اقتحام

4124 Words

أرهنت عمري الجزء الخامس نورا ناصر هيه طبت وصاحت ؛ حلاااااال دم الغزااااال ، شعدكم ها ولك عويش تريد تاكل اكلي ها ؟؟ كمممم وخر يلله .. ؛- افااا تاكلين واختج توها ميتة هيه هيج الاصول .. ؟ _ لعد تريدني اموت من الجوع والله يا الله .. نزلت للكاع وتربعت وكعدت كباله.. اخذت بلم الي بي التمن واللحم وخلته بحضنها وحاوطته بيديها .. ؛ جا ماتكول لروحك مو بيبيتك توها ميتة وتريد تتزغنب .. ظل يباوعلي ونظراته تعبانة ، ومبين يريد مني انزل اجيب اله اكل هيج فسرت نظراته .. لوتموت هسه كدامي ومحتاج لگُمة فلا اجيبلك ، اكرهه لانه هو السبب الي خلى ابوي يطلك امي .. خليتهم ونزلت بسرعة .. *** نزل من الدرج بعد ما غير ملابسه ، لبس دشداشة سودة ولف الغترة على رگُبته ،بيده السبحة و عطره يفح والنساوين تباوع عليه وهو مارفع راسه ولا باوع على وحدة ثكيل وتربات شيوخ مو بيده .. أسمر وطويل لحيته مرتبه ومشذبة ، شمرة حاجبه تنطي المثل سعفة مداعبها الهوا وميله روحها تنطي مظهر رجولي جذاب ومميز .. عگد حواجبه و طَبّگ كصته بانزعاج ، ويه هاي الحركة نزلت خصلات متمردة من شعره على جبينه ، داعبت حواجبه .. دخل للمطبخ يريد يطلع منه لان باب المدخل مليان نسوان وزحمة .. *** ميسم : جنت بالمطبخ واكفة وماكو احد بي كلهن راحن يتغدن وانه واگفة اراسل امي واقنعها تجي .. لشوية دخل عياش وظل يسولف ويا نادية بت عمتي _ خليلي غدا نداوي ترة ميت جوع .. كال هيج وباوع عليه وعود يكول ولا منتج ، درت وجهي منه ونطيته ظهر .. جاوبته نادية ؛ تدلل ابن خالي عيوني الك .. كللها ؛ خلي عيونج الج هسه وصبيلي غدا .. _ صار تدلل .. _ انه بالحديقة هناك دزيلي الاكل .. _ ان شاءالله .. صبتله غدا ودته اله وبقيت انه بالمطبخ ، خذيت ماعون وظليت اكل ورة شوية سمعت نادية بت عمتي تحجي رفعت راسي شفت عياش واكف يمها جايب الصينية مخلص اكل وهي تگله .. _ وصوني على ستكاين يردونهن بالديوان ماتاخذهن وياك ؟ رد عليها بصوته الرجولي الخشن بدون ميباوع الها وعينه على ساعته ؛ اي اخذهن ليش لا !جيبيهن يلله بسرعة لان تأخرت عليهم .. سمعت صوت رسالة، نزلت راسي اقرا بالرسالة شفتها امي دازتلي رسالة ، لحظات ورفعت راسي باوعتله شفته يباوعلي ، نزلت راسي گلت عادي صارله دهر ماشايفني ويمكن مستغرب .. رجعت اكتب لامي رسالة وهم رفعت راسي وشفته يباوعلي ، جريت تنهيدة بانزعاج ودرت وجهي ياربي وين راحت نادية ماتنطي الاستكاين خلي يروح ونخلص منه ، تقززت من نظراته .. تكررت مرة ومرتين وتلاثة بنفس الدقيقة ارفع عيني اشوف عينه عليه .. ماكدرت اسكت گتله ؛ شبيك تباوعلي ؟ مشى خطوات من مكانه واجه يمي ..... يحجي ومبتسم ؛ كبرانه ولج وصاير ل**نج طويل ابن البط عوام .. بقيت صافنة عليه شيقصد ! گتله؛ شتقصد بلله ؟ گال ؛ لاتصفنين الصفنة مو الچ وگلي لنادية انه برة بالحديقة خلي تخف ايدها وتدز الاستكاين بسرعة .. ماجاوبته وبقيت افكر بكلامه وهو طلع .. ورة دقايق اجت نادية بيدها الاستكاين ... گالت؛ وين راح عياش ؟ جنت لاهية بالتليفون وماجاوبتها .. حچت بنبرة هجومية ؛ مو احاچيچ وين راح عياش ؟ رفعت راسي جاوبتها بتوتر ؛ ها طلع وكال دزي الاستكاين بسرعة .. مدت ايدها تنطيني الاستكاين وكالت هاج ودينهن اله ... حطيت ايدي على ص*ري وأشر على روحي حجيت بفهاوة ؛ انه ؟ صاحت بعصبية ؛ اي لعد امي ها چ .. مديت ايدي واخذتهن منها واباوعلها ، اخاف منها تخوف مدري شونها وعصبية والله لو تدري بيها امي تصيح عليه جان ملختها تملخ .. طلعت من المطبخ وتوجهت للحديقة شفته واكف ومنطي ظهر ، ضجت على استحيت مشاعر احتدمت بداخلي ، تلفتت منا ومنا ادور واحد يجي انطي الاستكاين ويوديهن اله بس ماكو احد .. بقيت هيج ثواني واكفة بمكاني ، لحد ما اندار هو وباوعلي بنفس نظراته الغريبة ، صرنا نتناطح بالنظرات هو واكف ومايتقدم يجي ياخذهن وانه واكفة وماتحركت .. رفع تك حاجبه وكال شنو راح تبقين اليوم كله هنا جيبيهن .. تنفست بضيق ، ومشيت كم خطوة واحجي بداخلي عشتو ماتجي تاخذهن انتَ .. تقربت منه ، مديت ايدي اريد انطيهن اله عبالي اخذهن وجان يطيحن كلهن وصار بس صوت ارتطامهن بالكاع وتناثر الكزاز منهم .. تفشلت كلش وظليت احجي بداخلي امداج يالثولة شجاج هسه شيكول عليه شون موقف زبالة .. بس اسمع صوته يكول ؛ يلله فدوة ماصار شي .. دنكت كرفصت والم بالكزاز والفشلة تارسة روحي ، تمنيت اختفي واتلاشى عن هذا العالم .. اشيل بالكزاز وناسية روحي واعض على شفتي فشلانة ومزعوجة الى درجة .. ماشوف اله عياش كرفص كبالي ، ماباوعت اله بس خيم ظله عليه ، بلحظة مد ايده الي ولزمني من چفي وسحبه اله ، صار جف ايدي بين ايديه .. باوعتله مستغربة اجر بجف ايدي وهو لازمة قوي من رسغي ويباوع للجرح .. كال ولج باعي ترة انجرحتي وجاي تنزفين تعاي اغسلها الج.. باوعت لايدي الي بيده بصدمة وحسيت بألم ورطوبة الدم على جلدي .. رجعت باوعتله شفته يباوعلي ، سحبتها منه بسرعة وكمت ورحت اركض اريد بس ابعد عنه واحس بعده لازمني وايدي بيده اريد اتخلص من هذا الشعور ماجاي اكدر .. وصلت لباب المطبخ وترددت ادخل ، انوب خفت من نادية تحجي عليه ، ياربي وين اروح ما اريد ارجع للمطبخ واشوفها وتسألني ، ظليت ورة البيت كاعدة وايدي تنزف وتوجعني ، شفت كدامي صوندة مال مي وجاي تصب بالزرع ، اخذتها وغسلت ايدي وظليت ابجي بحرگة ومن كل گلبي .. قررت بس يجي ابوي اتخلفله واخلي واحد من خواني يردني لبيت امي احسن الي وأخير . *** كعدت ورة المطبخ وافكر بلي صار قبل كم سنة ومانسيت انو عياش بعصبيته وعنجهيته وسوء تصرفه فرگ بين امي وابوي ، بعدني ما اكدر اقاوم شعور الكره تجاهه بس الي صار انو اكدر اواجه عياش نفسه واعبر اله من خلال تصرفاتي عن رفضي اله . حسيت بلسعات برد ، رجعت بذاكرتي ، باوعت للدنيا غروب راح تصير وكمت من مكاني ، طليت على الحديقة والمكان الاستكاين الم**ورة ماكو ومنضفين مكانها .. شبسرعة!! فكرت ؛ خلي افوت جوة احسن ، فتت صارت بوجهي نادية .. كالت ؛ وين جنتي ؟ ارتبكت ؛ ها جنت هناك .. كالت ؛ يلله خلي نحضر للعشه من هسه ساعدي البنيات .. هزيت راسي واباوع للمطبخ متروس اشكال ، بتيتة وبصل وخضورات ولحم كل شغلة بجدر جبير ، والبنات ملتمات كل وحدة تسوي شغلة .. كعدت يم البنات الي جاي يكشرن البتيتة واجت منال مرة اخوي حاتم وكعدت ويانه ، صاحت عليها نضال مرة سعيد ابن عمي واخو عياش .. _ عيني المسعدة موجايه ع البتيتة روحي للبصل لو تخافين ع الكحل الي بعيونج ؟ هم فاتحة وهم خالة كحل .. ردت عليها ؛ ماعليج انتِ هيج كاتلج البصل كومي سوي وماعليج بيه .. _ انه كبلج جيت ع البتيتة وكلنا ملتمات ع البتيتة والبصل محد تكشره روحي علي كشري وكصصي .. _ ايباه تردين عيوني تعمى ما ما مو زين جاي اسوي وياكم شغلة .. _ عسى عيونج عمى ان شاءالله _ شبيج وياي ولج ؟ اوووو اكوم احسلي اكوم اوزع ماي لاتتأذه ايديه من السجينة .. وكامت منال وانه كلولي روحي للبصل واستحيت اكول لا ورحت سويته وعيوني تهل بالدموع ، حار حركني حرك .... لليل اجه ابوي رحت اله وطحت على ايده وبستها وكتله البقاء بحياتك .. باسني على راسي بحنية وكال حياتج الباقية بنيتي ، شلونج شلون كيفج .. _ الحمدلله انه زينة انتَ شونك بالي يمك .. _ هذا قضاء الله وقدره يابنيتي شنسوي بعد ، انتِ راح تبقين هنا الليلة لو ترحين .. _ ها لا بوية اروح واجي باجر .. _ اي روحي لاتخلين امج وحيدها ... _ لا مو وحيدها خليت حبوبتي يمها وخالي يطب ويطلع علينا.. مد ايده لراسي ومسح عليه بحنية كال الله يحفظج بنيتي انه اروح ارتاح من البارحة مو نايم خلي اخوانج يوصلونج .. _ اخذ راحتك يابه .. راح وانه صحت على اخوي حازم يوصلني .. كال صبري اشغل السيارة واجي اصيحج ، وكفت يم الباب وعبايتي على راسي واتاني ، دقايق واجه كال روحي للسيارة اجيب قمصلتي واجي .. رحت للسيارة وصعدت بيها شفتها تشتغل كعدت كدام ، شفت واحد يم السيارة عبالي حازم ماشفته زين لان الكراج شبه اظلم ثواني وانفتحت الباب ودخل كعد بصفي .. كال ها شون صارت ايدج خو ما بعدهه توجعج ؟ باوعتله واشوفه عياش !! ارتبكت كلش ودحست روحي بباب السيارة واكض طرف عبايتي واضغط عليها حيل .. باوعتله وصكيت على اسناني ؛ شتريد شجابك ليش صعدت انه جاي اتاني حازم يوصلني .. باوعلي وضحك ورجع دنك كال ؛ لا انه اوصلج ... كضيته من طرف دشداشته من يم زنده .. كتله وين توصلني وانتَ ممنوع تطب منطقة خوالي تريد تستفزهم تريد تكب الطلابة من جديد وابوي تعبان وعنده فاتحة انزل يلله .. حجيتها بنتر .. باوعلي وقرب راسه مني ويخوزر بيه كال ؛ ل**نج لا اكصه الج مو صايرة مثل امج وخوالج كلهم مخانثه وكلهم جوة رجليه اخليهم وادوس عليهم بقندرتي بعد شتردين .. خفت منه كلش والدمعة صارت بطرف رمشي بس ارمش تطيح .. حرك السيارة وساقها وطلع من البيت ... وانه ظليت ادك على خدي بجف ايدي ، اريد افتح الباب وانزل ما اكدر قافلهه من يمه مدري معلگة وماتنفتح ... ظليت اصيح علي وكوة يطلع صوتي خانگتني الغصة .. _ نزلني عياش ما اروح نزلي يللله .......! حرك السيارة وساقها وجاي يطلعها برة الكراج .. صحت بي مرة ثانية؛ نزلني ما اروح نزلني لا والله هسه افتح الباب واشمر روحي .. وكف السيارة يم البيت من برة وتقرب مني وكال ؛ شبيج وثول ... كتله وخر اكرهك ما اطيقك ووخررر ... كال ؛ حسج لاصيحين لا ل**نج اكصه ، صايرة فد نوب كلش هاي اثار بقاءج عند امج تتعلمين منها طولة ال**ن ، حازم كلي اطلع السيارة برة بين ما يجي وظلي هنا وحدج يلله .. نزل وسد الباب حييل وبقيت انه وحدي وظلمة ، خفت كلش ، يا ربي حازم شكد فاهي ، قمصلة صار بالربع ساعة يلبس بيها وخلاني ويا الس**ح عياش اموووت منه ، جا دم سنوني هو .. ورة دقايق اجه حازم ، صعد بالسيارة .. كال ؛ ها خو ما تأخرت عليج ؟ ارتبكت بالاجابة ؛ لا براحتك .. كتله هيج وروحي مليانه غيض منه ، جا خلاني ويا هذا المكروه عياش ، بس ماريد احجي بهذا الموضوع اخاف حازم يفتح سيرة الموضوع القديم مال انه لعياش وانه ماريد احد يفتحه ابد.. انطلقنا .. ظل يتلفت حازم ومرتبك ظليت اباوعله _ ها شبيك حازم ؟ _ وردة حاجتج خابرتج ؟ _ ماعدها تليفون وردة انه اخابرها على تليفون امها بس ليش تسال هذا السؤال ؟ _ لا هيج ماكو شي _ صاير بينكم شي التفت عليه حجى بنبرة صوت عاليه :- هاي شبيج ميسم ؟ _ يعني اكول خاف صاير شي من وصلتها خاف اهلها شافوك هيج قصدي _ لا وصلتها يم بيت جدي ونزلت محد شاف ولا احد درى . هزيت راسي وهمست ها . ووصلني لبيت امي ، دكيت الباب طلع الي خالي يحجي وبحلكه اللكمة ، مبين جاي ياكل .. سلمت علي ودخلت ، تلكتني امي وبيبيتي بوستهن وكعدت يمهن راسي مسطور ودايخة وهنه يردن اسولفلهن ، حجيت الهن الي اكدر عليه وصعدت فوك لغرفتي ونمت لحد الصبح جرة وحدة . **** الصبح كعدت واشوف وردة على راسي شمرت عليها المخدة : شجاج خوفتيني ولج كعدت يمي على الجرباية واصبعها مخليته على طرف شفتها : ماتروحين للفاتحة اليوم ؟ _ اروح ترحين وياي ؟ _ اي اروح وياج ، حازم يجي علينا مو ؟ خزرتها وهي خجلت ونزلت عينها ، نزلت رجليه من الجرباية وكمت انكت بالبطانيه : انت شسالفتج ويا حازم ها احجي وردة ؟ _ اكلج سر ؟ _ احجي اسمعج _ امس حازم كض ايدي وكالي احبج..... _ شنو شنو شنو ، صخام صخام صخام ولكم انتوا شنو انتي ويا مافكرتوا ها ؟ _ بشنو نفكر هو الحب يجي فجأة شنسويله واثنينه طحنة _ ولج شون وياج انتي ولج مو تدرين العداوات بين اهلي واهلج شون هيج تستسلمين انت لازم تبعدين عنه كامت على حيلها وملامحها عصبت وتحجي بقهر ؛- يعني شنو ابعد عنه كلشي لازم انحرم منه كلشي وبعدين حازم ابن عمتي مو غريب .. _ اي هاي انتي حجيتيها كلشي يحرموج منه وهسه راح تحبين حازم وتتعلقين بي وهم يحرمونج منه ، اعقلي وردة حبابة عقلي وشيلي من بالج مالج نصيب بي . باوعت عيونها متروسات دموع ؛- انه مو من هسه احبه صار هواي من جنت بالرابع وانت بالثالث ويجي يوصلج جنت احس بنظراته غير ، اكضي الليل كله افكر بي حبي اله مدفون باعماقي مو مال اليوم ولا البارحة _ هسه بعدكم مدام باول الطريق حاولي تنسين وتبعدين . مسحت دموعها وكامت :- يله ترة ساعة بالعشرة هسه اهل ابوج يحجون عليج تأخرتي هواي . _ اي بس وردة انت لا تروحين وياي ابقي هنانه احسن يم امي انه حازم يوديني وارجع _ ليش بلله ماروح وياج ؟ شنو السبب حتى لا اشوف حازم ؟ _ اي احسن حتى لا تشوفينه _ مو بكيفج انه جوة راح اتانيج عود غسلي وخلصي ومو اله تتريكين ترة تأخرنه ابتسمت ونزلت جوة ظليت افر بيديه هاي واصلة مرحلة متقدمة رحت غسلت ، صبحت على امي وبيبيتي سألتهم على وردة كالوا بالحديقة .. اخذت عبايتي وتليفوني كتلهم في امان الله وطلعت للحديقة شفت وردة منتجية على سياج الحديقة وايدهه جوة خدهه ، هزيت راسي برفض وفريت بيدي ورحت يمها وكفت بس ماحجيت شي . سمعنا صوت هورن يم الباب ، انتفضت كلها وتريد تروح بسرعة ، جريتها من عبايتها بقووة بدون وعي مني ، طاحت العباية من راسها . وكفت و باوعتلي :- ايييه شبييييج ؟ سويتلها حركة بيدي :- شوية ثگل وردة مو هيج عيب . رجعت عبايتها على راسها وتعدل بيها بخجل وخدودها حمر وضحكتها صارت تشع وبرزت رصعتها اليتيمة على خدها الايسر ، صح سمينة بس وجهه يجنن كلش حلوة حسناء بمعنى الكلمة . طلعنا برة صعدنا ورة صبحنا على حازم وهو كاسر ركبته على وردة بس يباوع الها وهيه هم رافعة وجهه ولا تستحي مخلية عيونها بعيونه . _ حازم ماتنزل تسلم على امي ؟ _ اي هسه نازل .. راح سلم على امي ورجع اله اكله يلله يرووح .. ورة شوية رجع صعد .. _ متريكين لو اريككم ؟ _ ها ترة اختك ميسم مامتريكة ض*بتها على كتفها عود اتريك بالفاتحة حازم : لج يا فاتحة هسه تريكو وخلصو راح يتغدون هسه ب ١٠ ونص عندج علم لو ماعندج علم _ اكلك حازم ترة الطريق كدامك سوق يله ليش كاسر ركبتك علينا وتباوع . _ هو منو الي مباوع الج ... دار وجهه ويعدل بياخته ، كرصتني وردة ، خزرتها وكرصتها ، ض*بتني على كف ايدي يلا وخرت منها . وكفنا يم ابو مشويات وهم التفتت النا وعينه على وردة ونظرات عيونه كلها حب :- ها شتريدون اجيبلكم كص لو كباب ؟ _ بكيفك الي يعجبك كرصتها : انت مو متريكة ابيتكم ؟ _ لا علمودج انه ، انت وراج شغل خاف تدوخين وطيحين حازم : ميسم ادري بيها ماتحب اللحوم نباتية انت وردة شتحبين ... وردة ؛- اي صخلة نباتية كرصتها وحركت روحي : وردة متريكة مسويه رجيم _ يا رجيم يا بطيخ ، كال هيج ونزل .. ظلينا نتعارك انه ووردة : ولج شكدج بعد تصيرين دفعتني من زندي دوولي ماعليج شكد حلو هذا الشعور من الحب يجيبلي اكل انه احب الاكل واحب الحب الله شعور لايوصف .. فريت ايدي وغميتها والتفت ع الجامة واشوف شاب يباوعلنه وخربان ضحك خليت ايدي على حلكي هذا صار ساعة يمكن يباوع لتصرفاتنا انه ووردة نسيت روحي عبالي بالمدرسة احنا جاي اض*بها وتض*بني ... كالت ارتاحيتي فشلتيني شون يباوعون علينه وانتي اطكين بيه اجه حازم فتح الباب ودخل انطاني لفة بجيس وانطى لوردة جيس بي لفتين وعلاكة سودة مدري شنو بيدها وحرك السيارة ، جريت العلاكة من عدها وطليت بيها مليانة حلويات .. بوزت شفافي وظليت احرك بيهن وحجيت اي والله خوش يدارون الهايشة والله ومشتريلها حلويات ... وردة ؛- انه هايشة يا صخلة ؟ ميسم ؛- اي هايشة و٦٠ هايشة جا بس انتي تسميني صخلة ؟ حازم ؛- ادري وين كاعدين بالحضيرة شبيجن ؟ شبيييجن ؟ ...... كالهه بعصبية وكمل سياقة باوعنه وحدة للثانية وسكتنه وصلنا لبيت ابوي ودخلنا جوا لاكتنه فختية سلمت عليها ودخلت ظلت وردة وراي صحت عليها يلله وردة تعاي... لان خفت لاتروح لحازم تسويهه هاي فطيرة وماتحسب حساب لكلشي ... ظلت بيبتي فخرية تباوعلي وانه اصيح عليها وردة ما وردة ورجعت نظراتها على وردة تلي اجت تمشي باتجاهي ووصلت يمي ... فخرية ؛- هاي وردة هاي ؟ هاي بطيخة ركية شجرة كاملة هاي ... طبينه للبيت ووردة تمشي وراي وتهمسلي اكلج هاي ليش تعيب عليه هيه هم ماقاصرة شكد وشسمنها جنهه جيس طحين كصة وحدة عدلة ... ضحكت وانه جاي اطب شاف*ني عمتي ام عياش خذتني على صفحة وظلت تحجي وياي على امي ليش ما اجت .....؟ جاوبتها امي مريضة ان شاءالله ورى الفاتحة من تصير زينة تجي .... عاد هيه سكتتت وايقنت انو امي مستحيل تجي .. بقيت هاي الفترة ابيت ابوي لان خميسات وكل خميس نسوي ثواب لبيبيتي طبخ وقراية وناس تجي عدنا فبقيت يمهم وبس اسمع طاري عياش اشرد فوك ... خابرتني وردة كالت ماتجين لبيت عمتي اريد احجي وياج ؟ _ خير ياطير شعندج ؟ _ من تجين اكلج خلي حازم يوصلج خوش _ تأمرين بشي ثاني ؟ _ لاع ولي يللله ... _ موصوجج صوجي انه الي راح اجيج بس هينه .... سديته منها ترخصت من ابوي ووداني حازم لبيت امي دخل سلم على امي وطلع وردة تبعته للحديقة ظلو يسولفون بالنص ساعة وامي كلساع تسألني وينها وردة وين راحت ظليت الهيهه وكلما تريد تكوم اكعدها اسولف وياها لمن ما اجت المحروسة اخذتها وصعدنا فوك ... رزلتها شويه لان تأخرت يم حازم وتالي كعدنا نسولف ... وردة ؛- لو تدرين بالموقف الي صار بيه ذاك الاسبوع _ شصار وياج ؟ دكيتها نومة من الظهر لل العصر بس شني كعدت ميتة جوع .. ميسم ؛- هو انت يايوم شبعتي ، دارت وجهه عوجت حلكها كالت ها؟ _ كملي هيج مو يمج _ اي ولج طبيت للمطبخ ظليت اتلفت واباوع منا منا وجان اشوف ذاك البصل الاخضر من هذا الي يعجب مصفط بالطاسة مغسول ونضيف ويلمع يبووي بس يعجبج تاكلينه ... ميسم ؛- يبوووي انه ما اكل البصل بس اذا مطبوخ .. غمتني وتباوعلي بنرفزة ؛- امداج ماعندج ذوق بالاكل البصل بس الذو**ين ياكلونه _ قصدج بس امهات كروش يا كلنه _ شحلاته ويا التشريب ، خل اكملج المهم جريت خبزة من الثلاجة طلعت وياهه كرفس وطماطة كصصت الطماطة وخليته بالخبزة رتبت الكرفس عود عود وخليته بصفها وين ؟ _ وين ؟ _ ع الخبزة ووياهم البصل وجان تصير لفة عالمية بوووياي البيتزا ماتلحكها اصلا تدفر البيتزا وتكللها وخري انه بمكانج ... ظليت افر بيدي كتلها دخيلج الزبدة _ ولج ماخليت زبدة باللفة _ هم عوزج تخلين زبدة ولج شون يصير زبدة وبصل بيا تاريخ صايرة هاي جاي اكلج زبدة السالفة _ ها اي خذيت اللفة وكعدت بعتبة المطبخ انتحرت بيها اكل وامطك ومستلذة بالطعم انوب ما اتاني اللكمة تنبلع لا لكمة فوك لكمة لكمة فوك لكمة لكمة فوك لكمة ض*بتها على على راسها وقطعت حجيها كافي شكلتي كملي السالفة انبط چبدي ... _ يابعد چبدي ما اطولها عليج السالفة يا حنينة وانه على هذا الحال اندكت الباب وانه بحلكي اللكمة صحت منوووووووعععمنوووو _ هاي شنووو ولج انكليزي فرنسي ؟ ولج مو اللكمة بحلكي وجاي اكول منو مدري منين اجه حرف العين طفر بنص الميم والنون والواو من كلمة منو.. ض*بت على فخذي هسه غير تحجي غير تكمل ولج اي واجاني صووت حازم من ورة الباب مال الشارع وانه يبووي بووياي يماااي انخبصت خبص طفرت للمطبخ جريت شيلة امي جانت بباب الفرن مال الطباخ مادري بيها وصخة نظيفة المهم خليتها فوك راسي ومشيت طلعت امشي للباب وانه امشي اعض باللفة والف بالشيلة اعض باللفة والف بالشيلة اعض باللفة ميسم ؛- ولج غيري الموجة بسرعة اي وصلت للباب وفتحته وجان يصير حازم كبالي ابتسم ورفع حاجبه وانه عين على حازم وعين ع اللفة عين على حازم وعين ع اللفة عين على حازم وعين ع اللفة . ميسم ؛- ولج بدلي دهن بانزين كلبي الصفحة غيري القناة .. اي ولج حازم قرب شوية مني وهمس حلوة وانت جاي تاكلين هو كال هيج وانه غصيت وظليت اكح وحازم يض*ب على ضهري انه اكح وحازم يض*ب على ضهري انه اكح ميسم صرخت ؛- ياربي صبرنييييي حازم كالي دخلي شربي ماي وجيبيلي مهند ابن عياش ابوه يريد يشوفه دخلت داخل ميتة من الفشلة شفتهم كاعدين بالهول كتلهم حازم بالباب يريد يشوف مهند وانه السليمة ناسية انه ممنوعة من طلعة الباب ... وهم نسو حازم ونسو مهند واجو عليه اخواني وصارت كتلتي عمل شعبي.. بس ولج يا اميسة كل هذا واللفة ماطاحت من ايدي همه يكتلون وانه اعض بلفة همه يكتلون وانه اعض بلفه همه يكتلون وانه ولج قابل اللفة علم وماتطيح من ايدج ؟ _ اي والله علم علم وحازم هم علم بعد رووحي ... خلصنه سوالف ونزلنا جوا يم امي ، اندكت الباب كمت اشوف منو ! تبعتني وردة تمشي وراي ولج خاف اجه حازم عليج التفتت عليها ؛- لاتفرحين مايجي كتله ابات هنا _ شكد خبيثة انتي _ ماتشبعين منه هسه قبل شوية جنت تدكين ويا فج ... _ لا والله .. وصلنا للباب فتحتها شفته فيض اخوي من امي ( امي جانت متزوجة رجال وخلفت منه فيض ومات زوجها وبعدها تزوجت ابوي ) اول ما اجت عينه على وردة باوع عليها بنظرات ماتتفسر وبعدها دنك سلم ودخل جوة اجت وردة يمي همست باذني اجه مستر عصبي يمته ما شفته وشافني عاكد النونة الي بحواجبه باوعتلها مخنزرة شتردين منه الولد مرتاح هيج .. _ طبي طبي جيبي عبايتي خل اروح كبل لايجون اخواني اذا عرفو بيه انه هنا اله تصير كتلتي عمل شعبي _ انت شابعة اعمال شعبية _ اي ولج مرات افرح من انكتل اكول هلبت اضعف بس يصير الع** انقهر واروح اكل ... دخلت جبتلها عبايتها ورحت ضيفت فيض بقى يمنه ع العشه وبعدين بالليل راح لان هو عايش يم اهل ابو عمامه .. *** بعد ماعدت فترة الاربعين يوم دز عليه ابوي حتى اروح وياهم للزيارة ، حضرت روحي وغراضي بجنطة وكعدت تانيت اخوي حازم يجي عليه .. كعدت بصفي امي توصي بيه .. _ اسمعي ميسمة ، اريدج تديرين بالج على روحج وكلش لا تتگربين يم عياش .. ارتبكت وتذكرت ذاك اليوم .. يمه انت تدرين بشي ؟ _ شنوة ؟ _ انه وعدت ابوي اوافق علي واتزوجه _ صخام صخمج من يمته هذا الحجي ؟ _ مادري يمه مادري شسوي هو ابوي قنعني بس هسه ساكتين وهو لو يريد يتزوجني جان تزوجني من زمان بلكي فك مني وغير رأيه _ ماادري ليش گلبي مقبوض منه وروحاتج هناك مامرتاحة الها چي عياش هناك ، حتى يرتاح گلبي ويصفى بالي ماريدنج يمه كلش حتى سلام لا سلمين عليه .. _ وانتِ يايمة منو گلج انه اسلم عليه ترة انه هم حالي حالج اكرهه وما اشتهي بعيشة الله ، چي هو الفرگ بيناتكم انتِ وابوي .. _ اي عفية بنيتي هسه ارتاحيت .. صوت هورن بالباب يمكن اجه حازم انه اروحن يمه ان شاءالله ادعيلج عد الامام .. _ يابعد امج وعمرها .. تگربت منها وحضنتها وبوستها ، شمتني شم .. كتلها ؛ بيبيتي ماهيه هنا ابيت خالي روحي يمها لاظلين وحدج.. _ لا اخوج فيض راح يجي يمي .. عكدت حواجبي وباوعت الها باستغراب وانزعاج .. _ يمه الله يخليج بلا مشاكل ويا عمامه تدرين بيهم مايقبلون يجيج .. _ سكتي سكتي هو هم ابني وانه ماخايفة منهم انه مسنودة بخواني حزام ظهري وفيض هو كال يريد يجي خو ما اطردنه .. _ لا ما كتلج طردي بس جيته هنا تسوي مشاكل تجنبيها.. وجان يدخل حازم بوس امي من راسها وايديها كال شفت الباب مفتوح ودخلت يمه خو ما وحدج هنا ؟ _ لا يمه هسه فيض راح يجي يمي _ اي ديري بالج على نفسج ، يله ميسم _ دير بالك على اختك _ لاتوصين حريص ، خليت العباية على راسي ودنكت اخذت الجنطة .. وكتلها اودعناج يمه ارجع ونسولف لو من اوصل هناك اخابرج ونحجي .. _ خوش ، الله وياج ، مثل ماوصيتج .. _ صار حبيبة .. طلعت من الباب وامي تبعتني وكلبت وراي ماي حتى ارد سالمة باعتقادها ، اشرت الها بيدي ودخلت بسيارة حازم .. وصلت لبيت ابوي وشفت كعد يحضرون للطلعة وسمعت منهم يطلعون بالليل الساعة بهدعش ١١ .. كعدت احضر وياهم جاي يسوون كباب عروك ياخذونه للطريق لان طويل ويجوعون ، ظليت اكلي واحطه بحافظات واكتره على صفحة .. لليل كل شي حاضر وصاحو علينه يلله راح نطلع ، لبست عبايتي وخذيت جنطتي وطلعت وياهم .. وانه جاي اطلع من باب الاستقبال حسيت بنظرات كلتني اكل ، هيج شعور يجي من واحد يباوع احس بي ، رفعت راسي واشوف نظرات عياش عليه .. واكف ومخلي ايده على سياج الحديقة وساند نفسه لابس قميص اسود ، مشكل رداناته وبنطرون بيجي .. نظراته تخترقني بطريقة عجيبة وتتسلل لجوارحي ويدب الخوف بيه ، نظراته نارية مثل قذيفة من لهب ، للحظة توقعت جاي يحسب بالنسوان مو جاي يباوعلي هلكد مامركز وتمنيت صدك يحسب بالنسوان مو يباوعلي .. ظليت امشي بتثاقل هو صاير من نفس الجهة الي جاي امشي بيها انه حسيت ايد انخلت على ظهري ودفعتني وبنفس اللحظة اجاني صوت فخرية .. _ دمشيي هسه جلبتي بهالمكان اريد اتعدى احصلي مكان بالسيارة يم الشباج .. وجان تدفعني ، زلكت وسرحت رجلي ، مديت ايدي اسند روحي بدون ما اباوع لسياج الحديقة ، حسيتها صارت على شي دافي باوعت واشوف مخليتها على!!!! يتبع ...... سلام...... القصة هاي قديمة من شهر ٣ او شهر ٤ من سنة ٢٠١٩ نزلت منها اول مشهد والغلاف كذلك قديم وياهه من اول مانزلت الها مشهد ، رجعت نزلتها بشهر ايلول ٢٠١٩ الي هو شهر ٩ ونزلت منها ٣ بارتات وهسه دا اكملها هذا الكلام للنوهوني ع الغلاف الغلاف قديم مو جديد وقبل القصة الي دتحجون عنها وتكولون نفس الغلاف بس اني ما اشوفهم متشابهين ابد ، لذا اقتضى التنويه اتمنالكم قراءة ممتعة .. ❤

Free reading for new users

Scan code to download app

App Store Google Play

Facebookexpand_more