#أسراء

(( Part 1)) طفولة فارغة

اليوم احجيلكم قصة بنية عمرها 10 سنوات اسمها إسراء. ..اسراء جانت بنية جميلة جدا شعرها أ**د وسرح وعيونها واسعه وعسلية وبشرتها حنطية لا هي سمره ولا هي بيضه. .هي من عائلة حيييل فقيره. .أبوها يشتغل حمال بالسوك وأمها دلاله تفتر عالبيوت تبيع ملابس وعطور وصابون للنسوان. .وعدها 8 إخوان 5 بنات و 3 أولاد. ..جانت حالتهم كلش فقيره يوم يأكلون ويوم ما يأكلون. ..طبعا محد من إخوانها يداوم بالمدرسة كلهم بطلو حتى يشتغلون والبنات اثنين متزوجات و بس وحده بعدها ما تزوجت كاعدة تعاون أمها بشغل البيت وتدير بالها على إخوانها وتسويلهم غدا لحد ما تجي الأم ورا ما تخلص فرتها عالبيوت. ..اسراء بنية حبابه ومؤدبة وجانت كلش شاطرة بالمدرسة. ..درجاتها كلها عاليه. ..والمعلمات يحبونها. .هي الوحيده اللي جانت تداوم مدرسة من دون إخوانها لانها ازغر وحده وجانت كلش شاطره. .فظلت بالمدرسة وإصلا هي بعدها زغيره يعني مو مال شغل ..وجانت معلمتها ست نداء ساكنه يمهم وجانت تقنع بأم اسراء انو تخلي اسراء تداوم مدرسة وجانت حتى تنطيها كتب واقلام وتنطيها ملابس من ملابس اختها القديمه. .بس حتى تسد حلك أبو إسراء وما يظل يحجي عالبنية ويشد وياها عالمدرسة. .اسراء بنية حيل اجتماعية وتحب تلعب وتتحرك وتطفر. ..فجانت تلعب كل يوم يم البيت. ..ومن جانت تشوف أبوها اجه من بعيد تخاف وتركض ركض للبيت لأن أبوها راح يبسطها ويكللها ليش تلعبين بالشارع هذا بدل ما تاخذين بسطية الحب الشمسي وتكعدين بيها بالباب ؟ ..المهم ..اجه أبو اسراء وملابسه جانت كلها وسخ وعركان وريحته ب*عة و وجهه معكور عكرتين ونص ويتعارك ويه ذبان وجهه. ..بالصدفة وهو راجع لمح إسراء تلعب حبل ودوار ما دوارها البنات ويضحكون ومتونسين. ...من لمحها ظل يمشي بسرعة و عصب كلش ...لزمها من شعرها ولفه على ايده وشالها من رأسها وخطية إسراء تصرخ وتبجي.

اسراء: يابه الله يخليك شعري راح ينشلع بيدك والدموع تارسة وجهها. ..وهو ولا يسمعها وظل شاد شعرها ويض*بها على ظهرها بالحذاء مالته.

الأب : اليوم لازم اربيج من جديد. ..يا ما تستحين يا وكحه انتي منو مربيج. .طالعه على امج ما مربايه...

اسراء:يابه عوفني والله ما اسويها بعد ...الله يخليك لا تض*بني. ..راح اموت يابه. ....وطبعا ظلت تبجي وتستغيث ولا اكو أحد كلف نفسه وفكها من هالأب الحقير. .

بيومها أم اسراء رجعت ورا المغرب جانت رايحه لغير منطقة تبعد ساعتين تودي غراض لناس بنتهم تريد تعرس وجاي يجهزونها...من رجعت للبيت حتى ما سألت على أحد. ..خلت بقجتها جوه رأسها ونامت.

بدور أخت اسراء جابت لفة مال جبن وصعدت للسطح حتى توكل اختها لأن نامت مقهورة. ..

بدور:اسراء كعدي جبتلج لفة اكليها ورجعي نامي. ..يلا حبابه كعدي .لا يسمع أبويه ويموتني.

اسراء: ما أريد أكل شي. ..أريد انام ..

بدور: انتي ليش هيج مهتمة. .يعني قابل اول مره تنبسطين؟ باوعتلها اسراء وظلت تضحك. ..أخذت منها اللفة اكلتها ونامت. ..وقبل لا تنام ظلت بس تدعي انو رب العالمين يحنن قلوب أهلها عليها. ..لحد ما أخذها النعاس ونامت ....

أم اسراء: سريوه كعدي ...شبيج نايمه بالشمس شنو ما تحسين انتي ...يلا كومي اليوم اريدج تجين وياي نودي الغراض لام كاظم. .عرس ابنها بعد أسبوع. .

اسراء: يمه ما أريد اروح .

أم اسراء منططه عيونها و وجهها أ**د من الشموس وصوتها عبالك صوت رعد بكد ما عالي وخشن. ...

أم اسراء: تمشين هسه كبالي لو امدج هنا وانتفج تنتف؟

اسراء : بس يمه لا تصيحين راح اغسل وجهي وامشط شعري واجي وياج.

ظلت أم اسراء تمشي وآسراء تمشي وراها وتتعثر تريد تلحك أمها ما تكدر عبالك غزال ولا جنها أم اسراء اللي جنها دبابه شلون تكدر تمشي هيج سريع ما ادري ..

أم اسراء : تعاي سريوه ساعديني أنزل البقجه من راسي ولج نفسي انكطع ..دكي الجرس ولج ما يسمعون الباب.

أم كاظم: هلا أم اسراء تعاي فوتي من باب المطبخ أبو كاظم يمه خطار.

أم اسراء : يلا خية ماكو فرق. ..تعاي اراويج شنو جبت.

وظلت تطلع بالملابس وقطع القماش وآسراء بس تباوع بعينها.

أم كاظم: هاي بتج

أم اسراء : اي والله هاي بنتي الزغيره

أم كاظم: الله يخليها .

ام اسراء : يخليلج الأولاد وتفرحين بيهم.

بعد ما خلصن هالمجاملات الجذابة رادن يحجن بسوالف النسوان فام كاظم غمزت لام إسراء تخلي بتها تطلع بره وتعوفهم.

غمزت أم اسراء لبتها واشرتلها تطلع بره. وظلن يتبسبسن ويضحكن.

يم الباب مال بيت أم كاظم جان اكو جهال يلعبون باالال**ب النارية والبنات والأولاد ملتمين ومتونسين. ..ورا ما الجهال صاحوها تلعب وياهم. ..طلبت منهم اسراء يخلوها تشعل النار بالمفرقعات وتخليها تنفجر. ..

اكو ولد من ضمن المجموعه اللي يلعبون حذر اسراء وكاللها لا تقربين عيونج. .بس اسراء ما سمعت منه وظلت مقربة عيونها لحد ما انفجرت المفرقعات بوجهها. خطية اسراء تاذت حييل وحتى فقدت نظرها وصارت عمية.

أمها كلش ضاجت مو لأن اسراء صارت عميه بس علمود انو منو يداريها ومنو يعتني بيها ....

يتبع⬅