روح بريئة

الجزء التاسع

طبعا مش مصدق ان كل الي شوفته ده كان كابوس وايه سببه ومناسبته الله اعلم ....

(اعوذبالله من الشيطان الرچيم.. الحمد لله.. الحمد لله)

قولت كده وانا بقعد على اقرب كرسي قابلني وببص ناحية السقف اللي طبعًا ماكنش فيه حاجة ولا حتي خدش صغير ، بس فجأة اتخضيت واتنفضت لما لقيت مراتي بتخبط علي كتفي وبتقولي ايه ياطارق مالك في ايه صوتك عالي ليه كنت بتزعق مع مين .

هاه . انا زعقت انا صوتي عالي ليه يا بنتي هو انا مجنون هكلم روحي يعني سمعت بتقول كفايه كده بقي حرام كلهم بيحبوكي مين دي الي كله بيحبها ومين اصلا الي بيحبوها يا طارق انت كنت بتكلم حد ..

سكت وانا مش عارف ارد اقول ايه خايف احكي تقول عليا اتجننت ولا تحكي لحد من اخواتي او ابويا مش عارف بقي اتصرف ازي دبرني يارب انا مش قادر اتحمل الي شوفته ده لوحدي حتي لو كام حلم او كابوس او تهيأوات انا مش جبان ولا عمري كنت بس انا حقيقي خايف بجد اختي سحر الملاك الي كانت البرائه بتنط من وشها ممكن روحها تبقي شريرة ومؤذيه بالشكل ده ... لا مستحيل مش معقول تكون اختي سحر روحها الطاهره تبقي بالمنظر ده او بالقساوة دي .. ايه ده ياطارق أنت بتكلم نفسك كمان ياحبيبي لاااا ياحبيبتي مافيش حاجه روحي صحي بابا وحضري الاكل ... طارق انت مش طبيعي يا بابا لازم دكتور تعالي نروح لدكتور الي كان بيعالج شادية

دكتور ايه بس انتي اتجننتي ولا شايفاني مجنون مثلا ولا بشد شعري ماتهدي كده بدل ما اليوم يقفل عليكي .. لا مش مجنون ولا انا بجر شكل وخلاص بس انت اتغديت معانا من شويه وعمي نزل علي القهوة يفك عن نفسه ويمشي رجله حبه انت فاهم الوحده بقت مسيطره عليه من وقت مامتك ما اتوفت هي وسحر .. اتكلم بسرعه وقالها يعني ايه احنا اعدنا اتغدينا مع بعض وبابا كمان نزل ... اه يابابا مالك في ايه محسسني ان عفريتك الي كان معانا علي السفره ههههههه ... حقيقي بقيت تخوف والله .. اصلا بص لنفسك في المرايا شوف شكلك عامل ازي مبهدل وعرقان وشعرك منعكش كأنك كنت بتتخانق او طالع من سباق جري ... لا مافيش حاجه انا غفلت وانا اعد بس شوفت كابوس فا قمت مخضوص... كابوس يعمل فيك كده طيب يا طارق يمكن بقي عموما انا هنزل اروح لماما عشان تعبانه شويه هطمن عليها وهتشوف حور وهنرجع(كان دلع سحر كانت مامتها بتحب تقولها حور مش سحر مكنتش بتتفائل بالاسم ده هي وافقت عليه عشان خاطر طارق وباباه بس )

بصيت لها وانا بمسح العرق من على جبيني

مافيش حاجه قولتلك انا تمام والله حتي عشان تتأكدي انا هقوم اوصلك كمان ... نعم طارق بيه هيتكرم ويوصلني لحد هناك .. اه فيها ايه يعني مالك مستغربه من كل كلمه كده ليه . لا ابدا هستغرب ليه ودي اصلا اول مره تقولي هوصلك في مكان فا ماليش حق استغرب معلش ... طب يلا ياماما يلا اجهزي وجهزي سحر بدل ما هتقلب بخناقه وهيبقي يوم مش معدي خلينا ننزل احسن ونقصر الشر حاضر يا طارق هروح بس برضه مش مرتاحه لشكلك ده .... يوه بقي هنعيد ونزيد في موضوع مالوش لزوم ... قربت منه وسألته انت ازي مصدق نفسك انه مافيش ازي وانت اول ما قربت منك اتنفضت كان حد هيقبض روحك ...

اتخضيت خضة مش طبيعية، ودلوقتي وشك اصفر وعمال تعرق بشكل غريب، فيك ايه يا طارق قولي يا حبيبي فيك ايه هتخبي عني ده انا مراتك سرك وسترك وغطاك في ايه ريح قلبي انا مش مطمنة

قومت من مكاني وقولتلها وانا بحاول اريحها وانا جوايا بركان من الدموع والصراخ ..

-مافيش حاجة يا حبيبتي . انا بس كنت بحلم حلم وحش او تقدري تقولي كابوس كان غلس شويه بكابوس، كابوس صحيت منه قبل ما تدخلي عليا بثواني. انت كنت سرحان يا طارق مش نايم ازي بقي كابوس مش فاهمه ... لا غفلت شويه قبلها ولما صحيت كنت سرحان بفتكر ايه حصل ... طيب هاه ايه الي حصل احكيلي ومش لازم ننزل ممكن نروح بكره ... محصلش انا مش فاكر بالظبط انا بس حسيت اني مضايق مش اكتر لكن مش عارف من ايه مركزتش ومش هشغل بالي بحلم يعني يلا بقي روحي جهزي نفسك عشان ننزل ... ماشي نعديها المره دي ... هههههههه ماشي ياستي متشكرين لكرم اخلاق حضرتك اتفضلي انجزي ...

ض*بتني على كتفي وهي بتقولي بهزار.. ماشي ياعم

خليك انت كده عمال تحلم بكوابيس ومش مركز معايا وبعدين قولتلك قبل كده ١٠٠ مرة.. بطل تتف*ج على أفلام رعب لوحدك بالليل بعد ما بنام هتدمر صحتك هتتلبس وهتلبسنا معاك واحنا معانا طفله صغيره حرام عليك .... ههههههه مجنونه والله يلا يابت انتي من هنا بقي روحي البسي الا والله اغير رأي وبعدين

زقيتها جوه الأوضة وخرجت بعد شويه وقت معاها حور زي مابتحب تقولها واحنا عمالين نهزر ونضحك، وقتها كان بابا بيرن الجرس بتاع الشقه بيحاول يديني ويديها حريه وخصوصية شويه عشان ماتحسش انها مقيده بوجوده يعني وكنا خلاص نازلين وقبل ما يفتح بالمفتاح كنت فتحتله الباب وجريت عليه سحر وحضنته واخدت منه الحلويات الي من غيرها ممكن ما تدخلهوش باب الشقه الي هي اصلا بتاعته إلي يعتبر احنا ضيوف فيها بس هو علي قلبة زي العسل سلمت عليه وسالنا رايحين فين كده ... قولتله رايح اوصل ام حور عند مامتها عشان تعبانه شويه ... ماشي يابني روحو خلي بالكم من نفسكم اهم حاجه

خد بالك من بنتك ومراتك يا طارق .. حاضر يا بابا اطمن والله.. وبالفعل نزلنا وكان الوضع بدا يهدأ بيني وبين داليا مراتي وبنتي كانت مبسوطه جدا اننا نازلين مع بعض غالبا من اول ما اتجوزنا وخلفنا سحر واحنا مانزلناش مع بعض مرتين تلاته علي بعض احنا ماكناش بنحب بعض اصلا هي مع الوقت حبتني لكن انا بتعامل معاها من باب العشره وانها ام بنتي ووقفت جمبي في أصعب اوقات وبس لكن مشاعر وحب الي بيطلع مني ليها بمثابة المجاملات وهي عارفة ده لكن بتحاول تعمل مش واخده بالها عشان تحافظ علي كرامتها قدامي .. وصلتها عند مامتها ولأول مره من وقت كبير جدا طلعت معاها ازورها عيب ابقي تحت البيت وعارف بتعب مامتها الي هي حماتي وما اطلعش اشوفها خصوصا ان بابا وصاني وانا نازل من غير ماهي تاخد بالها اني اطلع معاها معرفش ليه طلب مني كده بس قولتله حاضر واديته كلمه واتعودت اني ما ارجعش في كلمه نطق بيها ل**ني لو هيحصل ايه وبالفعل قولتلها يلا بينا انا طالع معاكي حرفيا بقت بتتنطط في الشارع شبهه سحر لما بوديها الملاهي مثلا وتبقي مبسوطه لا يا طارق هقلق عليك كده والله مالك فيك ايه يابني انت كويس طيب ولا سخن ولا ايه حكايتك بقي .. مالك يابنتي انتي هبله ولا فيكي ايه علي فكره بدأت اشك انك انتي الي فيكي حاجه مش طبيعيه ايه مامتك تعبانه وانا عرفت وغير كده انا تحت بيتكم يعني لازم وواجب اطلع عيب في حقي ابقي هنا وما اطلعش ولا ايه رايك هاه ..