لا تتركيني

هل حياتي استقرت؟

بعد ما عدي 5 سنين من المصايب الي حصلت ليا دي، بقت حياتي نوعا ما مستقره. دخلت كلية تانية، طبعا مش حاببها بس بنجح فيها وده المهم، ارتبطت تاني والمرادي كان الارتباط ده اطول من الي فات، تقريبا 4 سنين. لكنها برضو مستحملتش شخصيتي وطريقتي الوحشه فا مشيت من قريب جدا

مكنتش عارف وقتها اعيط علي فراقها ولا اضحك علي هبلي وانا مصدق ان ممكن يكون في شخص يفضل معايا للآخر، فضلت اليوم ده اعيط بطريقة غريبة وحسيت ان كفاية اوي كدا علي الحياة، بس انا مكنتش اقدر انتحر مش خوف من الانتحار انما انا مش عايز اتعذب دنيا وآخره كمان

من كام شهر حصلت عندنا حادثة في البيت وهي ان ارض الصاله وقعت بسبب ان جارنا الي تحت كان بي**ر في سقف بيته بس الحمدلله مكنش في اي اصابات خطيرة حصلت لينا

حرفيا عشت الفترة دي ايام كانت اصعب من اي ايام عدت عليا، نبات مرة عند خالي ومره عند خالتي وفي الحال ده لمدة 5 شهور لحد ما جالي اكتئاب ازيد من الأول وبقيت كارة العيشه والناس، لدرجة اني كنت حابس نفسي في اوضة مش عايز حد يكلمني ولا انا اكلم حد

الكل كان مستغرب طريقتي حتي انا بس مكنتش قادر اعيش اكتر من كدا في الوضع ده

وجت المصيبة الاكبر، وهي وفاة بابا. مكنتش مصدق ان ده حصل حقيقي وبدأت اعيط اكتر و اكتر. كنت خايف جدا مش عارف اعمل ايه، حسيت ان مبقاش في امان ولا بقي ليا ضهر، مع ان بابا طول عمرة مسافر بيشتغل برا والي كانت شايله البيت طول عمرها هي ماما

كنت عايز اموت ب اي طريقة وصل بيا الحال اني مكنتش باكل لمدة اسابيع عشان اموت، وصل وزني من 66 كيلو ل 47 بقيت شبة الهيكل العظمي

بس للأسف لسه عايش.

وطبعا مكنش لازم اسكت علي نفسي وقررت اروح دكتور نفسي الي شخص حالتي ان عندي وسواس قهري واكتئاب وانفصام في الشخصية

مكنتش متفاجئ انا اتبهدلت جدا في سن صغيره بس انا مكنتش مقتنع بالعلاج النفسي اصلا، وفعلا انا لسة زي ما انا مستني ف*ج ربنا يمكن بعد كل الي حصل ده يجيلي العوض الي استحقة ان شاء الله.