غيبوبة

3437 Words

ارهنتُ عمري ^الجزء التاسع^ نورا ناصر عياش .. قفلت المحل ورحت لسيارتي سقتها ، رحت يم اصدقائي شوية انتحرت بالنركيلة مثل االمفجوع ضوجة كلش ومنا عمي اجل زواجنا انه وميسم بحيث الايام بعدها تمر بطيئة وملل كلش .. ابني اشوفه كل شهر مرة مرات يتعمدون ومايجيبونه اله ادز عليه يله .. شاغل تفكيري مهند اكثر من كل شي اريده يتربى يمي اربي على ايدي احسن ، ما اثق بتربية امه ولا اهلهه .. وانه كاعد اجه صديقي ابراهيم سلم وكعد يمي وطلب نركيلة وتكابلنا .. كال ها شنو اخبارك امورك ؟ سحبت نفس وجاوبته ودخان النركيلة يتطاير من حولي _ والله ماكو جديد كلها نفس الروتين حتى المحل ضوجه سلمته بيد عمال اثنين وجاي يديرونه والله يا ابراهيم جاي افكر ادرس كلية .. _ والزواج شنو اجلته ؟ مو كلت ع الاساس راح تتزوج بت عمك ؟ _ بعدها صغيرة جاي انتظرها تكبر .. _ يمعود ماكو غيرها وبعدين انت ليش تختار صغيرة اخذها جبيرة تفهمك تربي ابنك.. _ مو اخذنا الجبيرة وما اتفاهمنا اي ليش تحجينا خلينا ساكتين احسن يا ابراهيم .. _ ولك عياش صارلك شكد تكلي اتانيها تكبر شنو واكف نموها لهسه ما كبرت بت عمك ؟ _ لا مو عمي اجل الزواج لبعد ماتخلص السادس اعدادي وهم احسن .. _ اي بس والله انت كبران شوف راسك ملطوش بالشيب دصبغه ع الاقل مديت ايدي لراسي اعدل ب*عري جاوبته ؛- ولك هنه جم شعراية بيضه اصبغه عليمن خلي اتعود عليه هو وراي وراي الشيب وبعدين كله عمري ٣١ سنة ، اخذ منهم سنتين زواج فاشل ومشاكل وطلايب هاي ماينحسبن من عمري وناوي اجدد كل شي بس اتزوج.. _ اي اتزوج اله بنت عمك هاي الصغيرة ؟ _ اي اشو اله هيه ومااتزوج غيرها هيه صارت سالفة عناد الله وكيلك ... _ لك عناد شنو هذا زواج مو لعبة خليت ايدي على كتفه ؛- اطمأن انت الك الصافي ولا يظل بالك عليه .. _ الله يهنيك .. _ يله اروح انه ، سلم ع ا****عة اذا اجو _ لك وينك بعد وكت !! _ لا يمعود كاعد من فجر الله اروح انطمر ارتاح .. _ يلله يوصل سلامك الله وياك .. عفته وطلعت للسيارة بس صعدت بيها دك موبايلي باوعتله رقم غريب واني جاي احرك بالسيارة جاوبت _ الوووو ... اجاني صوت انق*ف منه ؛- الوو عياش انه سميحة .. بعدت التليفون عن اسماعي وعقجت كل ملامحي وكلت اوووو ... اجاني صوتها يلعلع ؛- عياش ابو مهند تسمعني ؟ _ اي اسمعج خير ياطير شتردين ؟ مهند بي شي ؟ محتاج شي ؟ احجي ؟ ... _ لا بس انه ما اكدر اطول وياك بالحجي لا احد يسمعني بس ياعياش ابنك محتاجك واحنا لازم نرجع .. _ نعم نعم شكلتي ماسمعتج زين ؟ حجيتها بنبرة استهزاء .. وكملت ولج لو يصبونج ذهب ما ارجعج شنو نسيتي سوالفج وياي ودكايكج ولج صار سنة اصابتي من خوانج لهسه ماطايبة وتأذيني وبسببج انتي .. _ اي هسه الفات مات وعفى الله عما سلف رجعني واصيرلك خدامة جوة رجليك والله اطيعك ومااعند بعد انه تعلمت من اخطائي .. _ هاي انتي كلتيها عفى الله عما سلف الله هو اليعفي وهو الي يسامح اما انا لااااا وهسه يلله كلبي وجهج اريد اسوق لا اسوي حادث وتشمتين بيه . _ اكو مثل مدري شيكول المهم انت ماتموت .. _ ها يعني انه عار لا ياعار يا بت العار _ زين انه لعد اتزوج جاي يجوني خطابة مو تكول ؟ _ تزوجي شسويلج خلي يبتلي بيج رجلج بس مهند اخذه _ مو بكيفك بالمحكمة الي اذا زوجي الجديد فديته وقعلي على الكفالة .. _ لا والله اخذه من عيونج ابني ما يربى عند الغريب وانه زين ومني مخلي عندج الج يوم تشوفينه مسحوب منج ، ويله هسه اريد اولي ديري بالج على مهند بعد جم يوم اخذه خدش ماريد بي افتهمتي ؟ كبل لا تجاوب سديته منها ورحت للبيت ، احنا نفس الباب احنه وبيت عمي فتحت الباب دخلت السيارة تمشيت صوب بيتنه واسمع العيطة كابه ابيت عمي ركضت فتحت الباب سويت احم احم بعالي صوتي وطبيت اشوف شصاير عدهم .. شفت عفاف طايحة بالكاع ووجهه مزورك ووراها سعيد يريد يكتلها ومعصب ويغلط ويصيح عليها وعمي عزام دفعه بكل قوة واجت مرة عمي كومتها وخلتها على صفحة وصار عمي الشيخ بين سعيد وبين عفاف امي لازمة سعيد وهو مثل الثور الهايج يهد.. رحت دخلت بنصهم دفعت سعيد على صفحة وصيحت بوجهه شصاير ولك ؟؟ كامت عفاف تحاول تفتح نفسها من قبضة مرة عمي ام حاتم وظلت تحجي وتبجي ؛- والله وروح ابوي الغالي لا مرة ولا مرتين اشوفهم على هذا الحال بس اليوم زودوها كلش وانه ما اكدر اسكت بعد زينة وسعيد عدهم علاقة موزينة وشيريد يسوي سعيد بيه خلي يسوي ... طلعت زينة وطلع وراها حاتم من غرفتهم على صوت الصياح.. ظلت عفاف تأشر عليها ها ولج الخاينة الحقيرة وتريد تهجم عليها بسرعة صار حاتم كدامها ووكفها وصيح بوجهه شصاير شبيج عفاف؟؟ ظلت تصيح والله بهاي عيني شفتهم بالديوانيه هيه وسعيد وجاي يبوسها ... انصدم حاتم واحتار شيسوي ظل يباوع على زينة وعلى سعيد .. سعيد صاح لاتصدكها حاتم انه اخوك جذابة هاي وزينة ظلت تدك وتلطم وتصرخ وتبجي .. وكف بنصهم عمي ووجه كلامه لعفاف بويه هاي اعراض عالم انت متاكدة من حجيج الي جاي تحجينه ؟ يريد يحجي سعيد عمي سكته بصوت عالي وعصبية _ اسكت خل اسمعها اسكت سعيد .. ظلت تحلف عفاف اي والله عمي شفتهم بالهول .. _ توج تكولين بالديوانيه هسه بالهول فهمينه انتي شجاي تحجين شجاي تخربطين .. _ شبعني كتل عمي حتى على راسي ض*بني وانه حامل مو زين مني خلصت روحي كوة منه وجيت الكم والله ماجاي اجذب وداعة بنتي وداعة هذا الطفل الي ابطني مامجذبة بس طكت روحي ماكدر اسكت بعد شوفيلي حل وياهم حرام عليكم .. نطت زينة ؛- عمي والله جذابة جنت بالغرفة انه والله حتى اسال حاتم . حاتم كال اي نمت وكعدت وهيه يمي من العصر لهسه .. الشيخ عزام ؛- انت يمته شفتيهم بويه عفاف؟ _ الظهر شفتهم عمي والله الظهر ..اكيد من نام حاتم هيه اجت .. _ يابنيتي هسه ليل ليش من اول شوفتج الهم ما جيتي ؟ _ جا غير هو حبسني بالغرفة وطاحلي كتل كوة شردت منه وجيتكم والله كوة شردت _ عمتج وين جانت بوكت ماشفتيهم؟ _ جانت طالعة الصبح طلعت ومادري بيها من اجت .. _ ولج بويه هاي اعراض عالم ولازم شهود يشهدون وياج .. زينة بنحيب؛- انه تتهموني بشرفي اله اجيب اهلي والله واسويها عشاير وياكم .. الشيخ التفت لام عياش وسألها ؛- انتي شايفتهم عدهم شي موزين خويه ام عياش ؟ جاوبته ؛- لا والله وتدري بيه اكول الحك ومايهمني ولو على اكبر ركبة انه ماشايفة عدهم شي .. التفتت لام حاتم وسألها ؛- وانت ام حاتم جنتج عدها شي شايفه عليها شي موزين ؟شايفتها ويه سعيد ؟ جاوبته لا والله والقران مو شايفة عليها شي ابد جان هسه حجيت وما اخاف .. سكت شويه وظل يحجي وي عفاف كالها بويه ماكو احد شايف غيرج ماكدر اخذ بشهادتج وحدج هذا مو انه الي اكول الشرع والدين لازم شهود نسوان اثنين ورجال واحد من العدول وشايفينهم مثل الميل بالمكحلة .. قاطعته ام فخري ؛- جا وانه مو بعينك وماتنشدني ؟ جا هلبت ادري شي شفت شي جا تعبرني .. الشيخ ؛- لا خالة ام فخري انت الخير والبركة وهم موجه الج السؤال شفتي شي عليهم عندج شي تحجينه اريد الصدك هااا ماريد شي غير الصدك . _ يا جا انه راح احجي الصدك خم اجذب وهذا شرف عالم وناس ووادم وانه هم عرض وشرف وماكول غير الحك انه لاشفت شي على سعيدان ولا على المهبولة زينة صح هما موخوش ومرات مايحترمون وماتعجبني تصرفاتهم بس الواحد يكول چلمة الحك .. زينة ؛- والله والله تطلع حوبتي بيج ياعفيف وتطلع بكلمن يحجي بشرفي .. وطبت داخل تبجي... حاتم اجه يصيح بوجه سعيد ولك سعيد صدك جذب الي تكوله مرتك هذا؟ تتبلى على مرتي هيه من الاول من جنتو هنا تسوي مشاكل انوب وصلت للشرف تتهمها بي لك والله مااسكت ... سعيد ؛- حاتم اني الله شاهد على كلامي البنيه شريفه وحتى تستحي مني وهاي عفيف اليوم اذ*حها جوا رجليكم وحق الحق .. هم يريد يتقدم باتجاهه صار بوجهه عمي .. الشيخ ؛- حاتم روح الحك مرتك ولاتخليها تحجي لاهلها نفضها بيناتنه وانت يا ام عياش اخذي عفاف وروحي لبيتكم ، عياش وسعيد تعالولي للديوان عندي حجي وياكم .. والكل على غرفته يلله .. تبعنه عمي للديوان بس دخل اندار وعدل علينه .. بس ظل يحجي سعيد ؛- عمي ترة جذب هاي تتخييل من غيرته تعرف غيرة النسوان بعد .. بس مو صوجها صوجي اني منطيها مجال وبعدين اني لهل درجه نذل حتى اخون اخووي وتدني نفسي على مرته ، والله حاسبها مثل اختي والكل يشهد بس هاي كلبه بت سطعش كلب عدهن مشاكل وتريد تمنعها من الجية النه وسوت هاي المسرحية .. ..سعيد يحجي ومرتبك ومايخلي عينه بعين عمي .. عمي الشيخ قاطعه بنبرة صارمة _ لا تاخذني بال**نك ماكوو دخان بدوون ناااار الله غاضب علينه بسبب افعالنه وغيرة النسوان ما توصل لهل مواصييل .. اذا السالفه صدك يا ابن ابوووك ورب العرش اكتلك بييدي هاي وما يرف الي جفن...مو انه الشيخ عزام ولد اخوي الي ربيتهم على ايدي يطلعون زانيين وسافلين اصبعي وهو اصبعي اذا غدرني اكصه واشمره للجلاب سمعت ولك ؟؟ سعيد (بتلعثم) ؛- عمي يعني انت تصدك حجي وحدة مخبلة مثل عفاف ؟ الشيخ ؛- اسكت ولا كلمة لك والله ادفنك بيدي والله عفاف لا سنة ولاسنتين ويانه هنا واعرفها كلش زين وانه اعرف طبع البشر شنو بس ماكدر احكم ماكو لادليل ولا شهود .. .. اسمع عياش من باجر تطلع عمال وتكطع بينه وبينكم وسوي سياج وافتح باب الكم وحدكم ع الشارع ولا القيل ولا القلت وانت سعيد ماريد اشوفك هنا بنص بيتنه حدك للديوان وبس افتهمت!!! سعيد مدنك راسه وجاوبه ؛- صار على امرك عمي الي تريده يصير ويجرى بس انه والله برئ.. _ يلله هسه تكدرون تاخذون راحتكم .. ترخصنه من عمي وطلعنه من يمه وتوجهنا لبيتنا اريد بس الحك بسعيد ماكدر راح كبلي يركض ركض مثل المخبل ويدردم ويسب ويغلط .. وصلنا للبيت شفت امي واكفة بالباب وشايلة بنت سعيد .. طب يصيح بعلو صوته وينها وينها الكلبة اليوم اذ*حها واشرب من دمها .. تبعته امي تحجي ويا وتتوسل ؛- على كيفك يمه الطفلة لا تخترش ويصير بيها شي ... _ انعل ابوها لا ابو امها .. _ يمه اهدا الناس لاتسمعك على كيفك ويه روحك حرام عليك ... _ انه تفضحني هاي الكلبة انه تسوي بيه هيج _ ولك يمه البت جاي تنزف اهدا ووديها للمستشفى .. _ انه اريد اموتها تكلي وديها للمستشفى .. يحجي ويدور بالغرف وصل لغرفة امي شافها مقفولة ظل يدك على بابها ويصيح بعلو صوته ؛- طلعي كلبة حقيرة طلعي اليوم اموتج على ايدي .. رحت جريته ودفعته تمايل وراد يطيح وتماسك نفسه كتله اسكت كافي والله اذا مديت ايدك عليها .. ابتسم باستهزاء وكال هه شوفو منو يحجي هاي ماتبقى على ذمتي ماريدها من باجر اطلكها على ذمتي ماريدها .. _ انجب طلاك ماكو ماتطلك تعلمني بيك ماكو نار بدون دخان وعفاف لو مو شايفة شي عليك ماتحجي اعرفك واعرف عفاف كلش زين وذيج الماتتسمى هم اعرفها نسيت من شفتك وياها ورى البيت لو اذكرك وحذرتك وهم ماجاي تاخذ حجي واليوم الله ستر وما انفضحنا ... _ ادري اشف*ني ؟ جنت واكف يمها وبس ماشفتي بغير وضع لا تجلب بالسالفة عياش وهاي عفيف اطلكها يعني اطلكها ... _ لا ماتطلكها مو بكيفك... _ لعد انت من طلكت سميحة اشو محد حجه وياك ولا كال لاتطلك _ لك مطي شغل النعال الي براسك وقارن عدل اجاب سميحة على عفاف ، مرتك صوتها ماينسمع تباوع لحلكك من تحجي تعرفك من عيونك شتريد ، تدنك عليك تنزعك حذاءك وجواريبك من الباب ... سميحة رادت تتسبب بكتلتي اهلها وصلوني للموت وباكوني غير عن هذا كله ل**نها الزفر والعيشة وياهه ماتنطاق ، بس الله ينطي جوز للماعنده سنون .. سعيد ؛- لك عياش كولها للمخبل حتى لو شاف*ني وياهه من صدك تروح تفضحني انه زوجها تهجم بيتي ؟ جاوبته امي ؛- غير انت حابسها بالغرفة ودك كتل لو ما انه اجيت من بيت خالتك وكفت بالباب ظليت اصرخ يله فتح الباب الي وطلعت البنية مفرفحة ... سكت سعيد ودار وجهه وانه هم كعدت بالهول وامي راحت لغرفتها ورا شويه طلعت يمه ترة البت تنزف لايصير بيها شي خطية اخذوها للمستشفى .. كمت على حيلي يله خليها تلبس وامشي انه اوديهه طبت امي وطلعت كالت تخاف تطلع خاف لا يكتلها رحت وكفت يم باب غرفة امي صحت عليها خويه طلعي وانه بسدج امان لاتخافين .. ورا دقيقة طلعت تمشي متألمة تتجى ع الحايط وتمشي اجت عينها على سعيد الكاعد ع القنفة بالهول نافخ روحه يباوعلها بحقد ويخزر بيها ... اخذتها امي لغرفتها طلعت لابسة عبايتها ولازمه خصرها بيدها والايد الثانية لازمه الحايط وتمشي متألمة وتبجي .. وكلساع تباوع على سعيد وتدنك تباوع لخطواتها وتغمض عيونها حيل تفرغها من الدموع الي ملت عينها تبجي بصوت مسموع وتشهك بألم ... راحت امي لسعيد ومدت ايدها تنطي الطفلة هاك يمه خلي بتك عندك على ما نجي موزين عليها تطب المستشفى .. بنتر رد عليها ؛- ماريد انه بيا حال هسه اخذيهه من كدامي اخذوها وياكم .. رديت على امي وانه واكف يم الباب وبيدي السويج مال سيارتي _ جيبيها يمه نوديها لعواطف اختي نخليها عدها ونوديها للمستشفى .. رحنه للسيارة صعدت عفاف ورا وامي يمها كعدت والطفلة بنين عند امي وعفاف مابطلت بجي طول الطريق ، نزلت الطفلة لاختي عواطف ورجعت وديت عفاف للمستشفى ، دخلت هيه وامي وانه بقيت برا اتانيهم ، ورا شكد يلله اجو تلكيت امي سألتها كالت انطوها ابرة مثبت وشكلولها مغذي مابيها شي ان شاءالله والطفل زين بس الجارة نازلة كالو خل ترتاح وباجر نوديها لدكتورتها ... كتلها الحمدلله على السلامة ورحت فتحت الها باب الورا ودخلت امي يمها ، وانه صعدت اسوق باوعتلها بالمراية كتلها ها هسه صرتي احسن ام بنين احجيلي شنو صار وشنو شفتي ؟ ..... عفاف؛- شحجي وشكول مسلمتهم بيد الله اثنينهم خو محد صدكني اليوم ومحد صار وياي ... ردت عليها امي ؛- احنا ماشفنا شي حتى نصير وياج ونشهد عليهم وانت غلطتي يوم رحتي وحجيتي كلشي كدام الشيخ ، هاي بيها هجمان بيوت وكاتل ومكتول .. _ عمة انت مو جاي تشوفينها من تجي يمنه تكعد تندخس بي وسوالف وضحك _ هذا مايثبت شي هذا شي ضدج انت اكثر مما هو ضدها هسه يكولون تغار منها لان كاعدين يسولفون كدامنا مو من ورانا .. _ جا ومن تطلع ويطلع وراها ومايجي وين لاوين _ ماشفنا شي طلع وراها منو يكول راح الها وبعدين وين يروح وياهه يعني _ عمه البستان مليان ختلات يختلون ومحد يشوفهم ... جم مرة اكلج اطلع وراهم ماتخليني .. قاطعتهم ؛- انه احجي على اليوم شصار احجيلي مبين اليوم شفتي شي هلي خلاج ماتتحملين اكثر .. _ والله خويه مو من اليوم من كبل فترة علاقتهم مو طبيعية وهاي زينة كلش خفيفه وتكرهني همينه ودائما تعيرني وتحجي عليه وتعيب على لبسي وشعري وكلشي بيه وكدام سعيد وتنتقص مني .. كبل فترة شفتهم بصف البيت متقربين من بعضهك كلش ويتهامسون من شافوني وخروا .. حاجيت اخوك جنزني تجنز سكتت شسوي اخاف وشكلت حامل غضيت النظر عنه ، رغم اشوفه يتبعها بالبستان لو ادخل صدفة للديوانية اشوفهم اثنينهم كاعدين سوا اتفاجأ بيها يمته اجت وتختار اوقات عمتي ماموجودة وانه لاهية وتجي وعلى جم من مرة افتح باب الديوانية الكاه مقفول من الداخل .... اليوم عمتي طلعت للبيت اختها وانه كفيت شغلي ورحت نومت بنونه ونمت بصفها كعدت مثل الواحد وكلي كعدي ، رحت من دربي للديوانيه عبالك احد يقودني فتحت الباب وبهاي عيوني شفتهم ... مكعدها بحضنه وشفايفها على شفايفه ملابسها مرفوعه وكل سيقانها وافخاذها طالعة و ايده على فخذها يحركها بجرأة ويعصر بيها والايد الثانية على ص*رها .. بس شافوني كامو بسرعة زينة اختفت مثل الزيبگ(الزئبق) وهو اجه يمسح بحلكه ويحجي مرتبك ها عفاف ظليت اصرخ اليوم افضحك اليوم اليوم سحبني للغرفة شبعني كتل ويهدد ويتوعد اذا تحجين اذ*حج ، لو اخلي وياج واحد واتهمج بشرفج ساعة يكول نزوة وانسي الي شفتي وبعد ما اتدنالها بس انه نار وشبت بيه اول مرة اواجهه هيج طول عمري اخاف منه واحترمه بس اليوم لا فقدت كلش وماتحملت افشر واغلط عليه واتوعدله افضحه وافضحها بعد مابيه حيل تعبت كلش ... ظل يض*ب بيه وبنونه بس تبجي للعصر اجت عمتي يبه فتح الباب وانه شردت لبيت عمك الشيخ والباقي انت تعرفه .. _ انت هم غلطتي مثل ماكالت امي الي سويتي مايصير والليلة نامي بغرفة امي وقفلو الباب ، سعيد مامتوقعه تصرفاته شيسوي والله كريم الايام الجايه ان شاءالله خير انه راح اراقبه وراح اكطع سياج بينه وبين بيت عمي واخابر حاتم واحاجي اكله مايخلي مرته تجي بعد .. ☆☆☆☆ ميسم .. بعد ماراحو اولاد عمي لبيتهم اجه ابوي كال اسمعي ام حاتم بلغي جنتج بعد ماتوصل لبيت ام عياش نهائيا ، تروح تسولف يم ام عياش ضايجة تسير عليهم عدهم مناسبة ماكو ابد ماتوصل وانتي راقبيها خوش ؟ لا تخلينها تروح ابد احاسبج انت اذا سوتهه وراحت .. _ صار عيوني ابو حاتم تدلل .. وراها هدأت الاوضاع وبيت عمي بنو سياج بينه وبينهم وانه اكثر وحدة فرحانه اكدر اطلع للحديقة لو للبستان واشتم هوا بدون مااشوفن عياش ويكدر خاطري.. خابرتنه امي كالت راح اخذ خالج فائق واروح لبيت خالج راضي اصالحه وهم اخطب وردة لحازم تعاي ويه حازم ... حضرت روحي ورحت ويا حازم لبيت امي وهناك جان خالي فائق رحنا لبيت خالي سلمنا وكعدنا .. خالي راضي جان نافخ ريشه ومايتحاجه .. شكد حاولت امي ويا قافل يريد يبيع البيت ويقسم الحصص وامي ظلت قافله خالي فائق كاله انه واخواني وخواتي متنازلين لصباح عن حصصنا هو بلحظه جن جنونه وطردنه من البيت .. طلعنه كضيناهه ضحك عليه ماعبالك مطرودين الفلوس والطمع يعمي عين البشر ويخلي يتصرف تصرفات مامعقولة .. وحتى خطية حازم شكد جان متأمل يطلب وردة االليلة .. وهو تعب حتى قنع ابوي .. مرت الايام استلمت نتيجتي ونجحت وداومت صف خامس ادبي ومرت الايام واخذونا سفرة لمدينة الال**ب .. بدلنه واخذنا اكلنا ورحنه ، طول الطريق وردة بس تاكل وانه لعبانه روحي وجايه بلا ريوك وهاي ولا يهمها مو معدة عليها بس تكرش وانه اليكول حامل مااشتهي ريحة الاكل بالسيارة ... وردة اكلت اكلها بالسيارة وهناك من وصلنا للمدينة وصار وكت نتغدى دارت على اكلي واكلته .. للعصر وكبل لا نرجع للبيوت كاعدين ع الثيل ونسولف انه وصديقاتي ووردة مدري وينها ... شويه واحس واحد يكلي ماما ماما ... درت وجهي هذا مهند اخذته وحطيته بحضني ولك انت ويامن جاي ظليت احاجيه ظل يأشر وراي باوعت شفت ابوه بسرعة درت وجهي عنه وبلعت ريك واحس جسمي ظل يرجف هذا شجابه هنا .. !!! انوب اجه وصار كدامي ظل يأشرلي جيبي مهند ويأشر على ساعته عود تأخرت اريد ارجع .. وخرت مهند من حضني وظليت اقدمه ليكدام باتجاه ابوه واهمس باذنه روح لابوك يلله ، هذا معاند مايقبل يروح مجلب بيه ويكلي ماما ... وصديقاتي يضحكن يكولن فاول عليج راح تصيرين ماما عن قريب ، مايدرن بعياش مخليني رهينة عنده .. كمت وشلت مهند واتوجهت لعياش اريد انطي اله واتمنى المسافة تطول وما اوصل يمه بس هم وصلت اله .. انطيته اله ومهند يضحك ويكول ماما عياش هم ضل يضحك باسه وظل يهمس باذنه بصوت يوصل الي اي حبيبي هايه امك ليش لا .. _ ترة هو اي وحدة يشوفها يكللها ماما حتى امي وحتى خالاته يكللهن ماما وهم كلما يشوف رجال يكله بابا خطية الطفل مشتت .. خزرني وهو يدور بمهند للصفحة الثانية ويثبته عدل بلله فكينه من ل**نج رجعي لطبيعتج كبل ماتلوكلج طولة ا****ن وانه ما احب طولة ا****ن تدرين بيه _ والله هذا الموجود انت من هسه اخ**ها احسن ضحك بخبث وبنبرة شيطانية جاوب ؛- تحلمين ما اخ**هاااا حاطج ابالي ميسم .. حجى هيج وانه خزرته ودنكت حسيته اقترب مني اكثر بحيث عطره كله بانفاسي كال وين عبايتج ذابتها اليوم ؟ باوعت لروحي ودرت عليه شفته يتأملني بنظرات جريئة ورافع حاجبه ونصف ابتسامه على محياه بلعت ريك وعضيت شفتي ، انه لابسة نفنوف نيلي وبي ورد رصاصي قصير جوة الركبة بشويه وجواه بنطرون كابوي ( جان موديل كلش دارج بنههاية سنة ٢٠٠٨).. عفته و رحت اركض وكعدت على اقرب طاولة ولميت روحي ، هو بقى يلعب ابنه بالال**ب الي قريبة مني ويباوعلي من بعيد بنظرات اكذب اذا كلت افهمها او اكدر افسرهه .. شويه واختفى من كدامي وماشفته بعد ظليت ادور عليه بعيوني وانه على هذا الحال اجاني صواب قوي على جتفي باوعت وردة اجاني صوتها عليمن تباوعين ولج عليمن تدورين صايرة كلش مو راحة ...!!! خليت ايدي على كلبي من الخرعة و تنفست بقوة .. ☆☆☆☆ سيف ...... دا اسوق دك موبايلي باوعت بالشاشة شفته اخوي اسعد يتصل بيه رفعته وجاوبت .. _ الووو هلا والله باخي هلا بالغالي ... _ هلا بيك سيوف خدمة صغيرة اريد منك ؟ _ بس امرني خادم الك .. _ روح جيب شهد وحسوني من الشقة مالتي ووديها لبيتكم مالحك اني عندي كم شغلة اريد اسويها ... بارتباك جاوبته؛- ها والله تعذرني حبيببي سعودي اني خارج بغداد حاليا شوف رأفت او طيف ... _ طاح حظك هستوة تكول عيونك الك ظل يغلط وسداه ... قبل فترة انتقلوا على شقتهم بعد ماجانو ديرمموها ويغيرون د*كورها .. وكعدوا يمنا فترة وهسه رجعوا واني ارتاحيت شويه من وجود شهد بيناتنا لان وجودها ينشر باعماقي ذكريات الماضي .. حاولت ابقى برا البيت اكثر وقت ممكن اتجنب وجود شهد وشوفتها ، لحد مخابرتني امي تسالني ليش تاخرت .. كتلها منو بالبيت ؟ بيت سعد راحو؟ _ اي سافرو وخلو حسوني يمي طلعو للشمال يتونسون .. تنفست الصعداء ورجعت للبيت .. صعدت للغرفة نمت وكعدت الصبح رحت للدوام وهناك خابرني رأفت اخويه ؛- الحك سيف اخويه اسعد ومرته شهد سوو حادث وهسه اثنينهم بغيبوبة ... يتبع ..

Free reading for new users

Scan code to download app

App Store Google Play

Facebookexpand_more