"KAILANGAN kong sumaglit sa eskwelahan. May mga gamit akong dapat makuha sa lamesang ginamit ko do'n. Anuman, o munting gamit man na makapagtuturo sa akin ay hindi dapat mapasakamay ng iba, lalo na ng mga pulis. Magpapaalam tuloy ako kay Teacher Raquel upang kahit paano ay hindi siya magdamdam sa akin."
Hindi niya matiis na hindi magpaalam sa kapwa gurong naging malapit at napakabuti sa kanya--ang tanging kaibigang mayroon siya. Ito lamang ang kinakitaan niya ng tunay na pagmamalasakit, walang hinihintay na kapalit. Napakabait nito at palaging sa kanya nakapanig. Sa sitwasyon niya ngayon, gustuhin man ay hindi na sila maaaring magkita uli. Baka nga iyon na rin ang huli. Kaya nagpasya siyang puntahan ito. Kahit sa huling pagkakataon ay masabi man lang niya ang salitang 'salamat'. Pakiramd
