HANGGANG maaari, iniiwasan ni Alana na isipin ang anumang bagay tungkol kay Sally. Mas gusto sana niyang ibuhos ang buong pansin sa kanyang nahihimbing na katawan, kung paano siya makakabalik doon at kung paano magigising. Pero hindi ibig sabihin niyon, kinalimutan na niya ang lahat ng tungkol sa babaeng dahilan kung bakit nakaratay siya at nahihimbing sa loob ng mahabang panahon.
Wala siyang gaanong alam kung ano-ano ang mga hakbang na ginawa o ginagawa para maparusahan ang babaeng misyon na sa buhay na gawing miserable ang buhay ng iba. Hindi naman kasi ipinapaalam sa kanya nina Blu at Ma’am Bernadette. Sa likod ng kanyang isip, alam niya na may mga kumikilos. May pagkakataon na umaasa siya na sana, naparusahan na si Sally sa lahat ng kasamaang nagawa nito hindi lang sa kanya. Nahihili
