“HINDI ako ang kalaban dito kaya hindi ka dapat matakot sa akin. Kakampi mo ako rito. Ang kalaban natin ay nasa labas,” pahayag ni Achilles.
“Paano mo nalamang natatakot ako sa iyo? I mean, paano mo nalaman ang iniisip ko?” nagtatakang tanong ni Penelope. Marunong rin bang magbasa ng isip ng tao si Achilles?
“Hindi ba, sinabi ko naman sa iyo na nababasa ko ang nararamdaman mo? Iyong nilalaman ng isip mo ay hinuhulaan ko na lang. Hindi naman kasi ako si Ulysses para mabasa ang isip mo,” paliwanag nito.
“Anong sinabi mo? Anong kinalaman ni Ulysses dito?” Lalo namang ginugulo ni Achilles ang usapan nila. Inilalayo ba nito ang atensyon niya patungo sa ibang bagay?
“Ang mga bampira ay may kakayahang magbasa ng isip ng taong minamahal nila dahil sa mindlink. Hindi ko lubusang mabasa ang n
