DIS-ORAS ng gabi nang dumating sa ospital si Ico kasama si Tito Al, ang sinasabi nitong manager, ang personal assistant nito at isang babaeng pagkaganda-ganda. Ibinulong sa kanya ni Aling Bining na kaibigan din daw ni Ico iyon at ilang beses na ring naisama sa isla. Halos awtomatiko naman siyang nakaramdaman ng pagseselos. Pero pinigil niya ang kanyang sarili. Ano ba ang karapatan niyang magselos? Hindi naman komo binigyan siya nito ng mga regalo ay puwede na siyang magselos.
Tahimik lang siya sa isang tabi. Si Ico ay tutok sa pakikipag-usap sa tiyo nito. Ni bahagya nga lang silang nabati at ang tiyo agad ang pinansin. Naiintindihan naman iyon ni Missy. At minsan pa ay nais din niyang mahiya sa sarili sa pag-e-expect na siya ang agad papansinin nito gayong makikita naman sa mu
