HAWAK ang tray ng naglalaman ng isang tasang kape ay marahang kinatok ni Dianna ang pinto ng library o maliit na opisina ni Alexander.
Pagkatapos niyang mapatulog ang ina ay kaagad siyang kumilos upang pagtimplahan ng kape ang amo kahit hindi naman nito inutos sa kanya. Nais niyang pasalamatan ang lalaki sa mga nagawa nitong mabuti sa kanilang mag-ina. Bagamaʼt may nakaraan sila ng lalaki na pangit at hindi maganda ay dagli iyong nabubura sa kanyang isipan kapag ang usapan na ay ang kanyang ina.
Nang dahil kay Alexander ay unti-unti nang bumabalik sa normal ang kanyang ina. Bagamaʼt may pagkakataon pa ring natatahimik at natutulala ang kanyang ina ay mas maayos na ito ngayon kaysa noong hindi pa sila napapadpad roon. Noon kasing nasa probinsya pa sila ay kung minsan nahihinto ang pagmeme
