روح بريئة

الجزء الرابع

دخلت شادية شايلة بوسي ومبسوطة اوى انها لقيتها اول امها ماشافت بوسي مع بنتها الخضة ربطت ل**نها وزود سكوتها ان بوسي او القطة اللي كانت واقفه قدامها في الاوضة اختفت شادية عمالة تتكلم وتحكى لمامتها شوفتي ياماما بوسي من يوم اللي حصل مدخلتش البيت انا لقيتها طالعه واقفالي على رخامة المطبخ مصدقتش نفسي متعرفيش دخلت البيت امتى

في ايه ياماما مالك ساكتة كده ليه وسرحانه انتي حاسه بحاجة اوعى تكونى تعبانة ومش عايزة تقولي ياماما قربت شادية من مامتها وبدائت تمسك ايديها وتحركها وهي بتكلمها في ايه ياامى ردى عليا نزلت بوسي من على ايد شادية وفضلت تقرب من ام طارق واول مالمست بوسي ام طارق اتخضيت وزقيت القطة بعيد عنها وفضلت تقول اعوذ بالله اعوذ بالله اعوذ بكلمات الله التامات من شر ماخلق شادية استغربت واتخضيت في نفس الوقت وصعبت عليها القطة ورجعت شالتها تاني فاقت ام طارق من شرودها وردت على بنتها لا ياشادية مفيش حاجة انا سرحت شواية متخافيش انا كويسة رديت شادية قلقتيني عليكي وقلقتي بوسي وزعلتيها ينفع كده ردت الام معلش حقكم عليا انتى وهي بس ازاي بوسي كانت مش هنا اومال جت ازاي

شادية: اه والله من اخر مرة على السطح وبعدين انتى تعبتي محدش فينا شافها تاني وبصراحة انا مفتكرتهاش خالص ربنا يسامحني بقى تلاقيها كانت ع السطح ونزلت امبارح وسط نقل الكراسي والحاجة وقت العزا يلا بقى انا عملتلك نعناع اشربيه وانا هروح احط اكل لبوسي علشان تلاقيها مكانتش بتاكل وسابت مامتها وقامت مع القطة علشان تأكلها

الام بتكلم نفسها بسم الله الرحمن الرحيم ازاي كانت مش في البيت وهى كانت واقفه معاية اول امبارح وبكلمها مين اللي كانت واقفة معايه دلوقتي سكتت ام طارق وبدائت تعيط رجعت تاني تتكلم ياسحر ياحبيبتي ياقلبي انتى كنتى جايالي تطمنيني عنك صح اكيد دى انتي بتحبي بوسي علشان كده جايالي في صورتها ياحبيبتي يابنتي هستناكى كل يوم وطول اليوم وتعاليلي في الحلم ياسحر فضلت تعيط وقامت غسلت وشها واتوضيت تانى ودخلت تصلي وقعدت تقرا قرأن وقت طويل وشادية فضلت قاعدة مع بوسي تأكلها وتلاعبها كأنها بتواسيها عن فراق صحبتها فات شواية وقت ودخلت تخلى مامتها تاخد الدوا بتاعها واطمنت عليها وقالتلها شادية ياماما افردى جسمك شواية ارتاحى وانا هدخل اجهز الغدا بقى وافقت مامتها وفعلا فردت جسمها على سرير سحر ودخلت شادية المطبخ وقبل عين ام طارق ماتروح في النوم لقيت بوسي نامت في حضنها ابتسمت ام طارق براحة وهدوء وطبطبت على بوسي ونامت وهي في حضنها رجعابو طارق البيت لقى شادية جهزت الغدا ومستنيين طارق يرجع دخل يطمن على مراته لقاها رايحة في النوم وبوسي نايمة جنبها خرج من الاوضه يطمن من شادية على صحة مامتها وطمنته انها كويسة وحكيت اليوم معاهم كان عامل ازاي وقالها باباها انه راح زار سحر وقعد شوايه هناك قرالها قرأن ورجع ع البيت علطول قالها انا هدخل بقى اخد دش واريح شوايه لحد مايرجع طارق وفعلا ده اللي حصل فضلت شادية قاعدة لوحدها مش لاقيه حاجة تعملها ولا حد تتكلم معاه دى حتى القطة نامت دخلت قعدت في اوضة الصالون وجابت كل الصور بتاعتها هى واخواتها وفضلت تتف*ج وتضحك شواية مع مواقف تفتكرها بينهم وتدمع شواية لما تشوف سحر في الصور سمعت صوت المفتاح والباب اتفتح فرحت ان طارق رجع هو الوحيد في البيت اللي بقى صاحبها دخل اطمن عليها وسأل عن مامته وطمنته وقالتله ان بوسي رجعت تانى وفرح بيها اوى هو عارف القطة دى كانت سحر بتحبها ازاي دخل اخد دش وغير هدومه وشادية حضرت الغدا وصحيت باباها ودخل طارق صحى مامته وباس القطة اللي لسة نايمة كأنها طفل صغير

اتجمعوا على الغدا وكل واحد فيهم حكى اللي حصل معاه وطبعا ام طارق مقالتش حوار القطة اللي ظهرتلها مرتين محبيتش حد يقلق لأنها عارفه ان شادية بتخاف وقلقت جوزها يفكرها بتهلوس خلصوا غدا وشربو الشاى سوا وقعدوا يتكلموا عن الحادثة وانهم متفائلين انهم يعرفوا مين اللي عمل كده قريب اتكلموا كتير لحد م العشاء اذن قاموا يصلوا ودخلوا ينامو وطلب طارق من شادية يطلعوا يقعدوا على السطح فرحت شادية لأنها محتاجة تقعد مع حد فاهمها قالها طارق طيب انا هطلع اشوف القاعدة فوق لو محتاجة تتظبط وانتي اعملي اي حاجة تدفينا سحلب ولا حلبة واطلعي بقى اكون خلصت دخلت شادية تشوف بوسي علشان تأكلها قبل ماتطلع لأنها م اكلتش من الصبح لقيتها لسه نايمة هي حاجة غريبة جدا بالنسبالها ده مش الطبيعي بس هي مشغلتش بالها عملت السحلب وطلعت لطارق اللي لقيته قاعد مركز في المكان اللي كانت سحر فيه وعنيه مدمعه صعب عليها منظر اخوها وحاولت تطلعه من الشرود اللي هو فيه وبدائت تتكلم وتحاول تخفف عنه وتهزر رد قالها انا كنت طالع عادى بس لما لقيت بوسي قاعدة في نفس المكان قلبي وجعني

شادية: بوسي مين اللي قاعدة انا سايباها نايمة تحت انت بيتهيألك ولا ايه

طارق: لا والله دى بوسي كانت قاعدة هنا ومشيت لما طبطبت عليها نايمة تحت ازاي

وفجاءة ركزت شادية وطارق على سور السطح

وشادية شاورت على السور طارق الحق بوسي اهى

علشان طارق بذهول يقول سحر .

سحر شايفه بوسى على سور السطح

طارق شايف سحر على نفس السور وكل حد فيهم مصدوم صدمتين اولهم من اللى شايفه قدامه ثانيهم ان ولا شادية شايفه سحر ولا طارق شايف بوسى القطة موقف مرعب بالنسبالهم فعلا وده لأنهم مش بيتخيلوا فعلا سحر بتبص لطارق ومبتسمة وبوسى مركزة مع شادية وبتنونو يعنى الصوت ده مش تهيؤات لكن ازاى كل واحد فيهم شايف حاجه مختلفه شادية ابتديت تعيط من الخوف وتقول لطارق يلا ننزل انا خايفة لكن طارق رفض قالها بس ياشادية انتى عايزانى اسيبها وانزل لا مستحيل ياطارق انا مش شايفه حاجة انا خايفة يلا بينا علشان خاطرى هخاف انزل لواحدى وطارق مركز عنيه على سحر اللى مبتسمة لطارق اللى ابتدا يتحرك ناحية السور وشادية بتنادى عليه وهى بتعيط وخايفه ولسه شايفة بوسى قدامها مركزة معاها اول ماقرب طارق من السور كانت لسه سحر في مكانها ولسه مبتسمه لكن اول ماركز في عنيها حس برعشة مسكت جسمه كله وبقى يتنفض وهو واقف وفجاءة اختفيت سحر من قدامه ومش سامع غير صوت شادية وهى بتتحايل عليه ينزلو اتحرك من مكانه وهو حاسس ان اعصابه كلها مش قادر يتحكم فيها وجسمه بيرتعش وطبيعي شادية حاسة بيه لأنها فى نفس الحالة اول مادخلو البيت هما الاتنين اتوجهوا علطول على اوضة البنات اللى كانت نايمة فيها القطة علشان الرعب يكمل عليهم ويلاقوا بوسى لسه نايمة فعلا حضنت شادية اخوها وابتديت تعيط بصوت مسموع وهو مش قادر يهديها حتى اه راجل واخوها والمفروض يقويها لكن معلش هوا فعلا موقف مرعب ل اي حد يتحط فيه انا بشوف قدامى شخص ميت وقطة نايمة فى البيت ومقفول عليها الباب يعنى حاجة لاتعقل بيطبطب طارق على اخته لكن مش قادر يتكلم ولسه جسمه بيرتعش صحيت مامتهم على صوت عياط شادية واتخضت عليها دخلت وهي بتقولها فى ايه بسم الله مالك يابنتى بتعيطى ليه فى ايه ياولاد مالكم واقفين كده ليه ايه ياولاد حد يرد عليا انتم مش سامعينى هنا صحيت بوسى وجريت على ام طارق ووقفت جنب رجليها تمسح راسها وجسمها فى رجليها وام طارق كل تركيزها مع ولادها اللى حالتهم مش طبيعيه ابتديت بوسى تنونو واول ماسمعتها شادية صرخت وهربت من القطة ورا طارق بعد ماكانت فى حضنه ابتديت امهم تسمى الله وتستعيذ من الشيطان وتكرر سؤالها مالكم خير اهى ياشادية بسم الله الرحمن الرحيم طمنونى شادية قالتلها ياماما شوفنا بوسى ع السطح وهى نايمة هنا احنا والله طالعين وقافلين عليها الباب لقيتها على السطح وانهارت من العياط وبتكلم كلام وتقولها واول مانزلنا دخلنا لقيناها نايمة طبعا ام طارق حصل معاها الموقف ومحبيتش تحكيه قبل كده علشان متخضش ولادها لكن خدت الاتنين في حضنها بتحاول تطمنهم وتهديهم وطارق ساكت مش بيتكلم ابتديت تهدا شادية فى حضن مامتها اللى قالتلهم تعالوا نقعد علشان نعرف نتكلم مشوا معاها وهما ساكتين وخرجوا قعدوا فى الصالون ابتديت تتكلم ام طارق بصوا ياحبايبى علشان ده بيتنا اللى مش هنسيبه هقولكم على حاجة تخلوها اساس حياتكم اولها الصلاة وثانيها القرءان وذكر الله اي حاجه تحصل قدامكم اعتمدوا على الحاجتين دول اسم ربنا هيبعد عنكم اي حاجة مش حلوة غير كده بقى اللى حصل لأختكم ده مش موتة طبيعيه دى جريمة قتل يعنى روح اتعذبت قبل ماترجع لخالقها انتم فاهمين ده معناه ايه معناه ان الروح اللى اتعذبت مش بترتاح فى قبرها غير لما حقها بيرجع انا المفروض مقولش كلام زى ده لأن الله اعلى واعلم بس اهالينا زمان كانوا دايما يقولوا كده ان الروح بتفضل متعلقة فى الدنيا معلش لو بخوفكم او بقول حاجة زى دى لكن دى اختكم يعنى مش حاجه تخوف بالع** ده انتم تفرحو لما تشوفوها ولا تشوفوا حاجة تخصها بطريقة مش طبيعيه او مش متوقعينها هنا قاطع طارق كلام امه وقالها انا شوفتها ياامى قالتله ياطارق انت راجل معقول تبقى خايف اكتر من اختك رد قالها لاء ياامى انا شوفت سحر شوفتها قدامى سحر بضحكتها ووشها الحلو شوفتها ومشوفتش القطة شادية مشافتش سحر ياامى وبداء رعشة جسمه تزيد امه خافت عليه ويمكن من وجع قلبها على بنتها ردها كان غير متوقع بدل ماتحاول تهديه وتطمنه بقيت تقوله يابختك ياطارق بقى كده تزعل من شوفة اختك اخص عليك ده انا بتمنى احلم بيها بس يابنى يابختك بضحكتها وجمال وشها رديت شادية ياامى انتى بتقولى ايه انتى مش خايفه هو انتى عادى كده تشوفى حد ميت عادى كده تشوفى حاجه محدش غيرك شايفها ردت الام لا يابنتى مش عادى بس ربنا مايكتب عليكى وجع قلب ام على ضناها انا اتمنيت انام مكانها فى تربتها وهى اللى تفضل على وش الدنيا اللهم لا اعتراض على حكمك بس بنتى ياشادية حتة مني وحتة من قلبى انتم مش هتحسوا باللى بقوله ده ربنا مايحكمش عليكم تعيشوا وجع زي وجعي ويخليكم ليا اهدوا بقى انا هقوم اعملكم لمون دافى يهد*كم واسهر معاكم لحد ماتنامو دخلت الام المطبخ وبوسى جريت وراها خرج طارق وشادية تانى للاوضة بتاعت شادية وشادية بتكلم طارق وتقوله انا خايفه من بوسى ياطارق مش هعرف انام وهى معايه فى البيت سحر وحشانى وقلبى هيموت عليها لكن انا مش هقدر استحمل اللى ماما قالت عليه ده عارفة ان كلامى ممكن يزعلها لكن اعصابي مش هتستحمل رد عليها طارق وهو لسه مش على طبيعته عارفه ياشادية انا خوفت اوى من عنيها اول مرة فى حياتي اخاف بالشكل ده برغم ان عنيها بطبيعتها لكن النظرة بتاعتها كانت مخيفة اوى والله اول مرة اشوفها كده تفتكرى هى زعلانة مني هو انا السبب ياشادية رديت اخته قالتله ياطارق هو ازاى انت شوفت سحر وانا لا وازاى انا شوفت القطة وانت لا تفتكر سحر زعلانة مني انا كمان علشان انا اللى خليتها تطلع لوحدها الاتنين خايفين وبيسالو بعض اسئلة كتير ومالهاش اجابة مامتهم دخلت شايله العصير وبوسى داخلة وراها شافتها شادية قلبها اتقبض قالتلها ياماما انا اسفه فى اللى هقوله بس انا مش هستحمل بعد اللى حصل اقعد وبوسى موجودة فى البيت معلش انا خايفه بجد رديت الام ايه ياشادية انتى عايزانى اطلع من البيت اكتر حاجه اختك كانت بتحبها كمان مش كفايه هى مشيت انتم ليه مش عايزين تحسوا بيا انا بحاول امسك نفسي علشان خاطركم لكن انا ربنا العالم بيا يابنتى انا مش هخليكي تشوفيها خالص هاخد بوسى اوضتى ومش هطلعهالك برة خالص لكن انا مش هرمى حاجه تخص اختكم حتى لو حتة ورقة وصلوا واقروا قرءان وانتم مش هتلاقو حاجة تخوفكم يلا انا هنام هنا بقى على سرير اختكم لحد ماتنامو اشربوا العصير كده واستهدوا بالله وناموا قبل ماتنام راحت ام طارق دخلت بوسى اوضة نومها وحطيت لها طبقى الاكل بتاعها وخرجت وقفلت الباب وهى بتقولها تصبحي على خير ياقلب امك راحت الاوضة اللى شادية وطارق قاعدين فيها ودخلت السرير علطول وقالتلهم يلا ننام سوا بقى هنا اهو نطمن بعض شربوا العصير وامهم غمضت عنيها لكن مكانتش نايمة شادية نامت فى حضن مامتها وراحت فى النوم وطارق كمان نام معاهم فى نفس الاوضة وسايبين النور شغال