MAY paisa-isang luha na nangingilid sa pisngi ni Daisy habang nagsusulat. Agad niyang tinutuyo iyon pero may umaalpas pa rin talaga. Mga limang pahina yata ang naubos niya bago naramdaman ng dalaga na bahagyang gumaan ang kanyang pakiramdam.
Bumalik ang mga mata niya sa mga linya na katatapos lang niyang isulat.
Hindi mo alam pero tinuruan mo ako ng maraming bagay. Tinuruan mo akong maging dependent pero tinuruan mo rin akong maging matatag. Tinuruan mo ako kung paano maging masaya pero tinuruan mo rin akong umiyak.
Bakit ganoon kadali para sa ‘yong magbigay ng pagmamahal pero ayaw mong tumanggap?
Ikaw ang nagturo sa akin na may mga pag-ibig na ipinaglalaban at may mga pag-ibig na dapat bitawan dahil iyon ang tama.
Gusto ko pa sanang kumapit pero
