Wala na naman akong mapiling disenteng damit, kaya kinuha ko na lang iyong pinakamabahang dress ni Ava. Umabot lang iyon hanggang sa gitna ng mga hita ko. Sana pala ay kumuha rin ako sa mga dress ko.
Hindi ko na tuloy alam kung ako ba talaga ang namili at nag-impake ng mga damit ko o si Fabian? Nangasim ang mukha ko habang pinagmamasdan ang sariling repleksyon mula sa loob ng banyo.
Kulay puting dress iyon, manipis ang self-tie string habang malalim ang pagka-v neck dahilan para sumisilip ang 'di gaano kalaking dibdib ko. Bigla akong nagsisi na inakala kong ito na ang pinakamatinong dress.
Dito na ako nag-ayos. Tuyo na rin ang buhok ko. Hindi pa lang ako makalabas dahil pinag-iisipan ko kung magpapalit pa ba ako ng damit o huwag na lang. Beach naman ito, sakto lang din para sa outfit.
