Tanghali na ang gising ni Samir kinabukasan. Pagkatapos maligo ay tumuloy siya sa komedor para magkape. Hinahanap ng mga mata niya ang asawa pero tahimik ang paligid. Wala rin ang ingay ng batang naglalaro na nakasanayan niya nang marinig paggising niya.
"Where's Gia?" tanong niya sa katulong.
"Umalis po nang maaga. Pupunta po yata sa opisina at sa puntod ni Sir Benjamin."
"A-ang anak niya?"
"Natutulog pa ho."
Gia doesn't go to BLFC anymore. Nalaman niya iyon sa mga kasambahay at sa sekretarya ni Raji noong araw na kinausap sila ng abogado. Sumagi sa isip niya ang sulat ng ama na iniwan lang niya sa drawer ng dati niyang opisina. Hindi niya pinagkaabalahang buksan iyon matapos niyang marinig ang testamento ng Papa niya kung saan nag-iwan ito ng yaman kay Gia at sa anak nito.
