الفصل الثامن

1155 Words

زمن القلوب الحقيرة علي البدر البارت الثامن .... .... قررت امي تتصل بخالي كنعان وكالت النه محد راح يحل هاللموضوع غير خالكم.... وافقنه عالفكرة وصفاوي هم وافق .. وبالفعل كامت امي واخذت التلفون الارضي ودكت على خالي كنعان للبصرة وسلمت عليه وسالته عن اهله ووضعه واولاده .... وكالتله خوية كنعان محتاجتك بشغله واكيد ماراح ترجعني وبالفعل جان خالي كنعان يحب امي ومايردلها طلب ابدا وكال الها.... ام زينه انتي تامريني امر كولي.... كالتله امي ماينفع بالتلفون تعالي خوية لهنا لكركوك وافهمك وافق خال وكالها باجر من عين الصبح انه يمكم .وانتي تدللين بس طمنيني الاولاد بخير ...خاف صير عليهم شي فجاوبته امي وكالتله والله كلنه بخير.... امي مارادت تكل لخالي عن ابوي بالتلفون خافت مايفهم منها او مايجي وكالت خل يجي هنا وافهمه... جان ذاك اليوم طويل وصعب كلش وساعته تمشي بصعوبة وجنت حاضنه ل**بتي وحجيتلها كل شي وجنت احس بيها تسمعني وتضوج عله حالي.... وخلص اليوم بطلاع الروح واجه الليل ورحنه ننام وجانت نغم اكثر وحده حاقدة وجنت اسمعها تدعي عليه وتكول اللهي بجاه كلمن عنده جاه لاترجعه ولاترده النه وان شاء الله من هذا وازيد واشوفه مسودن ويفتر بالشوارع والتفتت عله امي وكالت الها انتي ليش ماتطلكين منه شعاجبج بيه... صورة جرجوبه ...عمي لو يظل اخر زلمه بالدنية هم ما اقبل بيه وانه متبرية منه لا ابوي ولا اريدة وبسرعه كامت امي عليها وشبعتها بسط وتدك عليها وتكول.... هاي تربيتي الج طيح الله حظج وحظ تربيتج ولج اكو وحده تكول هيج عله ابوها ششوالج بالله كص راسج ....هنه خمس شعرات زينهن.. ولج نغم اذا فكيتي حلكج وتنفستي بعد لسانج اكصه والله ..... وكمت خلصت نغم من ادين امي ونومتها ونمنه كل احنه بعد ماجان يوم صعب ومتوتر كلش..... ..... .... الصبح كعدنه وكالت امي لاختي زينه شغلي الصوبه جانت الصوبه علاء الدين .... وجان الجو بارد كلش التمينه عالصوبة وامي نفسيتها سوت النه الريوك وجانت اصيح علينه وتكلنه ولجن اكلن بسرعه هسه يوصل خالجن ويلكاها هوسه عيب.... اكلنه الريوك لكمه فوك لكمه وخلصنه بسرعه وراها كامت نغم غسلت المواعين ونورس شالت الفراشات وزينه نظفت البيت واني نظفت الحديقه والحوش وذبيت الزباله وامي كالت انه راح اطبخ الغدة وصاحت علينه وكالت خلصن شغلجن بسرعه حالجن عله جية.... صدك وره كلام امي بنص شاعه تقريبا وتحديدا بلعشره دخل خالي كنعان وسلمنه عله خالي وشبكناه وحضنته امي وسلمت عليه....جنه كاعدين يم خالي وقدمتله امي الضيافه ماي بس .... واستغربنه من السوته امي يعني جاي من البصرة لكركوك وننطيه بس ماي ..... جانت امي مستعجله بتصرفاتها وره شوية من كعد خالي واستقر كالتله امي .... كنعان خوية مادري منين ابدي رد عليها خالي خير خيتي احجي خوفتيني ابو زينه صاير تليه شي بس بلشغل . امي بدت تسولف كل اللي صار لخالي وحجتله عن المعاناة اللي نعيشها ... وكالتله ياخوية تدري اني مريضه وعندي قلب وضعيفه ماكدر اشتكي عليه لو اطلع لو اشرد .....وين اروح ببناتي اذا هجيت .... انه مليت ياكنعان خوية.... وراها صاحت ع نغم وكالتله هاك شوف شسوه ببنته اكو هيج بشر يسوي ...وراوته شعرها . ... .... سكت خالي كنعان شوية وكال استغفر الله شمسوي بيكم هذا .....المجرم مايسوي هيج ادري هو شنو اليريدة هذا مو بيت ....هذا مركز تعذيب مسويه.... وراها دمعت عيونه وتحسر وكال لاخوي صافي ... كوم خالي صافي خل نروح ونحاجي بلكت يقنع ويرجع ونسوي حل لهالمهزلة هذي..... ..... ..... وراح خالي وصفاء لماكان ابويه يم الجامع... .... .... بده خالي يسالني وكالي. . صفاوي ابوك هم يشتكي هالفترة من شي من مرض هم راجع طبيب دكتور اخصائي... ... ... كتله خالي والله لا راجع ولاراح ولاجان يشتكي من شي ....هو مجرد يشوفنه يجن جنونه ويطلع بينه انواع العذاب.... وصلنه يم ابوي وجان خالي كنعان متعجب من الحاله البيها ابوي وكالي ... .مستحيل واحد يعوف بيته ويرضى يعيش هنا بهالبرد هذا ... سلم خالي عله ابوية و كاله .... ابو زينه عيب منا ناس خل نمشي نتفاهم بالبيت وشتريد راح يصير ويجرالك والله مايصير خاطرك اله طيب. وانه اوعدك راح ينحل كلشي بس ارجع لبيتك وعيالك ... .... ... فجأه ابوي اختلف ع خالي بسرعه وكام يصيح انتم شتردون مني وين اولي منكم ماتكلولي وين اشرد بعد طلعت لهنا منكم لحكتوني الله اكبر ....جان ابوي يصيح حته يلم الناس وخالي يحاول يهدي بي ....ويكله بس صوتك لان الناس راح تلتم عيب ابو زينه افا عليك والله.... تدخلت انه وكتله بويه عيب من الناس خل نروح للبيت وهناك شتريد تسوي سوي وكل شي تريد يجرالك ويصيرلك بس روح ويانه للبيت .... بس ابوي ماسمعني ولا كأنما احجي وياه وبقه يصيح ولم الناس و المنطقه كلها التمت .... وابوي صار موقفه قوي .... لان كلها وياه وكلها تحجي علينه انه وخالي واحد من اهل المنطقه كال لخالي .... ... حجي رحمة الله عله والد*كم عوفوه هالمسكين شتردون منه يوميه جايينه ومهددينه ماتكلولي شبيكم شتردون هسه هم عاف البيت ومافتك منكم..... وبدت كلها تكل لابوي تعال لبيتي وعين غطه وعين فراش واي واحد يوصل يمك ن**ر رجليه ونخابر عليه الشرطه ياخذونه سحل.... عصب خالي كلش من تصرفات ابوي وهوسة الناس وصياحهم ..... وكاال الهم.. لامايروح وياكم ولايروح لاي مكان ثاني..... يروح لبيته وعياله افظل واحسن ويرجع ويانه هسه لا والله يعررف شسوي بيه جان خالي يحجي بعصبيه ومتنرفز ويصيح .... صاح ابوي بعالي صوته .... الله اكبر حتى الشارع ممنوع انام بي كافيكم خيري شري ماتكلولي شتريدون مني لاحكيني حته هنا.... و كام ابوي بوسط هل هوسه وكدام الجميع ولم فراشه وراح ..... . خالي والناس الموجودين عبالهم ابوي رجع للبيت....... وكعدت الناس تلوم بيه وبخالي وكلمن يحجي شكل خالي ظل واكف يفهم الناس وواني هم وياه نفهمهم بوضع ابوي وبالسواه بينه .... رجع خالي ترخص من الناس وطلب السموحه منهم.... ردوا عليه .....كلشي هين حجي المهم رجع ابو زينه لبيته وعياله وديروا بالكم عليه تره رجال جبير واله تقديره..... ورجعنه اني وخالي وجانت بلاعيمنه يابسه من الصياح والعطش ... وبالطريق خالي لزم ايدي وكالي.... هسه ابوك رجع للبيت وان شاء الله الامور كلها تنحل .... اريد منك ابني صافي تراضي ابوك وتطيح عليه وتبوس راسه وتنهي كل الخلاف اللي وياه ... ... بلبيت جانت امي كاعده عله نار واحنه كلنه متجمعين يمها وماندري شنسوي ومنترين خالي وصفاوي يجون وجايبين ابوي وياهم .... اندك الباب وطلعت نورس تركض فتحت الباب لخالي ولصفاء وراها طلعت امي ...... وكلنه طلعنه نسئل ونستفسر شفنه خالي معصب وتعبان وكال لامي.... هذا رجلج العنيد كوه قبل يرجع الله يلعن الساعه السودة العرفتهة بيه شلع كلوبنه وبالتواسيل الا رجع.... ردت عليه امي .... خوية كنعان وينه ابو زينة تره لهسه ماجانه ولاشفناه .شنو يجي كالكم اجي وراكم..... سالها خالي باستغراب.... ليش هو ما اجه مو شفناه لم فراشه ومشه ...... ياخوية جا غير دزيتكم عليه مودكول كوه قبل يرجع جاوينه..... ... ... والله يا ام زينه لم افراشه وبطانيته ومشه وانه عبالي رجع للبيت والتهينه نقنع بالناس انه وصافي لان اكلوا وجونه اكل..... كلها تسئل ليش طاردينه وحرام عليكم ومن هالحجي وكوه سكتناهم .... يمعوده هسه شويه ويرجع وين يريد يولي .يلف يلف ويرد لبيته وعياله..... .... ... دخلو صافي وخالي كنعان لديوانيه وامي بدت تصب غده .... جانت مسويه مرك عدس وتمن تغدينه احنه واخوي صافي وخالي كنعان..... بس امي تعذرت كالت شبعانه ما شتهي وهي جانت مهمومه عله ابوي كلش.... وانتضرنه للعصر وما اجه ابوي .وبدت تظلم الدنية .... .... .... .خويه كنعان روح دور علي شوفه وين وله هذا ماناوي يعديها النه عله خير.... كام خالي واخوي صفاء و دورو على ابوي بكل مكان ومالكو شي وظلوا يدورون كل يوم من الصبح لليل وماكو..... كأنما فص ملح وذاب واستمروا اربع ايام يفترون ويدورون وماكو.... جان جو البيت كلش متوتر والكل خايف ومهموم الا اختي نغم احسها مرتاحه بداخلها ودوم تدعي عليه كون مايرجع..

Free reading for new users

Scan code to download app

App Store Google Play

Facebookexpand_more