حچ لواد منصور .

نظر زيدان ل دياب بترقب : اللى آن أوانها يا ولدى ، عفاف بت زناتى

انقطعت انفاس دياب واحتبس شهيقه المؤلم بينما تابع زيدان : ودياب ولدكم ياخد اللى آن أوانها عندينا .. دينا بت حسين ولدى .

تعلقت الأعين بدياب الذى أصبح بين طرفة عين وانتباهتها بين شقى الرحا وعليه أن يضحى فى كلا الحالتين .

إما يضحى بقلبه ويقبل بالزواج من فتاة لا يملك الشجاعة لرفضها أمام أبيها واخويها الصامتين .

او يضحى بأمن النجع وسلامة أهله ويتمسك بإبنة عمه

**********

السلام عليكم ،

لحظات من الصمت أدت لانعقاد حاجبيها بقوة وإبعادها الهاتف للتأكد من الإشارة حتى أتاها صوته : عليكم السلام ،اتوحشتك

انف*جت شفتيها بنعومة : لحقت اوحشك ؟؟

رفرف قلبها مع تردد ضحكاته وهو يقول : ماجصديش من عشية ، جصدى من يوم ما وعيت ووعى جلبى على اسمك ، على رسمك ، على عشجك ، من سنين متوحش اسمع حسك اللى ليا وحدى مش اللى بتكلمى بيه باجى الخلج .

اندفعت الدماء الحارة لوجهها مع تزايد نبضات قلبها الذى يشعر بكل ما يقوله حرفيا ، هى أيضا اشتاقت الحديث إليه حبيبا كم قاومت رغبتها فى قربه !!

حتى منحته كاملا قلبا وعقلا ، منحته زوجا وحبيبا وعاشقا .

سكتى ليه !!؟

تساءل بلهفة لتجيب دون تفكير : بحبك يا سويلم .

توقعاتكم ⁦☺️⁩⁦☺️⁩