Madaling araw nilang narating ang isa sa mga daungan sa Negros Occidental. Naroon na rin ang mga sasakyang paglilipatan ng mga kahon na naglalaman ng mga armas at pasabog patungo sa Victorias kung saan sila magkikita ni Governor Ortega.
"Sa tingin ko ay wala naman tayong magiging problema. Maayos at ligtas nating na-i-ship ang mga armas dito sa Bisaya," saad ni Shawn kay Zeus na tuwid na nakatayo sa isang tabi habang tahimik na nagmamasid sa paligid. Para itong isang matapang na mandirigma dahil sa sukbit nitong baril na nasa balikat.
"Mas mainam na maghanda na lang tayo sa mga pangyayaring hindi inaaasahan. Hindi malayong may mga kalaban si Gobernador Ortega na alam kung kailan tayo dadaong. Marahil ay nariyan lang sila sa paligid at nag-aabang nang tamang tiyempo para tayo ay paulanan
