Maaga akong nagising kinabukasan, kaya naabutan ko pa si Brayden sa tabi ko. Saglit kong nilingon ang wall clock at nakitang alas singko pa lang ng umaga. Napasarap yata ang tulog ko at napaaga ang gising ko.
Napanguso ako bago muling ibinalik ang atensyon kay Brayden. Sa mabigat niyang paghinga ay natanto kong malalim ang pagkakatulog niya. Nakaharap ito sa gawi ko, rason para madali ko lang siyang matitigan.
Ang isang kamay niya ay naging unan ko habang ang isa ay yakap-yakap ang katawan ko. Samantalang ang binti naman nito ay nakadantay sa hita ko, tila ba kahit sa pagtulog nito ay ayaw niya akong pakawalan.
Tuloy ay hindi rin ako makagalaw. Well, hindi ko rin naman gustong bumangon. Sa ganitong paraan na lang ako babawi ng titig kay Brayden, kaya ninamnam ko ang mga sandaling iyon.
