Maagang tumawid sa bahay nila Cathy ang mga bata para tulungan siya sa mga gawaing bahay. Medyo hirap pa siyang lumakad dahil kumikirot pa ang sugat sa magkabilang tuhod niya kaya inaalalayan pa siya ni Bebang. Wala na sa bahay si Gio noon dahil maaga itong umalis para mamili ng pagkain ng mga nagtatrabaho sa bukid.
“Ate, ano po ang uunahin naming gawin?” agad na tanong ni Toto.
“Ikaw sa mga hayop, Kuya. Marunong ka bang magpakain?” nakangiting tanong niya.
“Opo,” anito na agad na nagtungo sa kamalig para kumuha ng pagkain. Halata talagang labas-pasok na doon ang bata dahil alam na nito kung saan nakalagay ang pagkain ng mga alagang hayop ng lola niya.
“Wow, galing naman! Alam mo agad kung nasaaan ang pagkain, ha?” nangingiting sabi niya.
“Tinutulungan ko po minsan si Lola Sefa na ma
