Inaya si Demi ni Zain na magtungo na lamang sa bahay ni Miles dahil hindi naman malayo iyon kung saan sila magkikita-kita. May duda na ang dalaga sa marahil dahilan, sigurado siyang walang ideya ang pobre nilang kaibigan na nag-ayang kumain sa labas ang hudyo. Halata kasi sa kakaibang reaksyon ng mukha nito at maging ang paminsan-minsan na pagngiti sa tuwing ibinabaling niya ang atensyon sa ibang bagay.
Sabay silang umibis ng sinakyang taxi, tulad dati nakaramdam muli siya ng lungkot nang mapagmasdang muli ang bahay na tinutuluyan ng kaibigan. Pakiramdam niya kahit sino marahil ang tumira sa bahay na iyon ay makararamdam ng matinding lungkot. Animo'y ang malaking bahay ay kahit ano mang oras ay maaari ng gumuho. Kaya hindi niya maiwasang mag-alala para sa kaligtasan na rin ng nakatira roo
