CHAPTER 34
Madalas hinahayaan ko na lang na igupo ako ng antok sa tuwing hindi ko na kayang labanan pa ito. Wala akong kapangyarihan para supilin ang nararamdaman ko. Hindi ko magawang imulat ang aking mga mata na para bang ipinaghehele ako sa kawalan. Kasunod ng pagpikit ko sa aking mga mata ang pagdalaw naman ng paulit-ulit na panaginip tungkol sa isang babae at lalaking di naman sa akin humaharap. Mahaba na may pagkakulot ang buhok ng babae. Balingkinitan at matangkad. Ang lalaki naman ay kasingtangkad at pareho ng hubog ng katawan ng kay Lucas. Iyon ang lalaking nakita kong pumasok sa kuwarto ni Kuya Diego noon. May hinala ako na ang lalaking iyon sa panaginip ko ay si Lucas mismo. Na maaring hanggang sa panaginip ko ay dinadalaw pa rin ako. Kung kailan makikilala ko na siya nang tulu
