NASA pasilyo na siya nang masalubong niya si Teddy. Kapwa pa sila nagulat.
“Missy, kadarating mo lang ba? Nauna na akong umuwi kanina.”
“K-kanina pa. Gising pa kayo?”
“May binabasa ako sa library kanina. Doon na pala ako naidlip.” Pinagmasdan siya nito. “May problema ka?”
“W-wala.”
“Saan ka pupunta ng ganitong oras?” seryosong tanong nito.
Napalunok siya. Alam niyang hindi siya makakapagsinungaling dito. “Kay Aling Bining. May itatanong sana ako.”
“Sa ganitong dis-oras ng gabi? Hindi ba iyan makapapaghintay ng bukas?”
Nahihiya siyang umiwas ng tingin. “Dinala daw sa ospital ang nanay ko. S-susubukan ko sanang manghiram.”
“Si Aling Bining ang naisip mong lapitan sa halip na ako?”
Napayuko siya. “Nahihiya akong bumale sa inyo.”
Pumalatak ito. “Missy, alam mong hindi ka magdadalawa
