اغلال القدر

البارت الثالث

اني مشيت وية خواتي وراه ... دخلنه لبيتهم .. بيتهم جان كوولش زغير ... و مبني من بلوك و السياج عبارة عن سعف و خشب و اغراض زايدة ... والباب مزنجرة وزغيرة ... الطرمة جانت زغيرة بس بيها غراض هواية ... تنور و يمة گونية طحين و كشن مال سيارة وسخ و قناني غاز ... و عربانة دفع بيها مكينة لحيم ... كال تعالوا طبوا ... نونو كام يبحي و يصرخ ... كتله اريد الحمام حتى اغسل لنونو ... كلي تعاي دخلي .. طبيت .. وخواتي وراية شمة لازمة ثوبي و خاتلة وراية و تشم بربطة امي و اسيل متچتفة و تباوع ع البيت و نفسها لعبانة .. البيت مو بس وسخ .. مبهذل .. الكاع صبة و ما مصبوغ داكين ع الحياطين وصل و جذع شجرة بالنص ... و السگف عبارة عن چينكو و سعف و نازل منه گلوب اقتصادي ... كلي هذا الحمام روحي ... ورة هاي الغرفة الي واكفين بيها اكو ممر ... اظلم ممبين شي خفت افوت كلي اجي وياج ؟ كتله اكو احد بالبيت ... كال لا امي نظيمة طالعة و ماخذة اختي و ابوية مو هنا ... كتله زين لعد اني اروح ... احنه صح فقرة و حالتنه المادية مو هالكد بس عمري مشايفة هيج بيت ... احنه من چنه بديالى صح بيتنه ايجار و صغير بس جانت امي تعدل بي و تنظفه ... ومن جينه لبغداد كعدنه بيت صديق ابوية حراس جان بيت جبير ... ونظيف طبيت للحمام و نسيت نونو ديفرفح يريدني انزعه الحفاظه ضايج منها ... وهو بايدي لان مندهشة بوضع بيتهم .. هذولة شلون عايشين ... الحمام اظلم و ما بي ضوة و كله رطوبة و الدوش يذب مي يقطر ... و عزة ... ما عندهم مغسلة ... كتله يا ولد ... كال ها كتله وين المغسلة ..؟ كال ماعدنه ...بس هذا البوري ... اباوع ع البوري هذا ليش راسه معووج ؟ كتله اريد مي دافي .. كال ما عدنه لازم نحمي ... راح اختفى و اسمعه يچقچق بالجدور ... و اني ظليت اسكت بنونو ... و ورة شوية اجة الولد و جايب مي ... بجدرية كال هذا المي ... اني باوعتله و كتله شلون وين ..؟ كلي هنانة بالكع و اني اديرلج... والله ردت ابجي ... بعدين كلت بگلبي زينب هاي البداية ....ما اسمع الا صوت مرة .. علي ... ولك علي ... هاي شنو .. منو هذوله .. شلت نونو وهو مصلخ .. و يلگع و عرفت المرية تصيح ع هذا الولد ... كتله هاي منو ... گلي هاي امي نظيمة ...راح و اسمعها تكفخ بي و كالت ولك معزى هذولة منو .. طلعت شوية و اجي الكه البيت مليان مزعطة ... كالت اني كم مرة كايلة اني جهال الشارع مطببهم للبيت ... كللهة اسمعي امي نظيمة والله هذولة مو بالشارع جانوا ...كالت لعد من يا قصر جوي عيني ... كال خطية امهم ميتة و ابوهم هم و ما عدهم احد و حتى عدهم طفل زغير خطية انقهرت عليهم ... و طببتهم ... اني سمعته و گلبي انزرف ... صرنه موضع شفقة و كلمة خطية توصف حالنه و هويتنه ايتام .... كالت و منو كلك اني مؤسسة اجتماعية لو دار ايتام ... ياله طلعهم برة .. وهنوب وياهم ابن انفاس .. باوعت عليه كالت حجاية واني بوكتها مفتهمتهة كالت ولج هذا نغل ... هذا ابنج عوبة شكدوتج و عندج هذا ... ؟؟؟علي صار اعصاب و كلها لا امي نظيمة خطية هذا اخوها .... كالت شعليه هي او امها الي لاعبات بليلة سودا و جابن هالنغل.. المهم طلعهم منا علي ... ترة والله احرك ابوك عليك و هو يعرف يتصرف .... كلهة زين بس هالليلة خطية و اني باجر من الصبح و قبل متكعدين اطلعهم والله .. هذا الحجي هي جارة اذنه و واكفه چنهة شيطان .. شكلها يخوف .. عينها جاحظة و سنونها كبار و خشمها مفروش و سمرا حيييييل و سمينة ... باوعت علينه اني وخواتي بقسوة .. كالت زين .. بس ما اريد صوت فايتة لغرفتي ارتاح ... فاتت منيمي و جان تباوعلي بازدراء و فرت ايدها وكالت عشتووو ... شكدوتهن و بيهن بلة .....اني مفتهمت شنو تقصد ... اخذت نونو الي خبصني بالبچي و رحت ابدله ... ام همسة علمتني شلون البسة و اشطفه ... كعدنا بهذا الهول ... و علي جابلنه **ون و روبة ... اكلنه و رضعت نونو ... علي ما ظل يمنه ساعة بالشارع و ساعة بالطرمة يم ابوه يشتغلون ابو لحيمچي و يساعده ... ابوه هم تفاجىء بينا ... و سأله و حچاله كلشي ... و صار عصبي گله هو احنه بالگوة عايشين هذوله شنو فوگ روسنا و قنعه بس هالليلة ... نفس ما گال لنظيمة ... نمنه و ونونو الله هداه و نام فد جرة جرها للصبح ...و صار الصبح و اجة علي عليه ... گلي زينب ... زينب .. گومي ... صار الصبح ... فتحت عيني و اريد استوعب اني وين ... و هذا منو الگعدني ... ظليت صافنة بوجهه و هو يباوعلي ... گلي شبيج زينب ( عبالك فهمني ... من عيوني ) گلي اني علي ... البارحة جبتكم لهنا ... كومي امي نظيمة رح تگعد و تجي تعيط خاف تأذيكم .... اتذكرت رأساً و كمت لميت الغراض و گعدت خواتي و گعدت اسيل تدردم واني اسكتها و شمة تبچي وحاظنه ربطة امي ... و فز نونو گام يصرخ ... الدنية باردة شلون رح نطلع ... زين وين رح نروح ...؟#اغلال_القدر اخذنه علي و طلعنه من بيته ... و مشينه وراه جانت الدنية باردة و المنطقة طين لان ما مبلطة و قبل يومين ماطرة و الشارع صاير لوصة... كم مرة ردت اوكع و بيدي نونو بس هو لازمني من ايدي و كايد بايده الثانية شمة ... و اسيل ضايجة و تحجي عليه و شايلة الجنط ...و صلنه لمكان هو مو بيت ... لا و لا غرفه ... فد شي ما اعرف شأوصفه ... مساحة مسكفة و مابي باب و لا سياج مفتوح ... گلي هذا مكان چان واحد يظم الحصان مالته هنا هو يبيع غاز ... و بعدين اشو راح ... اني راح اروح اجيب حديد و خشب اسوي منا مثل الباب و فد سد عن الشارع ... گلي هسة اجي اگعدوا هنا ... اني باهتة اباوع شلون رح نگعد هنا و طيانه ... و باردة و علي راح بكل حماس يجيب غراض ... مرة جاب تنكات و فصخهة و جاب جذوع شجر ... و سعف ... و حديد ... و بده يصفط بيهن ... هو مو جبير يمكن عمره ١٥ سنه ... بس عنده همة رياجيل كبار و احسن منهم ...اجتي مرة من الجيران سالتنه انتو مين ..؟ كتلها احنه جيران بيت علي ... شسوي ما اعرف احد ... و اجة رجال هم سأل و راح ... ورة كم ساعةاني وخواتي كاعدين هو اجة كال كملت .. اروح اجيب الكم شموع و اجي لان من تظلم الدنية شلون حتبقون ... راح و اجة ... كلي زينب هاج هذا شمع عدكم جداحة .. ؟كتله لا ... جان يطلع من جيبه باكيت جكاير و و بداخله جداحة ... كتله تشرب جكاير ..؟ كلي اي ليش ما اشرب و عندي نظيمة ... كتله هي مو امك ليش تحجي عليها ..؟گلي اتخسه هي مو امي ... اني امي استشهدت ... كتله وين ..؟ (اني كل بالي اليستشهد بس بالحروب) ... گلي بانفجار ... وزعت الشمع و علكته لان غوربت الدنية ... طلعت فلوس من جيبي و نطيته كتله اريد **ون و لبن .. گلي وهاي شنو ...؟كتله هذني فلوس عمو ابو همسة نطناياها ... گلي اني عندي ما اريد ... ضميها تحتاجيها بغير وكت ......اني سمعت كلامه و ضميتها ... ورة شوية اجة جايب وياه حصيرة و **ون و اللبن .. وگلي هاج هاي فرشيها ونامو عليها .. و اني فد شوية من تنام( هظيمة ) رح اجيبلكم بطانية ... كتله شكراً ... كال ياله اني اروح ... و راح .. تاخر علي و بدة البرد يلعب بينه ... طلعت كل الملابس الي بالجنط و غطيت بيها خواتي و نونو هم ... بس مدتكفي .. ظليت كاعدة اني اخاف اغفى لان المكان بي فتحات خفت تطب بزونه او حشرة او شي و خواتي يخترعن ... الهوا برة عالي و اصوات السياج الي سوا علي هسترتني ...من الخوف كمت ابجي ... بس بصوت ناصي حتى خواتي و نونو لا يكعدون ... وين چنه و ين صفينه ... و اني و على گعدتي غفيت ... و محسيت ... فزيت الصبح لگيت هاااي شنو .. مين هالبطانية ... متغطين ببطانية اظاهر علي اجة بس ملحكت عليه لان نمت ... كعدت اسيل و گالت جوعانة اني .. كتلهة هذا **ون و لبن اكلي .. كالت ما اريد اريد بيض ... كتلهة مين اجيبلج بيض ..؟ ما عدنه طباخ ... كامت تصيح ... كله من وراج انت طلعتينه من بيت ابو همسة و كذبتي و جبتينه لهنا ... شنو هالمكان و شرح ناكل .. اني بوعتلها و سكتت لان حجيها يجوز صح .. و هذا صوچي .. بس ابو همسة سمعته يكلها لام همسة ما اريدهم مسؤوليتهم چبيرة .. يعني هو رح يتخلى عننا شوكت ما چان .. كتلها اسيل انت مو تدرين بابو همسة ميريدنه ... كالت اي مو تجيبنه لهنا ... جان ودانا لبيت خالو رأفت لو خالو شاكر ... كتلها مو دك عليهم و محصلهم ... و شلون يودينه و منندل ...كعدت بالكاع تحجي و تعيط علية ... و خلت نونو يگعد و يصرخ ... زين هذا وين اشطفه ... و شلون انزعه باردة ... شلته دا اسكت بي ... و جان تكعد شمة و اشو هاي تلوب و تصيح بطني ... وجههة اصفر ... وعينها تكلب ... و ماكو على لحظة و جان اتقيئت ...صحت ..: اسيل شوفي شمة ... اسيل جتي عليها ركض وخرت الغطا كلتلها شبيج ... كالت بطني توجعني و نفسي تلعب ... طلعت برة كلت بلكي اشوف علي ... و ماكو ملكيته و نونو صار يصرخ اكثر ... بيت علي مو بعيد علينه بينه و بينهم تقريباً ٥ بيوت و كلها تجاوز و حالتهم حاله ...ظليت واكفه بالباب روحي تلوب اريد احد يشوف شمة شبيهة ... زادت حالتها و تصيح بطني ... و تتقيء بس مديطلع شي .. وصارت تصرخ بطني و بطني .. ونونو صار يبچي اكثر ... واني حايرة .. صحت اسيل.. كتلها الزمي نونو هسة اجي ... گلت اروح اصيح علي ..انطيت نونو لاسيل و ركضت لبيت علي ... لگيت الباب مفتوح ... طبيت جوة و باب الهول هم مفتوح ... بس عربانة ابو علي مال اللحيم ماكو ... اسمع صوت زينب اخت علي ... تبچي و تشهنك بونة ... هي اصغر من شمة تقريباً عمرها اربع سنوات ... دخلت للهول و ظليت اسمع لصوت نظيمة مرت ابو علي .. ترزل بزينب و زينب تعيط ... زاد عياطها و تصيح علي ... علي... تقربت اكثر و نسيت اختي مريضة و من وراها جيت هنا ... مديت راسي للحمام ولگيت نظيمة منحنية على زينب اخت علي بالكع و بيدها سچينه تحميها ع العين الي بالحمام و تحطها على ظهرها و رجلها ... اني شهگت و حطيت ايدي على حلگي حتى لا تسمعني .. بس هي شاف*ني و ركضت وراية تصيح عليه و تغلط ... و طلعت اركض ... انهزمت منها ...و لگيت علي بالطريق ... گلي شبيج زينب ... كتله هااا ... لا لا مابية ... گلي شنو جنتي بيتنه ... كتله لا لا .... اني خفت احجي ... خفت من نظيمة ... گلي رحت شفتج اختج امشي نوديها للمضمد ابو نجوى براس الشارع ...