PINILI NI Ally na kalimutan ang mga dapat niyang alalahanin sa hinaharap. Ang kasalukuyan lang ang meron siya kaya dapat niyang piliin kung saan siya magiging masaya. At masaya siya kung ano man ang meron sa kanila ni Gael ngayon. Maayos ang lahat, hindi muna niya iyon sisirain sa pag-iisip ng mga negatibong bagay.
"Sayaw tayo?" nakangiting baling ni Ally kay Gael habang pinapanood nila sina Gino at Ghia na sumasayaw.
"Huh?" Saglit lang ang pagkagulat ni Gael dahil napalitan agad iyon ng isang ngiti. "Hindi ako tatanggi. Magaling yata ako diyan." Nauna pa itong tumayo at inilahad ang kamay sa kanya.
Agad naman iyong tinanggap ni Ally at tumayo.
"Tamang-tama, turuan mo 'ko."
"Handa ka na ba sa pinakamasayang sayaw ng buhay mo?"
Hindi napigilan ni Ally ang mapahagikhik sa sinabi ni Gae
