تلاقينا

الفصل الخامس والسادس❤

#الحلقة_الخامسة

#رواية_تلاقينا

#بقلم_إيمان_جمال

________________

في المساء في ڨيلا الشامي

كلهم قاعدين عالسفرة ومعاهم مريم وسلوى أمها

كريم بيرخم على سليم: سوولي

سليم: وحياة امك هقوملك

وفاء: نعم ياسولي ايه يا روح امك دي

سليم: انتي كمان ياعمتو بتقولي سولي طب ابعدي ابنك عني

كريم: الله يا أخي دا انا بحبك اوي

سليم ضحك وسكت والكل حاسس ان سليم جواه حاجة طبعا ماعدا الست زفتة هي وامها

سلوى(ام مريم) وجهت كلامها لسليم: بقولك ايه ياسليم

سليم: خير ياعمتو

سلوى: كنت عاوزة يا حبيبي أغير عربيتي

سليم: روحي المعرض اللي بنتعامل معاه وغيريها ومالكيش دعوة بالفلوس

سلوى: شكرا يا حبيبي

مريم بدلع: وانا كمان ياسولي

سليم هنا بص لكريم وكأنه بيقوله عاجبك اوي وانت شايفها بتقولي سولي وبيستحلفله وكريم ضحك عليه

مريم: ايه يا حبيبي ماردتش عليا ليه

سليم: روحي مع مامتك وشوفوا اللي يعجبكوا

سليم سابهم وقام ودخل اوضة مكتبه ووفاء راحت وراه

دينا بتوجه كلامها لمريم: ايه يا مريم مش لسة مغيرة العربية الشهر اللي فات دا انتي معاكي احدث موديل

مريم ببرود: وايه يعني هو انا جيت طلبت منك انتي انا بطلب من جوزي حبيبي

كريم ادخل وقالها: حبيبك؟ ماهو واضح

مريم اضايقت: بقولك ايه يا كريم ماتتكلمش كدا معايا عشان مش عاوزة اتخانق معاك وقامت ومشيت وامها وراها

دينا بصت لكريم: عمرها ماهتتغير

كريم سكت وماردش ومضايق على ابن خاله اللي اكتر من اخ

طارق بيحاول يلطف الجو: بقولكم ايه مانيجي نخرج نغير جو

يارا (مرات طارق) تصدق ياطارق فكرة حلوة

كريم: اشطا ياطأطأ يالا نقوم نلبس

كلهم قاموا يلبسوا عشان يخرجوا

★★★★★★

في اوضة المكتب عند سليم دخل وقفل النور ومشغل نور اباچورة المكتب وبس وعمته دخلت وراه شافته سرحان وباين عليه الوجه راحت جمبه وحطت ايديها على كتفه: مالك يا قلب عمتك

سليم بيحاول يبان طبيعي: مافيش ياعمتو انا كويس ماتقلقيش

وفاء حضنته ومشت ايديها على شعره وكأن سليم مستني الحضن دا عشان يسمح لدموعه تنزل...وفاء حست بيه وسابته يعيط وفضلت ان الاحسن تفضل حضناه وبس لحد مايهدى

سليم بصوت مبحوح: تعبان اوي ياعمتو

وفاء: سلامتك من التعب ياسليم..مالك ياحبيبي احكيلي

سليم: نفسي في ولد يشيل اسمي

وفاء: هي باردوا مريم رافضة لسة

سليم: أنا خلاص مش عاوزه منها

وفاء بفرحة: يعني نويت تتجوز تاني

سليم خرج من حضنها: لا يعني لا مش هغلط الغلط مرتين

وفاء بهدوء: اهدى يا حبيبي انا مش قصدي حاجة بس انت نفسك في ولد

سليم: وانا خلاص مش هطلب منها تاني واهو عندي سيف ابن طارق اخويا ذي ابني و اكتر

وفاء: اكيد يا حبيبي بس في فرق بين ابن اخوك وبين ابنك اللي يبقى من صلبك

سليم بصلها وكأنه بيقولها كفاية كلام في الموضوع دا قعدت معاه شوية وبعد كدا خرجت وسابته فاتح اللاب

★★★★★★

بعد اسبوع في بيت ايه ، بطه خلاص رجعت بيتها واحمد والد ايه تعبان جدا والتعب بيزيد يوم بعد يوم....وهما قاعدين عالغدا ايه ومامتها وابوها ومازن بيتكلموا وبيهزروا ذي عادتهم جرس الباب رن ومازن قام يفتح وكانت المفاجأة بالنسبة لأحمد لأن كان اخوه

فاضل اخو احمد هو وسعد ابنه هما اللي عالباب دخلوا وسلموا عليهم وقعدوا مع بعض

فاضل: اذيك يا احمد

احمد وهو قلقان: الحمدلله ماشي الحال اذيك انت

فاضل: تمام والله

احمد: دايما يارب.....وجه كلامه لسعد: عامل ايه يا سعد

سعد: الحمدلله ياعمي انت عامل ايه وصحتك عاملة ايه

احمد وهو حاسس ان فيه حاجة من مجيتهم: الحمدلله يا ابني

سعد بيوجه كلامه لآيه: عاملة ايه يا بنت عمي

ايه: الحمدلله كويسة...وسكتت عشان هي اصلا مش بطيق عيلة ابوها وخصوصا اعمامها

فاضل بص لعايده ومازن وايه ووجه كلامه لأخوه: بقولك ايه يا احمد كنت عاوز اتكلم معاك شوية لوحدنا

احمد قلق: اه حاضر معلش ياعايده خدي الولاد واخرجوا

فاضل بص لسعد: وانت كمان ياسعد اخرج معاهم

سعد: بس يا بابا

فاضل قاطعه: لا أخرج انت بس وأنا هتكلم مع عمك

سعد خرج وقعد مع عايده وولادها وفاضل واحمد قعدوا يتكلموا أكتر من نص ساعة وبعد شوية خرج واخد سعد ومشي ، عايده دخلت لجوزها تعرف في ايه لاقته قاعد سرحان وقلقان اوووي ودا باين على وشه: ايه يا احمد مالك ايه حصل

احمد: ها....اقعدي وأنا احكيلك

*الحلقة خلصت*

ياترى اخو احمد قاله ايه؟

ياترى سلوى عمة سليم بتخطط لإيه؟

****************************

#الحلقة_السادسة

#رواية_تلاقينا

#بقلم_إيمان_جمال

_______________

في ڤيلا الشامي

صباح يوم الجمعة سليم صحي ونزل يجري (بيعمل كدا في اجازته) قابل مروان صاحبه

استووووووب

(مروان صاحب سليم من أيام المدرسة واتنقل مع أهله للمنصورة عشان شغل والده وهو هناك اتعرف على مي 'صاحبة ايه' وخطبها ورجع هو ومامته من فترة قريبة بعد وفاة والده واستقر في القاهرة تاني)

سليم سلم عليه وحضنه: مروان حبيبي ايه يا ابني نبقى جمب بعض ومانشوفش بعض

مروان: معلش يا حبيبي والله الشغل انت عارف بقى شغل المكتب والقضايا (بيشتغل محامي)

سليم: عارف يا مروان والله و عشان كدا عازرك ..ايه هنفرح بيك امتى

مروان: هانت يا صاحبي كلها شهر بالكتير إن شاء الله

سليم: مب**ك يا حبيبي مش محتاج أي حاجة

مروان: تسلملي ياصاحبي والله كله تمام...طمني عليك اخبارك ايه

سليم: أنا الحمدلله ذي ما انا مافيش جديد

مروان:مالك حاسك مخنوق ليه

سليم: لا يا حبيبي أنا كويس والله انت تايه عني يعني

مروان: ماهو عشان مش تايه عنك حاسس انك فيك حاجة

سليم: أنا كويس والله وبعدين سيبك انت انا فرحان ان شفتك اوووي

مروان: وانا والله بقولك ايه مانيجي نخرج بالليل اهو نرجع خروجات زمان

سليم: طب والله فكرة خلاص نتقابل في النادي على الساعة 9

مروان: تمام جدا....يلا الحق أنا الفطار عشان انت عارف الحاجة

سليم: ماشي يا حبيبي سلام

مروان وسليم مشيوا كل واحد راح بيته

سليم دخل الڤيلا شاف مريم مراته اللي استغرب انها صاحية بدري في يوم اجازة ذي دا بس ماداش اهمية وكانت قاعدة في الجنينة بتلعب يوجا والمفروض ان رياضة اليوجا الواحد بيبقي قاعد مع نفسه ومش بيتكلم مع حد بس هي رخمة وأول ماشافت سليم نادت عليه:سليم

سليم وقف: نعم

مريم راحت عنده وبتدلع: ايه يا حبيبي كنت فين

سليم: نعم ودا من امتى

مريم: الله مش جوزي وبشوفك كنت فين

سليم: جوزك: تصدقي نسيت....سابها وطلع ياخد دش ويغير هدومه

مريم فضلت مضايقة من كلامه وقعدت تفكر تعمل معاه ايه وطلعت لمامتها

في اوضة السفرة قاعدة وفاء وكريم وطارق ومراته وسيف ابنه ودينا سليم نزل ودخل عليهم: صباح الخير

كلهم: صباح النور

طارق وجه كلامه لسليم: هتعمل ايه في موضوع الفوج الأجنبي دا

سليم: لازم أعرف انهم جادين وشغلهم حلو لأن انت عارف ان دي حاجة مفهاش هزار

طارق: تمام كدا هتكلم تامر

سليم: اها هكلمه عشان هو هيبقى شريك في المنتجع الجديد ولازم يعرف كل التفاصيل بالليل هتقابل أنا ومروان في النادي وهكلمه يجيلنا هناك

(تامر المنشاوي صاحب سليم عنده شركة في ال*قارات 'شركة المنشاوي' وشريك سليم في المنتجعات اللي بتتبنى في شرم الشيخ وعلاقته بيه علاقة شغل وبس لكن صديق سليم المقرب اوي يعتبر مروان رغم انشغالهم)

سليم بيوجه كلامه لعمته: عمتو ممكن بعد الفطار نتكلم شوية

وفاء: طبعا يا حبيبي

كريم بيبص لدينا: دودو عاوز منك خدمة

دينا: انسى ياكيمو

كريم: والنبي والنبي انتي عارفة انتي الوحيدة اللي بتستحمليني في الموضوع دا

سليم ضحك لانه فاهم كريم بيتكلم عن ايه

كريم بصله: اضحك اضحك يا اخويا ما انت مش راضي تعبرني

سليم: عاوزني أجي معاك وانت بتشتري هدوم وفي الآخر مانشتريش حاجة بعد خمس ساعات لف لا انا مش هكررها تاني

دينا: ايوا والنبي ياسليم قوله

كريم: انسي هتيجي معايا يعني هتيجي معايا خلص الكلام

دينا بنفاذ صبر: حاضر بس يا انا يا انت النهاردة

سليم شال سيف ابن طارق اخوه ومقعده على رجله وبيلاعبه وسيف مبسوط وبيضحك

يارا: بيحبك ياسليم اوي

سليم بوجع بيحاول يداريه: دا حبيب عمه اصلا

وفاء موجوعة على ابن اخوها اللي طول حياته شايل كل حاجة ومش معاه ابن يشيل اسمه

خلصوا الاكل وكريم وطارق طلعوا الجنينة ويارا ودينا قعدوا لوحدهم وسليم ووفاء دخلوا اوضة المكتب

★★★★★★

في بيت ايه وبالتحديد في اوضة احمد وعايده في الوقت دا كان عدى يومين على اليوم اللي كان جه فيه فاضل وابنه سعد

عايده قلقانة على بنتها وبتفكر في كلام فاضل اللي قاله لأحمد وأحمد حكالها عنه

احمد: ها.....اقعدي وانا احكيلك

عايده قعدت وهي باين عليها القلق

احمد: فاضل طلب ايد ايه لسعد ابنه

عايده: ايه اللي انت بتقوله دا

احمد: ذي ماسمعتي كدا وماادانيش فرصة حتى ارد عليه وقالي فكر و يومين ورد عليا

عايده بخوف وقلق: لا يا احمد والنبي انت عارف أخواتك بيتعاملوا معانا ازاي انا والله لما لاقيته ادامي وبيتكلمه كويس وبهدوء عرفت ان فيه مصيبة

احمد: ربنا يستر وانا اصلا هرفض أكيد أنا مش ناقص بنتي تعيش في حياه كلها حقد وغل وكلها نكد

عايده بخوف: أحمد أنا خايفة اوي

احمد: بصي طول ما أنا عايش وفيا نفس عمري ماهوافق

عايده فاقت من سرحانها على صوته ايه

ايه: ياماما

عايده: ها...ايه في ايه

ايه: بنادي عليكي مش سمعاني

عايده: معلش كنت سرحانة شوية في ايه

ايه: بابا ومازن فين

عايده: نزلوا يصلوا الجمعة

ايه: ماشي ياست الكل انا قاعدة بارة

عايده: ماشي يابنتي

احمد خلص الصلاه وراح قعد على القهوة مع اصحابه ومازن طلع البيت ودخل اوضته يذاكر وايه خبطت عليه ودخلت

مازن: أهلا باللمضة

ايه: بس يارخم دا أنا جيبالك كوباية شاي انما ايه حلوة

مازن: حبيبة قلبي والله انا فعلا محتاجها

أخد منها الشاي وهي راحت قعدت على سريره وباين عليها القلق مازن شافها وراح قعد جمبها: مالك يا حبيبتي

ايه: زهقانة اوي يامازن عاوزة اشتغل انت عارفني مابحبش القاعدة

مازن: ان شاء الله يا حبيبتي تشتغلي مش انتي قدمتي ورقك في كذا مدرسة

ايه: اه ولحد دلوقتي مافيش أي حاجة

مازن: معلش يمكن بس عشان الدراسة بدأت من فترة فمستنيين لبداية السنة الجديدة

ايه: يمكن....يالا أسيبك تكمل مذاكرة

سابته وخرجت وهي راحة تجاه اوضتها جرس الباب رن وراحت تفتح

*الحلقة خلصت*

-ياترى سليم عاوز عمته وفاء في ايه؟

-ياترى مين اللي على الباب لما ايه راحت تفتح ؟