“BITIWAN mo na ang kamay ng kapatid ko, Mr. Antigua,” sabi ni Dok Kentt nang lumapit ito sa kanila.
Maingat namang binitiwan ni Raiden ang kamay ni Sasha. Ngunit nakatitig pa rin siya sa mukha nito. Kung panaginip lang ang lahat ng ito ay ayaw na niyang magising.
“Halina kayo. Sumabay na kayo sa amin. Magpapadagdag na lang ako ng upuan at mesa para sa inyo,” suhestiyon ni Dok Kentt.
“Ako na ang bahala, dok,” sabad ni Raiden. Bago siya umalis ay tinapunan pa niya ng tingin si Sasha na noon ay patingin-tingin sa paligid.
Pagbalik niya sa kanilang mesa ay napansin niyang may waiter na naglalagay ng plato at kubyertos sa pang-apatang mesa na idinugtong sa pinagkakainan nila .
Babalikan sana niya ang magkakapatid ngunit napansin niyang naglalakad na ang mga ito patungo sa mesa. Mabilis
