"Oh sh*t! B*wisit siya!" Nagngangalaiti si Wilma habang naghuhugas ng kamay sa ladies room ng coffee shop.
"Hindi naman niya sinasadya, e," saad ni Irish.
"Anong hindi? Sinadya niya na matapon sa suot ko ang milk tea." Pinasadahan nito ang suot na kulay puti na blouse. Nagkulay brown ang kabilang parte niyon dahil sa natapon na milk tea. "Kahit kailan talaga walang hiya ang Giovanni na yan!"
Hindi na nagsalita si Irish. Ayaw na niyang salubungin pa ang galit ng kaibigan. Hindi niya rin kasi maalala kung ano talaga ang nangyari. Napansin niya na lang na nasagi ni Giovanni ang hawak na milktea ni Wilma at natapon iyon sa suot ng bestfriend niya.
"Nakakakinis!" dagdag pa ni Wilma saka kumuha ng tissue. "Ang dami pa namang customer sa labas. Nakakahiya kung lalabas ako sa ganitong ayos."
