BERNADETTE
Inimbitahan ako ni Braden kumain sa labas. Day-off ko naman ngayon kaya pumayag ako. Si Luna naman ay may pinuntahang kaibigan. Narating ko ang restaurant na sinabi ni Braden nang matiwasay at walang traffic. Pagkapasok sa loob ay agad hinanap ng mata ko si Braden. Nang makita niya ako ay kinawayan ako.
“Bakit ang tagal mo? Kanina pa ako naghihintay,” reklamo niya sa akin nang makalapit ako sa kanya. Naupo muna ako at hinampas ang balikat niya ng pouch na hawak ko.
“Aray ko naman! Hindi pa tayo sinasaktan mo na ako,” aniya na mas lalo kong kinainis. Hindi ko alam kung biro iyon o inaasar lang niya ako. Inirapan ko siya.
“Malamang malayo itong restaurant na sinabi mo. My god, naligaw ako. Sana ikaw na lang ang sumundo sa akin at hindi ako ang pumunta rito,” reklamong sabi ko.
