````
Pagkatapos dumalaw ni Mr. Cortes kay Jerome, diretso na siya ng ospital para bantayan ang kanyang anak. Pagdating niya’y wala sa room si Harmony at Caleb, kaya inayos na lang ng ginoo ang mga pinamiling prutas para sa dalaga.
Napatingin siya sa kaibigan ng kanyang anak na hanggang ngayon wala pa ring malay. Si Maricar ang medyo napuruhan dahil siya yung driver, nagpapasalamat pa rin sila dahil kahit papaano ay ligtas ang dalawang dalaga.
Pumasok ang doktor at dalawang nars, dahilan para lumingon sa kanila si Mr. Cortes. Dahil wala pa ring malay si Maricar at walang nakikitang senyales ng paggising, susuriin nila ito para malaman kung ano ang kalagayan niya.
“Nandito ka pala Mr. Cortes, nasa hardin sila Caleb at Harmony nagpapahangin.” Nakangiting sabi ng matandang dalaga sa kanya.
