#أسراء

الجزء الاخيرpart (( 7 )) سقوط الأقنعة

طلعت اسراء وبيبيتها و الصدمة مرسومة على وجوهم. ..ما يعرفن شيسون. ...يضحكن؟ يفرحن؟. .يبجن؟ ؟ ؟ كل المشاعر والأحاسيس المتضادة والمتناقضة اجت بنفس الوقت ...حالة من الأمل ممزوجه بيأس غريب ما معروف مص*ره. .هل هو نابع من خلفية وذكريات حزينة عاشتها إسراء وخلتها تفقد ثقتها بشي إسمه فرح ...لو صحبتها الطويله ويه الحزن علمتها انو هي لازم ما تفرح ولا تصدك نفسها حتى لا تنصدم. ...كل هاي الأفكار وكل هالمعتقدات اجت بعقل اسراء وهي بطريق الرجعة للبيت. ..والعجوز طبعا ما ظلت ساكته. ..ظلت تسولف ويه السايق على وضع اسراء وشلون الطبيب كال انو هي ممكن تشوف ...وكعدت تكله يمتى اسراء راح تسوي العمليه وظلت تحجي كل التفاصيل للسايق وهو همين يسولف وياها. ...بس طبعا اسراء في عالم ثاني غاركة بتفكيرها بالشخص اللي يجيها بالليل. ..وبمصطفى. ...وبحياتها. ..وشنو راح يصيرلها بالمستقبل. ......ظلت تداور الأفكار براسها لحد ما سمعت صوت بيبيتها تكللها: يلا يمه سراوي وصلنا ...خلي اساعدج تنزلين.

نزلت العجوز اسراء وطبكت باب السيارة ومدت رأسها من الشباك وكالت للسايق : رحم الله والد*ك يمه.

السايق: مع السلامة حجية.

العجوز: محروس بالله .

ويه دخلة اسراء والعجوز للبيت ظلت اسراء تبجي بعلو صوتها .

العجوز: سراوي ليش تبجين يمه ...بدل ما تفرحين الله سخرلج ناس تهتم لحالتج وتعالجج. ..بدل ما تحمدين الله على نعمه.

اسراء وهي تبجي : بيبي انا متوترة وخايفه ما أريد أعيش بأمل وبعدين يطلع جذب ...ما مستعده انصدم مره ثانيه. ..والله بيبي قلبي خلص من القهر ..والله بيبي أحس روحي راح تطلع ..

العجوز: سراوي صيري سباعيه. ..شنو هاليأس اللي انتي بي .

اسراء حقها من تبجي وتقهر لأن محد يدري بحالها ولا أحد يكدر يعيش بالحالة النفسيه السيئة اللي هي عايشتها. ..منو من عدنا عنده كل هالظروف سوه. ..والله جان طكينا من زمان ومتنا. ...الله يساعدها شكد متحملة قهر ....وكله هذا يهون وسالفة الا****ب الليلي المستمر والمتواصل بكوم.

اسراء تحملت معاملة أهلها السيئه. ..وتحملت أنها فقدت بصرها وتحملت أنها تترك دراستها اللي تحبها. ...وتحملت بعد مصطفى عنها ...وتحملت هموم ما تشيلها جبال..

بين ما جانت اسراء صافنه وتفكر ..اندك الباب وراحت العجوز تريد تفتح الباب ....اسراء صاحت لبيبيتها وكالت : بيبي تعاي اكلج قبل لا تفتحين الباب.

العجوز : كولي يمه.

اسراء: بيبي ما أريد بشر يعرف بموضوع الطبيب وموضوع العمليه.

العجوز : ليش يمه.

اسراء: عفية بيبي. ..سمعي كلامي ...أخاف ما تنجح العمليه واتفشل.

العجوز: مثل ما تريدين بنيتي .

فتحت العجوز الباب وطلع مرتضى جايب المسواك.

العجوز: هلا هلا رضاوي

مرتضى : هلا بيبي ....هاي المسواك .

خله المسواك بالطارمه وراح مستعجل .

مرت الأيام لحد ما اجه يوم العمليه. ..كعدت العجوز من الصبح دخلت اسراء للحمام وسبحتها ولبستها ملابس نظيفة وكعدت تمشط شعرها وتغنيلها اغنية من مآلات قبل اللي جانن جداتنا يغنوها وظلت تغني العجوز وتكول:طلعت الشميسة

على قبر عيشة

عيشة بت الباشة

تلعب بالخرخاشة

صاح الد*ك بالبستان

الله ينصر السلطان

غزالة غزلوكي

بالماي دعبلوكي

كاعدة على الشط

كام اتمشط

اجاها نومي

كللها كومي

كالتلة ماكوم

الا تنطيني احجولي

راح اشتكي لخوية

حجولي باربعمية

وسوتلها ظفيره وصلت لتحت ظهرها. ..وبوستها من خدودها وكلتلها : يا يمه يا سراوي ربي يوفقج وربي يستر عليج يا بنيتي. ...ومسحت دمعتها اللي طاحت بلا ما تحس إسراء.

طلعن من البيت وبلا ما يردن أحد يحس بيهن. .لأن اسراء تريد هيج. ..بس فتحن الباب شافن السيارة واكفه ومنتظره. ....وراحن للمستشفى. .وبعد ما اجاهن الطبيب وحجى ويه اسراء وظل يسولف وياها ويضحكها لأن شافها ضايجه. .كللها : نامي وارتاحي عمليتج الساعه 3 الظهر. .

العجوز: يا يمه لعد ليش اجينا من غبشه.

الطبيب : حجيه ما يصير تجون بوقت العمليه لازم اكو وقت للفحوصات وأوراق نجهزها وهوايه أمور ثانيه لا تشغلين بالج بيها.

وفعلا اجت الممرضات وظلن ياخذن دم وسوو تحاليل. ..وتأكدوا أن الأمور كلها بخير ....لحد ما صار وقت العمليه ودخلت اسراء لصالة العمليات.

واستمرت العملية لمدة ساعتين ونص. ..وبعدها طلع الطبيب والابتسامة مرسومة على وجهه .

العجوز: ها دكتور ..بشر.

الطبيب: الحمد لله الأمور كلها تمام. .واسراء بخير.

العجوز: يعني شنو ..اسراء راح تشوف لو لا.

الدكتور: العلم عند رب العالمين. ..بقت يم الله. ...الضمادة راح تبقى على عينها لمدة عشر ايام و وراها تجيلي للعيادة نفتحها ونشوف النتيجة.

العجوز: الله كريم دكتور ...كلشي بيد النصيب ..خلي نشوف شنو نصيب هالطفلة المسكينه.

الطبيب : توكلي على الله حجية. .وخلي املج برب العالمين.

العجوز : ونعم بالله.

مرت الأيام مثل السحر. ...وباليوم العاشر الدكتور فتح الضمادة من عين اسراء ...سألها الطبيب : ها إسراء ....شنو جاي تشوفين.

اسراء: ما جاي اشوف شي ...كلشي أ**د ..

دنك الدكتور وأخذ نفس عميق و طك إيد على إيد ..بهاللحظه صاحت اسراء ..دكتور ..جاي اشوف شي أبيض كبالي. ..ومنا شي مثل الضوه. ..

فرح الدكتور و وكف على حيله وكال: عفيه سراوي سباعيه. ...هذا معناه نجحت العمليه. .

وبين ما يحجي وياها هو والعجوز ظلت تتضح الرؤية لحد ما ظلت تشوف الأشياء بوضوح اكثر ....فرحة اسراء ما تتقدر بثمن. .

اسراء : دكتور انا اشكرك جدا انت رجعتلي أغلى شي عندي ضوه عيوني.

بيبي انا شفت ...بيبي.

الطبيب : ديري بالج اسراء مو تبجين الدموع راح تخرب كلشي ...اهدأي وألف مب**ك ..

اسراء ظلت تشوف ...الفرحة ما سايعتها والعجوز سجدت عالكاع وظلت تشكر رب العالمين وظلت تبوس بأيد الدكتور وتدعيله.

رجعت اسراء ونورت بيت بيبيتها وظلت تروح وتجي وتشتغل وتغسل اماعين وهي كلش فرحانه. ..وطبعا محد يدري بيها أنها شافت. ..والسبب انو اسراء وصت بيبيتها ما تكول لواحد

العجوز: ليش ما تردين افرح واطش جكليت بالمنطقة .يا يمه يا سراوي ليش مستكثرة عليه الفرحه.

اسراء : بيبي بس تكولين للعالم يوصل الخبر لابويه وراح يأخذني منج ويوديني يم اخواني ابيع حب شمسي ...هيج تردين.

العجوز : اي يمه صدك كلامج ....ما نحجي وما نكول.

طبعا مو هذا السبب الحقيقي ورا إخفاء هالشي. ..السبب الحقيقي هو انو اسراء تريد تشوف الشخص اللي يجيها بالليل واللي مستغل ضعفها.

اجت الأيام وراحت الأيام. ...وفد يوم من الأيام ...سمعت اسراء صوت واحد يتحرك يمها ...وأجت الايد على حلكها واجه نفس الصوت باذنها : اششششش هاي انا لا تطلعين صوت .

اسراء: فتحت عيونها بوجهه وظلت تباوعله. ..وكلتله: انت منو ...وليش هيجي تسوي بيه.

الشخص: هاي شنو ...انتي ظليتي تشوفين.

اسراء: اي ...انا ظليت اشوف ...وعرفت شكلك كلش زين وباجر راح اشتكي عليك بالشرطه وانطي اوصافك.

الشخص: وانتي ما تخافين تكوليلي هالحجي. ...ما تخافين اقتلج هسه ؟

اسراء : يكون احسن ....خلصني من العار اللي لوثتني بي....صلح غلطتك واقتلني.

الشخص : إسراء

اسراء: انت منو ...وتعرف اسمي بعد.

الشخص: اعرفج أكثر من نفسج.

اسراء: انت منو

ظل يحجي الشخص بصوت مت**ر و وجه مغطيته ملامح الحزن والقهر.

الشخص: انا مصطفى!

الصدمة كانت جبيره حيييل ...وآسراء جان صعب عليها تستوعب هالشي.

اسراء: انت تجذب. ..أي مصطفى تقصد.

الشخص: مصطفى ابن حجي راضي .

اسراء انفعلت وظلت تض*ب مصطفى بلا وعي ومصطفى يحاول يهديها.

اسراء: ليش ...ليش هيج تسوي بيه. ...انت شنو من بشر ....انت ما عندك ضمير ....ما عندك شرف ....ما عندك انسانيه. ..ما عندك رحمه. ...الله ينتقم منك. ...الله يأخذ حقي منك .

مصطفى : اسراء سمعيني. ....

اسراء ما سكتت واستمرت بالحجي وبالانفعال لحد ما خلى مصطفى ايده على حلكها. ...وكللها سمعيني. ...خلي احجي اللي عندي وبعدين انتي احجي .

شوي شوي هدأت وشال ايده عن حلكها. ...وشعل جكاره وظل يسولف.

مصطفى: اسراء أريد احجي وياج. .ورجاءا لا تقاطعيني لحد ما أخلص.

ما جاوبته اسراء اكتفت بنظرة غضب .

مصطفى: انا بكد ما احبج وروحي بيج هيج سويت. ...انا اللي ربيتج على أيدي. ...جنت عيونج وايديج ورجليج. ..انتي جنتي تشوفين العالم من خلالي. ..تذكرين من جنت اقرالج قصص وكتب ...تذكرين من جنت اواسيج اذا ضايجه. ...تذكرين شنو دوري بحياتج.

اسراء: وقبضت الثمن.

مصطفى: لا ....مو موضوع ثمن. ...انا احبج. ..من اشوفج اتخبل. ..لهذا قررت انو انتي تكونين اللي وبس ...انا أولى بيج. ...اليوصل يمج اذ*حه.

ولهذا السبب انا حاجيت أهلي عنج. ..بس همى ما رضو. ...بس هسه اكيد راح يرضون. ...انا بأجر احاجيهم.

اسراء: ما رضو لأن عميه؟. ..وانت هسه تريد تقنعهم لأن انا شفت.؟ ....وانت اغتصبتني وخوف*ني وهنتني واستغليتني لأن تحبني؟

مصطفى: انا احبج واريدج إللي.

اسراء : انت واحد خسيس ونذل. .واشكر رب العالمين انو انت ظهرت على حقيقتك وما ظليت مخدوعة بيك.

مصطفى : اسراء ...لا تكولين هيج. ...انا مو نذل ولا خسيس. ..انا كل جريمتي اني احبج.

اسراء : انت جريمتك أكبر جريمة تعرضتلها بحياتي. .

مصطفى انا اكرهك واحتقرك ....اطلع بره.

مصطفى: انا طالع اتركج ترتاحين وباجر احاجيج.

اسراء: اطلع من حياتي ما أريد اشوفك بعد .

بيومها حست اسراء بطعم الانتصار. ..وعرفت شنو تريد. وشلون تتصرف. ..طلع بيومها مصطفى ومحد شاف وجهه بعدها. ..ومو بس هو حتى مرتضى. ..محد بين بعد من بيت حجي راضي .

إسراء ظلت هي تعتني ابيبيتها. ..هي تشتغل شغل البيت وهي تتسوك وكلشي تسوي وما احتاجت لأي شخص ....ومو بس هيج ...ظلت تدرس خارجي صف سادس علمي. ..ونجحت ودخلت كلية العلوم. ..كلشي تغير بحياتها للاحسن. ..وطبعا أهل اسراء درو بس جانت ردة فعلهم عادية جدا ولا اهتمو. .....

اسراء تغيرت حيييل من بعد ما ظلت تشوف. ..صارت قويه. ..و سباعية ومو بسرعة تتقشمر مثل قبل .

اسراء ....قصة ضحية مجتمع ومرض وإهمال أهل

قصة بنية صقلتها الظروف وخلقت منها إنسانة قويه وطموحة.

فتحت اسراء كتابها وظلت تدرس ....وكتبت بأعلى صفحة الدفتر. .... (( لا تثق بأحد ثقه عمياء. ..لأنه بالنهاية سيثبت انك شخص اعمى))

العجوز: تعاي سراوي نتعشى

اسراء: حاضر بيبي. ..جايه.

النهاية