MABILIS NA lumipas ang mga araw…
Nasa bungad si Saphira ng kuweba at hinihintay ang pagdating ni Ludgi mula sa isang misyon ng mga ito pero kanina pa siya nagdududa kung sa isang misyon nga nagpunta ang binata. Paano ay hindi naman kasama ang dalawa nitong kapatid. Hindi umalis si Laurens sa kuweba habang si Liam at Kasandra ay mabilis siyang dinala doon kanina pagkatapos ng tanghalian. Nagtataka pa nga siya dahil may kung ano sa kilos ng mga ito. Bigla ding nawala ang dalawa pagkatapos siyang dalhin doon at ipinaubaya nalang kay Laurens. Kung may misyon ang magkakapatid, dapat ay kasama si Laurens pero naroon lang ito at mukhang sinasamahan siya.
Isa pa, malaki-laki na ang kinuhang halaga ng magkakapatid sa huling misyon ng mga ito sa isang bangko sa Kuwatro upang mabawasan na din ang p
