Ang Penpal kong Preso

Chapter 12: Ang Paglaya

Lumabas si Gil ng kulungan ng Leyte na walang kahit anong dala kundi ang isang maliit na plastic bag na may mga lumang liham ni Rosa, ang larawan niyang bata kasama ang tatay, at ang huling papel na rosas na ginawa niya.

Wala siyang pera, wala siyang cellphone, pero mayroon siyang direksyon. Siquijor. Kay Rosa.

Sumakay siya ng bus papuntang port, nanghingi ng tulong sa dating kasama sa kulungan na may kamag-anak sa Leyte para sa pamasahe. Lahat gagawin niya makarating lang kay Rosa.

Habang nasa biyahe ng barko mula Leyte papuntang Cebu, at Cebu papuntang Siquijor, hindi siya mapakali. Paano kung hindi na siya hintayin ni Rosa? Paano kung may nobyo na itong engineer na nabanggit nito sa isang liham? Paano kung hindi siya magustuhan ng nanay nito?

Pero mas malakas ang pagmamahal kaysa sa takot.

Pagdating ng barko sa Siquijor alas sais ng gabi, madilim na at umuulan ng mahina. Hindi alam ni Gil kung saan ang bahay nina Rosa, alam lang niya ang baryo ng Lazi.

Nagtanong-tanong siya, basang-basa sa ulan, hawak ang plastic bag.

"Kilala niyo po ba si Rosa Dela Cruz? Yung nagtitinda ng biko?"

Isang matandang babae ang tumuro. "Doon, yung bahay na may ilaw na gasera, dulo ng palayan."

Tumakbo si Gil, putikan ang tsinelas, basa ang damit, pero ang puso ay kumakabog na parang sasabog.

At doon, sa ilalim ng gasera, nakita niya si Rosa. Nakaupo, nagsusulat pa rin, kahit gabi na. Tulad ng dati.

Huminto si Gil sa tapat ng bintana at dahan-dahang kumatok.

Tok. Tok. Tok.

Tumingala si Rosa. At nang makita niya kung sino ang nasa labas ng bintana, nabitawan niya ang ballpen.

Si Gil. Payat, basa, putikan, pero malaya. At nakangiti, yung ngiting matagal na niyang hinihintay.

"Rosa..." sabi ni Gil, nanginginig sa lamig at kaba.

"Gil?" hindi makapaniwala si Rosa, tumatakbo papalabas kahit umuulan. "Gil! Ikaw ba talaga yan? Malaya ka na?"

At sa gitna ng ulan at putik sa Siquijor, sa wakas ay nagyakap ang dalawang taong pinagbuklod lang dati ng tinta at papel. Walang salamin sa pagitan. Walang rehas. Totoo na.