روايه الصافي الجزء الاول

روايه الصافي 7

ﻭﻋﻤﻮﻣﺎ ﺍﻱ ﺭﺍﺟﻞ ﻋﻨﺪﻭ ﻛﺮﺍﻣﺔ ﻭﻋﺰﺓ ﻧﻔﺲ .. ﺍﻟﻤﻔﺮﻭﺽ ﻳﻨﻈﺮ ﻟﻠﺒﻨﺎﺕ ﻋﻠﻰ ﺍﻧﻬﻢ ﺑﺎﻟﻨﺴﺒﺔ ﻟﻴﻬﻮ ﺷﺮﻑ ﻭﺍﻋﺮﺍﺽ .. ﻭﺑﻲ ﻛﺪﺍ ﺭﺑﻨﺎ ﺭﺑﻨﺎ ﺑﺤﻔﻆ ﻟﻴﻬﻮ ﻋﺮﺿﻮ ﻭﺷﺮﻓﻮ ﻭﻫﻮ ﻏﺎﻳﺐ ..

ﻗﺎﻟﺖ ﻟﻴﻬﻮ ﻳﻌﻨﻲ ﻣﻌﻨﺎﻫﺎ ﺍﻧﺖ ﻫﺴﻲ .. ﻋﻼﻗﺎﺕ ﺍﻟﺒﻨﺎﺕ ﻣﻊ ﺍﻻﻭﻻﺩ ﺍﻟﺸﺎﻳﻔﻬﺎ ﺩﻱ ﻣﺎﻣﺮﻳﺤﺎﻙ؟؟ ..

ﺍﺧﺪ ﻟﻴﻬﻮ ﺑﺴﻤﺔ ﻛﺪﺍ ﻭﻗﺎﻝ ﻟﻴﻬﺎ .. ﺗﻔﻜﺮﻱ ﻟﻮ ﺍﻱ ﺑﺖ ﺍﺧﻮﻫﺎ ﻣﻌﺎﻫﺎ ﻣﻤﻜﻦ ﺗﺘﺼﺮﻑ ﻛﺪﺍ؟ﺗﺘﺨﻴﻠﻲ ﻣﻤﻜﻦ ﺍﻟﻮﻟﺪ ﺫﺍﺗﻮ ﻳﺘﺼﺮﻑ ﻣﻌﺎﻫﺎ ﻛﺪﺍ ﻗﺪﺍﻡ ﺍﺑﻮﻫﺎ ؟؟ .. ﺍﻧﺘﻲ ﻣﺎﺷﺎﻳﻔﺎﻫﻢ ﻗﺎﻋﺪﻳﻦ ﻣﺘﻠﺼﻘﻴﻦ ﻋﻠﻰ ﺑﻌﺾ ﻛﻴﻒ ؟ ﻏﺎﻳﺘﻮ ﺩﻱ ﺣﻜﺎﻳﺔ ﺍﻧﺎ ﺑﻌﺘﺒﺮﻫﺎ ﺍﻧﺴﻼﺥ ﻣﻦ ﺍﻟﺸﻴﻢ ﻭﺍﻟﺮﺟﻮﻟﺔ .. ﻗﺒﻞ ﺍﻧﻬﺎ ﺗﻜﻮﻥ ﻣﻌﺼﻴﺔ ﻟﺮﺏ ﺍﻟﻌﺎﻟﻤﻴﻦ ..

ﻫﺴﻲ ﺍﻟﻮﺍﺣﺪﺓ ﻛﺎﻥ ﺍﺧﻮﻫﺎ ﺍﻭ ﺍﺑﻮﻫﺎ ﻇﻬﺮ ﻓﺠﺄﺓ ﻗﺪﺍﻣﻬﺎ .. ﻭﻫﻲ ﻓﻲ ﺍﻟﻮﺿﻊ ﺩﻩ ﺑﺘﻌﻤﻞ ﺷﻨﻮ؟ .. ﻭﻫﻮ ﻳﻌﻤﻞ ﺷﻨﻮ؟

ﻋﺎﺭﻓﺔ ﻳﺎﻟﻴﻨﺔ ﺍﻱ ﺯﻭﻝ ﺑﺤﺘﺮﻡ ﻧﻔﺴﻮ .. ﺍﻟﻤﻔﺮﻭﺽ ﻳﺤﺘﺮﻡ ﺍﻻﺧﺮﻳﻦ ..

ﻻﻧﻮ ﺍﺣﺘﺮﺍﻡ ﺍﻻﺧﺮﻳﻦ ﺑﺠﻴﺐ ﻟﻴﻚ ﺍﻻﺣﺘﺮﺍﻡ .. ﻭﺍﻻﺳﺘﻬﺘﺎﺭ ﺑﺎﻻﺧﺮﻳﻦ ﺑﺠﻴﺐ ﻟﻴﻚ ﺍﻻﻫﺎﻧﺔ ﻭﺍﻟﺬﻟﺔ .. ﺩﻩ ﺷﻲ ﺍﻧﺎ ﻋﻨﺪﻱ ﺑﻴﻬﻮ ﻗﻨﺎﻋﺔ ..

ﺍﻟﻤﻬﻢ ﻳﺎﺟﻤﺎﻋﺔ ﻓﻲ ﺍﻟﻘﻌﺪﺓ ﺍﻟﻘﻌﺪﺗﻬﺎ ﻣﻌﺎﻫﻮ ﻟﻴﻨﺔ ﺩﻱ .. ﺍﺩﺍﻫﺎ ﺩﺭﻭﺱ ﻣﺠﺎﻧﻴﺔ ﺗﺤﻴﺮ ﺍﻟﻤﺎﺑﺤﺘﺎﺭ .. ﻭﺍﻟﻐﺮﻳﺒﺔ ﺍﻧﻬﺎ ﻛﻠﻬﺎ ﺩﺭﻭﺱ ﻣﻨﻄﻘﻴﺔ ..

ﻭﻃﻴﻠﺔ ﺍﻟﻘﻌﺪﺓ ﺩﻱ .. ﻣﺎﻋﺎﻳﻦ ﻟﻴﻬﺎ ﻓﻲ ﻭﺷﻬﺎ .. ﻭﻻﺑﺴﻢ ﻣﻌﺎﻫﺎ ﻭﻻ ﻫﺒﺶ ﻳﺪﻫﺎ .. ﻭﻻﻗﺮﺏ ﻋﻠﻴﻬﺎ ﻓﻲ ﺍﻟﻘﻌﺪﺓ .. ﻛﺎﻧﺖ ﻗﺎﻋﺪﺓ ﻗﺪﺍﻣﻮ ﻭﺑﻴﻨﻮ ﺑﻴﻨﻬﺎ ﻗﺮﻳﺐ ﺍﻟﻤﺘﺮﻳﻦ ..

ﺧﻴﻢ ﻋﻠﻰ ﺍﻟﺠﻠﺴﺔ ﺳﻜﻮﺕ ﻛﺪﺍ ﺭﻫﻴﺐ .. ﻭﺍﻟﺒﺖ ﺍﺯﺩﺍﺩ ﺍﺣﺘﺮﺍﻣﻬﺎ ﻟﻲ ﺍﻟﺼﺎﻓﻲ .. ﻛﻞ ﻣﺎﻳﺘﻜﻠﻢ ﻫﻲ ﺑﺘﻜﻮﻥ ﺑﺘﻌﺎﻳﻦ ﻟﻴﻬﻮ .. ﻭﻣﻌﺠﺒﺔ ﺑﻴﻬﻮ ﺍﻋﺠﺎﺏ ﻇﺎﻫﺮ ﻓﻮﻕ ﻭﺷﻴﻬﺎ ..

ﻗﺎﻝ ﻟﻴﻬﺎ ﻣﺎﻗﻠﺘﻲ ﻟﻲ ﻳﺎ ﻟﻴﻨﺔ .. ﺍﻧﺘﻲ ﺍﺻﻼ ﻣﺸﻜﻠﺘﻚ ﻣﻊ ﻣﺆﻳﺪ ﺷﻨﻮ؟ ..

ﻗﺎﻟﺖ ﻟﻴﻬﻮ ﺍﻧﺖ ﻟﻴﻨﺔ ﻗﺎﻟﺖ ﻟﻴﻬﻮ ﻭﺍﻟﻠﻪ ﻳﺎ ﺍﻟﺼﺎﻓﻲ .. ﻭﺻﺎﻳﺎﻙ ﻋﻠﻰ ﺍﻟﻌﻴﻦ ﻭﺍﻟﺮﺍﺱ .. ﻏﺎﻳﺘﻮ ﺭﺑﻨﺎ ﻳﻬﺪﻳﻨﺎ .. ﻟﻜﻦ ﺍﻧﺎ ﻃﺎﻟﺒﺔ ﺻﺪﺍﻗﺘﻚ ﻭﺧﻮﺗﻚ .. ﻭﻟﻮ ﻓﻴﻬﺎ ﺍﻱ ﻣﻀﺎﻳﻘﺔ ﻟﻴﻚ ﺑﻼﺵ .. ﻗﺎﻝ ﻟﻴﻬﺎ ﺍﺳﺎﺳﺎ ﻧﺤﻦ ﻣﺎﺩﻣﻨﺎ ﻓﻲ ﺍﻟﺠﺎﻣﻌﺔ ﺩﻱ ﻣﻊ ﺑﻌﺾ ﺍ .. ﻧﺎ ﺡ ﺍﺗﻌﺎﻣﻞ ﻣﻌﺎﻙ ﺑﻲ ﻣﺒﺪﺃ ﺍﻻﺧﺖ .. ﺍﻧﺘﻲ ﻭﺍﻟﺒﻨﺎﺕ ﺍﻟﺒﺎﻗﻴﻦ ..

ﻭﻗﺎﻡ ﻣﺸﻰ ﻋﻠﻰ ﺍﻟﺼﻼﺓ ..

ﺍﻫﺎ ﻳﺎﺟﻤﺎﻋﺔ .. ﺍﻟﺤﺎﺻﻞ .. ﻛﻴﻒ ﺑﺪﺕ ﺍﻟﻌﻼﻗﺔ ﺑﻴﻦ ﺍﻟﺼﺎﻓﻲ ﻭﺑﻴﻦ ﻟﻴﻨﻪ .. ﺍﻧﻮ ﻗﺒﻞ ﻛﻢ ﻳﻮﻡ .. ﺍﻟﺼﺎﻓﻲ ﻣﻦ ﺑﻌﻴﺪ ﺷﺎﻑ ﻟﻴﻨﺔ ﻛﺎﻳﺴﺔ ﻟﻲ ﻧﻀﺎﺭﺗﻬﺎ ﻭﺑﺘﺒﻜﻲ .. ﺟﺎ ﻣﻦ ﻫﻨﺎﻙ ﻣﺎﺷﻲ ﻋﻠﻴﻬﺎ .. ﺍﻟﻜﻼﻡ ﺩﻩ ﻓﻲ ﺣﺮﻡ ﺍﻟﺠﺎﻣﻌﺔ .. ﻭﻫﻲ ﻟﻘﺖ ﻧﻀﺎﺭﺗﻬﺎ .. ﻭﻟﺒﺴﺘﻬﺎ ﻭﻗﻌﺪﺕ ﻋﻠﻰ ﺭﺟﻠﻴﻬﺎ .. ﻓﻲ ﺍﻟﻀﻞ .. ﺗﺎﻛﻠﺔ ﺿﻬﺮﺍ ﻋﻠﻰ ﺍﻟﺤﻴﻄﺔ .. ﻭﺧﺎﺗﺔ ﺷﻨﻄﺘﻬﺎ ﻓﻮﻕ ﺭﺟﻠﻴﻬﺎ .. ﻭﺑﺘﺒﻜﻲ ﺑﻜﺎ ﺑﻲ ﺣﺮﺍﺭﺓ .. ﺍﻟﺼﺎﻓﻲ ﺟﺎ ﻭﻗﻒ ﻓﻮﻗﺎ .. ﻭﻋﺎﻳﻦ ﻫﻨﺎﻙ .. ﻟﻘﻰ ﻣﺆﻳﺪ ﻣﺎﺳﻚ ﺑﺖ ﻣﻦ ﻳﺪﻫﺎ .. ﻭﺍﻟﺒﺖ ﺍﺻﻐﺮ ﻣﻨﻮ ﻛﺘﻴﺮ .. ﻭﺑﻌﺎﻳﻦ ﻟﻲ ﻟﻴﻨﺔ ﺑﻲ ﻃﺮﻑ ﻋﻴﻨﻮ .. ﻭﻟﻴﻨﺔ ﺑﺘﺪﻋﻲ ﻋﻠﻴﻬﻮ ..

ﺍﺻﻠﻮ ﺍﻟﺼﺎﻓﻲ ﺍﺑﺎ ﻳﻘﻮﻝ ﻟﻴﻬﺎ ﺍﻟﺰﻭﻝ ﺩﻩ ﻣﺎﻟﻮ ﻣﻌﺎﻙ .. ﻻﻧﻮ ﻋﺮﻑ ﺍﻧﻬﺎ ﻣﺴﺄﻟﺔ ﺷﺎﻛﻮﺵ ﻻﻏﻴﺮ .. ﻭﻣﺎ ﻛﺎﻥ ﻋﺎﺭﻑ ﻗﺼﺔ ﺍﻟﻀﺮﺑﺔ ﺑﺎﻟﻜﺘﺎﺏ .. ﻃﻮﺍﻟﻰ ﺧﺘﺎﻫﺎ ﻓﻲ ﺭﺍﺳﻮ ﻣﻮﺿﻮﻉ ﺍﻧﺘﻬﺎﺀ ﻋﻼﻗﺔ .. ﻻﻧﻮ ﻋﻼﻗﺔ ﻟﻴﻨﺔ ﻭﻣﺆﻳﺪ ﻛﺎﻧﺖ ﻇﺎﻫﺮﺓ .. ﻣﺎﻓﻲ ﺯﻭﻝ ﻣﺎﻋﺎﺭﻓﻬﺎ ..

ﺍﻟﻤﻬﻢ ﺍﻟﺼﺎﻓﻲ ﻭﻗﻒ ﺍﺗﻜﻠﻢ ﻣﻌﺎﻫﺎ .. ﻭﻗﺎﻝ ﻟﻴﻬﺎ ﻗﻮﻣﻲ ﺗﻌﺎﻟﻲ ﻭﺭﺍﻱ .. ﻭﺩﺍﻫﺎ ﻋﻠﻰ ﺍﻟﺤﻨﻔﻴﺔ .. ﻭﻏﺴﻠﺖ ﻭﺷﻬﺎ ﻭﻗﻌﺪ ﻳﺘﻜﻠﻢ ﻣﻌﺎﻫﺎ .. ﻭﺑﻘﻮﻝ ﻟﻴﻬﺎ .. ﺍﻟﺰﻭﻝ ﺍﻟﻤﺎﺑﻌﺮﻑ ﻗﻴﻤﺘﻚ .. ﺍﻟﻤﻔﺮﻭﺽ ﻣﺎﺗﺒﻜﻲ ﻋﻠﻴﻬﻮ .. ﻭﺍﻟﺰﻭﻝ ﺍﻟﺒﺘﺨﻼ ﻋﻨﻚ .. ﻣﻌﻨﺎﻫﺎ ﺭﻳﺤﻚ .. ﺍﺣﺴﻦ ﻣﻦ ﻳﻜﻮﻥ ﻣﻌﺎﻙ ﻭﻫﻮ ﻣﺎﻋﺎﻳﺰﻙ .. ﻭﻭﻭ .. ﻳﺎﻫﻮ ﺍﻟﻜﻼﻡ ﺍﻟﻤﻌﺮﻭﻑ ﺑﺘﺎﻉ ﺍﻟﺘﺨﻔﻴﻒ ﺩﻩ ..

ﻭﻟﻤﻦ ﺩﺍﻳﺮﻳﻤﺸﻲ ﻗﺎﻝ ﻟﻴﻬﺎ .. ﺍﻧﺎ ﻣﺎﻋﺎﻳﺰ ﺍﺳﺄﻟﻚ ﻣﻦ ﺳﺒﺐ ﺍﻟﻤﺸﻜﻠﺔ .. ﺍﻻ ﺗﺤﻜﻲ ﻟﻲ ﺑﺮﺍﻙ .. ﻗﺎﻟﺖ ﻟﻴﻬﻮ ﺑﺤﻜﻲ ﻟﻴﻚ ﺍﻥ ﺷﺎﺀ ﺍﻟﻠﻪ .. ﻳﻮﻡ ﺍﻟﺘﻼﺗﺎ ﻻﻗﻴﻨﻲ ﻓﻲ ﺍﺧﺮ ﺍﻟﻴﻮﻡ .. ﻭﺍﻧﺎ ﺑﺤﻜﻲ ﻟﻴﻚ ﺷﻮﻓﻨﻲ ﻏﻠﻄﺎﻧﺔ ﻭﻟﻼﺍﻻ ..

ﻭﺍﻟﻠﻴﻠﺔ ﻳﺎﻫﻮ ﺍﺗﻼﻗﻮ ﺩﻩ ﻛﻞ ﺍﻟﻘﺼﻪ ..

ﺍﻟﺼﺎﻓﻲ ﻓﻲ ﺍﻟﺠﺎﻣﻌﺔ ﻋﻨﺪﻭ ﺍﺻﺤﺎﺏ ﻣﻦ ﻃﺮﺍﺯ ﻣﻌﻴﻦ .. ﻭﻓﻲ ﻧﺎﺱ ﺑﻜﺠﻮﻫﻮ .. ﺑﻘﻮﻟﻮ ﻟﻴﻬﻮ ﺍﻧﺖ ﻋﺎﻣﻞ ﻟﻴﻨﺎ ﻓﻴﻬﺎ ﻣﺜﺎﻟﻲ ﻭﺑﺘﺎﻉ .

ﻣﺮﺣﻠﺔ ﺍﻟﺸﺒﺎﺏ ﺩﺍﻳﺮﺓ ﺣﺒﺔ ﻟﻴﻮﻧﺔ .. ﺍﻟﺼﺎﻓﻲ ﻣﻘﺮﻃﺄ ﺷﺪﻳﺪ .. ﻣﺎﻋﻨﺪﻭ ﻏﻴﺮ ﺑﺲ ﺍﻣﺴﻚ ﻟﻲ ﻭﺍﻗﻄﻊ ﻟﻴﻚ ..

ﺍﻫﺎ ﻓﻲ ﺍﻟﻴﻮﻡ ﺩﻩ ﺫﺍﺗﻮ ﺍﻻﺗﻜﻠﻢ ﻓﻴﻬﻮ ﻣﻊ ﻟﻴﻨﺔ .. ﻣﺸﻰ ﺍﻟﺒﻴﺖ ﻭﻓﻲ ﺍﻟﺒﻴﺖ ﺣﺼﻠﺖ ﻋﻠﻴﻬﻮ ﻣﺸﻜﻠﺔ ..

ﻃﺒﻌﺎ ﻓﻲ ﺍﻟﺒﻴﺖ ﺳﺎﻛﻦ ﻫﻮ ﻭﺧﺎﻟﻮ ﻭﺩﺧﺎﻟﺔ ﺍﻣﻮ ﺍﺳﻤﻮ ﺧﺎﻟﺪ .. ﻣﺎ ﻣﺘﺰﻭﺝ .. ﺩﻩ ﺍﺧﻮ ﺍﺣﻤﺪ ﺍﻻﺻﻐﺮ .. ﻭﺍﺣﻤﺪ ﻣﺘﺰﻭﺝ ﻭﺳﺎﻛﻦ ﻓﻲ ﺍﻟﺼﺒﺎﺑﻲ ..

ﻭﺧﺎﻻﺗﻮ ﺍﺗﻨﻴﻦ ﺑﻬﻴﺔ ﻭﺭﻗﻴﺔ .. ﺭﻗﻴﺔ ﻣﻄﻠﻘﺔ .. ﻭﻋﻨﺪﻫﺎ ﻃﻔﻠﻴﻦ ﺍﻭﻻﺩ .. 7 ﺳﻨﻮﺍﺕ ﻭ 5 ﺳﻨﻮﺍﺕ .. ﻭﺑﻬﻴﺔ ﻣﺎﻣﺘﺰﻭﺟﺔ ..

ﺍﻟﺼﺎﻓﻲ ﻭﺧﺎﻟﺪ ﺳﺎﻛﻨﻴﻦ ﻓﻲ ﺍﻟﺼﺎﻟﻮﻥ ..

ﺍﻫﺎ ﺍﻟﺼﺎﻓﻲ ﻭﻛﺖ ﺟﺎ ﻣﻦ ﺍﻟﺠﺎﻣﻌﺔ .. ﻟﻘﻰ ﺩﻭﻻﺑﻮ ﻣﻔﺘﻮﺡ .. ﻭﻫﺪﻭﻣﻮ ﻣﺠﺪﻋﺔ ﻓﻲ ﺍﻻﺭﺽ .. ﻭﻓﻲ ﺍﻏﺮﺍﺽ ﻣﻦ ﺍﻏﺮﺍﺿﻮ ﻣﺎﻓﻲ .. ﺍﻧﺰﻋﺞ ﺍﻧﺰﻋﺎﺝ ﺷﺪﻳﺪ .. ﻻﻧﻮ ﻋﻨﺪﻭ ﺑﺤﻮﺙ ﻣﻬﻤﺔ ﻣﺎﻻﻗﻴﻬﺎ .. ﺍﻟﻤﻬﻢ ﻧﻔﺾ ﺍﻟﻬﺪﻭﻡ .. ﺑﺘﺎﻋﺘﻮ ﻛﺪﺍ ﻣﻦ ﺍﺛﺮ ﺍﻟﺘﺮﺍﺏ .. ﻭﺑﻘﻰ ﻳﻔﺘﺶ ﻟﻼﻏﺮﺍﺽ ﻭﺍﻻﻭﺭﺍﻕ .. ﻧﺎﺩﻯ ﺍﻟﻮﻟﺪ ﺍﻟﺼﻐﻴﺮ ﺍﺳﻤﻮﺍﻣﺠﺪ .. ﻟﻘﺎﻫﻮ ﻳﻠﻌﺐ ﻓﻲ ﺍﻟﺤﻮﺵ .. ﻗﺎﻝ ﻟﻴﻬﻮ ﻳﺎ ﺍﻣﺠﺪ ﺗﻌﺎﻝ .. ﺷﻮﻓﺘﺎ ﺍﻟﻔﺘﺢ ﺩﻭﻻﺑﻲ ﻣﻨﻮ ؟

ﻗﺎﻝ ﻟﻴﻬﻮ ﺍﻳﻮﺓ ﻓﺘﺤﻮ ﺣﻤﻮﺩﻱ .. ﺣﻤﻮﺩﻱ ﺩﻩ ﻣﺤﻤﺪ ﺍﺧﻮﻩ ﺍﻻﻛﺒﺮ .. ﻭﺑﺸﺘﻦ ﻟﻴﻚ ﻫﺪﻭﻣﻚ ﻭﺷﺎﻝ ﺍﻟﻮﺭﻕ ..

ﻃﻮﺍﻟﻲ ﺍﻟﺼﺎﻓﻲ ﻣﺸﻰ ﺩﻕ ﺍﻟﺒﺎﺏ ﺣﻖ ﺍﻟﺤﺮﻳﻢ ﻭﻗﻌﺪ ﻳﻜﻮﺭﻙ .. ﻳﺎﺣﻤﻮﺩﻱ .. ﺣﻤﻮﺩﻱ ﺗﻌﺎﻝ ﻋﺎﻳﺰ ﺍﺩﻳﻚ ﻫﺪﻳﺔ .. ﺣﻤﻮﺩﻱ ﺟﺎ ﺟﺎﺭﻱ .. ﻗﺎﻝ ﻟﻴﻬﻮ ﻭﻳﻨﺎ ﺍﻟﻬﺪﻳﺔ ؟

ﻗﺎﻝ ﻟﻴﻬﻮ ﺍﻧﺎ ﺑﺪﻳﻚ ﺗﺸﺘﺮﻱ ﻟﻌﺒﺔ ﻣﻦ ﺍﻟﺪﻛﺎﻥ .. ﻭﻣﻤﻜﻦ ﺗﺸﺘﺮﻱ ﺍﻱ ﺣﺎﺟﺔ .. ﺑﺲ ﻭﺭﻳﻨﻲ ﺍﻻﻭﺭﺍﻕ ﻭﺍﻟﺤﺎﺟﺎﺕ ﻭﺩﻳﺘﻬﺎ ﻭﻳﻦ ؟؟ ..

ﻗﺎﻝ ﻟﻴﻬﻮ ﺍﻣﻲ ﻗﺎﻟﺘﻠﻲ ﺍﺭﻣﻴﻬﻢ ﻓﻲ ﺍﻟﻮﺳﺎﺧﺔ .. ﻗﺎﻝ ﻟﻴﻬﻮ ﻳﻌﻨﻲ ﺍﻣﻚ ﺷﺎﻓﺘﻚ ﻭﻛﺖ ﻓﺘﺤﺖ ﺍﻟﺪﻭﻻﺏ ؟ ﻗﺎﻝ ﻟﻴﻬﻮ ﺍﻳﻮﺓ .. ﻭﻫﻲ ﻛﺎﻧﺖ ﺑﺘﻔﺘﺶ ﻣﻌﺎﻱ .. ﻗﺎﻟﺖ ﻋﺎﻳﺰﺓ ﻟﻴﻬﺎ ﺿﻔﺎﺭﺓ ..

ﻗﺎﻝ ﻟﻴﻬﻮ ﻭﺍﻟﻬﺪﻭﻡ ﺣﻘﺎﺗﻲ ﺍﻟﺠﺪﻋﻬﻢ ﻣﻨﻮ؟ .. ﻗﺎﻝ ﻟﻴﻬﻮ ﺍﻟﺒﻨﻄﻠﻮﻧﺎﺕ ﻭﻗﻌﻮ ﻣﻦ ﺍﻣﻲ .. ﻭﺍﻟﻘﻤﺼﻴﺎﺕ ﻛﻨﺎ ﺑﻨﺠﺎﺩﻉ ﺑﻴﻬﻢ ﺍﻧﺎ ﻭﺍﻣﺠﺪ ..ﺍﻟﺼﺎﻓﻲ ﻗﺎﻝ ﻟﻴﻬﻮ .. ﻃﻴﺐ ﻫﺴﻲ ﺣﺎﺟﺎﺗﻲ ﻭﺍﻻﻭﺭﺍﻕ ﻓﻲ ﺻﻨﺪﻭﻕ ﺍﻟﻮﺳﺎﺧﺔ ﻳﻌﻨﻲ؟؟ .. ﻗﺎﻝ ﻟﻴﻬﻮ ﺍﻳﻮﺓ ﺍﺟﻴﺒﻬﻢ ﻟﻴﻚ؟

ﺍﻟﺼﺎﻓﻲ ﻗﺎﻝ ﻟﻴﻬﻮ ﻻﻻ ﺧﻼﺹ .. ﻫﺎﻙ ﺍﻟﻘﺮﻭﺵ ﺍﻣﺸﻲ ﺍﺷﺘﺮﻱ ﻟﻴﻚ ﺣﺎﺟﺔ .. ﺑﺠﻴﺒﻬﻢ ﺑﺮﺍﻱ .. ﺳﻮﻕ ﻣﻌﺎﻙ ﺍﻣﺠﺪ .. ﺍﺷﺘﺮﻭ ﻭﺗﻌﺎﻟﻮ ﺳﺮﻳﻊ ﻳﺎ ﺷﺎﻃﺮ ..

ﺍﻟﻮﻟﺪ ﺷﺎﻝ ﺍﻟﻘﺮﻭﺵ .. ﻭﺩﺍﻳﺮ ﻳﻤﺸﻲ .. ﻭﻗﻒ ﻭﻗﺎﻝ ﻟﻴﻬﻮ ﻳﺎﻋﻤﻮ ﺍﻟﺼﺎﻓﻲ ﺍﻧﺎ ﺍﺳﻒ .. ﺍﻟﺼﺎﻓﻲ ﻗﺎﻝ ﻟﻴﻬﻮ ﻭﻻﻳﻬﻤﻚ ﻳﺎ ﺑﻄﻞ .. ﺍﻣﺸﻲ ﺍﻣﺸﻲ .. ﺍﻟﺼﺎﻓﻲ ﻣﺸﻰ ﻃﻮﺍﻟﻲ ﻋﻠﻰ ﺻﻨﺪﻭﻕ ﺍﻟﻮﺳﺎﺧﺔ .. ﻃﻠﻊ ﺍﻏﺮﺍﺿﻮ ﻛﻠﻬﺎ .. ﻭﺑﺤﺜﻴﻦ ﻛﺎﻥ ﺗﻌﺒﺎﻥ ﻓﻮﻗﻦ ﺍﻳﺎﻡ .. ﻭﻛﺘﺎﺏ ﺍﺳﻤﻮ ﺗﻠﺒﻴﺲ ﺍﺑﻠﻴﺲ .. ﻟﻼﻣﺎﻡ ﺍﺑﻲ ﺍﻟﻔﺮﺝ ﺍﺑﻦ ﺍﻟﺠﻮﺯﻱ .. ﺑﺘﻜﻠﻢ ﻋﻦ ﺍﻟﻔﺮﻕ ﺍﻟﻀﺎﻟﺔ .. ﻭﻫﻮ ﻛﺎﻥ ﻋﻨﺪﻭ ﺍﻫﺘﻤﺎﻡ ﺑﺎﻟﺤﻜﺎﻳﺔ ﺩﻱ .. ﻭﻋﻨﺪﻭ ﻣﻌﺎﻫﺎ ﻗﺼﺔ ﻃﻮﻳﻠﺔ ﺑﺘﺠﻴﻨﺎ ﺑﻌﺪﻳﻦ ..

ﺍﻟﻤﻬﻢ ﻟﻘﻰ ﺍﻻﻭﺭﺍﻕ ﻣﻠﻄﺨﺔ ﺑﻲ ﻣﻮﻳﺔ ﺷﺎﻱ ﻭﺗﻔـﻞ ﻭﺑﺎﻗﻲ ﻣﻼﺡ ﺗﻘﻠﻴﺔ ﺑﺎﻳﺖ ..

ﻭﺣﺎﺟﺎﺕ ﻋﺠﻴﺒﺔ ﻛﺪﺍ ﻣﻊ ﺟﻮﻃﺔ ﺍﻟﻮﺳﺦ ..

ﻗﻌﺪ ﻳﻀﺤﻚ ﺑﺮﺍﻫﻮ .. ﺍﺗﺬﻛﺮ ﺯﻣﺎﺍﺍﻥ ﻭﻛﺘﻮ ﺍﻟﻜﺎﻥ ﻓﻲ ﺍﻻﺳﺎﺱ . ﺣﺼﻠﺖ ﻗﺼﺔ ﺯﻱ ﻟﻲ ﺻﺎﺣﺒﻮ .. ﻟﻤﻦ ﺭﻣﻮ ﻟﻴﻬﻮ ﺍﻟﻤﻮﺯﺓ ﺍﻟﻤﻔﺠﺨﺔ ﻓﻲ ﺷﻨﻄﺘﻮ ..

ﺷﺎﻝ ﺍﻻﻭﺭﺍﻕ ﻛﻠﻬﺎ ﻭﻧﻔﻀﻬﺎ .. ﻭﻣﺸﻰ ﻓﺘﺢ ﻓﻴﻬﺎ ﺍﻟﻤﺎﺳﻮﺭﺓ .. ﻭﺧﻼﻫﺎ ﺑﺮﻩ ﻓﻲ ﺳﺮﻳﺮ ..

ﺍﻟﻜﻼﻡ ﺩﻩ ﻛﻠﻮ ﺍﻟﻌﺼﺮﻳﺔ ﻛﺪﺍ ﻗﺮﻳﺐ ﺍﻟﻤﻐﺮﺏ ..

ﻃﺒﻌﺎ " ﺍﻟﻮﻟﺪ ﺍﺷﺘﺮﻱ ﻟﻴﻬﻮ ﻭﻟﻲ ﺍﺧﻮﻫﻮ ﺷﻴﻜﻮﻻﺗﺎﺕ .. ﻭﺟﺎ ﺍﻟﺒﻴﺖ .. ﺍﻣﻮ ﻗﺎﻟﺖ ﻟﻴﻬﻮ ﺩﻳﻞ ﺟﺒﺘﻬﻦ ﻣﻦ ﻭﻳﻦ ﻳﺎﺣﻤﻮﺩﻱ .. ؟؟

ﻗﺎﻝ ﻟﻴﻬﺎ ﺍﺩﺍﻧﻲ ﻟﻴﻬﻢ ﻋﻤﻮ ﺍﻟﺼﺎﻓﻲ .. ﻗﺎﻟﺖ ﻟﻴﻬﻮ ﻟﻴﻪ ﻳﺪﻳﻚ ﻟﻴﻬﻦ . ؟

ﻗﺎﻝ ﻟﻴﻬﺎ ﻋﺸﺎﻥ ﻛﻠﻤﺘﻮ ﺑﻲ ﻣﻜﺎﻥ ﻭﺭﻗﻮ ﻭﻗﻠﺖ ﻟﻴﻬﻮ ﻭﺭﻗﻚ ﻓﻲ ﺍﻟﻮﺳﺎﺧﺔ ..

ﺍﻟﻤﺮﺓ ﻗﺎﻣﺖ ﻣﺸﺖ ﻋﺎﻳﻨﺖ ﻟﻲ ﺻﻨﺪﻭﻕ ﻟﻮﺳﺎﺧﺔ .. ﻟﻘﺖ ﺍﻻﻭﺭﺍﻕ ﺍﻟﺼﺎﻓﻲ ﺷﺎﻟﻦ ﻛﻠﻬﻦ .. ﺳﻜﺘﺖ ﺳﺎﻱ .. ﻭﺑﻘﺖ ﻣﺴﺘﻌﺪﺓ ﻟﻠﺸﻜﻠﺔ .. ﻻﻧﻮ ﺣﻴﺠﻲ ﻳﺴﺎﻻ ..

ﺑﻌﺪ ﺷﻮﻳﺔ ﺍﻟﺼﺎﻓﻲ ﺩﺧﻞ ﺍﻳﺪﻭ ﻓﻲ ﺟﻴﺐ ﺷﻨﻄﺘﻮ .. ﻃﻠﻊ ﺍﻟﻀﻔﺎﺭﺓ .. ﻭﺩﻕ ﻟﻴﻬﺎ ﺍﻟﺒﺎﺏ .. ﻳﺎﺭﻗﻴﺔ .. ﻳﺎﺭﻗﻴﺔ .. ﺟﺎﺗﻮ ﻣﺴﺘﻌﺪﺓ ﺗﺐ ..

ﻗﺎﻝ ﻟﻴﻬﺎ ﺍﻧﺘﻲ ﻣﻮﺵ ﻋﺎﻳﺰﺓ ﺍﻟﻀﻔﺎﺭﺓ ؟ ﻫﺎﻙ ﻟﻴﻬﺎ ..

ﻗﺎﻟﺖ ﻟﻴﻬﻮ ﻻﻻ ﺧﻼﺹ ﺧﻠﻴﺘﻬﺎ .. ﺍﻟﻘﺎﻝ ﺍﻧﺎ ﻋﺎﻳﺰﺓ ﺿﻔﺎﺭﺓ ﻣﻨﻮ؟ .. ﻗﺎﻝ ﻟﻴﻬﺎ ﺣﻤﻮﺩﻱ ﻗﺎﻝ ﻛﺪﺍ .. ﻭﺍﻧﺎ ﻛﻨﺖ ﺷﺎﻳﻼ ﻣﻌﺎﻱ .. ﻣﺎﻛﺎﻧﺖ ﻓﻲ ﺍﻟﺪﻭﻻﺏ ..

ﺍﻟﺼﺎﻓﻲ ﻃﺒﻌﺎ " ﺑﻌﺎﻗﺐ ﻓﻴﻬﺎ ﻋﻘﺎﺏ ﺧﻔﻲ .. ﺍﻟﻤﺮﺍﺓ ﺩﻱ ﻫﺎﺟﺖ ﻭﻗﻌﺪﺕ ﺗﻜﻮﺭﻙ ..

ﺍﻧﺖ ﺍﻟﺒﻮﺩﻳﻚ ﺗﺘﻜﻠﻢ ﻣﻊ ﻭﻟﺪﻱ ﺷﻨﻮ؟

ﻭﻟﻴﻪ ﺗﺴﺄﻟﻮ ﻣﻦ ﺩﻭﻻﺑﻚ ؟ .. ﻭﺍﻧﺖ ﺍﻭﻝ ﻣﺨﻠﻲ ﺩﻭﻻﺑﻚ ﻓﺎﺗﺢ ﻭﻣﻔﺘﺎﺣﻮ ﻣﺮﻛﺐ ﻓﻴﻬﻮ ﻟﻴﻪ ؟؟

ﻗﺎﻝ ﻟﻴﻬﺎ ﻭﺍﻟﻠﻪ ﺑﺲ ﻻﻧﻲ ﻋﺎﺭﻑ ﺍﻟﺒﻴﺖ ﺍﻣﺎﻥ .. ﻭﻣﺎﻓﻲ ﺣﺎﺟﺔ ﻣﻤﻜﻦ ﺗﺤﺼﻞ ﻟﻲ ﺩﻭﻻﺑﻲ ﺍﻭ ﺣﺎﺟﺎﺗﻲ ﺍﻟﻔﻴﻬﻮ ..

ﻗﺎﻟﺖ ﻟﻴﻬﻮ ﻃﻴﺐ ﻣﺎ ﺩﻳﻞ ﺍﻃﻔﺎﻝ ..

ﻗﺎﻝ ﻟﻴﻬﺎ ﻣﺎﻣﺸﻜﻠﺔ ﻳﺎ ﺭﻗﻴﺔ ﺍﻧﺎ ﻣﺎ ﺯﻋﻼﻥ .. ﻭﻣﺎﻣﻤﻜﻦ ﺍﺯﻋﻞ ﻣﻦ ﺣﻤﻮﺩﻱ ﻭﺍﻣﺠﺪ .. ﺩﻳﻞ ﺍﻃﻔﺎﻝ ﻣﺎﻋﺎﺭﻓﻴﻦ ﺣﺎﺟﺔ ﻣﻌﻠﻴﺶ .. ﻳﻌﻨﻲ ﺑﺲ ﺍﻧﺎ ﺳﺄﻟﺘﻮ ﻣﻦ ﺍﻭﺭﺍﻗﻲ ﻻﻧﻬﺎ ﻣﻬﻤﺔ .. ﺑﻌﺪﻳﻦ ﻓﻲ ﻛﺘﺎﺏ ﺑﺘﺎﻉ ﻓﻘﻪ ﻭﺩﺭﺍﺳﺎﺕ ﺍﺳﻼﻣﻴﺔ .. ﻛﻨﺖ ﺧﺎﻳﻒ ﺍﻧﻮ ﻳﻜﻮﻥ ﺭﻣﺎﻫﻮ ﻓﻲ ﺣﺘﺔ ﻏﻴﺮ ﻻﻳﻘﺔ ﻭﻓﻌﻼ ﻟﻘﻴﺘﻮ ﻓﻲ ﺍﻻﻭﺳﺎﺥ ..

ﻟﻜﻦ ﺑﺮﺿﻮ ﻣﺎﻣﺸﻜﻠﺔ .. ﻻﻧﻬﻢ ﺍﻃﻔﺎﻝ ﻭﻻﻳﻬﻤﻚ ﻫﺎﻙ ﺍﻟﻀﻔﺎﺭﺓ .. ﻗﺎﻟﺖ ﻟﻴﻬﻮ ﻗﺖ ﻟﻴﻚ ﻣﺎﻋﺎﻭﺯﺍﻫﺎ .. ﺍﻟﻠﻪ؟ .. ﺩﻩ ﺷﻨﻮ ﺍﻟﺪﻡ ﺍﻟﺒﻘﺮﻱ ﺩﻩ ؟؟

ﺷﺎﻝ ﺿﻔﺎﺭﺗﻮ ﻭﺩﺧﻞ ﺟﻮﺓ ﻋﻠﻰ ﺍﻟﺼﺎﻟﻮﻥ .. ﻭﻛﺎﻥ ﺣﺎﺳﻲ ﺑﺎﻻﻧﺘﺼﺎﺭ .

ﻭﺍﻟﻤﺮﺍﺓ ﺩﻱ ﻣﻨﻄﻠﻘﺔ ﻓﻴﻬﺎ ﻧﺎﺭ ﻏﺮﻳﺒﺔ .. ﻭﻫﻲ ﻣﺎﻋﺎﺭﻓﺎﻫﺎ ﻣﻦ ﺷﻨﻮ؟

ﺗﺎﻧﻲ ﻧﺎﺩﺕ ﻭﻟﺪﻫﺎ .. ﻗﺎﻟﺖ ﻟﻴﻬﻮ ﺍﻧﺖ ﻗﻠﺖ ﻟﻠﺼﺎﻓﻲ ﺷﻨﻮ ﺑﺎﻟﻀﺒﻂ ﻛﺪﺍ؟؟ ..

ﻗﺎﻝ ﻟﻴﻬﺎ ﺍﻳﻮﺓ ﻳﺎ ﺍﻣﻲ .. ﺍﻧﺎ ﻛﻠﻤﺘﻮ ﺑﺎﻟﺤﺼﻞ ﻭﺍﻟﺤﻘﻴﻘﺔ .. ﺍﻧﺘﻲ ﻣﻮﺵ ﻗﻠﺘﻲ ﻟﻲ ﻣﺎﺗﻜﺬﺏ ..

ﺍﻧﺎ ﻗﻠﺖ ﻟﻴﻬﻮ ﺍﻣﻲ ﺭﻣﺖ ﺍﻟﺒﻨﻄﻠﻮﻧﺎﺕ .. ﻭﺍﻧﺎ ﻭﺍﻣﺠﺪ ﺍﺟﺎﺩﻋﻨﺎ ﺑﺎﻟﻘﻤﻴﺼﺎﺕ ..

ﻭﻗﻠﺖ ﻟﻴﻬﻮ ﺍﻣﻲ ﻗﺎﻟﺖ ﻟﻲ ﺍﺭﻣﻲ ﺍﻟﺤﺎﺟﺎﺕ ﻓﻲ ﺍﻻﻭﺳﺎﺥ ..

ﺭﻗﻴﺔ ﻗﺎﻟﺖ ﻟﻲ ﺍﺧﺘﻬﺎ ﺑﻬﻴﺔ .. ﺍﻟﺰﻭﻝ ﺩﻩ ﺑﻜﻮﻥ ﻓﻬﻤﻮ ﺷﻨﻮ ﻳﺎﺑﻬﻴﺔ؟؟ ﺍﺻﻼ ﻣﺎ ﺳﺄﻟﻨﻲ ﻣﻦ ﺍﻟﺤﺘﺔ ﺩﻱ .. ﻭﻋﺎﻣﻞ ﻟﻲ ﻓﻴﻬﺎ ﺍﻧﻮ ﺩﻩ ﺗﺼﺮﻑ ﺍﻻﻃﻔﺎﻝ ..

ﻭﻻﺣﺴﺴﻨﻲ ﺑﺎﻧﻲ ﺍﺷﺘﺮﻛﺖ ﻓﻲ ﺍﻟﻤﻮﺿﻮﻉ ..

ﻗﺎﻟﺖ ﻟﻴﻬﺎ ﺍﻧﺘﻲ ﻟﻴﻪ ﻋﻤﻠﺘﻲ ﻛﺪﺍ ﻓﻲ ﺍﻻﻭﻝ .. ﻣﺎﺩﺍﻡ ﺑﺘﻀﺎﻳﻘﻲ ﻗﺪﺭ ﺩﻩ ؟

ﻗﺎﻟﺖ ﻟﻴﻬﺎ ﺍﻧﺎ ﻋﺎﻳﺰﺓ ﺍﺿﻴﻖ ﻋﻠﻴﻬﻮ ﺍﻟﺒﻴﺖ ﺩﻩ .. ﻳﻘﻮﻡ ﻳﺨﺘﺎﻧﺎ ﺟﺎﻱ ﻭﻻﺟﺎﻱ ..

ﻛﺮﻫﻨﺎ ﺫﺍﺗﻮ .. ﺍﻻﺭﺑﻌﺔ ﻭﻋﺸﺮﻳﻦ ﺳﺎﻋﺔ ﻣﻮﻟﻊ ﺍﻟﻠﻤﺒﺔ ﻭﻳﻘﺮﺍ .. ﺍﻟﺘﻘﻮﻝ ﺩﺍﻳﺮ ﻳﺤﻜﻢ ﺍﻟﻌﺎﻟﻢ ..

ﻗﺎﻟﺖ ﻟﻴﻬﺎ ﻋﺎﺭﻓﺔ ﻳﺎ ﺭﻗﻴﺔ .. ﺍﻟﺰﻭﻝ ﺩﻩ ﻣﺎ ﺡ ﻳﺨﻠﻴﻚ .. ﺍﻟﻌﻤﻠﻴﺔ ﺍﻟﻌﻤﻠﺘﻴﻬﺎ ﻟﻴﻬﻮ ﺩﻱ ﺣﺎﺭﺓ .. ﺍﺣﺮ ﻣﻦ ﺍﻟﻔﺎﺗﻦ ﻛﻠﻬﻦ .. ﺑﺲ ﺷﻜﻠﻮ ﺩﺍﻳﺮ ﻳﻨﺘﻘﻢ ﻓﻴﻚ .. ﺍﻧﺘﻘﺎﻡ ﻛﺪﺍ ﻳﺨﻠﻴﻚ ﻣﺤﺘﺎﺭﺓ .. ﺩﻩ ﺯﻭﻝ ﺫﻛﻲ ﺷﺪﻳﺪ ..ﻗﺎﻟﺖ ﻟﻴﻬﺎ ﻭﺍﻟﻠﻪ ﻓﻌﻼ .. ﺍﻟﺰﻭﻝ ﺩﻩ ﺑﺘﻜﻠﻢ ﺑﻲ ﺑﺮﻭﺩ ﻏﺮﻳﺐ .. ﻟﻜﻦ ﺍﻧﺎ ﺣﺎﺳﺔ ﺑﻴﻬﻮ ﻣﻦ ﺟﻮﺓ ﺑﻴﻐﻠﻲ .. ﻛﺎﻥ ﻟﻴﻬﻮ ﻣﺮﺍﺩ ﻳﻨﻂ ﻓﻴﻨﻲ ﻳﺨﻨﻘﻨﻲ ..

ﺍﻟﺼﺎﻓﻲ ﻃﺒﻌﺎ ﻓﻌﻼ " ﻧﻔﺴﻴﺎﺗﻮ ﺑﺎﻳﻈﺔ ﺷﺪﻳﺪ ﻣﻦ ﺍﻟﻌﻤﻠﻴﺔ ﺩﻱ ..

ﻭﻓﻜﺮ ﺟﺪﻱ ﺍﻧﻮ ﻳﺨﻠﻲ ﺍﻟﺒﻴﺖ ﻭﻳﻄﻠﻊ .. ﻭﺧﺎﻟﺪ ﻟﺴﻊ ﻣﺎﺟﺎ .. ﻭﻫﻮ ﺍﻟﻤﻔﺮﻭﺽ ﻳﺤﻜﻲ ﻟﻲ ﺧﺎﻟﺪ ﺍﻟﻜﻼﻡ ﺍﻟﺒﺤﺼﻞ ﻓﻲ ﺍﻟﺒﻴﺖ .. ﻟﻜﻦ ﻓﻲ ﺣﺎﺟﺔ ﺟﻮﺍﻫﻮ ﺑﺘﻤﻨﻌﻮ ..

ﺑﻘﻮﻝ ﺍﻧﺎ ﻣﺎﻓﻲ ﺩﺍﻋﻲ ﺍﻋﻤﻞ ﻣﺸﻜﻠﺔ ﺑﻴﻦ ﺍﻻﺧﻮﺍﻥ .. ﻭﺩﺍﻳﺮ ﻳﺮﺣﻞ ﻣﻨﻬﻢ ﻭﻣﺎﻓﻲ ﻃﺮﻳﻘﺔ .. ﻭﻣﺎﻋﺎﺭﻑ ﻳﻌﻤﻞ ﺷﻨﻮ ؟

ﺑﺲ ﺑﻘﻰ ﺑﻜﺮﺭ ﻓﻲ ﻛﻠﻤﺘﻮ ﺍﻟﻤﻌﺘﺎﺩﺓ ﺍﻟﻤﻌﺮﻭﻓﺔ ﻓﻲ ﻛﻞ ﻣﺸﻜﻠﺔ ‏( ﺣﺴﺒﻲ ﻭﻧﻌﻢ ﺍﻟﻮﻛﻴﻞ ‏) ..

ﺑﺎﻟﺘﻄﺮﻕ ﻟﻜﺘﺎﺏ ﺗﻠﺒﻴﺲ ﺍﺑﻠﻴﺲ .. ﺍﻟﺼﺎﻓﻲ ﻓﻲ ﻣﻌﺘﺮﻙ ﺍﻟﺠﺎﻣﻌﺔ ﺍﺻﻄﺪﻡ ﺑﻮﺍﻗﻊ ﻋﺠﻴﺐ .. ﺟﻤﺎﻋﺎﺕ .. ﻭﺍﺣﺰﺍﺏ .. ﻭﺍﺗﺠﺎﻫﺎﺕ ﻓﻜﺮﻳﺔ .. ﻭﻛﻞ ﻧﺎﺱ ﻳﻘﻮﻟﻮ ﻧﺤﻦ ﺍﻟﺤﻖ .. ﻭﺍﻟﺒﺎﻗﻲ ﻛﻠﻮ ﺑﺎﻃﻞ .. ﻭﻛﺪﺍ ﻳﻌﻨﻲ ..

ﺑﻘﻰ ﻣﻬﺘﻢ ﺑﺎﻟﺤﻜﺎﻳﺔ ﺩﻱ .. ﻭﻋﺎﻳﺰ ﻳﻌﺮﻑ ﺍﻟﺼﺢ ﻣﻨﻮ .. ﻭﺍﻟﻐﻠﻂ ﻣﻨﻮ .. ﻭﻗﺒﻞ ﻣﺎﻳﻤﺸﻲ ﻻﻱ ﺍﺗﺠﺎﻩ .. ﺑﺪﺍ ﻛﻞ ﻣﺮﺍﺓ ﻳﺸﺘﺮﻱ ﻛﺘﺎﺏ .. ﺑﺘﻜﻠﻢ ﻋﻦ ﺍﻟﺤﺎﺟﺎﺕ ﺩﻱ؟ .. ﻗﺮﺍ ﻣﻨﻬﺎﺝ ﺍﻟﻤﺴﻠﻢ ﻭﻋﻘﻴﺪﺓ ﺍﻟﻤﺆﻣﻦ ﻟﻠﺠﺰﺍﺋﺮﻱ .. ﻭﺭﻳﺎﺽ ﺍﻟﺼﺎﻟﺤﻴﻦ ﻟﻠﻨﻮﻭﻱ .. ﻭﺣﻴﺎﺓ ﺍﻟﺼﺤﺎﺑﺔ ﻟﻠﻜﺎﻧﺪﻫﻠﻮﻱ .. ﻭﻗﺮﺍ ﻛﺘﺎﺏ ﺍﻟﻤﻠﻞ ﻭﺍﻟﻨﺤﻞ ﻻﺑﻦ ﻃﺎﻫﺮ ﺍﻟﺒﻐﺪﺍﺩﻱ .. ﻭﺍﻗﺘﻀﺎﺀ ﺍﻟﺼﺮﺍﻁ ﺍﻟﻤﺴﺘﻘﻴﻢ ﻻﺑﻦ ﺗﻴﻤﻴﺔ .. ﻭﺑﻘﺮﺍ ﺍﻟﻜﺘﺐ ﺩﻱ ﻓﻲ ﻭﻗﺖ ﺍﻟﻤﻠﻞ ﻣﻦ ﻣﻦ ﺍﻟﺪﺭﺍﺳﺔ ﺍﻻﻛﺎﺩﻳﻤﻴﺔ .. ﻭﺍﻟﻤﺴﺎﺋﻞ ﺍﻟﺮﻳﺎﺿﻴﺔ ﻭﺍﻟﺤﺴﺎﺑﺎﺕ ﺍﻟﻬﻨﺪﺳﻴﺔ ..

ﻃﺒﻌﺎ " ﺍﺻﻼ ﺍﻟﺼﺎﻓﻲ ﻣﻦ ﺯﻣﺎﻥ ﻋﻨﺪﻭ ﻣﺤﺒﺔ ﻟﻼﻃﻼﻉ .. ﻭﺑﻴﻌﺸﻖ ﺍﻟﻘﺮﺍﺀﺓ ﻭﺗﺤﺼﻴﻞ ﺍﻟﻤﻌﻠﻮﻣﺎﺕ .. ﻳﺎﺧﻲ ﺩﻩ ﻓﻲ ﻓﺘﺮﺓ ﺍﻻﺟﺎﺯﺓ ﺑﻤﺸﻲ ﺍﻟﻤﻜﺘﺒﺎﺕ .. ﻳﺠﻴﺐ ﺍﻟﺠﺮﺍﻳﺪ ﺍﻟﻘﺪﻳﻤﺔ ﻳﻘﺮﺍﻫﺎ . ﺍﻟﻤﻬﻢ ﺑﻲ ﻗﺮﺍﻳﺘﻮ ﺍﻟﻜﺘﻴﺮﺓ ﻟﻠﻜﺘﺐ ﺍﻟﺜﻘﺎﻓﻴﺔ ﺍﻟﺪﻳﻨﻴﺔ .. ﺑﻘﻰ ﻋﻨﺪﻭ ﺫﺧﻴﺮﺓ .. ﻣﻦ ﺍﻟﻔﻬﻢ ﻓﻲ ﺍﻟﺪﻳﻦ ﻧﺎﺩﺭﺓ ﺟﺪﺍ ..

ﻭﻗﺘﻮ ﺍﻟﻜﺎﻥ ﻓﻲ ﺳﻨﺔ ﺗﺎﻧﻴﺔ ﺑﻨﺎﻗﺶ ﺍﻻﻟﺤﺎﺩﻳﻴﻦ .. ﻭﺑﻮﻗﻔﻬﻢ ﻋﻠﻰ ﻓﺪ ﻛﺮﺍﻉ ..

ﻋﺸﺎﻥ ﻛﺪﺍ ﻛﺎﻧﻮ ﻧﺎﺱ ﺍﻟﺠﻤﺎﻋﺎﺕ ﺍﻻﺳﻼﻣﻴﺔ ﻭﺍﻻﺣﺰﺍﺏ .. ﻛﻞ ﻧﺎﺱ ﻋﺎﻳﺰﻳﻦ ﻳﺠﻨﺪﻭﻫﻮ ﻣﻌﺎﻫﻢ .. ﺑﺎﻱ ﻃﺮﻳﻘﺔ .. ﻟﻜﻦ ﻫﻮ ﻛﺎﻥ ﻣﻌﺼﻠﺞ ﺗﺐ ..

ﺍﻫﺎ ﻓﻲ ﺍﻟﻴﻮﻡ ﺩﺍﻙ ﻣﺴﻚ ﻛﺘﺎﺏ ﺗﻠﺒﻴﺲ ﺍﺑﻠﻴﺲ ﺩﻩ .. ﻗﺮﺍﻫﻮ ﻣﻦ ﺍﻟﻐﻼﻑ ﻟﻠﻐﻼﻑ .. ﻓﻲ ﻧﻔﺲ ﺍﻟﻠﻴﻠﺔ ﺩﻱ .. ﺍﻇﻨﻮ ﻧﺎﻡ ﺍﻟﺴﺎﻋﺔ ﻭﺍﺣﺪﺓ ﺻﺒﺎﺣﺎ ..

ﻭﺍﻟﻜﺘﺎﺏ ﻛﺎﻥ ﻛﺘﺎﺏ ﺫﺍﺧﺮ ﺑﺎﻟﺘﻔﺎﺻﻴﻞ ﺍﻟﺪﻗﻴﻘﺔ .. ﻋﻦ ﺍﻟﻔﺮﻕ ﺍﻟﻀﺎﻟﺔ .. ﻭﺍﻟﻤﻨﺎﻫﺞ ﺍﻟﺒﺎﻃﻠﺔ .. ﺍﻇﻦ ﺍﻟﺼﺎﻓﻲ ﺩﻩ ﺑﻌﺪ ﻗﺮﺍ ﺍﻟﻜﺘﺎﺏ ﺩﻩ ﺳﺎﻋﺔ ﻣﺎﻗﺪﺭ ﻳﻨﻮﻡ .. ﻻﻧﻮ ﺷﺎﻳﻒ ﺍﻧﻮ ﺍﻟﻜﺘﺎﺏ ﺩﻩ ﻣﻄﺒﻖ ﻓﻲ ﺍﻟﻮﺍﻗﻊ .. ﺑﻄﺮﻳﻘﺔ ﻏﺮﻳﺒﺔ

ﻣﻊ ﺍﻧﻮ ﺍﻟﻤﺆﻟﻒ ﻣﺘﻮﻓﻲ ﺳﻨﺔ 597 ﻫﺠﺮﻳﺔ ﺗﻘﺮﻳﺒﺎ ﺳﻨﺔ 1201 ﻡ

ﻣﻊ ﺍﻧﻮ ﺍﻟﺼﺎﻓﻲ ﻣﺨﺼﺺ ﻟﻴﻠﺔ ﺍﻟﺨﻤﻴﺲ ﺩﺍﻳﻤﺎ ﻟﻘﺮﺍﺀﺓ ﻛﺘﺎﺏ .. ﺑﺲ ﺍﻟﻴﻮﻡ ﺩﻩ ﻗﺮﺍ ﺍﻟﻜﺘﺎﺏ ﺩﻩ ﻋﺸﺎﻥ ﻳﺘﻨﺎﺳﻰ ﺑﻴﻬﻮ ﺍﻟﺤﺼﻞ .. ﺑﺲ ﻣﺎﻗﺪﺭ ﻳﻘﻴﻒ ﻣﻨﻮ ﻻﻣﻦ ﺧﻠﺺ ..

ﻣﺮﺕ ﺍﻻﻳﺎﻡ .. ﻭﺭﻗﻴﺔ ﻣﺎﺯﺍﻟﺖ ﺧﺎﺗﺔ ﻓﻲ ﺭﺍﺳﻬﺎ ﺍﻧﻮ ﺍﻟﺼﺎﻓﻲ ﺡ ﻳﻨﺘﻘﻢ ﻣﻨﻬﺎ .. ﺣﺴﺐ ﻣﺎ ﺍﻭﺣﺖ ﻟﻴﻬﺎ ﺍﺧﺘﻬﺎ ﺑﻬﻴﺔ ..

ﻳﻮﻡ ﻣﻦ ﺍﻻﻳﺎﻡ .. ﺍﻇﻦ ﺑﻌﺪ ﺧﻤﺴﺔ ﻳﻮﻡ ﺗﻘﺮﻳﺒﺎ ﻣﻦ ﺣﺎﺩﺛﺔ ﺍﻟﺪﻭﻻﺏ .. ﻭﺣﺎﺩﺛﺔ ﺍﻟﺪﻭﻻﺏ ﻃﺒﻌﺎ " ﻣﺮﺕ ﻣﺮﻭﺭ ﺍﻟﻜﺮﺍﻡ .. ﻭﻣﺎﺣﺼﻠﺖ ﺑﻮﺭﺍﻫﺎ ﺍﻱ ﻣﺸﻜﻠﺔ .. ﺣﺴﺐ ﺍﻧﻮ ﺍﻟﺼﺎﻓﻲ ﻣﺎﺑﺤﺐ ﺍﻟﻤﺸﺎﻛﻞ ﻭﺗﻀﺨﻴﻢ ﺍﻻﻣﻮﺭ .. ﻏﺴﻞ ﺣﺎﺟﺎﺗﻮ ﻣﻦ ﺍﻟﻮﺳﺦ ﻭﺍﻧﺘﻬﻴﻨﺎ ..

ﺍﻫﺎ ﺍﻟﻴﻮﻡ ﺩﻩ ﻛﺎﻥ ﻳﻮﻡ ﺟﻤﻌﺔ .. ﺧﺎﻟﺪ ﻭﺍﻟﺼﺎﻓﻲ ﻗﺎﻋﺪﻳﻦ ﻓﻲ ﺍﻟﺼﺎﻟﻮﻥ .. ﻓﻲ ﻣﺮﺍﺓ ﻓﻲ ﺍﻟﺸﻌﺒﻴﺔ ﺻﺎﺣﺒﺔ ﺭﻗﻴﺔ ﺍﺗﻮﻓﺖ .. ﺭﻗﻴﺔ ﻗﺎﻟﺖ ﻟﻲ ﺑﻬﻴﺔ ﺍﺭﺡ ﻣﻌﺎﻱ ﺍﻟﻌﺰﺍﺀ ﻭﻧﺠﻲ ﺳﺮﻳﻊ ..

ﻃﻠﻌﻦ ﺍﻻﺗﻨﻴﻦ ﺍﻟﺼﺒﺎﺡ ﺯﻱ 8 .. ﻭﺧﺎﻟﺪ ﻣﺮﻕ ﻋﻠﻰ ﺍﻟﺰﻟﻂ ﻳﺤﻠﻖ .. ﻭﻻﻗﻮﻫﻮ ﺍﺻﺤﺎﺑﻮ ﺳﺎﻗﻮﻫﻮ ﺣﺪﻳﻘﺔ ﺍﻣﺪﺭﻣﺎﻥ ..

ﺍﻫﺎ ﻟﻤﻦ ﺟﻦ ﺭﻗﻴﺔ ﻭﺑﻬﻴﺔ ﺯﻱ ﺍﻟﺴﺎﻋﺔ 11 .. ﻟﻘﻦ ﺍﻟﺼﺎﻓﻲ ﻗﺎﻋﺪ ﺑﺮﺍﻫﻮ ﻓﻲ ﺍﻟﺼﺎﻟﻮﻥ ﺑﻘﺮﺍ ﺑﺮﺿﻮ ..ﻗﺎﻟﻦ ﻟﻴﻬﻮ ﻭﻳﻦ ﺧﺎﻟﺪ؟ .. ﻗﺎﻝ ﻟﻴﻬﻦ ﻃﻠﻊ ﻭﺍﻟﻠﻪ .. ﺭﻗﻴﺔ ﻗﺎﻟﺖ ﻟﻴﻮ ﻭﻳﻦ ﺍﻟﺸﻔﻊ؟؟

ﻗﺎﻝ ﻟﻴﻬﺎ ﻭﺍﻟﻠﻪ ﻣﺎﻋﺎﺭﻑ ﻣﺎﺟﻮﻧﻲ ﺑﻲ ﺟﺎﻱ .. ﻣﺮﻗﻦ ﻣﻨﻮ ﻭﺑﻘﻦ ﻛﺎﻳﺴﺎﺕ ﻟﻠﺸﻔﻊ ﺍﺗﻠﻘﻮ ﻋﻨﺪ ﺍﻟﺠﻴﺮﺍﻥ ..

ﺭﻗﻴﺔ ﺩﺧﻠﺖ ﻏﺮﻓﺘﻬﺎ ﻟﻘﺖ ﺩﻭﻻﺑﻬﺎ ﻣﻔﺘﺢ ﻭﻣﻔﺮﺗﻚ .. ﻭﺍﻟﺤﺎﺟﺎﺕ ﺑﺘﺎﻋﺎﺗﻬﺎ ﻭﺍﻟﻬﺪﻭﻡ ﻓﻴﻬﺎ ﺟﺰﺀ ﻭﺍﻗﻊ ﻓﻲ ﺍﻻﺭﺽ .. ﻧﻔﺲ ﺍﻟﺤﺮﻛﺔ ﺍﻟﻜﺎﻥ ﻋﻤﻠﺘﻬﺎ ﻟﻠﺼﺎﻓﻲ .. ﻭﺍﻟﻤﺸﻜﻠﺔ ﺍﻟﻜﺒﻴﺮﺓ ﻓﻲ ﺩﻫﺐ ﻛﺎﻥ ﺗﺤﺖ ﺍﻟﻬﺪﻭﻡ .. ﺯﻱ ﺧﺎﺗﻤﻴﻦ ﻭﺳﻠﺴﻞ .. ﺍﺗﻔﻘﺪ .. ﻣﺎﻓﻲ ..

ﻗﺎﻟﺖ ﻟﻴﻬﺎ ﺗﻌﺎﻟﻲ ﻳﺎﺑﻬﻴﺔ .. ﺷﻮﻓﻲ ﺍﻟﺼﺎﻓﻲ ﺍﻟﻜﻠﺐ .. ﻋﻤﻞ ﻓﻴﻨﻲ ﻧﻔﺲ ﺍﻟﻌﻤﻠﻴﺔ ﺑﺎﻟﻜﻮﺑﻲ .. ﻭﻛﻤﺎﻥ ﺷﺎﻝ ﺩﻫﺒﻲ ..

ﻗﺎﻟﺖ ﻟﻴﻬﺎ ﻭﺍﻟﻠﻪ ﻳﺎﺭﻗﻴﺔ ﻣﺎ ﺍﻇﻦ .. ﻳﺎﺧﻲ ﺍﻟﺰﻭﻝ ﺩﻩ ﻣﺴﺘﺤﻴﻞ ﻳﻌﻤﻞ ﻛﺪﺍ .. ﻧﺤﻦ ﺍﻟﺰﻭﻝ ﺳﺎﻛﻦ ﻣﻌﺎﻧﺎ ﻣﻦ ﻣﺘﻴﻦ؟؟ .. ﺍﻧﺎ ﻳﺘﺨﻴﻞ ﻟﻲ ﺩﻩ ﺣﻤﻮﺩﻱ ﻛﺪﻱ ﺍﺳﺄﻟﻴﻬﻮ .. ﻗﺎﻟﺖ ﻟﻴﻬﺎ ﻣﺴﺘﺤﻴﻞ ﻳﺎﺑﻬﻴﺔ .. ﺍﺻﻼ ﺣﻤﻮﺩﻱ ﻣﺎﺑﻬﺒﺶ ﺩﻭﻻﺑﻲ .. ﺑﻌﺪﻳﻦ ﺣﻤﻮﺩﻱ ﻭﺍﻣﺠﺪ ﻛﺎﻧﻮ ﻋﻨﺪﻧﺎﺱ ﻣﺪﻳﻨﺔ .. ﻭﻣﺎﻓﻲ ﺯﻭﻝ ﻓﻲ ﺍﻟﺒﻴﺖ ﻏﻴﺮ ﺍﻟﺼﺎﻓﻲ .. ﺩﻱ ﺟﺮﻳﻤﺔ ﺛﺎﺑﺘﺔ ..

ﺑﻬﻴﺔ ﻗﺎﻟﺖ ﻟﻴﻬﺎ ﻛﺪﻱ ﺍﻧﺘﻲ ﺍﺳﺄﻟﻲ ﻭﻟﺪﻙ ﺍﻭﻝ ..

ﺭﻗﻴﻪ ﻗﺎﻟﺖ ﻟﻴﻬﻮ ﺗﻌﺎﻝ ﻳﺎﺣﻤﻮﺩﻱ .. ﺍﻟﻠﻴﻠﺔ ﺑﻜﺘﻠﻚ .. ﺍﻧﺖ ﻟﻴﻪ ﻓﺘﺤﺖ ﺍﻟﺪﻭﻻﺏ ؟

ﻭﺑﺸﺘﻨﺖ ﻟﻲ ﻫﺪﻭﻣﻲ؟ .. ﻗﺎﻝ ﻟﻴﻬﺎ ﻭﺍﻟﻠﻪ ﻭﺣﺖ ﻛﺘﺎﺏ ﺍﻟﺪﻳﻦ ﺍﻧﺎ ﻣﺎﻓﺘﺤﺘﻮ .. ﻣﻮﺵ ﺍﻧﺘﻲ ﻗﻠﺘﻲ ﻟﻲ ﻗﻮﻝ ﺍﻟﺤﻘﻴﻘﺔ؟؟ ﺍﻫﺎ ﺩﻩ ﻣﺎ ﺍﻧﺎ ..

ﺭﻗﻴﺔ ﻗﺎﻟﺖ ﻟﻴﻬﺎ ﺍﻫﺎ ﺷﻔﺘﻲ ﻳﺎ ﺑﻬﻴﺔ؟؟ .. ﺣﻤﻮﺩﻱ ﻣﺴﺘﺤﻴﻞ ﻳﻜﺬﺏ .. ﻳﺎﻫﻮ ﺍﻟﺼﺎﻓﻲ ﺍﻟﻜﻠﺐ .. ﺑﻬﻴﺔ ﻗﺎﻟﺖ ﻟﻴﻬﺎ ﺑﺲ ﺗﺤﺼﻞ ﻳﺴﺮﻕ ﺍﻟﺪﻫﺐ؟

ﺍﻋﻮﺫ ﺑﺎﻟﻠﻪ .. ﻭﻣﺸﻦ ﺍﻻﺗﻨﻲ ﻋﻠﻰ ﺍﻟﺼﺎﻓﻲ ﻧﺎﻓﺸﺎﺕ ﺭﻳﺸﻦ ﺗﺐ .. ﺭﺑﻨﺎ ﻳﺠﻴﺐ ﺍﻟﻌﻮﺍﻗﺐ ﺳﻠﻴﻤﺔ ..ﻛﻮﻛﻮ ﺭﻗﻴﺔ ﻭﺍﺧﺘﻬﺎ ﺩﻗﻦ ﺍﻟﺒﺎﺏ ﺑﺘﺎﻉ ﺍﻟﺼﺎﻟﻮﻥ ﺍﻟﻔﺎﺻﻞ ﺑﻴﻦ ﺍﻟﺮﺟﺎﻝ ﻭﺍﻟﺤﺮﻳﻢ .. ﻭﺟﻦ ﺩﺍﺧﻼﺕ .. ﻭﺍﻟﺪﻕ ﺣﻖ ﺍﻟﺒﺎﺏ ﺫﺍﺗﻮ ﻛﺎﻥ ﺑﻲ ﺍﺯﻋﺎﺝ ﻭﺍﻓﺘﺮﺍ ﺷﺪﻳﺪ ﺧﻼﺹ .. ﺍﻟﺼﺎﻓﻲ ﻻﻣﻦ ﺍﺗﺨﻠﻊ ..

ﻳﺎﺭﺑﻲ ﻓﻲ ﺷﻨﻮ ؟؟ﻣﺎﺗﻜﻮﻥ ﺣﺼﻠﺖ ﻣﺼﻴﺒﺔ ﻋﻠﻰ ﺧﺎﻻﺗﻲ ﺩﻳﻞ .. ﻗﺎﻡ ﺑﻲ ﺳﺮﻋﺔ ﻣﻦ ﻣﺤﻠﻮ ﻭﻃﻠﻊ ﺑﺮﺓ ﻣﻦ ﺍﻟﺼﺎﻟﻮﻥ .. ﻭﻗﻒ ﻓﻲ ﺍﻟﺤﻮﺵ ﺷﺎﻓﻦ ﻟﻴﻚ ﺟﺎﻳﺎﺗﻨﻮ ..

ﺭﻗﻴﺔ ﻗﺎﻟﺖ ﻟﻴﻬﻮ ﺍﺳﻤﻊ ﻳﺎ ﺍﻟﺼﺎﻓﻲ .. ﻣﺎﻓﻲ ﺩﺍﻋﻲ ﺍﻧﻚ ﺗﻠﻌﺐ ﺑﻲ ﺍﻋﺼﺎﺑﻲ .. ﻓﺘﺤﺖ ﺩﻭﻻﺑﻲ ﻭﺟﺪﻋﺖ ﻫﺪﻭﻣﻲ ﻓﻲ ﺍﻟﻮﺍﻃﺔ ﻣﺎﻓﻲ ﻣﺸﻜﻠﺔ .. ﻛﺪﺍ ﺍﺗﺴﺪﻳﺖ .. ﻟﻜﻦ ﺗﺸﻴﻞ ﺍﻟﺪﻫﺐ؟؟ ﺩﻱ ﻛﺒﻴﺮﺓ ﻭﺍﻧﺎ ﻣﺎﺡ ﺃﺳﺎﻣﺤﻚ ﻓﻴﻬﺎ ..

ﺍﻟﺼﺎﻓﻲ ﻗﺎﻝ ﻟﻴﻬﺎ .. ﺷﻨﻮ؟ ﺷﻨﻮ؟ ﺷﻨﻮ؟ ﻗﻠﺘﻲ ﺷﻨﻮ؟ ﺍﻧﺎ ﻣﺎﺳﺎﻣﻊ ﻛﻮﻳﺲ .. ﺩﻩ ﻛﻼﻡ ﺷﻨﻮ ﺍﻟﺒﺘﻘﻮﻟﻲ ﻓﻴﻬﻮ ﻳﺎﺧﺎﻟﺘﻲ ﺭﻗﻴﺔ .. ؟؟

ﻣﻨﻮ ﺍﻟﺒﻔﺘﺢ ﺩﻭﻻﺑﻚ؟ ﻭﻣﻨﻮ ﺍﻟﺒﺸﻴﻞ ﺩﻫﺒﻚ .. ؟؟ ﺍﻧﺎ؟؟ ﻫﻬﻪ

ﻭﺍﻟﻠﻪ ﻟﻜﻦ ﺩﻱ ﻗﺼﺔ !!..

ﻗﺎﻟﺖ ﻟﻴﻬﻮ ﺍﺳﻤﻊ .. ﺍﻭﻋﺎ ﺗﺴﺘﻬﺒﻞ ﻋﻠﻲ .. ﻭﺗﻌﻤﻞ ﻟﻲ ﻓﻴﻬﺎ ﺑﺮﻱ .. ﺍﻧﺖ ﺍﻟﻮﺣﻴﺪ ﺍﻟﻘﺎﻋﺪ ﻓﻲ ﺍﻟﺒﻴﺖ ﺩﻩ .. ﻭﺍﻟﺪﻫﺐ ﺍﺗﻔﻘﺪ ﻭﺍﻧﺖ ﻣﻮﺟﻮﺩ ..

ﻗﺎﻝ ﻟﻴﻬﺎ ﺍﻧﺎ ﺍﺳﺎﺳﺎ ﻣﺎﻗﺎﻋﺪ ﺍﺩﺧﻞ ﺟﻮﺓ .. ﻭﺣﺪﻱ ﺍﻟﺼﺎﻟﻮﻥ ﺩﻩ ﻭﺣﻮﺷﻮ .. ﻣﺘﻴﻦ ﺷﻔﺘﻴﻨﻲ ﺩﺧﻠﺖ ﻟﻴﻜﻢ ﺟﻮﺓ .. ؟؟ ﺍﺧﺮ ﻳﻮﻡ ﻛﻨﺖ ﺟﻮﺓ ﻟﻤﻦ ﺣﺒﻮﺑﺘﻲ ﺍﻟﻤﻠﻜﺔ ﺍﻟﻠﻪ ﻳﺮﺣﻤﻬﺎ ﻋﻴﺎﻧﺔ .. ﺗﺎﻧﻲ ﻭﺍﻟﻠﻪ ﻣﺎﺣﺼﻞ ﻋﺘﺒﺖ ﻟﻲ ﺟﻮﺓ ..

ﻗﺎﻟﺖ ﻟﻴﻬﻮ ﺍﺻﻠﻚ ﻣﺎﺑﺘﻘﻨﻌﻨﻲ .. ﺟﻴﺐ ﺍﻟﺪﻫﺐ .. ﻟﻮ ﺳﻤﺤﺖ ﻳﺎ ﺍﻟﺼﺎﻓﻲ ..

ﻭﺍﻻ ﻭﺍﻟﻠﻪ ﺍﻟﻌﻈﻴﻢ ﺍﻧﺎ ﺑﺘﺨﺬ ﻣﻌﺎﻙ ﺍﻻﺟﺮﺍﺀﺍﺕ ﺍﻟﻘﺎﻧﻮﻧﻴﺔ ..

ﻗﺎﻝ ﻟﻴﻬﺎ ﻳﺎﺭﻗﻴﺔ .. ﻗﻠﺖ ﻟﻴﻚ ﺍﻧﺎ ﻣﺎﺩﺧﻠﺖ ﺟﻮﺓ .. ﻭﻣﺎﻓﺘﺤﺖ ﺩﻭﻻﺑﻚ .. ﻭﻣﺎﺷﻠﺖ ﺩﻫﺒﻚ .. ﻟﻮ ﻣﺎﻣﺼﺪﻗﺎﻧﻲ ﺍﻋﻤﻠﻲ ﺍﻟﻔﻲ ﺑﺎﻟﻚ .. ﺍﻧﺎ ﻣﺎﺧﺎﻳﻒ ﻣﻦ ﺣﺎﺟﺔ ..

ﻭﺧﻼﻫﻦ ﻭﺍﻗﻔﺎﺕ ﺍﻻﺗﻨﻴﻦ .. ﻭﺩﺧﻞ ﻣﺴﻚ ﻛﺘﺎﺑﻮ ﻭﺑﻘﻰ ﻳﻘﺮﺍ .. ﺑﻬﻴﺔ ﻗﺎﻟﺖ ﻟﻲ ﺭﻗﻴﺔ ﺍﻟﺰﻭﻝ ﺩﻩ ﺷﺎﻝ ﺍﻟﺪﻫﺐ .. ﺍﻭﻋﻚ ﺗﺴﻤﻌﻲ ﺍﺳﺘﻬﺒﺎﻻﺗﻮ ﺩﻱ ..

ﻳﻌﻨﻲ ﺍﻟﺢ ﻳﺸﻴﻠﻮ ﻣﻨﻮ ؟ .. ﻧﺤﻦ ﻣﺎﻋﻨﺪﻧﺎ ﺯﻭﻝ ﺑﺸﻴﻠﻮ .. ﻭﻣﺎﻓﻲ ﺣﺮﺍﻣﻲ ﺑﺠﻲ ﻳﻮﻡ ﺍﻟﺠﻤﻌﺔ ﻣﻦ ﺍﻟﺼﺒﺎﺡ ..

ﻃﻮﺍﻟﻲ ﺍﻟﻤﺮﺍﺓ ﺿﺮﺑﺖ ﻟﻲ ﺍﺧﻮﻫﺎ ﺍﻻﺳﻤﻮ ﺧﺎﻟﺪ .. ﻗﺪﺭ ﻣﺎ ﺩﻗﺖ ﺍﻟﺘﻠﻔﻮﻥ

ﻣﺎ ﻓﺘﺢ ﻟﻴﻬﺎ ﺍﻟﺨﻂ ..

ﻗﺎﻟﺖ ﻟﻴﻬﺎ ﻳﺎ ﺑﻬﻴﻪ ﺍﺳﻤﻌﻲ .. ﻧﺤﻦ ﻻﺯﻡ ﻧﻤﺸﻲ ﻧﻔﺘﺢ ﺑﻼﻍ ﺳﺮﻳﻊ .. ﺍﺭﺣﻜﻲ ﻫﺴﻲ ﺑﻲ ﺭﻛﺸﺔ ﻟﻲ ﻣﺮﻛﺰ ﺍﻟﺼﺎﻓﻴﺔ ﺩﻩ .. ﻭﻧﺠﻲ ..

ﻗﺎﻟﺖ ﻟﻴﻬﺎ ﻭﺍﻻﻭﻻﺩ؟؟ .. ﻗﺎﻟﺖ ﻟﻴﻬﺎ ﺑﺮﺟﻌﻬﻢ ﻧﺎﺱ ﻣﺪﻳﻨﺔ ‏( ﺍﻟﺠﻴﺮﺍﻥ ‏) ﻳﻘﻌﺪﻭ ﻣﻌﺎﻫﻢ ﻟﻐﺎﻳﺔ ﻣﺎ ﺍﺟﻲ .. ﻣﻮﺵ ﻓﻜﺮﺓ ؟ ﻗﺎﻟﺖ ﻟﻴﻬﺎ ﻳﻼ ..

ﻣﺸﻦ ﻃﻮﺍﻟﻲ ﺧﻠﻦ ﺍﻻﻭﻻﺩ ﻋﻨﺪ ﻧﺎﺱ ﻣﺪﻳﻨﺔ .. ﻭﻭﻗﻔﻦ ﻓﻲ ﺍﻟﺸﺎﺭﻉ ﺍﺷﺮﻥ ﻟﻲ ﺭﻛﺸﺔ ﺍﻻﺗﻨﻴﻦ .. ﺍﻟﻜﻼﻡ ﺩﻩ ﻛﻠﻮ ﻓﻲ ﻧﻬﺎﺭ ﺍﻟﺠﻤﻌﺔ ﻗﺮﻳﺐ 11 ﻭﻧﺺ ﻛﺪﺍ ..

ﻣﺸﻦ ﻟﻠﻤﺮﻛﺰ .. ﺍﻟﺴﻼﻡ ﻋﻠﻴﻜﻢ .. ﺍﻟﻤﻼﺯﻡ ﺍﻟﻤﺤﺮﺭ ﺑﺘﺎﻉ ﺍﻟﺒﻼﻏﺎﺕ ﻗﺎﻝ ﻟﻴﻬﺎ ﻋﻠﻴﻜﻢ ﺍﻟﺴﻼﻡ .. ﺍﻫﺎ ﻧﻌﻢ .. ﻗﺎﻟﺖ ﻟﻴﻬﻮ ﻧﺤﻦ ﻋﻨﺪﻧﺎ ﺩﻫﺐ ﻣﻔﻘﻮﺩ ﻣﺸﻴﻮﻝ ﻣﻦ ﺩﻭﻻﺑﻲ ..

ﻗﺎﻝ ﻟﻴﻬﺎ ﻣﺘﻬﻤﻴﻦ ﺯﻭﻝ .. ﻭﻻ ﺑﻼﻍ ﺿﺪ ﻣﺠﻬﻮﻝ؟ .. ﻗﺎﻟﺖ ﻟﻴﻬﻮ ﻣﺘﻬﻤﻴﻦ ﺯﻭﻝ ..

ﺑﻬﻴﺔ ﻗﺎﻟﺖ ﻟﻴﻬﺎ ﻻﻻ .. ﻗﻮﻟﻲ ﻟﻴﻬﻮ ﺿﺪ ﻣﺠﻬﻮﻝ .. ﻋﺸﺎﻥ ﻣﺎﻋﻨﺪﻙ ﺑﻴﻨﺔ ..

ﺍﺑﺖ ﺗﺴﻤﻊ ﻛﻼﻣﻬﺎ .. ﻗﺎﻟﺖ ﻟﻴﻬﻮ ﻻﻻ .. ﻣﺎ ﻣﺠﻬﻮﻝ ﻳﺎﺳﻌﺎﺩﺗﻚ .. ﺍﻧﺎ ﻣﺘﻬﻤﺔ ﻭﺩ ﺑﺖ ﺧﺎﻟﺘﻲ .. ﻗﺎﻋﺪ ﻣﻌﺎﻧﺎ ﻓﻲ ﺍﻟﺒﻴﺖ .. ﺑﻘﺮﺍ ﻓﻲ ﺍﻟﺠﺎﻣﻌﺔ .. ﻗﺎﻝ ﻟﻴﻬﺎ ﺑﺲ ﺍﻟﺰﻭﻝ ﺩﻩ ﺡ ﻧﺠﻴﺒﻮ ﻭﻧﺤﻘﻖ ﻣﻌﺎﻫﻮ .. ﺍﻧﺘﻲ ﻻﺯﻡ ﺗﻜﻮﻧﻲ ﻋﺎﺭﻓﺔ ﺍﻟﻜﻼﻡ ﺩﻩ .. ﺍﻟﺤﻜﺎﻳﺔ ﺩﻱ ﻋﻨﺪﻫﺎ ﺗﺒﻌﺎﺕ ﺍﺳﺮﻳﺔ ﻣﺎﺩﺍﻡ ﻗﺮﻳﺒﻚ ..

ﺩﺍﻳﻤﺎ " ﺍﻟﻀﺒﺎﻁ ﺍﻟﻮﺍﻋﻴﻦ .. ﺑﻔﻜﺮﻭ ﺑﻲ ﻋﻘﻼﻧﻴﺔ ﻋﻨﺪﻧﺎ ﻓﻲ ﺍﻟﺴﻮﺩﺍﻥ ﺑﺮﺿﻬﻢ ﺍﻭﻻﺩ ﺑﻠﺪ ﻭﺍﻟﻠﻪ .. ﻗﺎﻟﺖ ﻟﻴﻬﻮ ﺧﻠﻴﻬﻮ ﻳﺘﺠﺮﺟﺮ ﺍﻧﺎ ﻣﺎﻋﻨﺪﻱ ﻣﺎﻧﻊ ..

ﺑﻬﻴﺔ ﻗﺎﻟﺖ ﻟﻴﻬﺎ .. ﻭﺍﻟﻠﻪ ﻛﻼﻣﻮ ﺻﺎﺡ ﻳﺎ ﺭﻗﻴﺔ .. ﻫﺴﻊ ﺍﺣﻤﺪ ﺍﺧﻮﻱ ﻳﻘﻮﻝ ﺷﻨﻮ؟ ﻭﻧﺎﺱ ﺍﻳﻤﺎﻥ ﻭﺍﻻﻣﻴﻦ ﻓﻲ ﻋﻄﺒﺮﺓ ﻳﺴﻤﻌﻮ ..

ﻗﺎﻟﺖ ﻟﻴﻬﺎ ﺩﻳﻞ ﺑﻀﺮﺏ ﻟﻴﻬﻢ ﺍﻧﺎ ﺑﺮﺍﻱ .. ﺍﻟﺰﻭﻝ ﺳﺮﻗﻨﻲ ﻳﺎﺑﻬﻴﺔ ﺍﻗﻌﺪ ﺍﺧﺖ ﻳﺪﻱ ﻓﻮﻕ ﺧﺸﻤﻲ ﻭﺍﺳﻜﺖ؟

ﺍﻟﻤﻬﻢ ﺍﻟﻀﺎﺑﻂ ﻭﻛﺖ ﺳﻤﻊ ﻧﻘﺎﺷﻦ .. ﻗﺎﻝ ﻟﻴﻬﺎ ﺧﻼﺹ ﺑﺎﻛﺮ ﺗﻜﺘﺒﻲ ﻋﺮﻳﻀﺔ .. ﻭﺗﻮﺩﻳﻬﺎ ﻟﻮﻛﻴﻞ ﺍﻟﻨﻴﺎﺑﺔ .. ﻳﺤﺮﺭ ﻟﻴﻚ ﺍﻣﺮ ﻗﺒﺾ ﻟﻠﻤﺘﻬﻢ ..

ﺍﻟﻤﻬﻢ ﺭﺟﻌﺖ ﺍﻟﺒﻴﺖ .. ﻭﺍﺻﻠﻮ ﻣﺎﻛﻠﻤﻮ ﺯﻭﻝ ﺑﺎﻟﻤﺸﻮﺍﺭ ﺍﻟﺠﺮﻳﻤﻲ ﺩﻩ .ﻭﺍﻟﺼﺎﻓﻲ ﻗﺎﻋﺪ ﻓﻲ ﺍﻟﺼﺎﻟﻮﻥ ﺑﻘﺮﺍ ﻣﺎﺟﺎﻳﺐ ﺧﺒﺮ ﺑﺎﻟﺤﺎﺻﻞ ﺑﻲ ﻭﺭﺍﻫﻮ ..

ﺑﻐﺪ ﺷﻮﻳﺔ ﻗﺎﻡ ﻳﺘﺠﻬﺰ ﻟﻠﺠﻤﻌﺔ ..

ﺑﻬﻨﺎﻙ ﻗﺎﻣﺖ ﺭﻗﻴﺔ ﺍﻟﻤﻐﻔﻠﺔ ﺷﺎﻟﺖ ﺗﻠﻔﻮﻥ ﺍﻳﻤﺎﻥ .. ﻭﺿﺮﺑﺖ ﻟﻴﻬﺎ ﻓﻲ ﻋﻄﺒﺮﺓ .. ﻭﺩﺍﺭﺕ ﺍﻟﻤﻜﺎﻟﻤﺔ ﺍﻻﺗﻴﺔ ..

ﺭﻗﻴﺔ : ﺍﻟﻮ ﺍﺯﻳﻚ ﻳﺎ ﺍﻳﻤﺎﻥ ﻛﻴﻔﺎﻧﺘﻲ ﻭﺍﻻﻭﻻﺩ ؟؟ ..

ﺍﻳﻤﺎﻥ : ﻣﺮﺣﺐ ﺑﻴﻚ ﻳﺎﺑﺖ ﺧﺎﻟﺘﻲ ﺍﻟﻐﺎﻟﻴﺔ .. ﻛﻴﻒ ﺍﺣﻮﺍﻟﻚ ﻭﻛﻴﻒ ﺑﻬﻴﺔ ﻭﻧﺎﺱ ﺍﻟﺒﻴﺖ ﻭﺍﻟﺼﺎﻓﻲ . ؟؟

ﺭﻗﻴﺔ : ﻛﻮﻳﺴﻴﻦ ﻳﺎ ﺍﻳﻤﺎﻥ .. ﻟﻜﻦ ﻭﺍﻟﻠﻪ ﻋﻨﺪﻧﺎ ﻣﺸﻜﻠﺔ ﻃﻮﻳﻠﺔ ﻭﻋﺮﺭﻳﻀﺔ ﻣﻊ ﺍﻟﺼﺎﻓﻲ ..

ﺍﻳﻤﺎﻥ : ﻓﻲ ﺷﻨﻮ؟ ﺍﻥ ﺷﺎﺀ ﺍﻟﻠﻪ ﺧﻴﺮ .. ﺍﻟﻠﻪ ﻻﺟﺎﺏ ﻣﺸﺎﻛﻞ ﻳﺎﺭﻗﻴﺔ ؟

ﺭﻗﻴﺔ : ﻭﺍﻟﻠﻪ ﻳﺎ ﺍﻳﻤﺎﻥ .. ﺍﻧﺎ ﺑﺎﻟﻐﻠﻂ ﻓﺘﺤﺖ ﺩﻭﻻﺏ ﺍﻟﺼﺎﻓﻲ .. ﺑﻔﺘﺶ ﻟﻲ ﺿﻔﺎﺭﺓ .. ﺍﻇﻨﻮ ﻭﻟﺪﻱ ﺍﻟﺼﻐﻴﺮ ﺷﺎﻝ ﻟﻴﻬﻮ ﻭﺭﻗﺎﺕ ﺑﺪﻭﻥ ﻣﺎ ﺍﺷﻌﺮﻣﻦ ﺩﻭﻻﺏ ﺍﻟﺼﺎﻓﻲ .. ﻭﺍﻟﺼﺎﻓﻲ ﻭﻛﺖ ﺟﺎ .. ﻛﺎﺱ ﻟﻠﻮﺭﻗﺎﺕ .. ﻭﻭﻟﺪﻱ ﺭﺟﻌﻦ ﻟﻴﻬﻮ .. ﻭﻟﻤﻦ ﻋﺮﻑ ﺍﻧﻲ ﺍﻧﺎ ﻓﺘﺤﺖ ﺩﻭﻻﺑﻮ ﺯﻋﻞ ..

ﻭﺧﻼﻧﻲ ﻣﺮﻗﺖ .. ﺟﺎ ﻓﺘﺢ ﻭﻻﺑﻲ .. ﻭﺟﺪﻉ ﻟﻲ ﻫﺪﻭﻣﻲ .. ﻭﺷﺎﻝ ﺩﻫﺒﻲ ..

ﻭﺍﺑﺎ ﻳﻌﺘﺮﻑ ﻟﻲ .. ﻛﻤﺎﻥ ﺑﺘﻨﻬﺮ .. ﻫﺴﻊ ﺍﻧﺎ ﻣﺸﻴﺖ ﻓﺘﺤﺖ ﻓﻴﻬﻮ ﺑﻼﻍ .. ‏( ﺭﻗﻴﺔ ﺗﺘﻜﻠﻢ ﻭﺍﻳﻤﺎﻥ ﺳﺎﻛﺘﺔ ﺍﺻﻠﻮ ﻣﺎ ﺍﻗﻄﻌﺘﻬﺎ ‏) .. ﻭﻣﻮﺍﺻﻠﺔ .. ﻗﺎﻟﺖ ﻟﻴﻬﺎ ﻣﺸﻴﺖ ﻓﺘﺤﺖ ﻓﻴﻬﻮ ﺑﻼﻍ .. ﺍﻟﻀﺎﺑﻂ ﻗﺎﻝ ﻟﻲ ﺑﺎﻛﺮ ﺗﺠﻲ ﺗﻘﺪﻣﻲ ﻋﺮﻳﻀﺔ ﻟﻮﻛﻴﻞ ﺍﻟﻨﻴﺎﺑﺔ .. ﻋﺸﺎﻥ ﻳﻘﺒﻀﻮﻩ ﺑﺎﻣﺮ ﻗﺒﺾ .. ﺑﺲ ﺍﻧﺘﻮ ﻻﺯﻡ ﺗﻜﻮﻧﻮ ﻋﺎﺭﻓﻴﻦ ﻋﺸﺎﻥ ﻣﺎﻳﺠﻲ ﺑﻌﺪﻳﻦ ﻳﻜﻀﺐ ﻟﻴﻜﻢ ..

ﺍﻳﻤﺎﻥ : ﺧﻼﺹ ﺧﻠﺼﺘﻲ ﻛﻼﻣﻚ ﻳﺎ ﺭﻗﻴﺔ ؟

ﺭﻗﻴﺔ : ﺍﻳﻮﺓ ﺩﻩ ﻛﻞ ﺍﻟﺤﺼﻞ ..

ﺍﻳﻤﺎﻥ : ﻟﻴﻬﺎ ﻭﺍﻟﺼﺎﻓﻲ ﻋﺎﺭﻑ ﺑﻲ ﻗﺼﺔ ﺍﻟﺒﻼﻍ ؟

ﺭﻗﻴﺔ : ﻻﻻ ﻣﺎﻛﻠﻤﻨﺎﻫﻮ ﻋﺸﺎﻥ ﻣﺎﻳﻬﺮﺏ ..

ﺍﻳﻤﺎﻥ : ﻋﻤﻠﺘﻲ ﻛﻮﻳﺲ ..

ﻃﻴﺐ ﻳﺎﺭﻗﻴﺔ .. ﺍﻧﺎ ﻟﻮ ﻗﻠﺖ ﻟﻴﻚ ﺍﻟﺼﺎﻓﻲ ﻭﻟﺪﻱ ﻣﺴﺘﺤﻴﻞ ﻳﻌﻤﻞ ﻛﺪﺍ .. ﻣﺎ ﺡ ﺗﺼﺪﻗﻲ ..

ﻟﻮ ﻓﺮﺿﻨﺎ ﺟﺪﻻ " .. ﺍﻧﻮ ﺍﻟﺼﺎﻓﻲ ﻓﺘﺢ ﺩﻭﻻﺑﻚ .. ﻭﺷﺎﻝ ﺍﻟﺪﻫﺐ ..

ﺍﻧﺎ ﺑﻜﺮﺓ ﺑﺠﻴﻚ .. ﻭﺑﺮﺟﻊ ﻟﻴﻚ ﺩﻫﺒﻚ .. ﻭﻻ ﺑﺪﻳﻚ ﺗﻤﻨﻮ ﻋﻠﻰ ﺩﺍﻳﺮ ﺍﻟﻤﻠﻴﻢ .. ﺑﺲ ﺣﻜﺎﻳﺔ ﻋﺮﻳﻀﺔ ﻭﻭﻛﻴﻞ ﺍﻟﻨﻴﺎﺑﺔ ﺩﻱ ﺑﺘﺠﻴﺐ ﻟﻴﻨﺎ ﻛﻼﻡ ﺍﻟﻨﺎﺱ ﻭﻧﺤﻦ ﻧﺎﺱ ﺍﻫﻞ ..

ﺍﻧﺘﻲ ﺗﺴﺘﺎﻫﻠﻲ ﺍﻛﺘﺮ ﻣﻦ ﺍﻟﺪﻫﺐ .. ﻭﻻﺗﺰﻋﻠﻲ ﺭﻭﺣﻚ .. ﺑﺲ ﺍﺻﺒﺮﻱ ﻋﺸﺎﻥ ﺧﺎﻃﺮﻱ ﻟﻲ ﺑﻜﺮﺓ .. ﺍﻧﺎ ﺍﺟﻲ ﻭﺍﺣﻞ ﻟﻴﻚ ﻣﺸﻜﻠﺘﻚ ..

ﺭﻗﻴﺔ : ﺧﻼﺹ ﺍﻧﺎ ﺑﺼﺒﺮ ﻻﺑﺎﻛﺮ ﻭﻧﺸﻮﻑ ﺍﻟﺒﺤﺼﻞ ﺷﻨﻮ؟

ﻭﺗﻴﺖ ﺗﻴﺖ ﻗﻔﻠﺖ ﺍﻟﺨﻂ ..

ﺍﻳﻤﺎﻥ ﺩﻱ ﺯﻋﻠﺖ ﺯﻋﻞ .. ﻣﻦ ﻛﻼﻡ ﺭﻗﻴﺔ ﻓﻲ ﺍﻟﺼﺎﻓﻲ .. ﻭﺍﻟﻴﻮﻡ ﺩﺍﻙ ﺑﻜﺖ ﺟﻨﺲ ﺑﻜﺎ .. ﻭﺑﺮﺍﻫﺎ ﺗﻨﻀﻢ ﺩﺍﺧﻠﺔ ﻭﻣﺎﺭﻗﺔ .. ﻳﺎﺣﻠﻴﻠﻚ ﻳﺎ ﺍﻟﺼﺎﻓﻲ .. ﻭﺍﻟﻠﻪ ﺍﻧﺎ ﻣﻤﻜﻦ ﺍﻗﺴﻢ ﺑﺎﻟﻐﻴﺐ .. ﻭﻟﺪﻱ ﺍﻧﺎ ﻣﺎﺑﻌﻤﻞ ﻛﺪﻱ .. ﻭﺣﺴﻲ ﺍﻧﺎ ﻗﻠﺒﻲ ﻭﺍﺟﻌﺘﻲ ﻋﻠﻰ ﺍﻻﻫﺎﻧﺔ ﺍﻟﺼﺎﺑﺮ ﻋﻠﻴﻬﺎ ..

ﺍﻟﻠﻪ ﻳﺠﺒﺮﻙ ﻳﺎ ﺍﻟﺼﺎﻓﻲ .. ﺳﺒﺤﺎﻥ ﺍﻟﻠﻪ .. ﻫﻮ ﻣﻨﻮ ﺍﻟﺰﻱ ﺍﻟﺼﺎﻓﻲ ﺣﺒﻴﺐ ﻗﻠﺒﻲ؟؟ ﺍﻟﺒﺴﺘﺮ ﺍﻟﻌﻴﺐ ﻭﻣﺎﺑﺘﺪﺱ ﺍﻟﻔﻲ ﺍﻟﺠﻴﺐ .. ﻫﻮ ﻣﻨﻮ ﺍﻟﺰﻱ ﺍﻟﺼﺎﻓﻲ ﻭﻟﺪﻱ ﺍﻟﺪﻫﺐ ﺍﻟﻤﺠﻤﺮ ..

ﻭﻛﻞ ﻣﺎﺩﺍﻳﺮﺓ ﺗﺸﻴﻞ ﺍﻟﺘﻠﻔﻮﻥ ﺗﻀﺮﺏ ﻟﻠﺼﺎﻓﻲ .. ﻋﺸﺎﻥ ﺗﺤﻜﻲ ﻟﻴﻬﻮ ﻳﻐﻠﺒﻬﺎ ﺗﻘﻌﺪ ﺗﺒﻜﻲ ..

ﺍﻻﻣﻴﻦ ﻃﻠﻊ ﻋﻘﺪ ﺑﻌﺪ ﺻﻼﺓ ﺍﻟﺠﻤﻌﺔ .. ﻓﻲ ﺣﺘﺔ ﻓﻲ ﺍﻟﺪﺍﻣﺮ ﺍﺳﻤﻬﺎ ﺍﻟﺤﺴﻨﺎﺏ .. ﻭﻫﻲ ﻣﻨﺘﻈﺮﺍﻫﻮ ﻳﺠﻲ ﺗﺤﻜﻲ ﻟﻴﻬﻮ ..

ﺍﻟﺮﺷﻴﺪ ﻭﺩ ﺍﻻﻣﻴﻦ ﺍﺧﻮ ﺍﻟﺼﺎﻓﻲ ﻋﻤﺮﻩ 9 ﺳﻨﻮﺍﺕ .. ﻋﺎﻳﻦ ﻟﻲ ﺍﻣﻮ ﻛﺪﺍ ﻟﻘﺎﻫﺎ ﺗﺒﻜﻲ .. ﺟﺎﻫﺎ ﻗﺎﻝ ﻟﻴﻬﺎ ﺍﻣﻲ ﺍﻧﺘﻲ ﺑﺘﺒﻜﻲ ﻣﺎﻟﻚ؟

ﻗﺎﻟﺖ ﻟﻴﻬﻮ ﺍﺷﺘﻘﺖ ﻟﻠﺼﺎﻓﻲ ﺍﺧﻮﻙ ؟ ﻗﺎﻝ ﻟﻴﻬﺎ ﻫﻮ ﻟﻴﻪ ﺑﻘﻰ ﻣﺎﺑﺠﻴﻨﺎ ؟؟ ﺍﻧﺎﺫﺍﺗﻲ ﺍﺷﺘﻘﺖ ﻟﻴﻬﻮ ..

ﻗﺎﻟﺖ ﻟﻴﻬﻮ ﺑﻘﺮﺍ ﻓﻲ ﺍﻟﺠﺎﻣﻌﺔ ﻋﺸﺎﻥ ﻳﺒﻘﻰ ﻣﻬﻨﺪﺱ ﻛﺒﻴﺮ ﻭﻳﺒﻨﻲ ﺍﻟﻌﻤﺎﺭﺍﺕ .. ﻭﻳﺒﻨﻲ ﻟﻴﻚ ﺍﻧﺖ ﻋﻤﺎﺭﺓ ﻛﺒﻴﺮﺓ .. ﻗﺪﺭ ﻋﻤﺎﺭﺓ ﻧﺎﺱ ﺍﺩﺭﻳﺲ ﺩﻱ ..

ﻗﺎﻝ ﻟﻴﻬﺎ ﻃﻴﺐ ﻣﺎﻟﻮ ﻣﺎﺑﻨﻰ ﻻﺑﻮﻱ ﻋﻤﺎﺭﺓ ؟

ﻗﺎﻟﺖ ﻟﻴﻬﻮ ﻟﻜﻦ ﻫﻮ ﻟﺴﻪ ﺑﻘﺮﺍ ﻓﻲ ﺍﻟﺠﺎﻣﻌﺔ .. ﻣﺎﺑﺒﺪﺍ ﺍﻟﺒﻨﺎﺀ ﺍﻻﻟﻤﻦ ﻳﺘﺨﺮﺝ .. ﺍﻧﺖ ﻫﺴﻲ ﺩﺍﻳﺮ ﺗﺒﻘﻰ ﺷﻨﻮ؟

ﻗﺎﻝ ﻟﻴﻬﺎ ﺍﻧﺎ ﺩﺍﻳﺮ ﺍﻛﻮﻥ ﺳﻮﺍﻕ ﻃﻴﺎﺭﺓ .. ﻭﺍﻣﺸﻲ ﺍﻟﺴﻌﻮﺩﻳﺔ ﻭﺍﺷﻮﻑ ﺍﻟﻜﻌﺒﺔ ﺍﻟﻤﺸﺮﻓﺔ .. ﻗﺎﻟﺖ ﻟﻴﻬﻮ ﻣﺎﺷﺎﺀ ﺍﻟﻠﻪ .. ﺧﻼﺹ ﺑﺘﺴﻮﻗﻨﻲ ﻣﻌﺎﻙ؟

ﻗﺎﻝ ﻟﻴﻬﺎ ﺍﻳﻮﺓ ﺍﻧﺘﻲ ﺑﺘﻜﻮﻧﻲ ﺭﺍﻛﺒﺔ ﻣﻌﺎﻱ ﻗﺪﺍﻡ ..

ﻗﺎﻟﺖ ﻟﻴﻬﻮ ﻃﻴﺐ ﻭﺑﺴﻤﺔ ؟ ﻗﺎﻝ ﻟﻴﻬﺎ ﺑﺴﻤﻪ ﺑﺴﻮﻗﻬﺎ ﺍﻟﻤﺮﺓ ﺍﻟﺠﺎﻳﺔ .. ﻣﻌﺎﻫﺎ ﺍﺑﻮﻱ ..

ﻟﻮ ﻣﻼﺣﻈﻴﻦ ﺍﻳﻤﺎﻥ ﺑﺪﺕ ﺗﺘﻮﻧﺲ ﻣﻊ ﺍﻟﻮﻟﺪ ﺑﻲ ﻛﻞ ﺍﺣﺎﺳﻴﺴﻬﺎ ﻛﺎﻧﻮ ﻣﺎﻋﻨﺪﻫﺎ ﻣﺸﻜﻠﺔ ..

ﻫﺴﻲ ﺩﻱ ﻟﻮ ﻣﺮﺍﺓ ﺗﺎﻧﻴﺔ .. ﺗﻘﻮﻝ ﻟﻠﻮﻟﺪ .. ﻃﻴﺮ ﻣﻦ ﻗﺪﺍﻣﻲ ﻛﺪﻱ .. ﺍﻧﺎ ﺍﻟﻔﻴﻨﻲ ﻣﻜﻔﻴﻨﻲ .. ﻟﻜﻦ ﺍﻳﻤﺎﻥ ﻓﺼﻠﺖ ﺑﻴﻦ ﺷﻌﻮﺭﻫﺎ ﺍﻟﺴﻠﺒﻲ ﻭﻭﺍﺟﺒﺎﺕ ﺍﻻﻣﻮﻣﻴﺔ .. ﺭﺑﻨﺎ ﻳﻜﺘﺮ ﻣﻦ ﺍﻣﺜﺎﻟﻬﺎ ﺑﺖ ﺍﻟﻜﺮﺍﻡ ..

ﺍﻳﻤﺎﻥ ﺩﺧﻠﺖ ﺟﻮﺓ .. ﺑﻘﺖ ﺗﺮﺗﺐ ﻓﻲ ﻫﺪﻭﻣﻬﺎ .. ﻭﺗﻈﺒﻂ ﻓﻲ ﺣﺎﺟﺎﺗﻬﺎ .. ﻭﻋﻨﺪﻫﺎ ﺩﻫﺐ ﺭﺑﻄﺘﻮ ﻓﻲ ﻗﻄﻌﺔ .. ﻟﻔﺘﻮ ﻓﻲ ﺗﻮﺏ ﻭﺧﺘﺘﻮ ﻓﻲ ﺍﻟﺸﻨﻄﺔ ..

ﻭﻧﺎﻭﻳﺔ ﺗﺪﻳﻬﻮ ﻟﻲ ﺭﻗﻴﺔ ﻋﺸﺎﻥ ﻛﺮﺍﻣﺔ ﻭﻟﺪﻫﺎ ..

ﺍﻳﻤﺎﻥ ﺍﻻﻥ ﻋﻤﺮﻫﺎ ﻳﻘﺎﺭﺏ ﺍﻝ 38 ﺳﻨﺔ .. ﻟﻜﻦ ﺍﻟﺒﺸﻮﻓﻬﺎ ﻳﻘﻮﻝ ﺍﺧﺖ ﺍﻟﺼﺎﻓﻲ ﺍﻟﻜﺒﻴﺮﺓ .. ﻣﺎﺑﺨﺖ ﺍﻧﻬﺎ ﺩﻱ ﺍﻣﻮ .. ﻣﻤﻜﻦ ﺗﻜﻮﻥ ﺍﻡ ﺍﻟﺼﻐﺎﺭ ﺩﻳﻞ ..ﻣﺮﺍﺓ ﻭﻻ ﺍﻟﻒ ﻣﺮﺍﺓ .. ﺳﺖ ﺑﻴﺖ .. ﻭﺯﻳﻨﺔ ﻭﺍﻫﺘﻤﺎﻡ .. ﺳﺒﺤﺎﻥ ﺍﻟﻠﻪ .. ﻭﻟﻢ ﺗﺸﻐﻠﻬﺎ ﺷﺆﻭﻥ ﺍﻟﺒﻴﺖ ﻭﺍﻻﻃﻔﺎﻝ ﻣﻦ ﺍﻫﺘﻤﺎﻣﻬﺎ ﺑﻲ ﻧﻔﺴﻬﺎ .. ﺣﺘﻰ ﻧﺴﻮﺍﻥ ﺍﻟﺤﻠﺔ ﻣﺴﻤﻨﻬﺎ ‏( ﻣﻘﺪﺭﺓ ‏) .. ﻻﻧﻬﺎ ﻣﺸﻴﺘﻬﺎ ﻓﻲ ﺍﻻﺭﺽ ﺑﻲ ﺣﺴﺎﺏ ..

ﺍﻟﻤﻬﻢ ﻳﺎﺯﻭﻝ ﺍﻻﻣﻴﻦ ﺟﺎﺀ .. ﻭﺍﻟﺴﺎﻋﺔ ﻭﻧﺺ ﺍﻟﻌﺪﺗﻦ ﺍﻳﻤﺎﻥ ﻗﺒﻞ ﻣﺎﻳﺠﻲ ﺍﻻﻣﻴﻦ ﺩﻱ .. ﻛﺎﻧﺖ ﺍﺻﻌﺐ ﺳﺎﻋﺔ ﻭﻧﺺ ﻓﻲ ﺍﻟﺴﻨﺔ .. ﻣﻦ ﺍﻟﺰﻋﻞ ﻭﺍﻟﺘﻮﺗﺮ ﻭﺍﻟﺤﺰﻥ ﺍﻟﺤﺎﺳﺔ ﺑﻴﻬﻮ ﺍﻟﻤﺮﺍﺓ ﺩﻱ ..

ﺍﻻﻣﻴﻦ ﺟﺎ .. ﻃﺒﻌﺎ ﺭﺍﻛﺐ ﻋﺮﺑﻴﺔ ﺑﻮﻛﺴﻲ ﻣﻮﺩﻳﻞ 2001 ﺩﺑﻞ ﻛﺎﺑﻴﻦ ..

ﺍﻟﺮﺍﺟﻞ ﺭﻃﺐ .. ﻭﺍﻟﺒﻴﺖ ﻣﻠﻚ .. ﻭﺍﻟﻌﺮﺑﻴﺔ ﻓﻲ ﺍﻟﺴﻠﻚ .. ﻭﺍﻻﻭﺿﺎﻉ ﻣﺴﺘﻘﺮﺓ ﻣﺎﺷﺎﺀ ﺍﻟﻠﻪ ..

ﻭﺍﻻﻣﻴﻦ ﺫﺍﺗﻮ ﺑﻲ ﻧﻔﺲ ﺍﻟﺸﻜﻞ .. ﺍﻟﺨﻠﻴﻨﺎﻫﻮ ﺑﻴﻬﻮ ﻗﺒﻞ ﻋﺸﺮﺓ ﺳﻨﻮﺍﺕ .. ﺑﺲ ﻓﻲ ﺣﺒﺎﺕ ﺷﻴﺒﺎﺕ ﻛﺪﺍ .. ﻓﻲ ﺩﻗﻨﻮ ﺍﻟﺼﻐﻴﺮﻭﻧﺔ ﺍﻟﺘﺤﺖ ﺣﻨﻜﺎﺗﻮ ﺩﻱ .. ﻭﻏﺮﺓ ﺍﻟﺼﻼﺓ ﻓﻮﻕ ﻭﺷﻮ .. ﻭﺍﻟﺮﺍﺣﺔ ﻇﺎﻫﺮﺓ ﻓﻮﻕ ﻭﺷﻴﻬﻮ ﻭﺍﻟﺘﺮﻃﻴﺒﺔ ..

ﻭﺗﺎﻧﻲ ﻣﺎﺷﺎﻑ ﻧﺪﻯ ﺍﻟﻤﻨﺪﺍﺣﺔ ﻟﻐﺎﻳﺔ ﺍﻟﻠﺤﻈﺔ ﺩﻱ .. ﻗﺎﻟﻮ ﺍﺗﺰﻭﺟﻬﺎ ﻋﺒﺪﺍﻻﻟﻪ

ﻭﺳﺎﻛﻨﺔ ﻓﻲ ﺍﻟﺪﺭﺟﺔ .. ‏( ﺣﻲ ﻣﻦ ﺍﺣﻴﺎﺀ ﻋﻄﺒﺮﺓ ‏) ﻣﺎﻋﺎﺭﻑ ﻟﻮ ﻋﻨﺪﻫﺎ ﺍﻭﻻﺩ ﻭﻻﻻ ..

ﻭﻋﺒﺪﺍﻟﻤﻨﻌﻢ ﻣﺎ ﺍﺗﺰﻭﺝ ﻧﺒﻴﻬﺔ .. ﻧﺒﻴﻬﺔ ﺍﺗﺰﻭﺟﻬﺎ ﻭﺍﺣﺪ ﻣﻦ ﻧﺎﺱ ﻧﻬﺮ ﻋﻄﺒﺮﺓ .. ﻣﻦ ﻣﻨﻄﻘﺔ ﺍﻟﻬﻮﺩﻱ .. ﻭﺍﺳﺘﻘﺮﺕ ﻓﻲ ﺍﻟﺪﺍﻣﺮ ..

ﻭﻋﺒﺪﺍﻟﻤﻨﻌﻢ ﻟﻐﺎﻳﺔ ﺍﻟﻠﺤﻈﺔ ﺩﻱ .. ﻓﻲ ﺑﻴﺖ ﺍﻟﻌﺰﺍﺑﺔ .. ﺑﺲ ﺑﻄﻞ ﺍﻟﺴﻜﺮ ﻭﺍﻟﺒﻨﻘﻮ ﻭﺍﻟﻘﻤﺎﺭ .. ﻭﺑﻘﻰ ﺯﻭﻝ ﺻﻼﺓ .. ﻟﻜﻦ ﻣﻔﻠﺲ ﻭﺣﺎﻟﺘﻮ ﺑﺎﻟﺒﻼﺀ .. ﻭﻋﻤﺮﻭ ﻗﺮﻳﺐ ﺍﻟﺨﻤﺴﻴﻦ ﻭﻻ ﺍﺗﺰﻭﺝ ﻭﻻﻋﻨﺪﻭ ﻧﻴﻪ ..

ﺩﻩ ﺍﻟﺤﺎﺻﻞ ﻓﻲ ﻋﻄﺒﺮﺓ ﺑﻲ ﺍﺧﺘﺼﺎﺭ .. ﻭﻛﻞ ﻣﺎﺗﺠﻴﻨﺎ ﺣﺘﺔ ﺑﻨﻔﺼﻞ ﻓﻴﻬﺎ ..

ﺍﻫﺎ ﻧﺮﺟﻊ ﻟﻲ ﻧﺎﺱ ﺍﻻﻣﻴﻦ ﻭﺍﻳﻤﺎﻥ ..

ﺍﻭﻝ ﻣﺎ ﺍﻻﻣﻴﻦ ﺩﺧﻞ .. ﺍﻳﻤﺎﻥ ﻗﺎﻟﺖ ﻟﻴﻬﻮ .. ﺍﻋﻤﻞ ﻟﻴﻚ ﺷﺎﻱ ﻭﻻ ﻗﻬﻮﺓ ..

ﻗﺎﻝ ﻟﻴﻬﺎ ﻭﺍﻟﻠﻪ ﺍﺗﻐﺪﻳﻨﺎ ﻓﻀﻠﺔ ﺧﻴﺮﻙ .. ﻭﺷﺮﺑﻨﺎ ﺍﻟﺸﺎﻱ .. ﻋﻨﺪ ﻧﺎﺱ ﺍﻟﻤﻨﺎﺳﺒﺔ .. ﻟﻜﻦ ﻗﻬﻮﺓ ﻛﻮﻳﺴﺔ ..

ﻣﺸﺖ ﻋﻤﻠﺖ ﺍﻟﻘﻬﻮﺓ ﺳﺮﻳﻊ .. ﻭﺟﺎﺕ ﻛﺒﺖ ﻟﻴﻬﻮ .. ﻭﺍﺑﺖ ﺗﻔﺘﺢ ﺍﻟﻤﻮﺿﻮﻉ ..

ﻟﻐﺎﻳﺔ ﻣﺎ ﻛﻤﻞ ﻗﻬﻮﺗﻮ ﺑﻲ ﻣﺰﺍﺍﺍﺝ ﻭﺍﺗﻜﻴﻒ ﺗﻤﺎﻡ ..

ﻗﺎﻟﺖ ﻟﻴﻬﻮ ﺍﺗﺼﻠﺖ ﻋﻠﻲ ﻗﺒﻴﻞ ﺭﻗﻴﺔ ﺑﺖ ﺧﺎﻟﺘﻲ ﺍﻟﻤﻠﻜﺔ .. ﻭﻗﺎﻟﺖ ﻗﺎﻟﺖ ﻗﺎﻟﺖ .. ﺣﻜﺖ ﻟﻴﻬﻮ ﻛﻼﻣﻬﺎ ﺑﺎﻟﺘﻔﺼﻴﻞ .. ﻟﻐﺎﻳﺔ ﺍﻟﺒﻼﻍ ﻭﺍﻟﻌﺮﻳﻀﺔ ﻭﺍﻣﺮ ﺍﻟﻘﺒﺾ ...

ﻗﺎﻝ ﻟﻴﻬﺎ ﺷﻨﻮ؟ ﺷﻨﻮ؟ ﺷﻨﻮ؟ .. ﻗﺘﻲ ﺷﻨﻮ؟ .. ﺍﻧﺎ ﻣﺎﺳﺎﻣﻊ ﻛﻮﻳﺲ .. ﺩﻩ ﻛﻼﻡ ﺷﻨﻮ ﺍﻟﺒﺘﻘﻮﻟﻲ ﻓﻴﻬﻮ ﻳﺎ ﺍﻳﻤﺎﻥ؟ ‏( ﻧﻔﺲ ﻋﺒﺎﺭﺍﺕ ﺍﻟﺼﺎﻓﻲ ﺑﺎﻟﻨﺺ ‏)

ﻣﻌﻘﻮﻝ ﺍﻟﺼﺎﻓﻲ ﻭﻟﺪﻱ ﺍﻧﺎ ﻳﻌﻤﻞ ﻛﺪﺍ؟؟

ﻣﺴﺘﺤﻴﻞ .. ﺩﻱ ﻣﺮﺍﺓ ﻣﻮﻫﻮﻣﺔ .. ﻭﺍﻟﻄﻼﻕ ﻋﻤﻞ ﻟﻴﻬﺎ ﻧﻔﺴﻴﺎﺕ .. ﻭﺟﻨﺖ ﺍﻟﺠﻦ ﺍﻟﻴﻔﻘﻬﺎ ..

ﺍﻳﻤﺎﻥ ﻗﺎﻟﺖ ﻟﻴﻬﻮ .. ﻣﺎﺗﻘﻮﻝ ﻛﺪﻱ ﻳﺎ ﺍﺑﻮ ﺍﻟﺼﺎﻓﻲ .. ﺍﻟﺰﻭﻝ ﻭﻛﺖ ﺗﺮﻭﺡ ﻣﻨﻮ ﺣﺎﺟﺔ ﺯﻱ ﺍﻟﺪﻫﺐ ﺩﻩ .. ﺑﻘﻌﺪ ﻳﺘﺨﺒﻂ .. ﻭﻣﺎﺑﻌﺮﻑ ﺑﻘﻮﻝ ﺷﻨﻮ .. ﺍﻟﻤﺮﺍﺓ ﻣﺴﻜﻴﻨﺔ .. ﻭﻣﻜﺴﻮﺭﺓ ﺟﻨﺎﺡ .. ﺗﻠﻘﺎﻫﺎ ﻣﺎﻋﻨﺪﻫﺎ ﻏﻴﺮ ﺍﻟﺪﻫﻴﺒﺎﺕ ﺩﻳﻞ .. ﻭﻣﺎﻟﻘﺖ ﺯﻭﻝ ﺗﺮﻣﻲ ﻓﻮﻗﻮ ﺍﻟﺤﻤﻞ ﻏﻴﺮ ﺍﻟﺼﺎﻓﻲ ﻭﻟﺪﻱ ..

ﻻﻧﻮ ﺍﻟﻐﺮﻳﺐ ﺍﻟﻮﺣﻴﺪ ﻓﻲ ﺍﻟﺒﻴﺖ ..

ﺍﻧﺖ ﺍﺻﻠﻚ ﻣﺎﺗﻨﻔﻌﻞ ﻭﺗﺰﻋﻞ .. ﻟﻮ ﺑﺘﺰﻋﻞ ﻭﺍﻟﻠﻪ ﻣﺎﺑﺴﻮﻗﻚ ﻣﻌﺎﻱ .. ﺑﺮﻛﺐ ﺑﻤﺸﻲ ﺑﺮﺍﻱ .. ﺡ ﺍﺑﺮﻱ ﻭﻟﺪﻱ ﻣﻦ ﺍﻟﺘﻬﻤﺔ .. ﻭﺑﺠﻲ ﺭﺍﺟﻌﺔ ..

ﻗﺎﻝ ﻟﻴﻬﺎ ﻻﻻ .. ﺍﺑﺪﺍ ﻭﺍﻟﻠﻪ ﺍﻧﺎ ﻗﻠﺒﻲ ﻳﻘﻮﻝ ﻟﻲ .. ﻧﻘﻮﻡ ﺣﺴﻲ ﻧﺴﺎﻓﺮ ..

ﻭﺍﻟﻠﻪ ﺍﻟﺼﺎﻓﻲ ﻫﺴﻲ ﺗﻠﻘﻴﻬﻮ ﻛﺎﺭﻩ ﻧﻔﺴﻮ .. ﺍﻛﺘﺮ ﺣﺎﺟﺔ ﺑﺘﻀﺎﻳﻖ ﻣﻨﻬﺎ ﺍﻟﺼﺎﻓﻲ .. ﺍﻧﻮ ﺯﻭﻝ ﻳﺘﻬﻤﻮ ﺑﺎﻟﻜﻀﺐ .. ﺑﺒﻘﻰ ﺯﻱ ﺍﻟﻤﺎﻣﺮﻛﺰ ..

ﺍﻳﻤﺎﻥ ﻗﺎﻟﺖ ﻟﻴﻬﻮ ﻻﻻ ﻣﺎﻓﻲ ﺩﺍﻋﻲ ﻟﻼﺳﺘﻌﺠﺎﻝ .. ﺍﺻﺒﺮ ﻻﺑﺎﻛﺮ ﺻﺒﺎﺣﺎﺕ ﺍﻟﻠﻪ ﺑﻴﻀﺎﺀ .. ﻧﺠﻬﺰ ﺣﺎﻟﻨﺎ ﻭﻧﺴﻮﻕ ﺍﻻﻭﻭﻻﺩ ﻣﻌﺎﻧﺎ ﻭﻧﻤﺸﻲ .. ﺍﻟﻤﻮﺿﻮﻉ ﺑﺘﺤﻞ ﺍﻥ ﺷﺎﺀ ﺍﻟﻠﻪ .. ﺑﺲ ﺍﻧﺎ ﺩﺍﻳﺮﺍﻙ ﺍﻧﺖ ﺗﻄﻮﻝ ﺑﺎﻟﻚ .. ﻭﻣﺎ ﺗﺨﺴﺮ ﻋﻼﻗﺘﻚ ﻣﻌﺎﻫﻢ ﺑﻲ ﺳﺒﺐ ﻣﺸﻜﻠﺔ ﺑﺴﻴﻄﺔ .. ﺗﺘﻌﺪﻯ ﺍﻥ ﺷﺎﺀ ﺍﻟﻠﻪ ..

ﺍﻻﻣﻴﻦ ﻋﺎﻳﻦ ﻟﻴﻬﺎ ﻛﺪﺍ ..

ﻗﺎﻝ ﻟﻴﻬﺎ ﺩﺍﻳﻤﺎ " ﺑﺘﺎﺧﺪﻱ ﺍﻻﻣﻮﺭ ﺑﻲ ﺑﺴﺎﻃﺔ .. ﺍﻧﺘﻲ ﻋﺎﺭﻓﺔ ﻫﺴﻲ ﻧﻔﺴﻴﺎﺕ ﺍﻟﺼﺎﻓﻲ ﺑﺘﻜﻮﻥ ﻛﻴﻒ؟ .. ﻗﺎﻟﺖ ﻟﻴﻬﻮ ﻣﻬﻤﺎ ﺗﻜﻮﻥ ﻓﺴﻴﺎﺗﻮ ﻛﻌﺒﺔ .. ﻭﻟﺪﻙ ﻣﺎﺑﺘﺼﺮﻑ ﻏﻠﻂ .. ﺍﻧﺎ ﻭﺍﺛﻘﺔ ﻣﻨﻮ ﻳﺴﻠﻢ ﻟﻲ ﺩﺧﺮﻱ ﺍﻟﺤﻮﺑﺔ ..

ﻗﺎﻝ ﻟﻴﻬﺎ ﻃﻴﺐ ﻋﻠﻰ ﺍﻻﻗﻞ .. ﺍﺗﺼﻠﻲ ﻋﻠﻴﻬﻮ ﻛﻠﻤﻴﻬﻮ .. ﻗﻮﻟﻲ ﻟﻴﻬﻮ ﻧﺤﻦ ﺟﺎﻳﻴﻦ ..

ﻗﺎﻟﺖ ﻟﻴﻬﻮ ﻫﻮ ﻃﺒﻌﺎ ﻣﺎﻋﺎﺭﻑ ﺍﻧﻬﺎ ﻓﺘﺤﺖ ﻓﻴﻬﻮ ﺑﻼﻍ .. ﻭﻟﻮ ﻗﻠﻨﺎ ﻟﻴﻬﻮ ﻧﺤﻦ ﺟﺎﻳﻴﻦ ﺡ ﻳﻨﺰﻋﺞ .. ﻭﺍﺣﺘﻤﺎﻝ ﻳﻤﺸﻲ ﻳﻔﺘﺢ ﻣﻌﺎﻫﺎ ﻧﻘﺎﺵ .. ﺍﻧﺖ ﺍﺻﺒﺮ ﺑﺲ ﺧﻠﻴﻨﻲ ﺍﺗﺼﺮﻑ ﻳﺎ ﺍﻻﻣﻴﻦ ..

ﻗﺎﻝ ﻟﻴﻬﺎ ﻃﻴﺐ ﻫﺴﻲ ﻳﻌﺮﻑ ﻛﻴﻒ ﻧﺤﻦ ﺟﺎﻳﻴﻦ ..

ﻗﺎﻟﺖ ﻟﻴﻬﻮ ﺑﻨﻀﺮﺏ ﻟﻴﻬﻮ ﻟﻤﻦ ﻧﻘﺮﺏ ﻋﻠﻰ ﺍﻟﺨﺮﻃﻮﻡ .. ﺍﻭﻝ ﻣﻦ ﻧﺼﻞ ﺍﻟﺠﻴﻠﻲ ﻭﻻ ﺍﻟﻜﺒﺎﺷﻲ .. ﺑﻨﻀﺮﺏ ﻟﻴﻬﻮ ﻧﻘﻮﻝ ﻟﻴﻬﻮ ﻧﺤﻦ ﺟﺎﻳﻴﻦ ﻟﻤﻮﺿﻮﻉ .. ﻭﻗﺮﺑﻨﺎ ﻋﻠﻴﻚ ﺍﻧﺘﻈﺮﻧﺎ ﻓﻲ ﺍﻟﺒﻴﺖ ..