حلال ممنوع

النهاية ....

حلال_ممنوع

النهاية __?___

نورا ناصر ___

حتى بدون ماافهم شنو الصار وي جمال

وكعت لزمت ملابسي بكفوف ايدي قووي ..

احساسي يكوول جمال ماات ..

عمه كلبت الدنيا من الصريخ

واني رجليه ماعادت تشيلني ..

الدنيا كلها فزعت ع صوت صراخ عمتي ..

واني ع كعدتي اسمع النسوان الي تسائل عمي

يجاوبهم وهو منهار ..

يكول الهم جمال مات .. تريلة ( سيارة حمل كبيرة ) داعمه سيارته وهو بيها ..

مهما كان سبب موته خلص راح مني وبعد مااشوفه

سمعت صوت بداخلي ان**ر

وظل ينزف حسيته قلبي ..

سمعت صوت امي يمي

تصيح وتصرخ .. ويه على حضج يممه فاتن راح وخلاج راح ابو جهالج وبيتج .

اللتمت الناس كلها جابوا تابوته

حسيته يحاجيني من التابوت ويكولي احبج سامحيني ..

سمعت صوت وحدة تبجي بحركة كلب صوتها وصل لاحساسي .. رفعت وجهي والدموع تتساقط من عيني شلال ..

شفتها تغريد ..

جانت تبجي مثل يوم عرسنه بالضبط نفس عيونها حمره دم بس اليوم جانت تشهك ..

يمكن بهاللحظة اثنينه نفس الاحساس

صارت عيني بعيونها

وكانها تكولي هسه تعادلنا

اخذتي مني واخذه الموت منج ..

بس مالحكت اشبع منه يتغريد ..

مثل الحلم معبالك حقيقة ..

كلشي مر بسرعة ..

الفاتحة والايام وكل شي ..

جنت بالغرفة كل لحظة اكول هسه يدخل عليه بابتسامته الهادئة .. شايل بيده واحد من الجهال

وبالايد الثانية علاكة شوف شنو بيها من السغلات الي احبها .. كرزات او نساتل او جبس .. جان يعاملني مثل طفلة ..

بعد الفاتحة بايام قليلة .. سمعت بجي بصوت عالي صوت اكدر اميزه من بين الاف الاصوات

صوت معتز ..

جنت لازمة عدة .. عرفت انو اجه من المانيا ..

اخخ اتذكرت كلام جمال

من كال رضى عني معتز

وجان يتمنى يجي يشوفه

ظليت اعاتب معتز واني بمكاني .. ليش مااستجابيت لدعواته من كان يكولك تعال نشوفك ..

بس ماينفع الكلام ابدا ..

بعد مرور شهر يلله راح معتز كنت اسمع بس صوته ..

يجون الجهال يحجولي عنه يكلولي بي هواي شبه من بابا .. اكوللهم بابا محد يشبهه..

ادور ملامحه بوجوه اطفاله

بلكي احد يشبهه

يشبهون معانيه بس محد بيهم مثل عيونه ابد ..

جانت سلوى هواي تجي يمي واني بس حابسة نفسي بالغرفة ..

يوم منهن انطيتها صورة اله

كتلها خلي عادل يكبرها ويخليها باطار

ظلت تبجي ..

لزمتها من كتفها كتلها ولج مشتاقتله

اريد اسولف ويا ع الاقل صورته هنا احاجيهه ..

طلعت تبجي وبيدها الصورة ..

ارسم بيك ع الحيطان

واحضن بالهوى العفته

واصيح فلان عطرك وين

ص*ري نسمة خانكته

بعد ايام اجه وجابها ويا

علكها الي مقابيل السرير حتى تصير دوم كبالي ..

من كمل بجيت بحركة اجه يمي باسني على راسي

حضنته وظليت ابجي احس دموعي بللت قميصه

كتله تاركني وراح ياعادل..

عادل .. ميخالف خيتي انت قوية كومي الخاطر اولادج لو المرحوم عايش مجان يقبل هيج تسوين بنفسج ..

اني مراح اتخلى عنج وراح نبقى وياج كلنا وياج ..

وهذا قضاء ربج مايصير نعترض عليه ..

جريت حسرة ووخرت من حضنه مدنكة وامسح بدموعي .. كتله ادري بيك ماتقصر ..

كعدت على السرير منهكة القوى

كعد يمي وظل يسولف وياي يسليني شويه ..

بعدها طلع وبقيت اني وحدي اباوع لصورته واحجي وياها ..

لحد ماغفيت .. وعيت على صوت سلوى وهي تكعدني وجايبتلي الاكل ..

ووياها عزوز يبجي عليه يريدني ..

اخذته بحضني ابوسه وادور ريحته بي ..

... بعد ماخلصت العدة رحت اشوف ابوية بس شافني ظل يبجي حضنته وبوسته كتله يابه اني قوية لتخاف عليه ..

اخذونا نزور قبره كعدت يم القبر واحس كل شي حلو اندفن ويا .. حتى قلبي ..

الايام البعدها احسها بطيئة كلش وكوة تمشي مرات اخلص شغل واصعد فوك الغرفتي احبس نفسي بيها كم ساعه وافتح شلال دموعي وابجي كنت اتمنى يخلصن دموعي واني ابجي ..

الايام تمر باردة وموحشة

.. عمي وعمتي خلصوها من مرض لمرض على فراك جمال ..

فد يوم صاحني عمي . كال اكعدي احجي وياج ..

كعدت مقابيله وعمتي هم يمنه

عمو .. بنتي اني مامأمن على عمري وخاصة بعد ماالغالي راح ..

حسيت لزمته العبرة من كال اخر كلمتين ..

وعمتي شهكت بالبجي ..

رغم مرور اشهر بس بعدها الغصة بكلوبنا

اما اني فجانت نار تكويني ..

كمل كلامه .. كال اي بنتي

اي عمو كمل .

باعي اني خليت الولد والبنات يوافقون يتنازلون الكم عن هذا البيت .. وراح يبقى لولد المرحوم ومرته ..

بهالاثناء دخلت هيا

دينا بس شافتها راحت الها ركض

ماما ماما .. بعدتها من ايدها كالت الها روحي بعدين ..

اجتني دينا والدمعه بعينها .. دينا هواي تعلقت بيه حتى تكولي ماما .. تعلمت من اولادي ..

حضنتها وبستها على راسها ..

سلمنه على هيا وكعدت ..

هيا .. اي شجنتوا تسولفون .. ؟

عمه .. احنه مو اتفقنه هذا البيت يظل لمرة المرحوم واولاده ..

هيا .. اي بس شرط ماكو واحد غريب يدخله ..

فاتن .. هيا شتقصدين ؟؟

هيا .. قصدي واضح فاتن يعني ماتتزوجين واحد غريب وتجيبينه هنانه اذا تردين تتزوجين واحد من اخوتي ..

فاتن .. انتفضت من مكاني كمت وبعدت دينا عني

كتلهه شنو هالحجي هذا لا غريب ولا قريب اني مااتزوج بعد المرحوم والبيت هذا هم مااريد بيت ابوي موجود والحمدلله واني منا وجاي اعرف شون اعتمد على نفسي واعيش جهالي حالي حال هوايه نسوان عايشات بلا زلم ..

خلت رجل على رجل وكالت خنشوف بعدين ..

فاتن .. اريد احجي واهد عليها بس عمي قاطعني ..

كال الها اني اعرف بنت اخوي كلش زين ماتسويها ماتخلي غريب ياخذ مكان الغالي ..

كمال اخذ حصته من قطعة الارض ال١٠٠الي بفلان منطقة وبنى بيها ..

وانتن البنات الجن حصة من ال٢٠٠متر ابيعها وانطيجن حصصجن ..

ومعتز حاجيته متنازل عن حصته لاولاد المرحوم ..

هيا.. اي والله يابابا اني اريد حصتي لان اريد اتطلك ..

عمه .. يامعزاية شتحجين تردين تطلكين مرة ثانية لج الناس اكلت وجوهنا بعد زواجج المصخم من بسيم هسه ليش تطلكين بلله ..

هيا. بصياح .. مااريده مايخلف صارلي سنين ويا ..

عمو .. ولج انت شنو ماتكليلي .. اكثر وحده تعبتيني هلكتيني خلي يكون بعلمج طلاك ماكو اكعدي يم رجلج وسكتي وبلا هالخبالات واذا ميخلف اخذي بنتج ربيها يمج احسن ..

هيا .. شنو حتى بنتي متضايقين منها ..

عمو .. لج بنتي ممتضايقين مو تردين خلفة اخذي بنتج يمج ..

فاتن .. اني ابد معجبني الكلام الي جان يدور بينهم وعيا كلامها كله تبسمر وكل شويه وباوعتلي صفح

اخذت دينا من ايدها وكمت على شغلي ..

صبيت العشا وخليته كدامهم ..

ومن خلصوا هيا غسلت المواعين

خليت فواكه وكعدنا كلنا بالصالة بس عمو راح يم بابا يكعد يمه مثل كل ليلة ..

صارت ساعة عشرة ..

كمت كلت يلا حسن امير عزوز يلله انام اتاخر الوقت ..

بس صحتهم اجو وراية

دينا .. ماما فاتن اجي انام يمكم ..

هيا .. لزمتها من ملابسها ورجعتها لمكانه

ولج وين تروحين يمهم ولد وامهم انت تنامين يم بيبي مفهوم ..

دينا ... بصياح وبجي .. ماااا اني انام يمهم ..

هيا لزمتها وكعتلها ض*ب ..

فاتن .. متحملت سحبتها

صحت بوجهه لج عوفيها شبيج تطلعين خبالاتج على طفلة شنو ذنبها ..

هيا .. معليج بنتي وبكيفي روحي نيمي ولدج يلله ..

فاتن .. هه وشنو الي يثبت انو هي بنتج ..

عمه .. كافي صلن على محمد شبيجن لج يمه هيا خليها تنام يمهم هم مثل اخوتها ..

فاتن .. شفتها جرت حسرة بعصبية ودينا كتلت نفسها من البجي .. شلتها وصعدت بيها فوك .. فرشت لحسن وامير جوه

خليت عزوز عن يميني ودينا ع اليسار وظليت اسولف الهم سالوفة .. يلله ناموو ..

بعدها بيومين اجه وائل زوج هيا عليها

توسل بيهم حتى ترجع

وكال اني ممقصر بشي وياها ابد بس هيه حيل مزاجية واذا ع الخلفة مستعد يعالج ..

شرطت عليه تاخذ دينا وياها ..

وافق ومكال شي ..

جهزت اغراضها واني ابجي تعلقت بيها حيل ..

بس مالي اي حق امنعها من امها الحقيقية

هي كانت فرحانه ديونه يمكن لان شي جديد عليها ..

..

بعد اسبوع رجعوها ظاله تبجي علينا كلنا

من جدها لعزوز وتعدد باسمائنا ..

حييل فرحنا بوقتها وكفت كم ساعه بالمطبخ حتى اسوي الها الاكلات الي تحبها . .

كمال مشى ويانه بمعاملة تقاعد جمال وطلع النا راتب ..

مرت سنة على وفاته مااعرف شون مرت بس اني من يوم الي توفى احس اني ميته وبعد متعنيلي الحياة شي .. عايشة لاجل اطفاله هم مص*ر قوتي .

جنت ادور سوالفه بداخلي واتذكرهن و اضحك وياصورته وكانه يحجي ويايه ..

بعد كم شهر من سنويته .. شفت الكل مخبوص وينتظرون معتز يجي

بيومها اني رحت يم اهلي .

ماردت اصطدم بي .واشوفه مجنت مرتاحة الهالشي

من رجعت شفت الغرفة مليانه هدايا

الجهال كالوا هاي من عمو معتز ...

طوال فترة بقائه اني جنت مااجتمع وياهم ع الاكل ودائما اتهرب من شوفته

وهو هم مو طول اليوم بالبيت

يا نايم ياطالع يا معزوم يم الاقارب والاصدقاء ..

فد يوم عزوز راد مني اسويله كوب حليب

اخذته ورحت للمطبخ

دفيت اله مي وصبيته بالكوب

وخليت فوكاه حليب ..

اريد اخلي شكر ..

سمعت واحد من وراية يكولي شونج ام حسن

وكعت الخاشوكة مني ع الكاونتر وكلبي صارت دكاته سريعة بلعت ريق ..

درت بس بدون مااباوع لوجهه ..

كتله هلا بيك حمدلله على السلامه

ابد ماباوعت لوجهه ..

خليت الكوب بيد عزوز واريد اطلع من الباب الي يطل ع الحديقة

سمعت عزوز يكولي ماما هذا ماصخ ..

سويت نفسي مااسمعه اريد انهزم وينه صار درب الفلته ..

جاوبه معتز تعال باباتي اني اخليلك عليه شكر ..

دخلت من باب الصالة وصعدت كبل لغرفتي ..

ظلت تداهمني الذكريات من كل صوب ..

بذاك اليوم حبست نفسي بغرفتي وماطلعت منها

بالايام البعدها .. صرت اتجنب شوفته بس اسمع صوته انهزم .. صرت اكره الذكريات القديمة ولان معتز يذكرني بيها صرت اكره وجوده ..

بعدها راح معتز وهو كل سنة يجي

نادرا ما اشوفه او التقي بي والحجي ويا معدوم

اولادي يحبو كلش ويتواصلون ويا من تليفون عمتي او عمو .

فد يوم حسن ابني راد موبايل خاص

جاوبته لا ماما انت بعدك صغير من تكبر اشتري الك

حسن .. هسه لو بابا عايش مجان اشترالي موبايل ..

قهرتني حجايته واشتريت اله موبايل خليته بايده

بس باوقات الدراسة والامتحانات اشيله منه

بس مجنت اراقبه هواي

لان اشوفه يباوع بس كارتون ..

بعد مرور اربع سنوات على وفاة جمال

كنت نايمة .. وشفته وياي بالغرفة كاعدين نضحك ونسولف ونحجي ..

فتح علاكة طلع منها روب ابيض

كال اللبسي مشتاقلج ..

اخذته منه وشمرته وضحكت مقبلت البسه ..

كعدت ضايجة وشكو ذكرى ناسيتها اتذكرتها بهاليوم ..

ظليت احوس واشتغل بدون خلك ..

طلعت بتيته كشرتها وحطيتها بالطاوة عزوز يحب البتيتة الصبح ..

صبيت كهوة وكعدت اشرب .. وبالي راح لبعيد وكل شوية اتذكر الحلم ..

شميت ريحة حرك

رحت للطاوة .. طلعت البتيته محتركة حرك ..

خليتها على صفحة

باوعت للساعه ٧ونص بعد وكت عطلة والجهال نايمين

رحت صوب بيت اهلي شفت اكو حوسة بالمطبخ

فتحت بابهم ودخلت سلوى وجهالها كاعدين

عدهه بنيه وولد ..

كلت صباح الخير .

سلوى .. صباح النور ..

كعدت ع الميز ..

_هاا امي نايمة ..

_اي نايمه شبيج اشو مو على بعضج ..

_ اخخ حلمت بجمال بعد عيني ..

_سودة عليه .. احجي شنو حلمتي ..

_جايبلي روب ابيض ويكولي لبسي مشتاقلج ..

يمكن هذا كفن الروب موو ؟

جرت كرسي وكعدت عليه لزمت ايديه

سلوى .. لا حبي هذا رجال الروب مو كفن ..

فاتن .. دخيلك ياربي هم زين مالبسته ..

اكوم اروح خاف الجهال يكعدون مايلكوني ..

سلوى .. بعد وكت خلي اصبلج جاي ويانه

فاتن .. مااريد شربت كهوة يلله بعدين امر الكم ..

طلعت من يمها وافكر بتفسير الحلم ..

دخلت للبيت .. شفت عمتي كاعدة

صبحت عليهااا

هاا عمه تردين جاي ..

عمه .. اي والله اريد اشرب علاجي ..

حطيت القوري ع النار ادفي ..

عمه .. اكول ام حسوني ياريت تنضفين غرفة الولد ..

_عمه نضيفة مابيها شي ..

_لايوم اقصد نقلي اغراض الولد لغرفة البنات لان معتز الشهر راح يجي ويكول مطول بجيته هالمره ..

ارتبكت شويه شعنده مطول اوو عاد ولااخذ راحتي من يجي رغم هو مايضايقني ..

كتلها صار عمه ..

رحت للغرفة فضيتها من ملابس الجهال

صحت على عادل ساعدني اصعد سرير

حسن ليفوك بغرفة البنات سابقا ..

بقيت بيها بس سرير واحد ..

بعد شهرين كالوا راح يجي معتز ..

قبلها بيوم انخبص البيت خبص

منال وهيا وكمال وعوائلهم اجو ..

وراحوا استقبلوا بالمطار ورجعوا ..

اني بقيت بالمطبخ اطبخ ماطلعت

والجهال طابين طالعين وكلساع اصيح على واحد .

داافرغ التمن على الزيت سمعت صوته من وراية وهو يكول شلونج ام حسن .

اجيت اوكع التمن كله ع الطباخ وجوده كلش يوترني يذكرني بايام راحت ومترجع ..

واني اصب التمن كتله بخير الله يسلمك حمدالله على السلامة ..

وبعدها بس اسمع صوت التمن وهو ينصب ع الزيت مسمعته معتز شنو كال ..

من التفتت شفته شايل عزوز وطلع ..

التهيت اطبخ واجن البنات ساعدني

فرشنه كلنا بالصالة لان يلله تكفينه

اخذت كاسات الزلاطه بصينية واريد اوديها للصالة

وصلت لباب الصالة اريد افتح الباب وانفتحت من وحدها .. صار كبالي معتز لاارادي باوعتله واجت عيني بعينه

.. شكد متغير

طشار شيب بلحيته وشعره كالبه ليفوك

بس ممبين كبران بشرته حيل نضيفة بعدها بس الشيب طالع شويه مو هواية

بعده جسمه رياضي .. لابس تيشيرت نيلي وبنطرون جينز ..

اخذ مني الصينية ماعولت ياخذها اريد اختفي من كدامه ..

طكيتها مشية سريعه للمطبخ ظليت اض*ب على خدودي واشتم نفسي وثول ثولج ولج شون تحطين عينج بعينه هسه جمال يغار امداني اي والله ..

صعدت اركض للغرفة .. سديت الباب باوعت لصورته حاجيت جمال حبيبي اسفة بدون قصد والله وظليت اتعذر منه .. ادري بي بعده يعشقني ويسامحني ..

اندكت الباب .. صوت سلوى

يلله وينج فاتن دننتظرج ع الغده .. ..

اي طالعة هسه جاوبتها مسحت دموع عيوني وطلعت بعد ماباوعت اله ابد ..

وكالعادة هو يجي كل سنه مرة ويبقى شهر

ويروح ..

مر شهر على وجوده نادرا مااشوفه او اتجنب ملاقاته ..

فد يوم جنت بالغرفة اجاني حسن

ماما عمو معتز يريدج ..

استغربت كلش .. خليت شالي على راسي

وطلعت من الغرفه فتت الممر .. شفته واكف يم الدرج من فوك ..

عدلت روحي وباين عليه التوتر ..

كتله هاا صحتني جان لازم بيده تليفون حسن ..

معتز .. ام حسن انت تراقبين تليفون حسن دشوفين شبي مابي .. ؟

فاتن .. ليش شبي ..

شال التليفون وانطانيا وكال باعي

اخذته منه شفت بي فيس وبلاوي وياهاا

كلها صور خزي واصدقائه طيحان حظ ..

رفعت راسي اله كتله لا ياحمار تعاااال اليوم امووتك ..

معتز .. فاتن شنو هالحجي هذا لتكوليله حمار تره صدك يصير حمار وبعدين الخطأ منج انت ممراقبته ..

فاتن .. احتاريت شنو اكول فعلا انت ممراقبته سكتت وظليت اخزر بحسن وارفع راسي ..

معتز ..حسن روح خليني وي ماما شوية ..

فاتن .. احسابك بعدين تحلم تشوف موبايل بعد ..

معتز .. عوفي خلي عليه اني احاجي

اني عندي كلام وياج فاتن اذا ممكن تسمعيني للاخير ..

فاتن .. اي اتفضل اسمعك ..

معتز .. ممكن ننزل نكعد بالصالة ..

فاتن.. ارتبكت كلش كتله خير اكو شي ؟

معتز .. هسه تعرفين ليش تستعجلين ..

فاتن .. نزلت ويا جوة دخلنه بالصاله مجان اكو احد عمو وعمه بغرفتهم ..

وهاي كعدنه .. حجيت ..

معتز .. فاتن اني اريد اتزوجج

فاتن .. كمت ع حيلي كتله اشايفني لابسه الاحمر والاخضر لو مكحلة ومحمره حتى تكول عليه تدور زواج ..

معتز .. لا مو هيج انت فهمتي غلط اني اريدج نتزوج ناخذ الجهال ونروح لاوروبا هناك مستقبلهم افضل ..

فاتن .. لا عيني لا اني مااريد اتزوج مايصير بعد وانت مايصير تفكر بيه هالشكل ..

معتز .. ليش مايصير تره حلال اتزوجج والله ..

فاتن .. هذا حلال ممنوع ودير بالك تفكر بيه هيج بعد مرة ثانية تره والله اطلع من البيت يااني ياانت اني الجمال وبس حتى لو هو جوة التراب ..

وعفته وطلعت .. بعدها بايام ماشفته راح يم كمال وبات يم منال هم كم يوم ..

ظليت بس افكر خاف يجبروني عليه شون ياربي ..

كعدت الصبح وابالي افكار اريد اطبقها ..

طبيت للمطبخ اشتغل

دخلت عمتي صبيت الها جاي وخليت كدامها ريوك ..

ظليت اباوعلها .. كتلها عمه ليش ماتخطبين وسن بنت عمي لمعتز .. ؟

كملت لكمتها وكالت هو اني كتله على تغريد بنت خالته شحلاها ودكتورة بالجامعه مقبل بيها بعد وسن ..

فاتن .. لا تغريد غير ميقبل بيها اكيد بس وسن شبيها هم خريجة ومدرسه وزينه مو كبيرة هم عمرها ٢٧سنه ..

لشوية دخل معتز خرعني كال احم احم .. تسائلت بداخلي ياا هذا شوكت اجه .هم زين مخليه حجابي على راسي . .

لابس تيشيرت ابيض وترا**وت رصاصي بي خطوط بيض رياضيه على طوله ..

راح للثلاجة طلع بطل مي وكال وانت شنو ست فاتن صايرتلي خطابة . .

درت عليه واني كاعده ع الكرسي

كتله شفتك تخطب ناس مامناسبين الك كلت اخطب الك الانسب ..

جرع الماي وراها جر حسرة ..

باوع لامه كال الها يووم اني رايح بعد كم يوم ديري بالج على اولاد المرحوم وراقبيهم كلش زين ..

حسيته متقصد يغثني كتله لا عيني ميحتاج توصي جهالي اني دايرة بالي عليهم عمه خطية تعبانه ..

معتز .. اني مااوصي ناس مامناسبين وموحريصين ..

عوجت حلكي وكامت امه خلت اله ريوك ..

وبعدها سافر ..

مااعرف شنو الحكمة والعبرة من حياتي

لاتزوجت حبيبي ولا كملت عمري ويا زوجي ..

بقى معتز يهتم هواي باطفالي ويراقبهم حتى عن بعد صار الهم مثل الاب الروحي

اما اني عايشة على ذكرى جمال وحتى ثوبي الاسود ماغيرته ..

انتهت ..

اتمنى تترحمون الجمال اسمه الحقيقي زياد ?

جانت غايتي من نشر القصة دعواتكم يتزوجون معتز وفاتن ..

اني ضد فكرة انو الاخ يتزوج زوجة اخو بعد وفاته وهالشي صاير عادة عند العراقيين بسبب كثرة الحوادث لكن مع فاتن ومعتز الشي يختلف

لانها كانت حبيبته قبل ورغم انو هي حبت جمال لكن معتز بقى حبها نبض بداخله لان لحد هاي اللحظه هو ممتزوج ..

اشكر جميع من علق وتفاعل مع القصة

اشكر الكاتبة نور الزبيدي على الابيات الشعرية الي اهدتها للقصة ..

انتظروني بقصة جديدة واوعدكم راح اكتفي من الحزن وهاي اخر قصة تكون نهايتها حزينة ..

وائل جسار

خليني ذكرى جميلة عندك واوعى تنسى زمان

كلمات هاي الاغنية احسها ترهم لجمال ومعتز

كانها ل**ن حالهم اثنينهم ?