Nakatitig si Intoy sa kulobot at maputlang mukha ng ama. Pumayapa na ang lahat dahil nakatulog na ito. Ipinatawag niya ang doctor ng ama at ilang minuto lang ay dumating ito. Inasikaso nito ang kanyang ama habang siya naman ay pinuntahan saglit ang asawa. Naabutan niya itong humihikbi at hinahagod naman ni Manang Mila ang likod nito. Pagkakita nito sa kanya ay napatayo ito at sinalubong siya at sa dibdib niya umiyak ng mas malakas. Parang biglang naglaho ang tampuhan nila na umabot na nga ng ilang araw.
"Ang Papa, bakit nagkaganun ang Papa..." Hagolhol ni Yvonne.
"Hush, mahal, huwag ka ng umiyak, makakasama sayo ang masyadong ma stress, huwag ka ng magalala sabi ng doctor niya okay na siya. Progress pa nga daw ang pagkakatumba niya sa wheel chair mahal." malumanay na paliwanag ni Intoy.
