Claimed by Sir Frederick

Kabanata-6

Sumasabog sa inggit at galit si Mandy habang nakatitig sa orasan na nakasabit sa dingding ng mansyon ng mga Falcon. Isang buong gabi na namang hindi umuwi si Frederick at alam niyang nasa piling na naman ito ng dukhang dancer na si Kristela sa BGC Penthouse. Hindi niya matanggap na mas pinipili ni Frederick na manatili sa piling ng isang babaeng wala namang yaman kaysa sa sarili niyang asawa. Sa isip ni Mandy, hindi niya hahayaang mapunta kay Kristela at sa anak nitong si Abigail ang yaman ng pamilyang Falcon na para sa kanya ay dapat mapunta lamang kay Jacob.

Nang marinig niya ang tunog ng sasakyan ni Frederick sa ibaba ay mabilis siyang kumilos. Dali-dali siyang naligo, naglagay ng mamahaling pabango at nagsuot ng manipis na pantulog na inaasahan niyang makakapukaw muli sa atensyon ng kanyang asawa. Habang naghihintay siya ay paulit-ulit niyang iniisip kung paano niya maibabalik ang dating atensyon ni Frederick. Ngunit higit sa lahat ay gusto niyang iparamdam dito na hindi siya basta-basta mawawala sa buhay nito.

Pagpasok pa lamang ni Frederick sa kanilang silid ay agad na lumapit si Mandy at hinalikan siya sa labi habang pilit na ipinaparamdam ang kanyang katawan. Ngunit bago pa man siya makapagpatuloy ay malamig at marahas siyang itinulak ni Frederick. Sa lakas ng tulak ay napasuray si Mandy at malakas na nabangga ang kanyang balakang sa matulis na gilid ng kama.

"Kainit ng ulo mo, Frederick!" sigaw ni Mandy habang umiiyak sa galit at hawak ang nasaktang bahagi ng kanyang katawan. "Nakalimutan mo na bang may asawa ka? Nakalimutan mo na ba kung sino ang kasama mo sa mundong ito dahil lang sa murang dancer na iyon?"

Hindi man lang sumagot si Frederick. Malamig at walang emosyon ang kanyang mga mata habang nakatingin sa nagagalit niyang asawa. Sa halip na makipagtalo ay diretso siyang naglakad papunta sa nakatagong safe vault sa loob ng silid. Mabilis niya itong binuksan at kinuha ang ilang mahahalagang papeles ng kumpanya kasama ang pera na nakatago roon. Pagkatapos ay walang anumang sinabi siyang humakbang pabalik sa pintuan.

"Frederick, bumalik ka rito! Huwag mo akong talikuran!" sigaw ni Mandy habang sinusundan ng tingin ang kanyang asawa.

Ngunit hindi man lang lumingon si Frederick. Patuloy lamang siyang naglakad hanggang sa tuluyang lumabas ng silid at maisara ang pinto.

Dala ng matinding galit, takot at inggit ay mabilis na kinuha ni Mandy ang kanyang telepono. Nag-type siya ng isang maikling mensahe para kay Magnos.

Pumunta ka sa kwarto ko ngayon na.

Dahil wala na ang mga tauhan ni Frederick sa mansyon at karamihan sa mga ito ay sumama sa kanya sa penthouse, dali-daling umakyat si Magnos sa silid ni Mandy. Pagpasok niya ay nadatnan niya itong nakaupo habang umiinom ng mamahaling alak mula sa bote. Namumula ang mukha nito sa galit at patuloy pa rin ang pag-agos ng luha sa kanyang mga mata.

"Mandy, anong nangyari?" tanong ni Magnos habang isinasara ang pinto.

"Iniwan na naman ako ng walang kuwentang lalaking iyon," galit na sagot ni Mandy habang nagsasalin ng alak sa dalawang baso. "Inumin mo ito."

Umupo si Magnos sa tabi niya at nagsimula silang uminom habang pinag-uusapan kung paano nila tuluyang aalisin si Kristela at Abigail sa buhay ni Frederick. Habang tumatagal ay unti-unti ring tinatamaan ng alak ang kanilang isip. Dahil sa matinding galit at problemang kinakaharap nila, hindi na napigilan ni Magnos na ilabas ang matagal na niyang itinagong damdamin para kay Mandy.

"Matagal na rin kitang gustong makasama muli, Mandy," bulong ni Magnos habang lumalapit sa kanya.

Tumingin si Mandy kay Magnos. Siya ang lalaking tunay na ama ng kanyang anak na si Jacob. Sa gitna ng kalasingan, galit at kagustuhang gumanti kay Frederick ay hinawakan niya ang leeg ni Magnos at hinila ito palapit sa kanya. Mabilis na nagtagpo ang kanilang mga labi sa isang halik na puno ng matagal nilang itinagong pagnanasa at pagtataksil.

Sa gabing iyon ay muling nagbalik ang lihim na relasyon nina Mandy at Magnos. Sa loob ng silid ni Frederick, na dapat ay lugar ng kanyang pamilya, nagpatuloy ang kanilang pagtataksil habang pareho nilang iniisip kung paano nila sisirain ang buhay ni Frederick at kung paano nila makukuha ang kanyang yaman.

Hindi nila alam na habang ginagawa nila ang lahat ng iyon ay may mga taong tahimik na sumusubaybay sa kanilang mga galaw. Bawat oras ng kanilang pagkikita at bawat hakbang ng kanilang plano ay unti-unti nang nalalaman ng mga imbestigador ni Frederick.

Samantala, maagang nagising si Frederick sa BGC Penthouse habang mahimbing pa rin ang tulog ni Kristela sa kanyang tabi. Dahan-dahan siyang bumangon, isinuot ang kanyang silk robe at tahimik na lumabas papunta sa malawak niyang opisina.

Eksaktong alas-sais ng umaga nang mag-vibrate ang kanyang pribadong telepono. Agad niya itong sinagot at nakita ang kanyang investigator na naghihintay sa may pribadong elevator ng penthouse. May hawak itong kulay brown na sobre na may nakasulat na Confidential.

"Ito na ang resulta ng DNA test, Sir Frederick," mahinang sabi ng investigator habang iniaabot ang sobre. "Na-double check na rin po ito ng laboratoryo para makasiguro tayo."

Tumango lamang si Frederick at pinapunta na ang investigator. Nang maiwan siyang mag-isa ay dahan-dahan niyang binuksan ang sobre. Isa-isa niyang tiningnan ang mga dokumento hanggang sa makarating siya sa huling pahina.

Doon ay malinaw na nakasulat ang resulta ng pagsusuri.

"Probability of Paternity: 0%"

"Frederick Falcon is excluded as the biological father of Jacob Falcon."

Matagal na nakatitig si Frederick sa resulta. Parang biglang tumigil ang mundo niya sa sandaling iyon. Sa loob ng dalawampung taon ay pinalaki niya si Jacob at itinuring itong sariling anak. Ibinigay niya rito ang lahat ng kaya niyang ibigay bilang isang ama. Ngunit ngayon ay nalaman niyang anak pala ito ng sarili niyang tauhan at ng kanyang asawa.

Malamig na napatawa si Frederick. Mababa ang tunog ng kanyang tawa ngunit ramdam ang galit na nakatago sa kanyang dibdib. Dalawampung taon niyang inalagaan at pinakain ang anak ng kanyang tauhan habang ang dalawang taong pinakamalapit sa kanya ang palihim na nagtaksil sa kanyang likuran.

"Papatayin ko silang dalawa," bulong ni Frederick habang mahigpit na pinipiga ang papel sa kanyang kamay hanggang sa tuluyan itong malukot.

Ngunit bago pa niya tuluyang hayaang kontrolin siya ng galit ay huminga siya nang malalim. Sanay siyang kumilos agad kapag may nagtaksil sa kanya, ngunit sa pagkakataong ito ay alam niyang mas kailangan niyang mag-isip nang mabuti. Ayaw niyang malaman agad nina Mandy at Magnos na alam na niya ang katotohanan. Mas gusto niyang hayaan silang magpatuloy sa kanilang plano habang unti-unti niyang inihahanda ang bitag na hindi nila kayang takasan.

Itinago ni Frederick ang resulta ng DNA test sa loob ng secret vault na nasa likod ng isang malaking painting sa kanyang opisina. Habang isinasara niya ito ay iisa lamang ang malinaw sa kanyang isip. Bago niya harapin sina Mandy at Magnos ay kailangan muna niyang siguraduhing ligtas sina Kristela at ang anim na taong gulang nilang anak na si Abigail.

Pagpasok ni Frederick sa master bedroom ay nakita niya si Kristela na nakatayo sa tabi ng malaking bintana. Nakasuot ang dalaga ng magandang pantulog at bagsak na bagsak ang mahaba nitong wavy na buhok hanggang baywang. Tahimik itong nakatingin sa labas habang hindi nito alam ang mabigat na lihim na kakalaman lamang ni Frederick.

"Bakit maaga kang nagising, Frederick?" mahinang tanong ni Kristela nang maramdaman niyang nasa likod na niya ang lalaki.

Hindi sumagot si Frederick. Lumapit siya at mahigpit na niyakap ang beywang ni Kristela mula sa likod. Ibinaba niya ang kanyang mukha sa leeg ng dalaga at marahang hinalikan ito. Sa simpleng sandaling iyon ay tila nabawasan ang galit na kanina pa bumabagabag sa kanyang dibdib.

"Namiss kita," bulong ni Frederick sa mababang boses.

"Frederick, gising na ang mga tao sa bahay. Baka makita tayo ni Abigail," mahinang sabi ni Kristela habang napapansin ang kakaibang lambing ng lalaki sa kanya.

"Naka-lock ang pinto, Kristela," sagot ni Frederick habang marahang hinaharap ang dalaga.

Tinitigan niya ang mga mata nito at ilang sandali siyang nanatiling tahimik. Sa dami ng galit at problemang nasa isip niya ay sapat na ang makita si Kristela upang kahit paano ay kumalma siya.

Hinawakan niya ang baba nito at marahang inangat ang mukha bago niya hinalikan ang mga labi ng dalaga. Naramdaman ni Kristela ang matinding emosyon sa halik ni Frederick at napapikit siya habang mahigpit siyang niyayakap ng lalaki.

"Frederick," mahinang sambit niya habang sinusubukang pakalmahin ang lalaki.

Hindi sumagot si Frederick. Sa halip ay mas hinigpitan niya ang kanyang yakap. Sa likod ng kanyang galit ay may takot siyang hindi maipaliwanag. Ayaw niyang mangyari kay Kristela at Abigail ang anumang masama dahil sa gulong magsisimula kapag nalaman nina Mandy at Magnos na alam na niya ang katotohanan.

Dahan-dahan niyang binuhat si Kristela at dinala ito sa malambot na kama. Sa loob ng kwarto ay nagkaroon sila ng sandaling silang dalawa lamang ang magkasama. Sa kabila ng malaking lihim na nalaman ni Frederick ay pinili niyang ilayo muna ang sarili sa problema at manatili sa piling ng babaeng pinakamahalaga sa kanya.

Nang gabing iyon ay muling naging tahimik ang kanilang kwarto. Habang mahimbing na natutulog si Kristela sa kanyang tabi, tahimik na nakatingin si Frederick sa dalaga. Alam niyang hindi na tulad ng dati ang kanyang buhay. May lihim na siyang hawak na maaaring tuluyang magpabagsak kina Mandy at Magnos.

Ngunit sa pagkakataong ito ay hindi siya basta kikilos dahil sa galit. Maghihintay siya sa tamang oras at kapag dumating iyon, wala nang makakatakas sa kanyang bitag.