Pagsapit nang gabi ay nagtipon-tipon sina Chino at ang mga tauhan niya sa may manggahan kung saan sila kumain kanina. Pinagbigyan kasi niya ang imbitasyon ni Tatay Isko sa kaniya na sumama sa inuman ng mga ito ngayong gabi.
Dahil wala naman siyang gagawin ay pinaunlakan niya ang mga ito. May naggigitara at nagkakantahan sa isang panig ng upuang yari sa kahoy, habang sila naman ni Tatay Isko ay nakangiting nakikinig lang sa mga kasamahan nila.
“Sir, hindi ko alam na nagkita na pala kayong muli ng dati ninyong kasintahan,” maya-maya’y usisa ni Tatay Isko sa kaniya.
Nakaupo sila ngayon sa mahabang upuang yari sa kahoy habang nag-iinom ng gin, ang paboritong inumin ng kaniyang mga tauhan sa farm. Si Mang Isko ang isa sa mga malalapit na taong kaniyang napagsabihan ng kaniyang problema noo
